Kan mamawh inngaihtlawmna

F. Vanlalrochana

Kan mamawh inngaihtlawmna

(Johana 3:30, Luka 14:7-11)

Ringtu mimal theuh leh a bikin rawngbawltute hian kan mamawh chu inngaihtlawmna a ni. He kum tharah hian inngaihtlawmna nena nun hmanga, rawngbawl turin i inbuatsaih ang u.

Lal Isua khan entirna tha deuh mai a sawi a. Zanriah buatsaihnaah hian, mi sawm zahawm ve tak a lo kal a, thuthmun tha takah a thu a, mahse, a mah aia zahawm leh mi lian zawk a lo kal a, a thut hmun chu sawn tura ngen a ni ta a. Thil zahthlak tak a lo tawng ta a ni. Khami, insawn tura ngen kha a lo luh tir kha, a langsar lo leh thuthmun tha lo laiah lo thu nise chu thuthmun tha zawka thu tura ngen a ni ngei dawn a. Chu chu a zahawm leh hle thung si a ni. Chutiang tur chuan lo in ngaitlawm se chu, zahawmna a hlawh chhuah belh zawk sauh dawn a lo ni. "Ani chu tlatlum tur a ni a, kei erawh chu lang tur ka ni" titu Baptistu Johna pawh tun thlengin kan la ngaisang a, Lal te hlauh leh zah pawh a hlawh a nih kha.

Mihring hian lian intih a awl a, rawngbawlnaah pawh hian niawma inhriatte pawh hi a awm fo a. Ropuia in ngaih hi a awm thin a ni. Setana pawh kha, Vantirhkoh chungnung ber a ni thin a, a chapona avangin a lo tla chhe ta a ni tiin an sawi thin a ni. Pathian ringtute tana tha lo leh hlauhawm em em chu chapona a ni.

Khawvela mi ropui ber ber te hi mi in ngaitlawm ber ber te an ni fo. Tun lai khawvela mi ropui berte zinga mi Nelson Mandela te hi mihring inngaitlawm ber a ni ang ti hialin an sawi thin. George Washington-a te, Abraham Lincoln-a te pawh kha, Pathian ropuina hmaah chuan an tlawm zia an inhmu a, Pathian hmaa thingthiin A kaihhruaina an dil thin. Mihring mihringnaah pawh mi in ngaitlawm an ni bawk a, Hruaitu ropui tak an ni thei a ni.

Thuziaktu ropui Thomas hardy pawh kha, a hmingthan vanglai ber khan, chanchinbu te hian a thuziah vangin pawisa tam tak an pe thin a. Engemaw chang chuan, a thuziak leh hlaphuah te kha Chanchinbu Editorte hnena a thawn hian, Envelope ruak, a ma hming leh address inziahna sa, Stamp inbelsa thlap hi a thawn tel thin a; a thuziak chu Editor ten an lo chhuah duhloh hlauh chuan an thawn kir lehna turin a ti a ni. A ropui vanglai ber pawhin a kutchhuak chu an chhuah duhlo mai ang ti khawpin a inngaitlawm a ni.

Inngaihtlawmna hi zir theih a ni a, nitina beih ngaite pawh a ni hial zawk awm e. Engtin nge kan inngaihtlawm zel theih ang?

1. Inngaitlawma, chuta awm chhun zawm tur chuan thil nihna tak kan hmuh thiam a ngai a ni. Engang pawhin thil hre zauin hre tam ila, kan hriat loh hi a la tam zawk fe a ni. Thil tam tak kan han niin kan han nei thei a, mahse, kan thlen theih chin hi tlem te tak tak a lo ni zawk. Mi rpui leh pawimawh takah kan inngai a ni thei e, Thihnain min la bo se emaw, kan hna atang chawl ila emaw, nun leh hna chu a dan pangai rengin a la kal zel dawn a ni. Inchhuang thei kan awm lo a ni. Rawngbawlna chanvo pawh hi, keini lo ti tur an tam. Mihring an awmloh pawhin, thilnung lo pawh a hmang mai dawn tih Pathian ngeiin a sawi. Chuvangin, Pathian khawngaihna vanga thil kan tih, kan nih leh kan neih, kan chante hi kan chapo pui a thiang lo a, kan ta lah a ni heklo tih kan hriat angai.

2. Thil thiam tak leh thei tak kan ni thei e, kan aia thei an lo awm zel mai. chungte nen chuan han inkhaikhin ila. Mi tam tak chuan an aia thiam an hmuh leh hriatin an inthlahrunga an zak ngawih ngawih thin a ni. Musician tam takin vantlang hmuha rimawi tum an sim thak fo.Solomona meuh pawh a ropuina zawng zawng nena a inthuam pawhin, ram tuktin par tluka chei a ni lo a nih kha. Lalpa ropuina hmaah mahni han in en ila, a thianghlimna ropui taka han inthlir ila, kan chapo te chu a lo lum bo anga, kan induhtawkna te pawh a lo reh ang. Aigupta ropuina leh finna zawng zawng zir zo vektu Mosia pawh kha, Pathianin tirhchhuah a tum lai khan, a hnial ngang ngang reng a. Pathian thin ti ur khawpin Pathian kha a hnial a ni. A chhan chu, Lalpa ropuina enga amah a inhmuh vang a ni.

Mi tam takin kan zai ngaithla chakin mual zau puiah min nghak a ni thei e, kan nui hmel ringawtah tlangval sang tam an buai a ni thei e, kan hming kan ziah hnan zauhin cheng nuiah tam tak sem darh a ni fo thei e, eng pawh nise, engang pawhin ropuiin, lianin, sang mah ila, kan ropuina ber niah pawh misual, khawngaihnaa chhandam kan ni.

Kumtharah hian inngaitlawm leh thuhnuairawlhin i nungin rawng i bawl ang u. Chu chu Lal Isuan, bat tura nin tih, a nghawng kawl chu a ni a. Chumi kan bah chuan, eng pawh phur ila, a nuamin a zang dawn a ni, chu chu kan thlarau chawlhna tur pawh a ni;Amah ngeiin chu chu a sawi a nih kha. (Matthaia 11:28-30)