Enge Politics chu?

Zohmingthanga Pachuau

Harold Dwight Lasswell, American Political Scientist chuan Politics chu- Who gets, What, When and How tìin a hrilh fiah a. Heti zawng hian sawi fiah han tum chhin i la.

David Easton-a, Canadian Political Scientist khan Politics a hrilh fiahnaah khan a hmasa berah chuan mihring, pawl leh khawtlangin kan mamawh leh kan duh thil hlû [Value] a awm thù a sawi a. Kha thil hlû [Value] tho kha Harold Dwight Lasswell-a Politics hrilh fiahnaah pawh hian a thu lai mu a ni.

Entir nan: Thil hlû chu chi hrang hrang a awm a, heng:- Budget te, Thu neihna [Power] te, Sum te, Kawngpui tha te leh khawtlang leh pawl ang tea kan mamawh leh tùlte hi thil hlû [Value] chuan a huam vek a ni.

Tichuan, chû thil hlû [Value] kan tih chu tute'n nge nei, tute'n nge chang? Khawi khuain nge nei, khawi khuain nge chang? tih zawhna Who gets? hi a lo piang hmasa ta ber a ni. Mizoram State Assembly Budget Session-ah Finance Minister-in Budget a pharh thin a. Chû a budget pharh chu Budget Estimate [BE] a nih avangin mipui chhiah tling khawm atang te, Central atanga dawn leh pûk tur atang tea kan beisei Pawisa a ni. Chû chu Mizoram mipui zawng zawng tana kan thil hlû, insem tur, chan ve tur, a tùlnaa kan hman ve tur [Value] chu a ni. Thingtlang kil khawr ber ber pawh he Value hian a tuam phak vek avangin Mizoram Sawrkar Budget a ni. Chu Budget chu Department hrang hranga sem sawm leh niin, Kawngpui siamna tur te, Kawlphetha siamna tur te, Lo neitute leh kut hnathawktute hmasawnna turte a ni. Chûng zawng zawng chu Easton-a te, Lasswell-a te'n Value a lo tih, ram mipui chan tur thil hlû chu a ni.

A nih chuan tu nge chû thil hlû [Value] chu nei?

Who gets? tih zawhna hi Lasswell-a chuan a zawt hmasa ta ber reng a ni.

Heta tute nge/ Who? a tih tak mai hi Mizoram Politics-ah hian tute nge ni ang? Party mi leh sate em ni? Minister biala khaw lian zual deuhte sawina em ni? Opposition bialte hi hê Who hian a huam ve em? Opposition bial akara thingtlang lehzual khuate hi hê Who hian a huam ve ngai tak zet em? Tute pawh chu lo ni se, hêng tute nge a tih [Who?] hian eng nge [What] an dawn a, eng nge [What] an hmuh? An khua leh vengin eng nge [What] an hmuh? Anni bialin eng nge an dawna an hmuh? What? tih zawhna hi a lo awm piang leh ta a ni. Aizawl khawpui kawng a mam purh a, Mizoram hmun dang kawngpui a tha em? Thil hlû [Value] kan tih kha Mizoram mipui tana dah a ni vek si a. Minister bial leh Opposition bial a danglam lutuk em? Thingtlang leh khawpui zirna sikul te hi a inthlau lutuk em? Hmasawnna ruhrel [Infrastructure] engkim mai a inthlau lutuk em? Tute khua leh vengin [Who] nge chûng kawngpui tha leh Zirna in, hmasawnna ruhrel lian leh infiamna hmun hma tha [What]-te chu chang? Who Gets? What? Mizoram Budget-a Crore tam tak an dah hran [Allocate] kha tute'n nge insema tute'n nge chang?

Engtik hunah nge? Engtik laiin nge? When? tih zawhna hi a lo piang leh ta a ni.

Chûng hmasawnna ruhrel lian tham [Infrastructure] te chu engtik hunah nge thu neitu leh a thil ti theite chuan an pèk thin? Inthlan hma kumin nge? Inthlan hnuah? Election dawnah Alkatra rim a nam zual thin nge? Fur laiin nge thal laiin kawngpui an siam? VC/ LC inthlan dawnah nge, AMC inthlan dawnah? MLA inthlan dawnah nge MLA inthlan hnuah [When?] tih zawhna hi a lo piang leh ta a ni.

Tichuan, engtiangin nge? How? tih zawhna hi a lo awm leh a. Engtiangin nge [How] chûng thil hlû [Value] kan tih [Infrastructure lian leh tha]-te chu thu neitute'n an pek chhuah thin? An khawtlang mamawh dan azirin nge, kan party VC/LC an nih leh nih loh azirin? Dan hmangin nge, induhsakna hmangin? A tlatlum leh thil ti theite vangin kan inpe nge tla tlum lo mah se an mamawh êm avang zawkin chû Value chu kan pek chhuak thin? Minister bial an vanneia Opposition bial an vanduai zel mai nge? Opposition nih tawh sa nak alaia khaw lian lo leh hmasawn vak lo tan chan a awm ve thei meuh lo zawk nge? Engtin nge Easton-a te, Lasswell-a te'n Value an tih hi kan sem sawm thin tih zawhna hi inzawt chungin kan ram Politics leh State dang politics hi kan khaikhin ve fo pawh a hun tawh khawp mai.