Kan hnam culture hi chawisang zel ila

Reuben Lalnunthara Hnamte

Khawvel hnam tin hian hnam culture (hnam nunphung) kan nei vek a; Mizo pawh hian kan pi pu aṭang tawhin hnam tih dan phung kan nei ṭha hle. India ramah hian hnam hrang tam tak kan awm a, chungte chuan India mi ni tho mah se, culture hran an nei vek bawk. Hnam culture kan tih hi keimahni phuah chawp mai ni lovin, Pathianin a min lo din dan a ni miau mai a, a hluin a ropui hle. Tunlai hunah kan hnam nunphung hre lo fe fe ṭhalaite zingah an tam tawh hle mai a; a bik takin vairama awmte zingah a hluar zual emaw tih tur a ni. Mahse, YMA leh sorkarin nasa takin ṭan an han la a, tunah hi chuan zia lam chu a pan ta viau niin a lang.

Mizote hian democracy nih kan hmang thiam lo em ni aw tih changte ka nei ve ṭhin. Hmânlaia lal awm lai huna inrelbawlnate kha a felfaiin a ṭha hle ṭhin a, kan la tlem vang nge chu ka hre lo. Hmânlai hunah kha chuan ral an do a, mi an that tih mai lovah kha chuan inthahna te, pawngsual leh rûkrûk tihte kha sawi tur a vâng ṭhin hle. Tunah erawh chuan ni tin deuhthaw hian dan bawhchhiatna thu hi kan hre ta deuh reng mai chu a ni. Mahni intihlum tihte kha an awm ngai pawh khan a lang lo va, tunah erawh thihna langsar tak zinga mi a ni chho ta hial a ni.

Hmânlai kha chuan aia upa zahna te, khawtlang rorel pawisakna te, mite duh loh zâwng leh mite tana hnawka awmte kha an hlau hle ṭhin a; tunah erawh a inletling hlauh ta emaw tih tur a ni. Kristiannate pawh hi kan hmang thiam lo emaw tih hlial tur a ni ta a; kan Kristianna hi kan hnam nunphung nena kan her mil thiam loh vang nge ni dawn ni? Kristian kan nih chinah hian kan zalen ta riauva inhriatnate hi a awm zawk nge? Kan mizo nunphung hi kan hloh ta hle mai. Kan changkang telh telh a, hnamd ang nunphung kan lak tak riauna hian kan Kristianna kawngah leh kan khawtlang inrelbawlna thleng hian a nghawng ta em ni tihte hi zir tham tak niin ka hria.

Kristian ṭha leh dik tak, Pathian thuin a sawi ang zâwma nung ni ila chuan kan Mizo nunphung mawi tak pawh kha kan chhawm nung zelin a rinawm. Tunah chuan Kristianna hi kâwrah hmangin, Kristianna phênah hian thil dik lo tam tak a lo awm ta a ni. Kan changkan tâk avang leh lehkhathiam leh mi ropui tak tak kan tam tâk avang hian kan Mizo nunphung hi kan hloh tur a ni tihna a ni lo. Mizo nunphung takin Kristianna hi kan kalpui mai zawk tur a ni a, kan Kristianna hi kan Mizo nunphung nen hian inmil taka kalpui tum hi a pawimawh zawk hle.

Mizo inkaihruaina leh nunphung lah a Kristian em em a, Pathian thu nena inmil tak pawh a tam mai. Tlawmngaihna te, aia upa zah thiamte kha a Kristian zia em em a ni. Tunlai mite ai hian hmanlaia kan pi leh pute khan an nunziaah chuan Pathian thu hi a takin an lo kalpui zawk emaw ni aw a tih theih. Hnam dang nunphung kan la nasa lutuk hian min ei chhe hle a, changkanna anga kan ngaih lai hian Mizo zia hi kan hloh phah nasa ta lutuk a ni. Mizo tak hian a changkan theih a, a Kristian theih bawk a; chu chu hnam dang tan pawh min hmuh hniamna tur aiin min ngaihsanna zawk tur a ni.

Hmanlai hunah kha chuan lal leh upate thu kha khawtlangin an zâwm ṭha a, zawm lotu nih kha chu thil zahthlak takah an ngai ṭhin a; khawtlangin inkaihhruaina dan fel tak a nei a, kha mi zâwm khan an kal ṭhap ṭhap ṭhin a nih kha. Tunlaiah chuan thuawihnate hi kan tlachham ta a, mi dang tana pawi tur leh harsatna siam leh mahni ṭânghma hai râna thil tihte hi zahna reng kan nei tawh lo va, ngaiah kan nei ta zawk emaw tih hial tur a ni tawh. Hmanlai huna khan mahni anpui kawp te, mahni inzuar te, nula leh tlangval innei si lova nupa anga awmte hi awm ta se, engtin tak rorelsak ang maw?

Hmanlai chuan uirênate kha an haw em em a, sakeiin a seh duh tihte kha a ni ṭhin a; lo seh duh bik tak tak ni se, Mizoramah hian sakei la awm ṭeuh bawk ta se, tunah zawng sakei pawhin an seh sêng tawh ngût lo vang. Tunah chuan mahni nupui/pasal hriat lem lohva uire hi chhiar tham fê an awm tawh ngei ang.

Tunlai khawvel changkannate hi a ṭhain a hlu em em a, chu chu kan dan theih loh, ni tina lo thleng a ni. Mahse, chu changkanna chu hman thiam a har hle a, kan mimal nun, chhungkua, khawtlang leh ram thlengin min ei chhe mek a ni. Kan Mizo nunphung mai ni lo, kan Kristianna thleng hian min ei chhe mek tawh a nih hi. Thil tih khawm nikhuaa ‘ Mizo kan ni kan hmel a ṭha, kan tum a sang bawk si’ tia zai ho dual dual piah lamah hian kan Mizo nunphung ṭha–tlawmngaihna, aia upa zahna leh mi dangte tan hnawksak nih loh hi kan chhawm nun zel a ngai a ni.

Mizoa piang kan ni a, khawiah pawh awm ila Mizo kan nihna a bo chuang lo. Inla sap, inla Korean teh ṭhin mah ila, Mizo kan ni tho tho; Mizo taka kan awm mai hian hnam dang tan pawh kan zahawm zawk. Sap hote khuan sap ang nih kan tum phêt hian min nuihzat zawk a, Mizo taka kan awm hian min ngaisang zawk daih. Chhungkaw tin mai pawh hian kan chhungkua ṭheuhah Mizo nunphung hi kanin zirtir uar a ṭul hle a, tunlai naupangte hian nunphung an hre tawh lo lutuk a, a pawi ṭhin.

Mizo nunphung chawisan hi hmanlaina a ni lo va, changkan lohna lah a ni hek lo. Mizova piang tura Pathianina min din leh siam kan ni miau a, Mizo nunphung chawisan hi changkannaah i ngai ang u. Tunlai khawvel changkanna mil zelin Mizo ila, kan hnam nunphung hi chawi nung zelin, Mizo takin Kristian ila, ringtu ṭha ni ila. Tichuan, Mizo nunphung ṭhate hi khawvel hriatah kan pho lang zel dawn a ni.