Democracy nge theocracy? (Democracy or theocracy)

Rev. Dr. Zaichhawna Hlawndo

Tuna Mizorama sawrkâr kan siam leh kan kalpui mêk hi democracy inthlanna aṭanga siam a ni tih chu kan hre ṭheuh awm e. Article ka ziah tawh, ‘Party sawrkar nge mipui sawrkar?’ tihah khan democracy awmzia leh a lo chhuah dan pawh tlêm azâwng chu kan tarlang tawh a. Chhiartu mipuite’n democracy leh theocracy ṭawngkam pahnih hi kan hriat chian nan kan tarlang hmasa dawn a ni.

Democracy tih hi Greek thumal ‘demos’, ‘mipui’ tih leh ‘kratos’ ‘thueneihna’ tih aṭanga lo chhuak a ni. A nih chuan democracy chu ‘mipui thuneihna’ emaw, ‘mipuite thuneihna hmanga rorelna siam’ ti pawhin kan sawi theih ang. Tuna democracy kan kalpui dân chu ‘Ram mipui inthlang thei zawng zawng hmanga sawrkâr siamna hi a ni. ‘Mipuite aiawh rorêlna khâwl’ emaw, ‘Dan mumal tak siama rorêlna’ ti pawhin a sawi theih bawk ang.

Democracy sawrkârah chuan dan (law), kalphung (policy), leadership (hruaina) leh ram rorêlna pawimawh zawng zawng mipuite thuneihna hnuaiah a kal tih mai tur a ni. A chhan chu mipui tam berin rorêl tura an duh an thlan chhuahte hmanga rorêlna a ni. Abraham Lincoln, USA president 16-na khan ‘Democracy chu mipuite sawrkâr, mipuite siam leh mipuite tâ’ tiin a lo sawifiah.

Theocracy chu Greek ṭawng ‘theo’ ‘Pathian’ tih leh ‘kratos’ ‘thuneihna’ tih aṭanga lak a ni a; ‘Pathian thuneihna’ tihna a ni. Theocracy hi sakhaw hruaitute’n ram rorêlna an chelh sawi nan hman a ni a; rorêlna chu sakhaw puithiamte kutah awmin, Pathian hming leh Pathian thu anga rorêlna kalpui tumna a ni. Bible-ah Mosia hun aṭangin lal Saula lal tura an thlan thleng kha theocracy hnuaiah an awm tiin a sawi theih awm e. Theocracy sawrkâr chu Pathian thu leh duh dana rorêlna kalpui tumna a ni. Theocracy rorêlna ram ṭhenkhatah chuan sawrkâr hruaitute kha sakhua/kohhrana puithiamte an ni a, an sawrkar pawh sakhaw dan zulzuiin an kalpui. Theocratic system hmanga rorêlna hi tun hma chuan khawvel ram hrang hranga rorêlna kal dan tlângpui a ni ṭhin. Khawthlang ramah chuan kum zabi 16-naa ngaihdan thar lo chhuak ‘Enlightenment’ kha theocracy rawn titawptu a ni. Democracy leh theocracy hi a ṭhatna tam tak a awm ve ve a, a ṭhat tâwk lohna pawh tam tak a awm ve ve bawk.

Democracy ṭhatnate:

1. Mimal thuneihna hman dik lohna lakah mipuite zalenna a pe.

2. Mipuite’n an tana rorêltu tur an duh zâwng tak an thlang thei.

3. Rorêltu ṭha lote paihthlak leh hnâwl leh theihna dan ṭha tak a ni.

4. Roreltu ngaiin rorêl reng lovin, mi thar leh mi fel leh ṭha, rorêltu turte tan kawng hawnna ṭha tak a ni.

5. Ram leh hnam hmasawnna ngaihtuahna thar siam zel nân a ṭangkâi.

Democracy a ṭhat lohna langsarte:

1. Lal leh thuneih inchuhna ṭha lo tak a siam.

2. Sum leh pai hmanga dik lo taka politics khelhna a siam.

3. Mipui inngeih leh lungrual sateah indona nasa tak a siam.

4. Sakhuana leh ram rorêlna a kal hrang a, chu chuan Pathian ṭih lohna leh sakhaw zirtirna pawisak lohna a hring.

5. Eirûkna, sum ngainatna leh rinawm lohna lo chhuahna bulpui a ni.

Theocracy hi democracy awm hmaa rorêlna awm dan tlângpui kha a ni a; Bible-a rorêlna kan hmuh pawh kha theocracy a ni tih pawh kan hria. Theocracy ṭhatna chu mihring duh dan ni lo, Pathian duh dana rorêlna a ni. Pathian ruat ngeiin Pathian duh dana ro an rêl chuan mipui an thla a muang a, lei lam malsawmna pawh an dawng ṭhin. Mipuite sual viau tum mah se la, Pathian tana ding Mosia-te pawh kha Pathian be pawp thei, mipui sualna leh hremna tur pawh tuar ngam khawp hruaitu a nih tlat avangin a hruaina hnuaiah khan mipuite’n Pathian hremna pawh an pumpelh ṭhin. Ei tur leh in tur an neih loh pawhin Pathian nen an inbepawp a, mipuite rilṭam leh tuihalte pawh khan ei tur leh in tur Pathian hnen aṭangin an dawng ṭhin a nih kha.

Theocracy hi a nih dan tur ang takin Pathian duh dan leh Pathianin mihringte hmanga a rorêlna anga kalpui chu ni se a ṭhat loh theih loh tih mai tur a nih laiin, theocracy hming pu ve si, Pathian tel lo, a duh dân ni miah lova rorêlna tam tak a lo piang tawh a ni. A hnam thlan Israel lalte zingah pawh khan Pathian ruat ni lo, mahni inruat chawp leh lal duh avanga rorêltute tihlum a, an lalna chhuhte pawh an awm. Pathian hnam thlan ni si, Pathian duh dan leh a thu ang ni miah lova rorêltu tam tak an awm a ni. Theocracy chhe mi tih mai tur ‘religious theocracy’–sakhaw hmanga rorêlna pawh sawi tur tam tak a awm. Kristian leh Mosolman ramte zingah pawh religious theocracy hmanga rorêlna ṭha lo tam tak sawi tur a lo awm tawh a ni. Sakhuana hi Pathian nung tel lo, Pathian duh dan ni miah lo pawhin a kalpui theih a ni tih hi khawvêlin a lo hmelhriat tam tawh hle.

Zo fate hian democracy nge theocracy kan duh tih inzâwt ta ila, duh thlan thiam pawh a har viau ang. Democracy ṭhat lohna leh theocracy kal sualpuina tam tak en hian, a enga mah hi kan duh lo tih mai tur a ni. Chutih rual chuan, khawvêla kan awm chhung chuan rorêltu kan neih ngei ngei a ngai bawk si. Democracy ṭhatna lâite hmangin theocracy dik kalpui thei ila chu duhthusam a ni ang. Chuvang chuan, Zo fate’n kan mamawh chu ‘Democratic theocracy’ hi niin ka hria. Chu ngei chu Lalpa Pathianin kan ram leh hnam tana min dinsak a tum pawh niin ka ring bawk.

Democratic theocracy chu democratic a nih angin mipuite’n kan duhthlanna thianghlim tak hmangin kan aiawh rorêltu kan thlang ang a; amaherawhchu, kohhran mipuite’n kan ṭawngṭaina a takin kan kalpui ang. Kohhran rawngbawltu upa kan thlan ang hian thianghlim thei ang berin kan kalpui tawh ang. Candidate turte pawh party politics bawlhhlawh ‘Ṭhat theih miah lohna bâwm’ aṭanga siam kan bansan ang a, sum hmanga lal inchuhnate kan duh tawh lo vang. Kristian ram leh hnam kan nihna angin theocracy kan dah pawimawh ang. Kan rama rorêlna chelhtute chu lal ni lovin, Pathian chhiahhlawh an ni tawh ang. Pathian ṭih mi, Pathian be pawp, Pathian nena lêng dun ṭhin, Pathian kaihhruaina leh a duh dan ang chauhva rorêltu tur kan thlang ang. Chutiang thlan tur, party politics tuinúin a chiah balh loh, Lalpa chhiahhlawh tur, baâl hmaa ṭhingṭhi ngai lo mi tam tak kan ramah hian Lalpa’n a nei. Chu democratic theocracy sawrkar chu khawvel ram khawiahmah a la awm ngai lo.

Pathian lal berna, sawrkar thianghlim, Pathian thlarau thianghlim kaihhruaina hnuaia rorelna kan nei tawh ang a; chu ngei chu Pathian lal ram sawrkar lo inṭanna tura Zo fa Kristiante’n kan beisei chu a ni.