Mupui chanchin ngaihnawm

Andy K Zarzoliana

Mupui chanchin ngaihnawm tiin thupui ka vuah ve ngawt tak a, a thupui phawk pha lo lutukin ka chhuah ang tih pawh ka hlau hle lo ve. Mupui chanchin hre tlem hle mah ila, kan hriat chhun chhun khingbai angreng tak siin tarlan kan tum dawn a ni. Kan ziak ngaihnawm thiam lo anih pawhin a tak takah chuan a ngaihnawm viau tho tih in lo hre mai a ni ang chu.

Siamtu kutchhuak nungchate hian Pathian themthiamzia leh ropuizia an tarlang chamchi a. Chutih rualin hringfate tan nungchate nunah hian entawn tur leh zir tur pawh tam tak kan nei awm e. A bik takin chungleng sava zinga chungnung ber mupui chanchin hi a ngaihnawmin ringtu nunah leh sakhaw thulah pawh mupui chanchin hian entawn tur tam tak min pe thei awm e. Kan sakhaw laimu Bible-ah ngei pawh ringtute tan mupui chanchin min khawhhmuh ngun na ngiang mai.

"Mu chi ten sa an ei, Kawlhawk thau a țha," tia kan lo zir țhin ang khan, mu chi tam tak te hi sahring ei chi an ni deuh vek mai a. Hmui zum leh tin hriam tha tak an nei a, an thla a pharh tha a, sava dangte aiin a țo bit bik bawk a, chungleng sava dangte aiin an thlawk sang thei bik bawk a, an mit a fiah țhain an huaisen bik hle bawk a, sahring ei tura siamtu duan a nihzia a pianhmang reng pawh hian a phawk chiang hle awm e. Mupui kan tihah pawh hian chi tam tak țhenhran leh a ni a, Asia khawmualpui, Britain, Africa, United States, Canada, South America, Australia leh Europe khawmual țhenkhatah te, mupui lian tak tak leh mawi zet zet hmuh tur an awm fur mai a, hmun thenkhatah phei chuan naupang hial pawh an bei ngam tlat mai a ni. Hetianga mupui hlauhawm mihring beih chingte hi hmanlai Mizote pawh khan kan lo hmachhawn tawh țhin a ni ngei ang, Mura puk pawh tun thlengin Zote khuaah a la awm a. Champhai atanga 10 km vela awm a ni a. He hmunah hian puk 6 lai a awm nghe nghe a ni.

Heng Mura Pukte hi engtik hunlaia siam nge a nih hriat a ni lova, kum 1899 a Laitea hova Zote khua an dinthar leh lai pawh khan an lo awm reng tawh a ni. Khatih hunlai pawh khan ‘Mura Puk’ tiin a hming an lo sawi tawh a. Heng pukte hi an lo awm tan dan hriatchian ni lo mahse, Mura laka an sahimna tura biruk nan an siam ani ngei ang. Pu Khualkhawla Mura kah chanchin ziahnaa a lan dan chuan, Mura chu mupui lian leh tihbaiawm tak, mihring meuh pawh beih ching a ni a. A ketin ringawt pawh sepui ki tiat zeta lian leh a kha bawr pawh patling lukhum tawk zeta lian a ni. In chungah bawkin a thlain bang chhak leh bang thlang a hup a, kawmchar lam atangin a meiin in chhung a hawl a, kawngka a mihring tlanchhuak apiang chu a lo chuk ta thin a ni an ti. Mura chu chutiang taka hlauhawm a nih avang chuan heng pukah te hian an tlanchhe thin a ni ngei ang. Hmanlai chuan heng pukte hian lungchhin tha tak an nei thin a, a chhung pawh a vawng him tha viau niin an sawi bawk. Tak tak te a nih ngai chuan thil hlauhawma han chal loh chi ziazang a ni lo ve.

Pathian thilsiam ropui tak zingah mupui hi a mak'in adanglam bik hle a. A chanchin pawh hi ngaihnawm tham tak a ni. Chik lem lova han ngaihtuah mai chuan sava pakhat ve mai a ni a, a makna em em han sawi tur a tam viau awm lo ve. Amaherawhchu, Mupuite hi sava dang ang a ni ve reng reng lo va, a hringnun kawng chhuk chho a zawh dan hi chungleng sava dangte zingah amah ang pakhatmah an awm awm lo ve.

Kum 1980 bawr vel khan Europe khawmualpuia tlang hmingthang tak tak leh Alps tlang an tihah te, Africa khawmuala tlang lian hmingthang Mount Oku te, Mount Meru te, The Drakensberg leh Atlas Mountains-ah te khuan mithiamten mupui chanchin hi a kum a kum puilinglet teh meuh an lo zir bing tawh a, thil thar tam tak an la hmuh ngailoh an hmuchhuak a. Chulai chheh vela cheng mu te chu mu lian pui pui an ni nawk hlawm a, an thawk sangin, an thla te hi an zap ve ngai mang lova, an zar pharh duai mai a, chhum chunglamah te khian rei tak tak an leng delh delh thin a ni.

Chu lai hmuna cheng ve Mupui chikhat Lambmarker an tih te ngat phei chu an lianin an chak em em mai a, ama rih zawng tluk zet a rit te pawh mel hla tak tak thlengin a thlawhpui duai duai thei a. Sakeibaknei-in ramsial a ei zawh tawhna ruhrel te hi van sangah a thlawh pui vang vang a, tichuan, van sang atang chuan lungpui chungah a thlak keh darh ta chuai mai thin a, a ruh chhung atanga a thling lo baw chhuak chu a ei ta thin a ni. Chu ti ang mupui chi hrang hrangte chu khing tlangah te khian an fuan kim hle a ni.

Alps tlang khu a lian em em mai a, a tlang bulthut vel chu ram ngaw dur pui mai a ni a, a tlang pang kham vel te pawh tuma tuk ngailoh ramngaw ropui tak a ni. Lungpui tohlawt sang pui pui leh thing kung lian tak tak, leilung pian tirh ata ding ngir khup tawh niawma mawite an ni hlawm a, chu vangin chung lai ram te chu Mupuite tan chuan pasalthate ram țuanna Buannel ram ang mai a hmun thlakhlelh awm leh lungdumtu a ni reng a ni.

Mupui țhenkhat bu chhehdan leh an no tete an enkawldan chu a danglam riau mai a. Tlang sang tak tak leh thingkung sang tak takah Thingțang lian fe fe an chhep khawm ruih a, chumi zawhah thingțang hling-nei chiin an delhkilh leh te te a. Chumi zawhah chuan hnah thap pui pui leh thinghnah mi sar thei chiin an tuamhnan leh a, chumi zawhah chuan thingțang nemin an tuam leha an tui ve chauh thin a ni. Tichuan a note a lo keu ta a, sa țawih leh sa rimchhiate pe ve lovin sa tharlam, an man hlim ngei mai chu an pe țan ta a, sa ruh hrawmhraw leh sa hrang lian deuh an pek chan a awm fo bawk. Tichuan an note hmul țo kim hmain a bu nem chin zawng chu apui chuan a paih thla vek a, hnahthap chanah chuan a note chu a awm tir ta a, chung hnahthap te chuan a no te vun nem kha a sar bawl țuk mai thin a, an vual hel hul thin a, chu chu hrehawm laka chhel an zirtirna hmasa ber a ni awm e.

Tichuan an hmul a rawn țo kim țan chauh va, hnahthap chu an paih thla leh a, hling zingah an khawsak tir leh ta a, chung hlingte chuan an vunte chu chhun hliam chang a nei fo bawk. Nimahse apui chuan an nunkhawchhuahna turin hrehawm an tawrh hmasak phawt a ngai ani tih hre ranin chutiang chuan a enkawl chho zel a, an thla an zarpharh thei ta maw tihah hling chu a paihthla leh a, thingțang karah chuan a khawsak tir leh a, a chang chuan chung thingțang kar atanga an tlak chawn chawn hun pawh a thleng fo bawk a ni. A changin apui chuan chung thingțang chu a rap hrual lui deuh ngat thin bawk a, chutianga a zirtir thiam hnuah chuan ralbeihdan a zirtir leh a, rul lian pui pui chu a nungchungin a rawn hawn a, a note chu a thahtir hmasa zet a, tichuan an pawt sawm a, an ei ta chauh thin a ni. Te taktê an nih lai atanga hrehawm tawrhdan leh thil hlauhawm lo hmachhawn fo tawh an nih avangin an thlawhchhuah hnuah pawh mahnia inrelbawlin chung mu te chuan an nun chu an hmang ta thin a ni. Mupui țhenkhatte damrei lam hi tunlai mifing tam tak chuan an la zir mek a, zir tham meuh khawpa chanchin danglam an neih thin avangin Mupui chanchin kimchang taka chhuichhuah pawh hi thil awlai tak zawng ani hauh lo vang.

United State of America chuan an National chhinchhiahna atân Turkey (sai-âr) kha thlang ta lovin, Blad Eagle (Mupui) an thlang hnuhnawh ta kha a ni a. Tin, German ram pawh khan Mupui tho an chhianchhiahna atân an hmang bawk a. Chu mai a ni nem, Kaisara hun laia Rom Lalram ropui takah pawh khan sipai huaisen Vth & Xth Legion-ten mupui tho tho kha chhinchhiah nân an lo hmang veleh tlat mai bawk a ni. Mupuite hi an chakin an huaisen chungchuang hle a, Grik thufing pakhat chuan, “Mupui tar tawh pawhin vamur viak tha tak a la hen e,” an lo ti thlawt bawk.

Bald mupui hi America mupui tia hriat lar a ni a, he mupui (Bald Eagle) hi America ram chhinchhiahna atan an hmang bawk ani. He mupui chi hi khawvela mupui chi mang mai hlauhthawnawma awm mek zingah a tel avangin an humhalh hle bawk a ni. Bald awmzia hi Lu var tihna a ni a, Latin tawng atanga lehlin chuan "Lu var tuipui mupui" tihna a ni awm e. Bald mupui hi a lu a var a, a mei lam a var bawk, a taksa lehthlate chu dum/uk a, a hmui a eng a, a zum van mai. A ke ah hmul a nei lo.

Bald mupui hi a thla parh hmawr lehlam atanga hmawr leh lam teh tlangin 7ft. a sei a ni. Chaw atan sangha, rul, savate bakah ruang tawih (carrion) an ei thin a, chaw pounds 8 a rit la/pu chungin an thlawk thei. Kum tin an thanglian a, an bu pawh a lian thin hle awm e. He mupui bu hi America hmarlam sava zawng zawng bu aiin a lian ber a, an record danin 20ft a thuk, 10ft a zau leh ton 2 a rit a tling thei a ni.

Balb mupui mit chak zia chu mel chanve dana thil hi hmaih miah lovin fiah zetin a hmu thei a,darkar khata mel 100 a chakin leia a chaw ei tur a țum bir fuh chat chat thei a ni. A chaw eitur a țum bir chak zia chu rifle kah mu letin a chak zawk an ti a ni.

Bald mupui hian hmul 7000 vel a nei a, lo neitu te thian a ni bawk, buh leh thlai eitur sazu leh sazupui suattu a ni. Mupui pem chi a ni a, a dangdaina chu chhimlamah an pem chuan a ngaiah bawk an pem a, hmar lamah an let leh a nih pawhin a ngaiah bawk an let thin.

Mupui hi chi hrang hrang an awm a, mupui chikhat Mulek an tih chu a makin a danglam khawp a, mupui dang angin a khawsa ve lo va, a rilru a phakar nge a verther kan tizawk dawn, A nihloh vek leh atana khuanu ruat zawk pawh ani mahna, a tui te hi a awp keu ve ngai lo va, a no te lah a chawm ve ngai hek lo, ti dan mak tak mai a nei a, a tui a lo hun chuan mupui bu a zawng a, mupui tui zingah khan a rukin a lo va tui kual thin a, mupui chuan ama tui emaw tiin a awp tel ta thin a ni. Tichuan, mulek tui chu mupui tui dang zawng ai khan a lo keu hmasa ta a, mupuiin chaw a va zawn sak hlan chuan la keu ve lo mupui tui tak tak zawk te chu a bu chhung atang chan a nek chhuak ta thin a, mupui chuan hre thiam hek lo le, chu mulek note, fa tak ni lo chu a mal chawm ta tlut tlut thin a ni.

Mupui danglam leh em emna pakhat chu, a no te te a enkawl dan hi a ni leh a, a no te te a duat dan leh a enkawl dan hi mak tak a ni. A bu chu lungpui sang tak ah emaw, thing ler sang tak ah emaw chuan a chhep thin a, hmelmate tihbuai phak loh tawp tur hmun himah uluk takin a buatsaih thin a, tichuan chu hmunah chuan a tui te chu a awp keu thin. Tichuan a no lo keu thar te chu a duat em em mai thin a, nisa lakah te hian hlim nuam a siam sak a, a thla hlai tak mai chu a no te chungah chuan a zar pharh duai a, khawlum leh nisa lakah chuan a veng thin a ni, ramsa thisawn uih tawh ang chi te hi a no te te chu a ei tir ngai reng reng lo va, ama thah ngei chu an thisen lum laiin a ei tir thin a ni.

Chutiang taka a note te a enkawl a vang chuan a no te pawh an bu zawl chu nuam an ti em em a, thlawh chhuah ve nachang pawh an hre lo va, thlawh zirtir an ngai ta hial reng a ni. Mupui chiah hi chungleng sava zingah no te thlawh in zirtir thin an ni a, sava dangte chuan thlawh an in zirtir ngai lo. Mupui chuan a note te chu thlawh chhuah a hun ve tawh a a hriat hunah chuan an bu zawl nuam tak chu an thai darh sak ta thin a, a thla khawng tak mai chuan a khawng darh chum chum mai thin a ni. Chutah zet chuan a note te chuan a pui tih dan chu an hrethiam lo a, an chungah a thinur ta niin an ngai thin a, an hlau hle thin a ni, chutah le a pui chuan a chungah chuan a note te chu a la thut a, van sang tak lam pan chuan a thlawh pui ta vang vang mai a, a note te chuan mak an tiin an la thlen ngai reng reng lohna hmun van sang tak mai chu an hlau a, an hrilhhai hle mai, tichuan a pui chuan van sang tak atang chuan a thlauh ta thut mai thin a, an tla thla ta nawk nawk a, hlau em emin an thla te chu thiam leh thiam lo hian an pharh ve a, thi ngei dawn a an inhriat hnuah a pui chuan a dawng leh chauh thin a ni. Chutianga vawi tam a tih hnu chuan thlawh te chu an lo thiam ve ta, an hlauh em emna hmun van sang takte chu tuallen nan an hmang a, luikawr thuk tak tak chungah te chuan an leng delh delh thin a ni.

Mupuite hi ruah leh thlipuite, rial lo thawk thin te hian a tibuai ve ngai reng reng lo va, chutiang a thlipui leh ruahpui a lo thawh dawn chuan van sang takah khian an invawrh chho daih a, ruah leh thlipui reng rengin a chim phak lohna hmunah khian an thlawk veng veng thin a ni.

Chutiang ang tak nun kan neih theihna tur chuan ringtute pawh Pathianin kawng harsa tak takah te min lo hruai thin a, Deuteronomy bung 32 kan chhiar chuan, “Lalpa chanvo chu a mite an ni a, a mit note angiin a vawng....mupuiin a note te a chawk tho va, a thla chungah a la a, a thlawhpui thin ang hian Lalpa chauhvin a hruai thin” tiin a sawi a, mupui nun ang mai a ringtute min hruai thin zia chiang takin asawi a ni.

A bik takin Mupuite hi an dam rei em em mai a, kum 100 chuang daih mai dam thei pawh an awm a. Kum 60-70 vel an lo nih chuan an tar ta thut mai thin a ni. Tin, Mupui (Eagle) tamzawk damchhung chu kum 70 vel ani tlangpui a. Kum 40 vel annih tawh chuan an thlawk hlei thei tawh lo va, chaw kawpuar hmuh chu an tan thil harsa tak a lo ni ta. An hmuite chu a kual kawm zo va, an tin hriam em em mai thin te pawh kha ei zawn nan hman tlak a lo ni ta bawk hek lo va, tute emaw nu-hah ang maiin an chau ngawih ngawih mai thin a ni. Chutia an tara an chet hleihtheih tawh loh a vang chuan ruahpui leh thlipuite, rial lo thawk thin te chu an sepui ruah tawrh tlawk tlawk mai thin a. A hma zawnga tu dang ngai bil lova van sanga leng delh delh thin khan khuanu ruat taksa lam harsatna an han tawh takah chuan an mangang a, vanglai ni ngai reng rengin tlai ni an leng ta țhin a. Hringfate iangin mahni dinhmun chu an sit ve ngawih ngawih mai a ni.

An thiante tih ang engmah an tih theih ve theih tawhlohah chuan an in la hrang ta thin a, an tha zawng zawng sawm khawmin tlang chhip sang taka lung pui awmna hmun lam chu an pan vang vang a. Hmun ralmuang leh hmun biru an melh reng a, an tana hmunhim nia an hriat chu an bel chawt a. Chu hmunah chuan ngawi rengin an awm ta thin a ni. Chutia mahni chauhva khawhar taka an awm lai chuan a in ngaihtuah a, chu mupui tar chuan duhthlan tur pahnih chiah a nei a, pakhat chu pianthar lehna (re-birth) a ni a, a nih loh vek chuan pakhat leh chu ngawi renga thih kha ani tawp mai.

Mupui tam zawk te hi an tar hnu in an in siamthar(re-birth) leh thin tih hi nungcha zirmite sawi dan a ni. Lal Isuan Nikodema hnenah, “i piangthar tur a ni” a tih ang born-again piantharna ang kha chu a ni lova, ‘kristan a ti zo vek tawh’, tih lam kha innghah nan an hmang ve ngawt thei lo va, anmahni ngeiin thi leh thau pawlh a ansual chhuah a ngai thin a ni. He mupui insiamthar lehna (re-birth process) hi a hautakin a namai lo hle a, an tan chuan na tak a ni. Tam tak chu dam khawchhuak zo lovin an thi nge nge thin a, a hmul te a pukin a thla te kha a lo rit em em mai a, tichuan, mupui tar chau tawh tak chuan a hmui chu lungpuiah chuan a chhu ngat ngat mai a, a khawh vek hma loh chuan a bansan ngai lo, a tin te pawh chu lung ah chuan a chhu thlawn vek thin a, tichuan, ruahte a in nan huh tir vek hnu ah nisa tak maiah chuan a in pho leh a, tichuan, a thla hlui leh a hmul hlui zawng zawng chu a khawng til vek thin a, a ngal vun char bum mai te chu a ti khawk a, chumi hnuah chuan mupui tar chu pukah a lut ta a, puk kawngka chu hlumin a khar a, a inchar hnan tlat a, rei tak chhung chutah chuan a tawm ngar ngar mai thin a nih chu! Rei tak a tawm bo hnu chuan a thla leh a hmul te chu a lo chawr tha leh ta a, a tin leh a hmui te pawh chu a lo in siamthar leh ta thin a ni. Chutia an insiamthar lehna hun an hmang chhung chu thla nga/ ruk laite a awh hial thin. Tichuan puk chhung atang chuan nunthar nen a lo chhuak a, mupui dangte angin chak tak takin van sangah chuan a lo thlawk leh thei ta thin a ni.

“Khâm kovah te a cheng a, lung tohlawt hmun him takah a riak thin. Chuta tang chuan ei tur a bihthla a, a mit chuan hla tak a hmu,” tih thu Joba 39:28f-a kan hmuh angin Mupui chu kham chhawrdawh sang tak takah an tawm thin a, chung hmunte chu an tan chuan hmun nuam leh hmun ralmuang a ni tlat thung.

“Chau hnènah te chuan thiltihtheihna a pe thin a; chakna reng nei lo te chu a tichak thìn. Tleirawlte meuh pawh an chauvin an hah ang a, tlangvâlte pawh an tlu der ang: LALPA nghâktute erawh chuan an chakna an siam thar leh ang a; mipuite angin thlain an thlàwk chho vang a, hah lovin an tlan ang a; chau lovin kein an kal ang,” tih thu zawlnei Isaia 40:29-31-ah kan hmu.

"I kâ chu thil țhain a titlai thin a; Chutichuan i tleirawlna chu mupui anga siam tharin a awm leh țhin."

Sam 103:5.

Mupui nun hian awmze ril tak a neih vang a ni ngei ang, keini ringtute pawhin, “Mupui” ngei hi kan chhinchhiahna leh kan ringtu nun insiam that nan Lalpa'n min lo thlanfelsak ni. Nangni thil chik peih leh chhuizau peih deuhah, Mupui nun hi kan ringtu nun nen lo hmehbel ve chhin ula, ringtute nun insiam țhat lehna hmanrua a tan kan hmang thei hlauh anih chuan a ropui dawn em asin!!