Lalnuntawma Fanai
Mahni hnam zia \han harh pui zawnga harh chhuah hi hmasawnna fing leh khawvel pawhin an intih hmuh mek a ni a, hnam zia kalsan zawnga changkan hi hnam pawi khawih zawnga finna chi khat a ni. Faraw-a fanu a fapaa vuah aia Pathian mite nena tihduhdah tuar thlangtu Mosia kha nationalist ropui lutuk leh kan entawn tur pa a tling. Mahni hnam ziaa Pathian chawimawi pawimawhna sawifiah nan hengte hi han thailang hmasa hlek teh ang.
Kan pi pute kum 1300-1450 inkara Run leh Thantlanga an chen laia hla chhuak tlar hnih zai te, kum 1450-1700 inkara a chhuak tlar thum zai te, \iau an kan hnu kum 1700-1890 inkara mimal hming chawia hlate kha thluk kham phei, ri sang leh ri hniam lai pawh inhlat lo, sak hahdam tak a ni a. Khatia, chanchin\ha a lo en rual chiah khan kan missionary hmasa te hla phuah leh lehlinte chu thluk khawng, sak hahthlak leh \ang at a ni ta a. A \hente chu Solfa note 8 leh octave khat pelte an nih tak avangin he hla thluk chi hnih hi chanchin\ha en rual chiahin Mizo khawtualah a insual \an ta a. Awpbeha kan mi hmasate an awm avangin Mizo hla thluk leh khuangte chu hnualsuat a ni ta a. Kum 1984 khan missionary te \hut chilh Mission Veng leh Serkawn biak inah phei chuan khuang hi an lalut ta chauh niin ziaktu tam tak chuan an ziak hlawm a, Rev. Lalsawma erawh chuan,“ Kum 1950 khan Mission veng biak inah khuang hi an lalut daih tawh a, pen thum lam hmangin Kristian hla sakna’n an hmang a, hemi kum vek hian Durtlang lamah pawh an lo lalut ve bawk a ni” a ti thung.
Missionary ten Welsh Presbyterian Mission Board-a kumtin an rawngbawl dan report an thawn \hinah pawh Mizorama harhna chungchang hi an sawi tam ngai lo hle a, khuang phei chu a lang sar lo viau mai. Kum 1930 a Kristian hla thar bu tihchhuah \um pawhin Assembly moderator EL Mendus chuan, "Khawvela mi thianghlim ber berte hla phuah, hlabu hluia chuang hmangin heng hla thar phuahtute hian an phuah chhuah ve a ni tih hi hriat reng tur a ni" tiin a ziak nghe nghe a. Pu JM Loyd-a’n Gospel centenary lawmnan a Mizo kohhran chanchin a ziahah chuan centenary symbol ropui lutuk khuang kha a fak aiin a sawisel mah zawk a. Sap missionary te khan an kut chhuak hlate ai khan Mizo hlate kha kan ngaihsan an hlau hle tih a lang a. An zingah khan Mizo hnamzia hre thiam taka min Kristian pui chakte chu an hotute khan hnawk an ti hma hle \hin an la ti lehzel bawk.
Hetiang rilru min put khum lai mek hian Mizote Pathian nung chuan Amah chawimawina atana kan hnam ziaa min tuh Lengkhawm hla chu min kaihthawh sak ta tho tho a. Kum 1913 khan Pastor Liangkhaia chuan sap hla, “Sing of sing, wonders story” tih hla thluk a\anga lak ,“Thu mak ka sawi nin theih loh chu” tih leh “Thisen hlu thisen hlu” tih hla leh Thanga’n “Aw Lalpa chungnung ber kan fak hle a che” tih hla a phuah ta a. Heta \ang hian Mizote rilrem zawng hla thluk nawrchep a awm mek chu kaihthawhin a awm \an ta a ni. Kum 1919 a harhna \um thumnaah chuan Mizo lengkhawm hla thar, Mizo lunglen zawnga sak chite chu Patea, CZ Huala, RL Kamlala, Saihnuna, Chawngkhupa, Suakliana leh midangte kaltlangin Pathianin min pe ta a. CZ Huala chuan “Tonic solfa hmangin a thlukte hi kan din hlawm a, amaherawhchu, mipuiin an han sak khan an lunglen remin an tidanglam ta ni berin ka hria, kan phuah pawh a ni lo, mipui lunglengin an siam a ni ber e” a ti a, a dik thawkhat viauin a rinawm.
Dodalna avanga hun rei tak chhung Mizo rilrem zawng hla sa thei tawh lo Mizo Kristiante chuan “Ni ropui a lo thleng dawn ta”, “Misual ka ni Lalpa min ngaidam rawh”,“Aw khawngaihtu Pathianin” tih leh hla dangte sain ram pum huapin an lam ta hup hup mai a. Kum 1919, October thlaa Lungrang khuaa Baptist Kohhran inkhawmpui an neih \uma Pastor Liangkhaia’n “Pathian hmangaihna leh Kraws thu” tih thupui hmanga thuchah a sawi lai phei chuan mipuite chu an \ap ta mur mur mai a. Hlim em emin,“Aw ka thlarau chu tlangah chuan… I Lalpa kross lera awm chu; Nungin i va hmu ang a” tih an sak lai chuan a hmaa khuang leh Mizo hla thluk hnawltute zing ami Pu Buanga meuh pawh a insum zo ta lo, awrawl chhuah meuha \apin, “He ka pheikhawk ngei hian Kalvary tlang vaivut a lo rap tawh a, mahse Lungrang pulpit bulah ngei hian Kalvary tlang a lo hnai ber e,” tiin a au chhuak ta hial a ni. Hriatna leh thiamna khawvela min hung chhuaktu sap missionary te kha an hlut em em rual khan an kaihhruai Mizo ring tharte nena Zo zai leh khuang an hup beh tlatna chhan kha an sual vang leh Pathian thu an pawm dan a dik loh vang ni lova. An hnam nunphung tung ding chunga ram thar lak an tumna (imperialism) an nunpui tlat vang a ni. An culture-ah min hruai luh tumin an meng kar a, sap culture a\anga Kristian chungin a kawi a ngilin an thu zawm a \ul a, Kristian a min siamna phena rilru lam thlenga ram an lak dan hi \hangtharte hian kan man fuh a hun ta. He rilru hi darthlalangah hmangin kan Mizo missionary-te pawh hian sap Isua aiah Mizo Isua chanchin sawi ve tawhse a va ropui dawn tehlul em.
Mahni hnam zia a Pathian chawimawi kawngah kan harh tlai chhan hi rilru lama sap awpbehna vang niin a lang, kan pi pute dinhmun ngaihtuahin a awm viau mai, dik pawh a dik ang.Pastor Liangkhaia pawhin kum tun tlaikhawhnu kum1973 khan a lo sawi chhuak ve chauh a nih kha. Rev Z.T.Sangkhuma’n ,“Mahni hnam zia ni lova mi hnam ziaa chanchin\ha dawn leh Pathian biak chu hlimna leh lawmna sosang fu \hin mah se, thlarau lam leh rinna kawngah thukna a nei lova, pawnlawi te a Kristianna, thlarau lam thilte pawh incheina ang leka hmanna a ni” a tih te, Darchhawna’n,“Mizote chuan solfa hla rem tluk tluk a\angin kan Pathian kan pawh zo tak tak lo ve, kan lengkhawm zai, keimahni thluk ngeia kan zai hian kan hlimin Pathian pawh kan pawl hma ber nge nge fo” a tihte leh ATC Vice Principal Rev Dr Vanlalchhuanawma’n, “Pathian fakna’n kan lengkhawm hlate hi \halaiten sakna chang an hriat hunah chuan kan Pathian mai ni lo, a satu \halaite ngei pawh hi an lawm ngawt ang” tia an lo sawite hi a pawmawm viau asin, i ngaihtuah zui ang u hmiang.
Solfa hla ropui tak takte hi hnualsuat lovin Pathian faknan i sa zel ang u. Amaherawh chu, hnam dang tihdana Pathian fakna kan lakluh zawng zawng hi chintawk neia kan kalpui thiam lo a nih vaih chuan Pathianin incheina a en lo, thinlung lam a en zawk ti a, jeans kekawr mawng tawt, T-Shirt leh nula kawrawm zau ha chunga Vanapa Hall-a tuten emaw an rik pui hluai ang kha a luanluhna tur khur tawp chu a ni mai. Tirhkoh Paula'n engtin nge a sawi kha, ‘Inbel lutuk lovin, thuam inchawih tawkin inchei sela, sam phiarin emaw, rangkachakin emaw, tuikeplungin emaw, puan man tam tak taktein emaw inchei lovin’ (I Tim. 2 : 9) tia a sawi kha Kristian \halaite hian kan inenfiahnan kan hman fo a \ul.
Kan hnam nunphung, incheina leh hnam ziarang, Kristianna nena inhmeh chin, Isua Krista duhzawng nena inhnerem thlapte hi Kristian \halaite hian kan nunpui ngam a hun ta? Pathianin min pek Mizo lengkhawm hla ropui tak tak K|P huanga nasa zawka seng lut tur hian eng nge min daltu ni ta ang le? Harhna a thlen apianga Mizote hlimpui ber lengkhawm hla hmanga \halaiten nasa zawka Pathian kan pawlna tur dal zawng hian Setana hian \halaite hi lang lo lamah min bei a ni mai lo maw? |halai inkhawma lengkhawm hla sak tur kan thlan avanga \hing nih kan hlauh tlatna chhan hi thlarau sualin thiam taka kan mihrinnna rilru min awpbeh sak vang a ni thei em? Lo ni ta se Pathian tana \hing ngam nih kan inzirtir ang hian hawh u i \hing ngam chhin ang u hmiang, chutih hunah chuan \halaiteah hian tun aia nasa zawk hian Pathian thlarau hi a lo che chhuakin ka ring tlat.
K|P Gen. Conference Hla buah hian lengkhawm hla tlem a zawng seng luh a ni \hin a, Mizo lengkhawm hla pakhat tal tel lo hian K|P General Conference hla bu te hi kan siam palh ang tih mawlh mai hi ka lo hlau \hin a, lawmawm ka ti \hin. Khuang hniha sak chi Mizo Lengkhawm hla, Pathianin Mizote min pek dan hlutzia hi \halaite’n kan varpawh hunah chuan kan la \ah pui nasa khawp ang. “Engkim thaw thei tawh phawt chuan Lalpa chu fak rawh se,” a tih angin kan lengkhawm hlate hi rimawi chi hrang hrang nen Pathian chawimawi nan kan puala kan inkhawm hunah pawh sa ve mai tur kan ni dawn lo’m ni? Ngaihtuah zui teh ang u.
‘Hawh u, Zo hnamah i chiang ang u,’ kan tih hian pi pute khawvela kir leh turin kan insawm tihna a ni lova, khawvel hnam dangte tihdan mawi leh \ha te i do ang u kan tihna a ni hek lo. Khawvel lehlama miten an kalna apianga an hnam ziarang leh nun phung huai taka nunpui chunga ram lak a, hnamdangte hneh an tum tlat ang hian Mizo rilrem zawng hla ropui tak taka mite kaltlanga Pathianin min pek, a phuahtute pawhin ka phuah tih aia Pathian min pek tia an sawi \hin Mizo lengkhawm hla hla ropui tak takte hi Kristian \halaite hian Pathian chawimawi nan tun aia nasa hian i sa zel teh ang u, hei hi Zo hnam ziaa amah kan chawimawina hmanraw pawimawh tak a ni si a. He ram a\ang ngei hian Zo hnam ziaa Pathian chibai buk chung zelin chatuan khawvar chu i nghak phawt mai teh ang u.
(He article hi chanchinbu hran hrang- The Aizawl Post, The Zozam Times, Evening Post, Zoram Today leh hmun dang dangah a chhuak tawh a. Kum 2010 March thla Kristian Thalai chanchinbu-ah pawh tihchhuah a ni bawk- Author)