Inkhawmpui thlirna
Thuamtea Khawlhring
Mizote hi inkhawmpui uar hnam tak kan ni awm e. Khawvel awm chhung chuan pawl hrang hrang hian inkhawmpui hi kan buatsaih chho zel dawn niin a lang. I han thlir thuak thuak teh ang.
1. Hun hman dan : Inkhawmpui liana thil pawimawh tak mai chu, hun hman thiam hi a ni. Pawl hrang hrang inkhawmpui hi han thlir ila, eng pawl mah hian hun kan hmang thiam thei tak tak lo niin a lang. Zan dar 7 atanga zanlai dar 12 thleng rawk emaw, zing lam dar 1 thleng lai maia hun han hman te hi chu a rapthlak lam mah mah a ni. Sana ban vai hian milian leh mi te pawh, tumah a nghak si lova, ni hnih emaw ni thum emaw lek chhung hian thil tam tak tih hman kan duh thin bawk si a, hun hian min daih seng lo a ni ber awm e.
1.1. Mipui sing tel thut theihna Pandal lian tak chhungah hian dawhsan (stage) pahnih siam mai a tha. Chu chu hun hman zai dan kawng awlsam tak pakhat a ni. A tul chuan banner pahnih pawh siam mai tur. Dawhsan pakhat atangin a kaihruaitu (Chairman emaw mi dang emaw) khan a kaihhruai laiin, a dawt leha chanvo nei turte kha dawhsan pakhat zawkah an lo inrem fel thap thei ang. Ngaihtuah zui ang u.
2. Dawhsana thu tur chin : Kohhran inkhawmpui lianah emaw YMA inkhawmpui lianah emaw hian, tihtur chanvo engmah nei hlei lo te pawh hi dawhsan (stage)-ah kan thu tlim hmur thin. Hei hi a tul lo ngawt mai. Miin tihtakzetin an chanvo (mal zai, group zai, drama, etc) an hlen chhuah laiin, kha chanvoa tel ve reng reng lo te kha engtiklai pawhin an lo lang ve reng thin a, a ti hmuhnawm lova, a boruak a tiheng thin. An lo inbia a, an tho a, an chhuak a, a then an lo lut a, a ti tuiawm loh zo vek a, a ti hmuhnawm lo thin. Dawhsanah hian Chairman, Speaker, Host tih bak thut loh ngam a hun ta.
2.1. Dawhsan (stage)-ah inti milian taka thu thlim hmur an awm loh chuan, dawhsan kha a ruak huai dawn a, chu chu hman tangkai tur a ni. Hun khawhral loh nan, a dawt leha chanvo nei turte kha dawhsan ruakah chuan an lo thu sa thap thin ang. In koh chawpa rawn inzui duah duah chhung hun paih ral kha a bo tawh ang.
2.2. Pawl/kohhran hruaitu pawimawh chinte chu mipui zingah an thu ve mai ang a, mahse an thutna tur chu a tlar hmasa lamah a hranpa bik taka buatsaih theih tho a ni. A thu hrimin, mipui zinga an thut ve avang hian an nep sawt lo va, an ropuina kha a bo chuang lo. An ngaihsanawm zawk mah.
3. A hun chhung : Kan ti ta vai vek bawk a, inkhawmpui lian hi chawlhkar khat chhung tal ni law law se, a fel fai zawk a ngem? Thawhtan atanga Inrinni thleng hi ni mai se a tha zawk em? A hun rei zawng hi chu nguntaka ngaihtuah chi a ni ang. Hun rei lo te chhunga belebut taka inkhawmpui hi a tha reng mai kan ti dawn nge, a hun chhung hi rei ta deuh zawk se, hnawhsarum lutuk lo hian kan tih theih phah a ngem? A hun chhung rei chuang si lo, felfai taka in manage theih kha a fuh ber maithei.
4. Hun ren thiam : Thusawitu thenkhat hian hun bituk chhung an ngaipawimawh duh lo fo. Minute 10 hun pekah minute 20/30 lai thu sawi ching an awm. Lemchan entirtute pawh hian hun hi an hmang rei mah mah niin a lang thin. Zai tura sawmte hla pakhat chauh sa tura beisei an nih laia hla pahnih sak ching an awm ta fo bawk mai. Thuhmahruai sawi ve duah phei chu sim hmak chi a ni. Pawl inkhawmpui hi concert a ni lova, pawisa chibai (cheng sawm emaw te lek lek) hi a tul lo viau bawk. A zaia te khan hla thu an theihnghilh phah fo a, an music track-in a kalsan fo bawk. Va chibai kher hi a ropui hran lo ve.
