Social media tuiah kan cheng lu deuh em?

PL Liandinga

Thu tul sawi nan biakhlatna a lo chhuak a. Khawvel miten tangkai takin an hmang a. Hnathawh a awlsam phah a, thlaphanna turah thlaphan lohna min thlen a, chinchang tul kan inhrilh thin a. A va hlu em!

Biakhlatna ken kual theih, Mobile phone an tih a lo chhuak leh a. Chu zet chuan kan nun a vawrh bingbilet ta fe mai. Kawng hrang hrangin kan hmang a, tangkaina mual a tam khawp a. Tangkai lohna mual erawh a nei ve tho mai.

Thihna thuah te kan hmang tangkai a, a lawmawm em em a. Mahse thenkhat hi chuan an ti lutuk ve deuh chuan a lang. Mitthi chungchang thehdarhtu, zualko hna thawk mai thei hi kan tam viau mai a. A chang phei chuan thi chiah lo te pawh thi thanin kan thantir a. Group-ah te kan han tarlang a, Group thenkhatah phei chuan kutzungpui hi a tlar bung mai a. Kan hawihhawm lutuk nge a lo tul ta viau zawk tih hriat pawh a har.

Khawvel thil reng reng chu pakhat kan uar chuan a dangin a tuar chawk a. Mobile handset bih nana kan naute hun hman han en hian kan tawrhna hi a la lang chhuak zel dawnin a rinawm. Reilote emaw tih chhungin hun a liam duak duak a. Thu thar leh fiamthu tharlam buaipui reng reng hian mi tam tak hi chuan lehkhabu chhiarna hun hi an nei ta hauh lo niin a ngaih theih hial.

Mobile lamah chuan thu tak tak leh ziktluak deuh han dah chuan, ‘A sei em mai,’ kan ti ta zung zung mai a. Amah ngau ngau chuan dik pawh a dik. Mobile handset hmanga chhiar atan chuan thu sei tak mai chu a remchang chiah lo. Mahse a pawi ta ber laia chu thu tak  tak inziahna lehkhabu kha kan chhiar tlem phah ta tlat a ni.

Tunlaiah chuan eng lehkhabu mah chhiar lo thalai lehkhathiam fu fu an awm ta nual mai. Thu tlanglawn deuh leh midang han hnial maina tur tawk vel chu an hre fur mai a. Mahse thu laimu leh thil awmdan te chu kan kheuh chhuak pha lo a ni ngei ang, kan Quiz Competition han en hian kan thalaite hi hriatna lamah an beng a var tawk lo deuhvin a lang. TV lama vaihovin an han ti ve te hi chuan an hre nangiang mai.

Lehkhabu tak tak chhiar tlem ta chuan kan Mizo nunphung te, kan Mizo khaw hming te, kan Mizo khawsak dan te kan hre tlem ta viau mai a. Mizo tawng ziahdan chungchang pawh hre lo fe fe kan awm nawk a. Tlem lai deuh phei kha chuan Mizo tawng chhumbung ziahdan a lo chhuak a, sipel kim lovin kan ziak vak vak mai a. Naupang mawl zual thenkhat phei chuan exam chhan nan te an lo hmang hmanhmawh lehnghal a. Tunah hi chuan hawrawp kim lo leh dik lova kaih sawih hi chu kan ngaisang lo tlang ta viauin a lang a, a reh leh ta. A lawmawm khawp mai.

Kan ti ta lutuk deuh mai awm mang e tih a ngaihtuah leh theihna chu thil awlsam lamah kan intlansiak nasa lutuk deuh em maw ni a tih theih. Tam tak chuan Committee Meeting kohna te hi khawi Group-ah emaw an han dah tawp a, an duhtawk ta hial. Chu chauh ni lovin kan ngaihtuahna kalphung kha thui tak a hruai a, ‘Heti hian a awlsam zawk alawm,’ tih hi kan changchawi ta viau mai. A dawt leha tihtur engmah nei leh si lo hian uluk lo leh nalh mang lova thiltih a, a serh thian thil tih kan chin phah em aw? te ka ti rum rum. Thawhrimna te, beihna te, inthununna te, tawrhchhelna te kan neih tlem phah lo maw? tih a awl. Mihring hian a nuam lam kan zawng ngar ngar a, mahse a nuam lam ngawt hi chuan mihring nun tha leh fel a kai chhuak zo lo. Awlsamna reng reng hi hun tam zawk kan neih theih nan leh hna kan thawh tam zawk theih nan a ni a. Mahse kan hun neih tam zawkna (addition time gained) kha kan hman tangkai leh si loh chuan awmzia a nei lo a ni.

Naupang tam tak chuan an phone hi an bih reng mai a. Chu chauh ni lovin thenkhat phei chuan game khelh nan te an hmang a. Darkar hnih darkar thum game an han khel a, thildang ti hman lovin an han awm a. Taksa insawizawina awm lova chutianga mahni a awm chu naupang te tak te, a Tea Set nena lungawi taka inkhualtelem nen a inang thei awm e. Phone hmanga khelh a nih tak avang khan changkang deuhvin kan han hre tlat lehnghal a.

Thil hi a lutuk lai tak mai hi a tha lo lai chu a ni duh khawp mai. Chaw tel lovin kan awm thei lova, chaw ei puar lutuk hi mihring tan thil hrehawm ber pawl niin an sawi. Mut theih loh, din theih loh, natna anga chhiar theih si loh, dinhmun hrehawm ber pawl a ni. Thil tha pawh hi a lutuk chu a tha thei lo. Kan inbiakna phone pawh hi a remchangin a tangkai a, a tih theih zawng zawng tihpui tum hi chu a tha lovin a lang.