Damlai lungphun
HC Vanlalruata
Tunhmaa Mizo thalaiten india ram lemchang thiam zinga an ngaihsan em em ?hin Rishi Kapoor chuan hman deuh khan Prime Minister hmasa ber, Jawaharlal Nehru leh a thlahte chungchang na takin a sawi a. indira Gandhi international Airport chu entirna atana hmangin, an chhungkaw hming chawia hmun pawimawh hming an vuah nasa lutuk chu a sawisel a ni. A ni tak a, Congress Party-in india rama sorkarna an chan rei tawh em avanga Congress party hruaitu nihna chelh chhotuten an chhungkaw hming chawia thil hming vuah hi an uar mah mah a. Rishi Kapoor-a’n india ram mi ropui tak tak Mahatma Gandhi te, Bhagat Singh te, Dr Ambedkar te hming chawi chhan na a tlem lutuk tia a sawisel hi sawiselna awm tak chu a ni.
Mizoramah pawh hian hei hi kan dinhmun tho a ni. Mizo zingah hian tunhmaa pasal?ha ropui tak takte, tuna Mizoram lo ni ta - hetiang a lo nih theihna atana sat zauva humhalhtu kan lal ropui tak takte, Vailian lo do letna kawnga hnam tana nunna hlantu leh sapho hremna tuara tanina hrehawm taka lo tang tawh mi engemaw zat chawimawi phu kan nei a. Chu’ngho hming daih lohna tur leh ?hangthar lo la awm zel tur ten chawimawitlak an nihzia an hriat theih nan an hming chawi chawi tirna tur tam tak a awm ang.
Anni bakah hian, kan politician zingah pawh an hming chawia thil phuah phu tak tak an awm. Mizo hnam awi tleitu, thu leh hla lama kan mi ropuite, kan hnam nun leh hawiher sawi danglam dawrh khawpa thu leh hla lama kan hnam tiropuitute leh Mizoram tana kawng hrang hranga a tha zawnga thawh hlawk tak tak, thiamna hrang hrang nei pawh an awm nawk ang. Chutih rual erawh chuan fir deuh chu a ?ul thei hle ang a, ngaihdan inpersan tak tak a tam theih viau dawn avangin. A theih hram chuan a mipui mimirin kan pawm tlan theih tur thlan chhuah a pawimawh ang.
Min rawn ni ta sela chuan (tuma’n min rawn dawn hauh lo tih a chiang chungin) kan politician zingah chuan Pu C. Pahlira kha kawng siam chungchangah chuan a thawk tha filawr hle tiin ka ngaihdan ka hrilh ang. Thuneihna a chelh lai dinhmun ngaihtuahin khati khawpa politician huaisen, taima leh a taka hnathawktu kha ngaihsan loh theih a ni lo. Amah vang liau liauva inkalpawhna kawng tha kan neih phah zozai hi ngaihthah chi a ni lo va, "CP Road" an tih mai ho hian a ropuizia a lantir a ni. Ani ang politician hi nei ngah ila chuan vawiina Aizawl khawpuia buaipui tham traffic tawt kan sawi mek hi a nep hlein a rinawm a ni. lirthei intlansiak tih vel hi kan buaipui chiam chiam lo mai thei.
Pu Laldenga kha Mizo politician zinga mi ropui ber a nih loh pawhin a pahnihna chu a ni bik lo vang. Zalenna an sual chungchang leh a mimal ropuina hrim hrim, a thusawi thiamzia leh mi a hneh theih dante chu dah ?ha ta i la. Mimal zalenna thuthlung dik tak leh dan rorelna chungchanga min zirtir zozai kha pawm ila chuan, Mizo hnam tan hnam changkang nihna a thlen nghal thei ang. Chumi piah lamah chuan, hmasawnna atana a thawh hlawkzia kha ngaihnep theih rual a ni lo.
Lengpui Airport hi tuna kan Chief Minister Pu Lal Thanhawla hunlaia siam zawh, amah ngei pawhin nasa taka tha a thawhna a ni chungin a tak a lo chan theihna atana a bulthuma thawh hlawk ber chu Pu laldenga kha a ni tiin, a hrechiangte chuan an sawi a ni. Mizoram hmasawnna atan a pawimawh tih hre chianga sorkar laipui vau daia pawmtirtu a ni an ti. "Laldenga Airport" tia vuah ni si, tuma’n an sawi lang ngai zui ta lo hi chu a zia lo ngawt mai. Aizawl Ramhlun kawngpui huaisen taka a tihzauh hretu kha an tlem ta nge,helai kawng zau tha tak hi Laldenga Kawngpui/Road tihna chang kan hre lo hi chu a pawi ngawt mai bawk.
Tunhnaiah hian, hmanlaia Mizo lal leh mi langsarten, "Damlai lung" an phun ang deuhvin ram hruaitu la damte hming chawia thil phuah kan ching thar hle mai a. Kan ching thar mai pawh ni lovin thenkhat mit timim khawpin kan uar ta duar a nih hi. Hming an chawi chhan kan ram hruaitute hian an phu lo em em e tih lam ai mahin; a zah theih lohthlak zawnga lo ngai an awm pawhin dem viau theih an ni kher lo vang. Mahni tawtawrawt ham ring viaute hi mi’n an ngaisang viau lem lo tih hi chu hai rual ni lo va, hruaitu liante tlawn nana an hming chawia thil hming phuah chingte pawhin ngaihsan an hlawh zui vak chu a rinawm loh.
MNF sorkar lai khan kan politician hlui langsar zual fam chang tawhte hming chawiin Bus Terminal, Truck Terminus leh thil dang dang kha an phuah chiam mai a. An hming phuah chhante hi an party mi ni lo leh ni ngai reng reng lo, tunhma phei chuan an mil loh tak takte an ni. Hetianga an ti hi an fakawm ang reng ngawt mai Mahse, an party dintu leh Mizo hnam thinlung chhemalhtua an pawm "Hnam Pa" ti hiala an vuah Pu laldenga hming chawia thlawhna tumhmun hming an phuah, official taka an sawi ring zui ngam lo erawh kha chuan an huaisenna tlakchham zia a tilang a ni. Politician hming chawia hmun pawimawh hming an vuah dan pawh hi ti puat puat an ang.
Mizo hnam tana thawh hlawkte hming chawia Mizoram chhunga thil pawimawhte kan phuah dawn hian fimkhur leh fir taka kan tih a ngai a. inrawn zau pawi lohna tak pawh a ni awm e. A phu hi chu mipui mimir hian kan hre mai a. intlawnna vang mai mai emaw, thuneitu nih avanga tute emaw ten mahni hming daih loh nana an inphuah mai mai ang chi hi chuan a takin mi thinlungah awmze thuk a nei thei lo. Chu ai chuan, a phu dik tak hming chawi chhana thil kan tih hi kan hnam zahawmna khawih pha a ni tih hria ila. Chutih rual chuan, zah theih loh em avanga "Damlai lung" phun chiam leh hruaitute tlawnna atana an hming chawitir chiamte erawh hi chu i ti lo ngam ang u. Hetianga thiltih hian hnam a tizahawm ngai hek lo.
Kan hnam hian kan tel vena political party leh pawl atchilhna thinlung tel hauh lova mi ropui dik tak ngaihsanna chang kan hriat hi a pawimawh em em a. Chu chu ngaihsan tur dik ngaihsanna thinlung (value system) khawih leh thalaite rilrua thil dik leh kawng dik kawhhmuhna a nih rualin, kan hnam hma lam kal zelna tur pawh hril pha tur a ni tih hi i theihnghilh ngai lo vang u. Kan hruaitute pawhin an hnathawh ?hat hi damlai lungphun langsar leh zahawm zawk a ni tih hria se la, thuneitu nih vang emaw, hotute tlawn nana thiltih mai mai hi sim a hun hle.
