Mut hun tha ber hi eng hun nge?
R. Ramnghinglova
Chaplain Christian Medical College Vellore
Tunlai Science & Technology thang duang takah hian, he kan thupui hi a pawimawh hle. Eng hun hi nge mut hun tha ni ang? Sap thufing chuan, 'Mut hmaa thawh hma bawk hi a hrisel e' an lo ti a. A dik awm hle mai. Tlai taka mut a, tlai taka thawh hi a hrisel lo hle a ni. Pathianin kan taksa a siam dan hi Medical Science thiamten an zir chiang zel a, thil mak tak an sawi chu pawn lam hun nen kan taksa hi a inzawm tlat a ni tih an sawi thin.
Kan taksa che vel zawng zawng hi hunbi fel tak hnuaia che tur leh hahchawl thin tura duan a ni a. Hei hi mithiamte chuan, 'Biological Clock' an ti. He Biological Clock hian mumal taka hna a thawh theihna tur chuan hunbi fel taka khuanu duan sa hi zawm a tul hle mai.
Mithiamte sawi danin, zan dar 11 atanga zing dar 3 hun chhung hi kan Blood Circulation hi Thin lamah a luankhawm hun lai a ni a. Thin hian kan taksa tana chaw tha a siam hun a ni thin. Hemi huna Thinin hna tha taka a thawh theih nan mut hah chawlh ngei tur a ni.
Zan dar 11-ah mut chuan darkar 4 chhung i thin tan hnathawhna hun i pe tihna a lo ni ang a; zanlai dar 12-ah i mut chuan darkar 3, zing dar 1-ah i mut chuan darkar 2, zing dar 2-ah i mut chuan darkar 1 chiah i thin hnathawh nan i pe tihna a nih chu.
Zing dar 3 hnu lama mu thin i nih chuan i taksa tihchakna turin i thinin hun a chang lova, eng eng emaw taksa hrisel lohna i hmachhawn thei reng tihna a ni. Zing dar 3 piah lamah hian eng ang pawhin mu tam mah ila, kan taksain mut a kham thei tak tak tawh lo!
Mut hunbi vawn fel hi kan taksa khawl hrang hrang tan hian a pawimawh em em a ni. Kan taksa chakna turin Biological Clock hian hunbi fel tak neiin kan taksa peng hrang hrangah hna a thawk a. Vawi khat mut that loh mai pawh hian a zavai hian a nghawng vek a, a pawi em em a ni.
Biological Clock-in taksa peng hrang hranga a thawh dan mithiamte sawi chu :-
Zan dar 11Pm - 3am - Thin (Liver)-ah
Zing dar 3am - 5am - Chuap (Lung)-ah
Zing dar 5am - 7am - Rilpui (Colon)-ah
Zing dar 7am - 9am - Pumpui (Stomach)-ah
Hetiang hi a nih avangin zan dar 11 atanga zing dar 3 hi mutna hun tha ber a ni a; zing dar 3 atanga dar 5 hi boruak tha hip tura insawizawi hun a ni a; zing dar 5 atanga dar 7 hi kan taksa atanga bawlhhlawh paih chhuahna hun tha, inthiar hun; zing dar 7 atang dar 9 hi kan pumpuiin chaw tha a mamawh hun lai tak a nih avangin ei leh in hun tha a ni.
Khawpuia chengte aiin Thingtlang a chengte an hrisel zawk fo. A chhan chu an mu hmain an thawh hma zawk vang a ni. Khawpuia cheng tam berte chu Television, Computer leh Hand set avang te, zan lama hnathawh avang tein mut hun an vawng thei lo fo. Hei hi a pawi hle mai.
Hlawh tam um avanga zan lama hna thawk thinte hian an sum lakluh tam tak damdawia inenkawl nan an hmang leh si thin. Taksa hrisel hi a hlu a, sum tam tak hen a ni.
