Mizote tana Mizo tawng pawimawhna

Enid H. Lalrammuani

Assistant Professor

Department of Mizo

Pachhunga UniversityCollege 

Thlahtu thuhmun leh tobul hmunkhatte hi ‘hnam’ tia sawi an ni a, pianpui thil leh inthlahchhawnnain a ken tel a nih avangin danglama hloh mai theih niin a lang lem lo. Hnam nunphung leh zia (culture) te, tawng te erawh hi chu pianpui leh inthlahchhawn thil ni lovin kan zir chawp leh neih chawp, kan chhehvela kan chenpuite atanga kan zir leh kan thanlenpui a ni ve thung. Chung culture leh tawng hrang hrangte chu hnam hrang hrangte humhalh a, phuar khawmtu leh tipumkhattu an ni a, vawn hima chhawm nun zel ngai leh inzirtira inhlanchhawn zel thin a ni.

Culture hi a inthlak danglam reng a, eng hnam leh ram culture mah hi pawlhsawp loh leh  danglam lo tak tak a awm ta lo. Zirna, thiamna leh hmasawnna chi hrang hrangin mihring khawsak leh nunphung a tidanglam a, chung finna leh hriatna kan chhar belh zelte avang chuan kan culture pawh a inher danglam ve zel thin a ni. Hmanlai kan pi leh pute hun laia Mizo culture kha tunlai mite tana chhawm zel theih loh thil tam tak a awm thei ang a, chutih rual chuan chhawm nuna inzirtir ngei ngei tur Mizo nunphung leh ze tha tam tak a awm bawk. Pasaltha ngaihsanna kan la chhawm zel a, pasaltha leh huaisen kan tehna erawh a danglam ta hle thung a, tlawmngaihna kan la vawng nung zel a, a lan chhuahna hmun leh lan chhuahtir dan erawh a inang vek thei ta lo. Kan nun khaw chhuah theih nana kan mamawh leh kan hmanrua azir zelin kan nunphung leh mizia (culture) a inher danglam thin niin a lang.

Tu hnam leh eng ram mah hi mahni chauhva mal din thei kan awm ta lo. Mahni hnam dan leh nunphung la thlak danglam lo leh khawvel hmasawnna hrang hrang laka la inthiarfihlim theite pawh hi engtik hunah emaw chuan loh theih loha an insiam rem a tul hun a lo la thleng ngeiin a rinawm. Khawvel hian culture intawm (global culture) a pawm tan mek a, hei hi hmasawnna hrang hrangin min luh chhuah tak avang te, kan inmamawh tawn avang te leh thiamna leh finnain min hrut rual chhoh mek avang te a ni. Global culture chuan khawvel pum huap tawng (global language - english) a rawn hring chhhuak bawk a. Thiamna leh hmasawnna dodal zawnga culture humhalh tum chu thil finthlak loh leh tihchi loh tak a nih bawk si avangin engtia lo hmachhawn tur nge ni tih hriat thiam a har hle thin.

Mihring hi hmasawn zel thei leh hmasawn zel tum tlat kan nih avangin global culture hi lo hnualsuat ngawt tur niin a lang lo. Amaherawhchu hnam anga kan din khaw chhuah theihna tur kawng erawh kan ngaihtuah a tul ta hle mai. Hmanlai Mizo culture leh tunlai Mizo culture chu kawng tam takah a danglam tawh hle a, khawvel tukverhah dakin hnam dang nun dan leh hawiher pawh kan tawmpui thiam ta deuh vek mai. Kan culture danglam mek hi hmasawnna vang ni bawk mah sela, Mizo hnam zia leh nunphung chi hrang hrangte vawng him tura theihtawp kan chhuah loh chuan keini aia fing leh kan ngaihsante nunphungin a siam global culture hian kan thalaite min lem zawhsak ang a, ze bil leh ze nghet (culture) nei lo Mizo hnam dinhmun tur chu chhut ngam pawh a ni lo ang.  Kan ram leilung hi kan humhalh a ngai a, hnam dangin min chimral mai loh nan kan inven a tul a, kan hnam zia leh nunphung pawh chhawm nun zel a ngai bawk. Culture hloh tawh hnam tan inpumkhatna a awm tak tak thei lo va, nunphung leh ngaih dan hlawm khat a awm theih nan culture vawn nun a ngai a, chutianga culture humhalh theitu pawimawh tak chu tawng (language) hi a ni.

Hnam min phuar khawmtu ber chu tawng hi a ni a. Hming te, ram te, hnam dan te leh thil dang dangte pawh hi an pawimawh hle nachungin, min phuar khawmtu ropui ber chu tawng hi a ni.^[1] Hnam fing zawk leh chak zawkte kara kan nun khaw chhuah ve theihna awmchhun chu hnam thinlung nghet tak kan neih hi a ni. Chumi siam theitu pawimawh tak chu tawng hi a ni. Mizote pawh hian hnam rilru kan put tak nachhan pawimawh tak pakhat chu tawng khat – tawng inhman tawm theih (lingua franca) kan neih tak vang niin a ngaih theih. Khawvelah hian hnam tenau leh chak lo zawk tam tak awpbeha chimral an lo ni fo tawh a, a chhan ber pawh anmahni aia culture chak leh hmasawn tawhten an luhchilh a, chu chuan an hnam nunphung leh khawsak dan a her danglam zo va, an tawng a fan chhuah hnuah phei chuan inpumkhat leh tura beih let a lo har tawh a, a chak leh lian zawk culture-ah an inchhunglut zo ta thin a ni.

Culture tih hian a huam zauvin mihring nunphung chi hrang hrang, tawng thleng hian culture huang chhunga khung luh vek theih a nih avangin tawng hi culture ze peng pakhat ni maiin a ngaih theih a. Tawng pawh hi culture thuhmun neite inbiak pawh tawnna a nih bawk si avangin culture hian tawng a hring chhuak nia ngai an awm a, chutih laiin tawng khat hmangte hian nunphung leh ze inang an nei ta zawka ngai pawh an awm ve bawk. Heng ngaih dan hrang hrang atanga chiang taka lo lang ta chu culture leh tawng hi a inkungkaih tlat tih hi a ni. Tawng hi mihringte inbiak pawh tawnna a nih mai piah lamah hian hnam zia leh nunphung tam tak a keng tel a, kan ngaihtuahna pawh thui tak a tarlangin a kaihruai bawk a ni. Tawng phenah hian culture a awm zel a ni.

Hnam ral mai loh nan culture vawn nun a ngai a, culture a nun reng theih nan tawng humhalh a ngai bawk. Tawng hloh tawh hnam ding chhuak sawi tur an awm lo va, culture leh tawng hi a inzawm tlat vang a ni. Tawng (language)-ah hian hnam nunphung leh zia tam tak a inphum tlat a. Tawng danga leh chhuah theih loh a awmzia hrilhfiah ngai thu kan nei nual mai. Entirnan – 'Tlawmngaihna' tih thumal hi Mizo thinlungah chuan hrilhfiah lehchuan ngai lova chiang, Mizo ze chhuanawm tak a ni a, tawng danga lehlin dawn erawh chuan a awmzia hrilhfiah fe a ngai tawh thin. 'Mizopa' han tih mai pawh hian Mizo a nihna mai bakah a mizia leh rilru puthmang a tarlang tel nghal bawk.

  

Culture inher danglam rualin tawng pawh a danglam ve nghal zel a, hmasawnna chi hrang hrang avangin tawng thar a lo piang zel a. Kristian sakhua avangin tawng thar tam tak kan neih belh a, eizawnna leh hnathawh dan hmang (work culture) danglam zelin tawng thar a hring chhuak zel bawk a. Kan in leh lo, hmanrua leh thil neih hrang hrangte, zirna leh thiamna, hmasawnna chi hrang hrangtein tawng nasa takin a her danglam a. Heng hian thumal thar tam tak a hrin chhuah avang te, hnam dang tawng tam tak her rema Mizo tawnga kan seng luh tak te avangin tawng tihausatu pawimawh tak an ni.

Kan tawng neih sa tichhe zawnga Mizo culture inher mek pawh hi hmuh hmaih chi a ni lo vang. Khawthlang nun leh tawng ngaihsannain min tuam nasa telh telh a, sap tawng thiam kan ngaisang a, Mizo tawng thiam loh erawh intih theih nan kan hmang ta lek lek mai. Pawl sawmpahnih zirlai lehkhathiam thei tak, Mizo subject a fail avanga compartment exam ngai ta chanchin chu a laichin hnai tak pakhat chuan chhuang angreng takin min hrilh a ni. College zirlaite zingah pawh Mizo tawng sipel ziah dik loh pawi ti miah lo, thiam pawh tum chuang lo an tam hle bawk. Mahni hnam thil ngaihnepna leh hnualsuatna hi hnam tenaute nuai chimittu a ni fo. Mizo culture humhalh nana pawimawh tak mai chu mahni culture ngaihsanna leh ngaihhlutna (ethnocentrism) leh mahni tawng (language) pawimawhzia inzirtir hi a ni. Hmasawnna kawng zawh thei lo khawpa hnam bing rilru put chu a tha hauh lo vang a, khawvel pum culture-a kan hnam a pil bo mai loh nan leh inpumkhat nan erawh thil tul tak a ni thung.

French linguist Claude Hagege-a chuan, “Tawng hi thumal awm khawm satliah ni mai lovin, nunna nei, culture siamtu thil hrang hrang suih zawmtu leh awi nungtu a ni a, tawng a thih rualin a chenna culture pawh a bo ve nghal thin,” tiin a sawi.^[2] Tawng leh culture hi nunna nei, damkhaw chhuah nana inmamawh tawn leh inchawm tawn an lo ni tihna a ni thei ang. Tawng a thih chuan culture a boral ve nghal a, culture-in a chakna a hloh chuan tawng pawh a pachhe tial tial dawn tihna a ni. US linguist lar tak pakhat chuan kum 2100 a lo her chhuah meuh chuan khawvel tawng zaa sawmkua hi chu hman an ni tawh dawn lo niin a lo sawi ve bawk.^[3]

Hnam rilru siamtu lian tak chu tawng hi a ni. Pawn lama hmuh theiha lo lang chhuak hnam nunphung leh zia zawng zawng hi thinlung lama intan a ni. Mi tupawh hnam dang nena inchiahpiah lutuk vanga mahni hnam tawng hre lo khawpa a awm chuan, hnam rilru a nei nep thin a, a hloh hlauh thei bawk.^[4] Culture hian rilru chhungril ber atanga pawn lam lang theia kan nunphung zawng zawng a huam a, chumi humhalhna atana pawimawh tak chu tawng hi a ni. Tawng pawimawhna leh hlutna hi chhungkua atanga kan inzirtir a ngai a, mahni hnam tawng thlir dan dik lo – thing tihna leh ngaihnepna, tunlai khawvela tangkai lo leh hlutna nei lo  anga ngaihna hi a reh theih nan theihtawp kan chhuah a ngai a. Nu leh pa, zirtirtu leh rual u zawkte hian Mizo hnam hma lam hun thui tak thlir chungin kan tu leh fate hnenah hian Mizo tawng hlutna kan zirtir a tul hle a, chu chu hnam anga kan dam khaw chhuah theihna tura pawimawh tak a ni si a. Bible pawhin, “Naupang chu a kalna awm kawngah chuan zirtir ula, a upat hun thleng pawhin a thlah lo vang,”^[5] a lo ti diam tawh a. Mizo hnam hmakhua chu vawiina puitlingte kutah hian thu itak a innghat tihna a ni thei ang.

[1] Chhangte, Ralluaii: Mizo tawng chikna, p-1.

[2] https://www.google.co.in/search?q=news.bbs.co.uk,BBs-Today-The+death+of+language

[3] https://www.google.co.in/search?q=news.bbs.co.uk,BBs-Today-The+death+of   +language
[4] Chhangte, Ralluaii: Mizo tawng chikna, p-1.

[5] Pathian Lehkhabu Thianghlim, Thufingte 22:6.

-The MIZO Vol.II No.2 (October, 2014)