Lushai Territory (Lusei Ram)

Keihawla Sailo

British hovin, “Lushai Territory,” an lo ti bik thin a. Lusei ram ni si, chenna khua awm mang si lo, amaherawhchu, an Sai ram chhuahna, an ramvahna leh an chaklakna ber ngawpui a ni thin tih hriain, chu chu zahsakin, “Lushai ram (Territory),” an lo ti kher kher bik thin a ni. Chu chu,Calcutta Gazette Chanchinbua an ziak dan a ni. Chutianga ram ruak anga lang chu, “Inner Line Forests Reserve,” tiin,Luseiho tan bik an humhalhsak tlat thin a ni. Chu chu, 1875 vel lai khan a ni.

Hringchar (Silchar) vel chu Kachari te awmna hmasa ber niin, kum 1809 khan, an Lal (Raja) chu, Khrishna Chandra a ni a. Meitei hote nen intihbuaina an nei deuh reng thin a. Cachar phai zawl zau zawk chu Meiteiho awmna a ni. Tun thlengin Meiteiho chu an la awm. Kum 1819 khan, Meitei unau pathum, Charjit, Marjit leh Gambhir Singh te chuan, Kachari Lal nen ram chin chungchangah intihbuaina an nei a. Chutihlai chuan, Burma ho an rawn inrawlh thuk hle a, Cachar phai chu an ram angin an rawn chuh ve ta mai a. Mahsela, British-India Sawrkar a rawn tlazep ve leh a, Burma rawn inrawlh chu rem an ti lo va. Kachari Lal, Khrishna Chandra thlaktu atan an Lal chhungkaw zinga mi, Gobind Chandra chu Lal atan an dah a, ani chuan kum tin Rs.10,00/- British hnenah chhiah pe ve turin an phut thung a.

Gopind Chandra chu kum 1830-ah thah a ni a. Roluahtu tur a nei si lova, chuvangin, a ram chu British-in 1832-ah British Crown hnuaiah an dah ta a ni. G.Chandra hun hnuhnung lamah chuan, a thuihruai, Officer pakhat chu, North Cachar-ah independent kingdom neiin a thu a. G.Chandra a lo thih chuan, Lal angin awm ngheh a tum a. Chu chu, North Cachar lo pian hlen takna dan chu a lo ni ta. Mahsela, British hovin an awih mai lova, amah a chak lovin, Naga-ho lo lut chu dang zo dawnin an hriat loh avangin, British-in North Cachar chu 1854-ah an la nghet ta zawk a, a chhungte chu pension an pe thung a ni.

Hringchar (Cachar)-ah Kachari an awm laiin, Luseiho nen inriin, Luseiho chuan Silchar atanga mel 10 vel thlengin ram an va nei a. Chutih lai chuan Kachari leh Lusei inkarah innghirnghona a awm hriat a ni lo. Tin, British leh Bengali hote pawh an la lo lut ve map lo va, Cachar phai chu, Kachari te, Lusei te, Kuki te, Meitei te chenna ram a ni thin. Kachari hote chu, Bengali leh British hovin an hnawt tiau zo ta a ni ber mai. Tichuan, Silchar-ah chuan zawi zawiin Bengali an lo lut ta zel a. Leilette siamin, British hovin thingpui huante an siam thung a. A mi cheng hmasate chu an hnawt tiau ta zel mai a ni. (‘Frontiers And Overseas Expedition From India’ tih bu, phek 198 para. 2 en rawh).

Kachari chauh lo pawh, Zofa hnam chi hrang hrangte pawh min hnawt tiau chu a ni ta ber alawm! Dholai lui atanga Vairengte thlenga Lushai Territory ni thin na na a, a chhunga Vai awm pun nasat tawh dante han en hian, Lushai Territory atangin; Kachari ho ang chiahin, min umtiau vek tawh a ni ber alawm. Chumi chhungah chuan an lut hum hum a, a ram neitute erawh lut ve tawh lem hek lo i. Hei hi, kan ram buai lai,1966-86 buai lai denchhenin a zualkai a ni. A ramri an duh ang angin an letling a. Kum 1875 vela ramri, 1933 tih ang vela kham that leh kha British leh Bengali ten leilet leh thingpui huan siam an duh avanga siam danglam an ni. British-ho ngei pawh khan min khawngaihna chin nei tam viau mahsela, an tanghmasialna zawn an ngah avangin, chu tak chu keini’n kan lo tawrh phah ta zel zawng a nih hi. Kan lal leh pasalthate ramvahna leh chaklakna ber chu British-ho leh Bengalihoten min luahlan ta a ni.

Bhaga Check Gate khu Dholai bul deuh lawka awm thin kha, Vairengte lamah an sawn ta daih a. Dholai bul lui erawh an sawn thei lul lo a nih rih khu. Kan ram chhung, Lushai territory chu, Vaiho tualchaina a lo chang zo ta a ni. “Assam Tribal Affairs Department Secretaryin, 1953-a Order a siam ang ngei khan, Lushai Territory chhunga Vai awm zawng zawng khuan, an chhiah pek loh tlingkhawm zawng zawng Mizoram Sawrkharah pe ngei rawhse,” tih hi kan au hla tur a ni. Inner Line Pass nei lo phei chu hnawhchhuah vek awm tak an ni zawk. Kha daih kha a ni asin!

Hei hi sawi theihna huang chu, UNO a ni zawk. Assam a inhnukdawk duh bau lo a nih si chuan,UNO-ah zualko thei kan ni. UNO 2007 Thupuan Chang 26-ah chuan, “Tualto Hnamte’n an ram leh a chhunga hausakna chungah Dikna Chanvo an nei,” a ti alawm Ram thlalatute (Surveyors) pawhin thla la dawn se, harsatna an neih theih tur chu, eng tik kum atanga ram thlaklakna kha nge en tur an nih? Tih chu a pawimawh lai ber a ni ang. Inrem theih nan, ‘Status Quo Ante,’ tih chu a ni tlanglawn ber hmel a ni.

‘Status Quo Ante,’ chu, ‘Tunhmaa awmdan pangngai,’ tihna a ni mai a. Tunhmaa kan awmdan pangngai thin chu, khu lai ram khu, ‘Lushai Territory,’ tih a ni mai a. British hun lai khan, chutianga ngawpui awm chu, enkawltu bik awm a ngai a, Forest enkawltu atan, British ho khan, Assam Forest ho chu an lo hmang mai thin a. Chhiah an dawn atanga zaa 70 chu, Superintendent, Lushai Hills hnenah chhunglutin, zaa 30 chu, a enkawl man atan an la ve thei chauh thin a ni. District Council kan lo neih ve chinah chuan, Forests lam enkawltu bik, Forest Department pawh an nei ve a. Chu chuan Assam Forest Department hna lo thawh thin chu, lo lak zui a, lo chhunzawm ve daih tawh tur kha an ni a. Chutianga chuh nachang reng reng an lo hre lo kha, an lo fin tawk loh vangah a ngaih loh theih loh a ni.

Kan sawi tawh angin, Assam Tribal Area Secretary chuan, “Kum 1953 khan, chhiah reng reng chu, District Council kutah Assam Forest ho chuan an pe lut tawh ang, Aizawl Borhsap hnena pe tawh lovin,” a ti miau mai a. Chu tihdan pangngai chu, ‘Status Quo Ante’ chu a ni mai. U.T. Dan, Dan chhemi khan a thiat ngawt thei lo ang. Chu chu kan tanfung ber tur a ni.

Kum 1875 hun laia ramri an lo siam kha, a bul ber phur chhuaktu a ni a, kha kha kan phut tlat tur a ni ang. A ram neitute remtihna la hmasa miah lova, 1933-35 tih vela ramri lo siam danglam leh ringawt kha, a ram neitute chuan kan pawm ngai tur a ni lo. Kan ram (territory) chu min pe let vek tawh tur a ni ringawt mai. Chu chu, ‘Status Quo Ante,’ chu a ni mai. Kan lal, Suakpuilala te nena Sanad, Inremna,“ Sa Ui Tan,” tia an lo hriat thin kha kan changchawi ber tur a ni. Sanad awmzia hi, Inremna anga ngaih theih, amaherawhchu, Supreme Court rorelna ang chuan, Inremna ni lovin, thuneitu sang ber (Crown)-in inremna tur atana a siamsak ang ang kha a ni. 

Chu pawh chu lo ni tehreng sela, kan tan chuan pawm zui zel a him ber ang. British ho ngei pawh khan, an duh an maka  an tih zawng zawng kha erawh, a dik lohna lai na na na chu, UNO lamah sawi zui ve theihna kan nei alawm le. Inthlanna aiin, heihi engto berah i nei mawlh teh ang u.Inner Line Pass hi, a hmanna tur dik tak chu, hnam dangte Inner Line Reserve chhunga an luh phalna atana hman a ni zawk tur a ni a. A tirah Zofate luh phalna petu atan, Slilchar D.C. thuneihna an pe a, rei lo te. Mahse, chu chu dik theiin an hre lova, Pass petu atan Lushai Hills District Bawrhsap an ruat leh ta a. A ram neitu dik tak kha, Pass petu tur a ni reng a. Awm ngheh chu sawi loh, rei lote hun chhung atana Pass pek thin tur anga ngaih a ni lek fang a ni. Chu I.L.P. chu hmangin, Inner Line Reserves pawna Zoram khaw dang dang tlawh nan pawh kan pawm ta vek mai a nih hi! A dik ve tho thei bawk e.

Inner Line Pass hi pek dan phung leh a hman dan tur dik taka hmang ta lovin, Aizawl, Lunglei leh hmun dang dang tlawh phalna emaw kan lehtih ta daih a. Chutiang tur atan chuan, Passport hmanga Visa ngai a ni zawk. An tan chuan, Zoram hi foreign a ni tlat alawm! Kan man em? I la chian loh fo leh, ‘Thliarkar Dang Ngaihdan Dek Che Tham,’tih bu, Samthang rama Puklehlanga February ni 23, 2018-a tlangzarh kha chhiar ve mai teh. Thliarkar dang chauh ni lovin, i ngaihdan pawh a dek che ve mahna le!! Inner Line Pass erawh Inner Line Reserves chhunga luhna tur atana Phalna a ni lek fang a ni. Kha daih kha a ni asin! Phalna pe theitu kha Phalna neitu aiin a lal zawk. Keini chuan a nihna pawh hre chiang lovin, I.L.P. kan pe mai mai a. A duh duhte pe turin, Bairabi-ah phalna pe  turin, Kolasib D.C.-in Officer a tir thla zawk chawn chawn mai te hi zawng, a nuihzatthlak lam deuh chu a ni e.

He Bairabi bul, “Zo Phai” kan tih tak mai buaina hi, Delhi-ah ni lovin, a sawifelna tur dik tak zawk chu, Geneva leh New York a ni. Khulai ngawpui chauh khu ni lovin, Zofate zawng zawng chenna ram chungchang pawh hi, sawi hun lai tak a ni. April ni 14-30, 2018 hi New York-ah sawi theihna hun a ni a. Kan sawi dawn em? Sawi turin kan kal dawn em? Kan kal loh chuan, a ziaktu hi dem miah suh u. Hei hi Zofate zawng zawng hriat atana Thupuan a ni e. Thliarkar Dang Ngaihdan mai ni lovin, I ngaihdan mawlh mai kha, dek che se kan va ti em! Kan tan hun a tlai mai dawn, a tlailam mah mah a ni zawk.