Mizo ṭawng

Mahmuaka Chhakchhuak

Ṭawng thiam saa piang tu mah kan awm lo a, tu pawh mai hian kan zir chawpin kan thiam ta mai chauh a ni. Chuvangin, pianpui ṭawng (mother tongue) kan tih pawh hi khawvelah tu mahin pianpui ṭawng an neih loh avangin nausen lai aṭanga kan ṭawng thiam chu a ni mai a, keini Mizo tan chuan ‘Mizo ṭawng’ hi kan pianpui ṭawng a lo ni ta mai a ni. Dawithiam Lalruanga erawh kha chuan a pian tirh aṭangin ṭawng a thiam nghal ni awm tak a ni a, ani tan chuan pianpui ṭawng a nei tihna a ni kan ti thei ang. Mother tongue tih chu pianpui ṭawng kan tih tak nâin, mahni hnam ṭawng tihna erawh a ni kher lo thei thung. A chhan chu vawiinah ngei pawh hian kan zingah mahni hnam ṭawng hre lo hi mi tam tak kan awm; Pawi, Ralte, Paihte, Hmar leh hnam dang zingah hian keimahni hnam ṭawng aia Mizo ṭawng hmang ta zawk hi kan nih vang a ni. Mother tongue hi hrilhfiahna pakhatah chuan, naupangin a thiam chian ber, suangtuah nan leh ngaihtuahna atana a hman ṭawng hi a ni tih a ni a. Chuti a nih chuan Chhakchhuak leh Fanai inkara nau piang pawhin ṭawng a thiam hmasak ber chu Mizo ṭawng a nih chuan chu chu a pianpui ṭawng a lo ni mai tawh dawn tihna a ni ang.

Ṭawng hi a pawimawh em em a, a pawimawhna ber pakhat chu hnam zia (culture) humhimna atan a ni. Ṭawng leh hnam zia hi inkungkaih nghet tlat a ni a, kaih ṭhen theih a ni lo. Ṭawng thiam a, hmang thiam tak tak tur chuan hnam zia hriat chian viau a ngai a, entirna atan, vaipa pakhat hi Mizoramah a rawn awm a, Mizo ṭawng a zir chawp a, rei lo teah inbiakna atana pawimawh leh a mamawh khawp chu a thiam mai. Nimahsela, Mizo ṭawng hlutna leh hausaknate chu a hre phak tak tak chuang lo ang. Romei kan tihte, arṭial fin kan tihte leh vawkpa sûtnghâk kan tihte hi hre fiah tur chuan Mizo hnam zia a hriat ve hle a ngai dawn ang. Chuvangin, ṭawng hi inbiakna tur chu a nih rualin, hnam zia humhimna atana thil pawimawh berte zinga mi a ni tih hi kan hriat a ṭha. Hnam dang zinga Chhurbura chanchin sawiin awmzia a awm vak loh karah keini zingah chuan fiamthu thawhna hmanrua ber emaw tih mai turin kan uar thung si. Heng aṭangte hian hnam zia leh ṭawng inpumkhatna pawh kan hrethiam awm e.

Ṭawng hi mithiamte duan chhuah tam tak a awm rualin mi naran tak tak zing aṭanga rawn piang pawh tam tak a awm bawk a. A ṭhan lenna hmun pawh mi tam tak awmna hmun a ni zawk mah. Hnampui zawkte chuan ‘Language grows along with the growth of civilization’ an lo ti reng a; hnam zia ṭhan chhoh ang zelin kan ṭawng pawh hian hma a sawn ṭhin tihna a ni. Tun hmaa kan hman ngai reng reng loh ṭawng thar pawh keini rual pawhin sawi tur kan hria ang a. Chutih rualin, ṭawng thi tawh tih mai tur, ṭawng hman tawh loh tam tak a awm bawk. Hnam dang ṭawng ni si, keimahni ṭawng anga kan neih tak mai pawh sawi tur tam tak a awm bawk a; kan hnam zia a ṭhan chhoh zel angin kan ṭawng pawh a ṭhangin a danglam chho ve zel ṭhin a ni. Entirna pakhat lek han tarlang ila: tun hma chuan ‘hrai’ tih hi kho sawina atana hman ṭhin a ni a, ṭhangthar tam takte chuan an hre tawh kher lo ang, tunah chuan hman pawh a ni tawh meuh lo. Hetiang hian kan Pathian lehkhabuah ngei pawh hian a hun laia fiah leh chiang em em si, a hnua thlak leh tak hi sawi tur a awm nual a ni.

Ṭum khat chu English news anchor Rajdeep Sardesai hian Congress chhuanvawr Sashi Tharoor leh BJP mithiam Swapan Dasgupta te a kawm ṭumin, ‘In pahnih karah chuan English chungchang chu kan sawi ve ngam lo e’ a ti e, an ti a; a level chu sang tak a ni. Sap ho zingah ngei pawh khuan sap ṭawng hi keini ang bawkin an inthiam hleih hlawm ngang mai a. Mizo chhul chhuak zingah pawh hian ṭawng hmang thiam leh thiam lo hi an lo inthlau thei viau mai a, chutiang bawkin ziak lama chem kal takte hi ṭawng lamah chuan an lo chûkhâ lutuk lo em ni tih tur hi an awm nualin a hriat. Lalhmingliana Saiawi kha a thu leh hla chu chhiar a hlawh viau laiin, amah kawm chuan titi tur ngah vak lo nia sawi a ni ṭhin. Pu Laldenga pawh kha a ziak lamah chuan sawi tur a tam loh laiin, ṭawng lamah chuan Mizo ṭawng thiam taka sawi a ni a, mipui hmaa thusawi thiam tak mi a ni. Chutiang zelin R. Vanlawma, K.L. Liana te pawh kha an thu leh hla chhiar a nawm em em rualin anmahni chuan titi an ngah vak lo em ni tih tur a ni. US President zingah pawh sap ṭawng thiam leh thiam vak lote thusawi chu ngaihnawm hleih tak a ni a; Barack Obama’n Bin Laden thih thu a report leh Donald Trumpa’n ISIS leader thih thu a report kha han ngaithla kawp ila, America President ṭheuh ṭheuh si kha ngaihnawm hleih tak a ni.

UNESCO-in February 17, 2009-a buatsaih Atlas of the World’s Languages-ah chuan khawvelah hian ṭawng la nung, la hman mek 6,000 vel awmin chhinchhiah a ni a, February 2022 a lo thlen leh meuhah chuan ṭawng chi hrang 1,863 hman mek niin a chhinchhiah leh tawh a ni. Hetianga ṭawng chi hrang a tlemna chhan pakhat chu a hmangtute boral tak zel vang a ni a, a hmangtu an awm tlat si loh chuan ṭawng pawh chu humhalh tum hle mah ila humhalh theih loh a ni tihna a ni.

January 26, 2010-ah khan India rama ṭawng pakhat chu kumkhua atan a bo hlen ta a, Andaman & Nicobar Island khawpui Port Blair-a pitar pakhat kum 85 mi chu hemi niah hian a boral a, amah chauh chu ‘Bo’ hnam ṭawng hmang la awm chhun a nih avangin a boral rual chuan ‘Bo’ ṭawng pawh chu a boral ve nghal tihna a ni. Hetiang hian Mizo hnahthlak hnam zingah pawh kan ṭawng ṭhenkhatte chu boral mai thei dinhmunah a ding a; heng–Bawm, Hrangkhawl, Paite, Thado, Hmar, Anal, Aimawl, Mara, Gangte, Chawhte leh Kawm te hi UNESCO chuan dinhmun hlauhthawmawm a ding mek niin a tarlang. Hetiang a nih chuan kan ṭawng hman mek Mizo ṭawng pawh hi kan unau Khiangte, Pautu leh Tarau ṭawngte angin thi mai thei dinhmunah a ding ve thei reng bawk.

Tichuan, kan ṭawng hman mek, Mizo ṭawng hi keini hian kan chhawm nun reng a ngai a, hnam dang ṭawngte pawh kan ṭawnga dah mai bakah, a nihna ang anga kan ṭawng atana kan hman pawh a pawimawh a, chu chu ṭawng tihhausakna pawh a ni. Sap ṭawng pawh hi hnam dang ṭawng anmahni ṭawng ang maia an hman tam tak a awm a, a tam ber chu Latin ṭawng aṭangin a ni hial awm e. Adhoc, adminisratio, adultus, color, creator, creatura, crocodilus, custodia, devotion, dictator, digression, diligens, gloria, honor, indifferente, lesbian, oblivion, opinion, ordinaries, redemption, renovation, rumor, smallpox, systematic, termination, theologian, thesis, tuberculosis, via, voluntaries tihte pawh hi Latin ṭawng vek a ni a, Sap ṭawng atana hmante niin, a ṭhente hi chu a nihna ang chiah lo deuha tihdanglam pawh a awm.

Hetiang hian hnam dang ṭawng pawh Mizo ṭawnga hman zui tak a awm nual a. Hetiang a nih avang hian kan ṭawng hi kan tihhausak deuh deuh pawh a ngai a, kan hnam nun chawi nungtu pawimawh tak a ni tih hi kan theihnghilh loh atan a ṭha. A mawina lamah pawh Mizo ṭawng hi ṭawng mawi tak niin, a lam rik dan azirin a kawh a danglam daih thei a, sap ṭawngah erawh lam rîk rem lo tak tak hi sawi tur a awm nual; that, those, this, these, them, there, their, thou, thee, thy tihahte hian ‘th’ hi ‘d’ anga lam rik tur a nih laiin ‘thing’ ah chuan Mizo ṭawng anga lam rik a ngai leh daih thung si. Hetiang hi sawi tur a awm nual. Mizo ṭawngah chuan hetianga ri danga pem kawitir hi kan nei ve lo a, a nihna ang anga lam rik a ni.

Thumal pakhat, lam rik dan azira a kawh dang daih theite pawh hi Mizo ṭawngah hian kan nei nual a, entirna atan ‘Pang’ tih hmang hian sentence han siam ta ila:

ri sang tawi: An lo thleng ta pang mai

ri sang sei: Ka lukham hi Páng làa siam a ni

ri hniam tawi: Ka mu a, ka pang a kham

ri hniam sei: Mi hnial ve pàng pàng a

ri kuai tawi: Liani chu a inchei pang lutuk

ri kuai sei: A ṭawng pâng pâng mai

ri er tawi: An unauvah a pang ber a ni

ri er sei: Tui a hmuam pâng mai le!

Hetiang hian ‘pang’ tih thumal pakhat hmang ringawt pawhin sentence hrang hrang kan siam thei ang. Lei tihte, ban tihte leh a dang dangte pawh chi hrang hranga sawi theih an awm nual bawk. Chuvangin, Mizo ṭawng hi a hausa a, kan tihhausak zel pawh a ṭha ngei ang.

Sap ṭawng thumal pakhat ‘harvest’ tih chu Mizo tawngah chuan sawi dan chi hrang hrang a awm a. Buh chungchang sawi a nih chuan ‘seng’ tih hman a ngai a, lâ chungchangah chuan ‘en’ tih a ni leh a, chhawhchhi-ah chuan ‘kháwng’ a ni leh daih a, mai leh maipawl lamah chuan ‘khawm’ hman leh a lo ngai a; bal, bahra leh sawhthingahte chuan ‘cho’ hman leh ngei ngei a lo ngai bawk. Hetiang hi Mizo ṭawng hausakna a ni. Hnam zia a lo danglam ang zelin kan ṭawng pawh danglam lo thei lo a awm ṭhin a, chungte chu pawm loh ngawt theih a ni lo.

Kan ṭawng hi keimahni zingah ngei pawh hian hman uar a ṭul deuh deuh a, kan ṭawnga thuziakte pawh hi ram hran leh hmun dangahte pawh kan thehdarh a ṭul viau bawk. Guwahati vai dawr pakhata ‘Vawksa Rice’ tih lo intar chuan min tihtlangnel phah hle mai a, anmahni lah chuan Mizo ṭawng an thiam hauh lo lehnghal. Israel rama Isua thlânah khuan, ‘Lal Tawngtaina’ thuziak hi kan dah tawh em kha? Hawh teh u, kan ṭawng hi i hmang uar deuh deuhin i thehdarh zel bawk ang u. Min phuar khawmtu pawimawh tak a ni si a.