Mizo IAS leh a dangte

Prof. JV Hluna, Ex-MLA

Pu Lalbiaktluanga Khiangte, IAS chu kum 36 lai a service hnuah October 31, 2024 khan Jharkhand State Chief Secretary aṭangin a lo pension veleh ta a. State liana Chief Secretary nih hi Mizote tan a har hle a ni tih kan hria a, hetia CS a ni thei hi Mizo lawmin kan lawm a nih kha.

Tluanga hi junior tê, SDO emaw lek a la nih lai khan Silchar Mizoram House room khatah tuilian avangin kan tangkhang dun a, Mizoram House kha kâwng thleng rawkin tuilianin a rawn chim a, ni thum chu kan cham ringawt mai a. Tlema a kâm deuh chuan Pu Vanhlira te truck, ar chaw phur hawng turah kan chuang a; kawng pawh a chîm vek avangin kawng zawh sual loh nan mau an phun zel a. Chutichung pawh chuan kawng ber a lan loh avangin fimkhur a ngai hle. Driver chuan a zawh sual palh a, kawng sir tui li put maiah chuan min bun a, vai tuithiamin min chhan chhuak a, an lawngleng min hire tir a, an inchhiar zat a piang ‘ok’ tih a ngai, kan pek zat ka hre tawh lo.

Kabuganj-ah riak turin kawng sirah kan chhuk a, zan a ni tawh a, vai pakhat Zoṭawng thiam hian min khawngaih ni awm tak hian “Heng laiah hotel a awm si lo va, riahna a awm lo vang, kan inah lo riak rawh u, in motor hian kal ila ka hruai ang che u,” a ti a, kan ‘aw’ ve ta mai a. kawngpui aṭanga pêngin hla deuh kan thlen chuan min suam tumin min bei ta thut a, kan insual a ni ta ber mai a. Driver chu, “Rang takin in turn la, a chak thei ang berin Kabuganj bazar kha pan rawh, tu mah chil hlau suh,” kan ti a. Kabuganj bazar kan thlen chuan kan han inen vel a, hliam leh engmah hloh kan nei lo va. Kei chuan vaipa torchlight cell thum, hmai hlai ang chi kha kan inbeihnaah chuan ka laksak a, Tluanga chuan engmah a laksak ve lo va, engmah an laksak lo bawk. Kabuganj kawngpui sir thingpui dawr dawhkan chu kan bawh a, thosi a tlem lo va, mutthilh zeuh chu kan nei awm e.

A tukah chuan tui a la lian mup mup mai si a, lawngleng kan hire leh a, hlauthawng angreng takin Bhaga chu him takin kan thleng a. Aizawl hawna tur motor a lo tam tawh a, riak lovin Aizawl kan thleng chu kan lawm teh asin.

Hetih chhung hian Tluanga hi kan inhre chiang hman hle a, a ipte a thûk lo va, a lei a chet tlem em em a, a tlawmngai hle bawk. “Bihar-a ka sub-division-ah college panga a awm a, board-ah ka chairman vek,” a tih khan “Eng ṭawng nge in hman, eng ṭawngin nge minute in ziak,” ka ti a. “Hindi vek kan hmang a, minute pawh Hindi vekin kan ziak,” a ti. “Harsatna i nei em?” ka ti a; “Nei lo, engmah ṭawngah harsatna leh buaina ka nei lo,” a ti a. Ka nau duh tak Tluanga hi fel ka ti a, Pathian zarah a la ka isang zel a, Chief Secretary hial a la kai thei ang ka ti a, amah ka ngaihsanna a zual hle. Hetia a lo pension hian ka lawmpui tak zet a ni.

Pu F Lalremsiama, IPS (RR)–regular recruit 1965-in kan ṭhalaite chona Aizawl Post-ah ṭha deuhin a rawn ziak a. Kum 1965-ahte chuan pathum ngawt IAS (RR) kan nei a, 1967-ah pahnih, 1970-ah pahnih bawk. Kum 1974-ah pali kan nei rual ṭhawt a, 1975-ah pahnih kan nei leh. Kum 1979-ah pahnih, 1988-ah pahnih, kum 1989-ah pahnih bawk kan nei leh a, 1997-ah pahnih bawk kan nei leh a ni. IAS (RR) kan neih hnuhnun ber chu kum 2014 daih kha a ni ta mai awm e.

IFS hi 14 kan nei tawh a, a hnuhnung ber Muanpuii Saiawi hi 2005 batch a ni. IPS hi RR-a tling hnuhnung ber chu David Lalrinsanga, 1995 batch-a mi daih kha a ni. IPS (Postal) phei chu Joseph Lalrinsanga, 1999 leh Lalfakzuala Chhangte, 2001-te hi service lai kan neih a ni awm e. IAAS Pu Vanlalchhuanga, 1998 leh Elvina Leivom, 2015 kan nei a; Indian Civil Account Service (ICAS)-ah mi pathum–Eddie L Khawlhring (1995), R Lalremruata (1996) leh Vanlaldina Fanai (2002)-te kan nei.

IRS (Custom & Excise)-ah hian mi 5 kan nei a; L Beimopha (2006), Lalhmingmawia Ralte (2009), Thari Sitkil (2010), Eric Lallawmpuia (2013) leh Malsawmtluanga (2014)-te an ni a. IRS (Income Tax)-ah chuan service lai pasarih kan nei a; Esther Lalruatkimi (1991), David Chawngthu (1994), Anne Kapṭhuama (1994), Rintei Renthlei (2007), Lalmalsawma Pachuau (2008) leh Lalramsanga Sailo (2008)-te an ni.

Indian Defense Account Service (IDAS) pahnih – Zothankhuma, 1991 leh Lalbiakchhunga, 2013-te kan nei a; IES (Indian Economic Service)-ah pahnih–Vanlalramsanga Chawngthu (2001) leh Ramdinpuii Renthlei (2012)-te kan nei. IRAS (Indian Railway Account Service)-ah mi pahnih bawk–KT Beichoa (1990) leh David Lalmalsawma (1993) a; Central Secretariat Service-ah chuan Lalchhandama chauh kan nei a ni.

Heti khawpa service hlu, Mizo missionary te, zirlai leh zin veivak apiangte tan a ṭangkai hi sorkar super IAS scholarship-a tling an awm ka hre lo. India rama min titlangneltu, neitu rilru kan put ve theihna, indirect-a Pathian thu kan put darhnate hi an tlem ta emai a. High school naupang nih lai aṭangin nasa takin i bei teh ang u.

MIZO IAS OFFICERS SELECTED THROUGH DIRECT RECRUITMENT OF UPSC

1954–Jamchonga Nampui

1959–Lalkhama

1961–P. Rohmingthanga

1962–S.R. Vala

1964–Lalhmingliana Saiawi

1965–Lal Fakzuala

1965–F. Pahnuna

1965–Lalchuangliana

1966–Hauzel Jelshiama

1967 – J.K. Sanglura

1967–M. Lalmanzuala

1968–Rothangliana Hmar

1969–Rin Sanga

1970 – S.L. Sailova

1970–Robert Hrangdawla

1972 – H.V. Lalringa

1973–Lalrawna Sailo

1974–H. Lalthlamuana

1974–P.L. Thanga

1974–Haukhum Hauzel

1974–Lalhuma

1975–Saichhuana

1975–C. Lalthara

1976–Vanhela Pachuau

1978–C. Hrangthanga

1979 – P.C. Lawmkunga

1979–Lalthantluangi Khiangte (turned L. Tochhong)

1981–C. Lalsawta

1983–Lalmalsawma

1985–Liankunga

1987–Lalnunmawia Chuaungo

1988–Laima Chozah

1988–Lalbiaktluanga Khiangte

1989–Lungmuana Lakher

1989 – J.C. Ramthanga

1997–Lalrinliana Fanai

1997–Robert Lalchungnunga Chongthu

2001–Dr. Christina Zothanpari Chongthu

2001–R. Lalvena

2006–Dr. Franklin Laltinkhuma

2008–Saidingpuii Chhakchhuak

2014–Grace Lalrindiki Pachuau