Theological Education leh Mizo thalaite
Rev. Vanlalthlana
Theological Education tih hian, a huam zau zawnga sawi chuan, Sunday School pawh hi a huam thei vek awm e, mahse tun tumah hi chuan Theological School/College/Seminar-a Pathian thu zirna chungchang hi kan sawi ber dawn a ni. Mizote hian Pathian thu kan duhin Pathian Thu zirna lam pawh kan ngaisang a, zir tur pawhin kan induhsakin Theological degree neite pawh kan chawimawi thiam hle. Amaherawhchu Pathian thu zirna kalhmang leh zia kan hriat dan te, rinna leh thlarau lam nun chawmna atana hmun kan pek dante ngaihtuah erawh chuan theolocal education kan hriat thiam danah hian siam dik leh inzirtir ngai a awm vein a lang.
1. Mizorama Pathian thu zirna leh a zir chhakte : Mizote zingah theological education hian hmun a luah hma hle, kohhran upa pawh kan la neih hma - kristian zawng zawng pawh 45 chauh an la nih lai, kum 1901-a Aizawla Sunday School neih tan atang khan kan hmelhriat tawh ti ila a sual awm love. Chuta tanga kum 6 hnu lek, 1907-ah Rev. D.E. Jones (Zosaphluia) chuan Pathian thu zirna (Theological School) a din a, mi panga Thangkhuma, Hauchhunga, Rosema, Dengruma leh Taitea te chu kum 3 course theology zir turin an lut nghal a. He Pathian thu zirna hian hma a sawn zel a, kum 1964-ah L.Th zirna-a hlankai niin, kum 1971-ah B.Th zirna hawn a ni a. Kum 1994 ah phei chuan BD zir theihnaa hlankai niin kum tin 30 vel zir chhuak an awm ziah a, kum 2002 atangin Christian Theology Department-ah M.Th zirna hawn tan a ni bawk. Tunah History & Missiology leh New Testament-ah te M.Th zirna hawng tura hma lak mek a ni.
He College bakah hian Baptiost kohhranin kum 2000 atangin Academy of Integrated Christian Studies (AICS) Aizawlah an din a, B.Th leh BD zirna hawn gnhal a ni bawk a, mi engemawzatin an zir chhuak tawh a ni. Heng Mizoram chhunga Pathian thu zirna bakah hian India ram hmun hrang hrangah Mizo engemawzatin Pathian thu an zir a, Mizoram chhunga zir tam tyakin India ram hmun dangah leh Foreign-ah degree sang zawk la turin an zir chhunzawm bawk a ni.
Theological Education-in kan ram kohhran leh khawtlang nuna hnuhma a nieh hi kan sawi seng awm love. Mizo Pathian thu zir chhuak zinga 80% vel hi kohhrana inhmang, rawngbawl hna leh roprelna lama a kul a taia tang zuite an ni. Kohhran huang chhungah mai ni lovin, khawtlang nun siamthjatna leh ram rorelna khalh ngil kawngah pawh engemaw chenah huvang an nei ti ila a sual awm love.
2. Zir dan kalhmang leh Mizoram zir theih Course te : Mizoten theological education kan hriatthiam dan ber chu rawngbawl tura inbuatsaihna ni berin kan ngai a, chuvangin Pathian thu zirte pawh ‘Pastor hna zir’ tiin kan sawi thin. Chu chu Mizo Pathian thu zir tam berte zir chhuahna Serampore Affiliated College-te kalhmang pawh a ni. Serampore kalhmangah hian B.Th leh B.D course te chu rawngbawl tura inchherna (ministerial formation oriented) anga duan leh kalpui pawh a ni reng a, hei hian ;academic’ lam a ngaihthah tihna zawng a ni chuan glo. Kum 20 vel kalta atang phei kha chuan khawtlang nunhona leh ni tin khawsak nun peng hrang hrang tawk zawnga Pathian thu kalpu leh hrilhfiah tumna lam uar thar a ni a, politic boruak inlumlet te, economic lama harsatna leh hmasawnna chungchang te, vantlang nunhona lama mipui nun nghawng thil thelng thar zelte hi theological education chuan a ngai pawimawh ta hle a ni. Entirnan - tunah hian HIV+ leh Drugs Problems chungchangte hi B.Th leh B.D zirnaa subject pakhat anga tel ve rawtna a awm mek a ni., Chutih lai chuan kohhrtan mal thurin leh kalhmang zui bik awm chuan glovin, protestant tradition chhunga kohhran hrang hrangte zia leh kalhmang huapzo (ecumenical) tura heng degree course te hi buatsaih a ni a, Roman Catholic kohhran rin dan leh kalhmang tlangpuite pawh a huap tel tho mai. Amaherawhchu Mizorama Pathian thu zirna kan neih chhunte hi enkawltu leh neitu bik kohhran nei an ni bawk a, zirna kalpui danleh syllabus kalhmangah ‘ecumenical’ zia zui inti mah ila, khawvel ram danga zalen taka Pathia thu an chhui zaunaa critical study ang hi kan nei tawk lo niin a ngaih theih awm e.
Zir dan kalhmangah mi tam takin Theological College-ah hian Bible hi a bul atanga a chang indawta zir emaw an ti thin, chutiang chu a ni hauh lo mai. pathian thu zirnaah hian Branch/Discipline hrang hrang - Biblical (Thuthlung Hlui & Thar), Christian Theology (Thurin lam), History (Kohhran chanchin), Ministry (Counselling, Homiletic, Education etc), religion (Sakhaw chanchin) etc, tia then a ni a, heng then chhungah hian paper /subject engermawzat a awm theuyh hlawm a, B.Th ah a tlangpui deuhva zir a ni a, BD ah chuan chipchiar deuh zawkin zire a ni thung. M.Th ah chuan specialized-na tur Branch /Discipline bik chauh zir a ni a, Doctorate level-ah chuan specialized-na Branch chhungah mahni tuina Area bikah research beih a ni thung. Theology zirnaah hian text bu bik a awm meuh lo. Branch pakhat chhunga paper/subject khatah thupui (topic) hrang hrang a awm a, topic pakhatah pawh lehkhabu engemaw zat chhiar a ngai thin.
Mizoramah hian BD leh M.Th (Christian Theology) degree course zirnate hawn a ni a, BD hi academic degree course a nioh laiin rawngbawl tura inbuatsaihna (minsterial formation ariented) anga kalpui a ni. M.Th erawh diswcipline thlan bika zirtirtu ni tura inbuatsaihna a ni thung.
BD leh M.Th course te hi residential-a zir tur a ni. BD hi graduate chin tan dil theih a ni a, kum thum course a ni a, a hmain orientation thla ruk chhung tih a ngai bawk. Tunah hian India ram college tam berte tih dan angin orientation a hranpaa awm tawh lova kum li course-a siam tura hma lak mek a ni. Kum tin June-July ah dilna hun hawn a ni thin. BD zirnaah hian kum khat atan fee Rs. 20,000/- vel sen a ngai. M.Th hi kum hnih course ani thung. Heng bakah hian external-a zir theih B.C.S. (Bachelor in Christian Studies), kum li course leh Dip. C.S. (Diploma in Christian Studies) kum hnih course te a awm bawk. Kum tin November-December-ah Registration tihna hun hawn a ni thin a, Registration Fee Rs. 400/- vel a ni thin, hei bak hi fee a awm lo. Mizoram Synod hian hian students chawm theih dan (sponsorship category) chi hranghrang a nei: sponsorship with full financial support, sponsorship with half financial support leh sponsorship without financial support tihte a ni.
3. Pathian thu zirna tur hmun thlan thu-ah fimkhur a ngai : India rama Protestant kohhran zingah Pathian thu zirna khaitu leh kaihruaitute ber chu Senate of Serampore (University College) hi a ni. Senate of Serampore hnuaiah hian Affiliated College 50 vel lai a awm a, kan sawi lan tawh angin Mizorama Pathian thu zirna College kan neih chhun - Aizawl Hteological College (ATC) leh Academy of Integrated Christian Studies (AICS) te pawh hi Serampore Affiliated Colleg an ni.
Roam Catholic Seminar te tiam lovin, India ram hmun hrang hrangah Serampore zawm ve lo Theological/Bible College za engemaw zat a awm a (Nagaland-ah ngawt pawh khian Pathianm thu zirna 40 chuang zet a awm nia!) Serampore zawm ve lo zinga a tam zawk chu zawmpui mumal nei lo, ‘tualtto college’ tih mai theih chi, mi tui thenkhatten rawngbawlkna kawnga thahnemngaih avanga an din te, USA leh ram dang atanga tanpuina an hmuh hmanga sumdawnna atana an din te, kohhran (denomination) hmingchawi leh kohhran nghen bik nei lote an ni. Hming ropui tak trak aninphuah a, mi hip turin thu mawi leh hnun tak tak hmangin an in-advertise thin. Building leh Library pawh nei mumal lote an ni nawk hlawm B.Th., M.Div. etc degree zirnate chu an ni hlawm lawi a! |henkhat sawi dan phei chuan pawisa nei tan chuan heng degree te hi hun rei lote chhunga hawnpui mai theihte a ni awm e.; Seminar / College thenkhat chu sum harsat avang leh zirlai dfuh ang tawk hmuhloh avanga kum laklawha khar a, sum awm hun hawng leh mai thinte an ni.
Mizote hian Pathian thu zirna hi kan ngaisangin kan uar ve ta hle a, Serampore Affiliated College ni lo,m kohhran pawm loh leh kohhran hotute pawhin an hriat ngai loh Pathian thu zirna college/seminar-ah te pawh kan intir tam ta tial tial a. Chutiang atanga zir chhuak chu mi engemaw zat Mizo thalai zingah kan nei tawh nghe nghe. ‘Kan fapa/fanuin a zir ve duh phawt chuan’ tia Theological College/Seminar hmingpu kan hriat apiangt leh mi sawi apiang a tha tura ngaia intirh ngawt hi chin loh atan a tha hle. Pathian thu zirna mah ni se, thenkhat chu tawp tak tak, Pathian thu kalpui dan leh thurin chungchangah kalsual awm theihna chu thudang ni se, nun dan tihchhiat hlen derna pawh awm thei a ni tih hi hriat reng a tha.
4. Mizo thalaite tan theological education a pawimawh : |halaite tan theological education hi zirna peng dang anga ‘career’ siamna ang ngawt thlir chi a ni lo. Ram leh khawtlang lam kaihhnawih thiltye nen inzawm hle mah se, sakhaw lam thil a nih tel avangin, rinna leh inpekna a ken tel hi hriat reng tur ani. Chumi hre reng chungin Mizo thalaite tan theological education pawimawhzia leh Mizoramin Pathian thu zirna lama mithiam leh chhenfakawm kan mamawhzia lo thlir zui ila:
a) Kan khawsakna nun peng hrang hranga hmasawnna sang zel, sualna ze hrang hrang keng tel bawk si hi, Pathian thu lama thiamna leh hriatna hian a compete phak zel a tul hle, a umphak loh hunte a thleng an ih phei chuan kan ram dinhmun hi a la ngaihtuah-awm ngawt ang. Chuvangin sakhaw rawngbawlna thil mai atan ni lo, raml eh khawtlang siamthatna atan thalaiten theological education awmze nei taka an tuipui a tul tial tial dawn a ni.
b) Kohhran pawl hrang hrangte thawhhona leh inpumkhatna atan hian Pathian thu lama mithiam chenfakawm, a awmna kohhran pawl ni lo tan pawha zah tlak leh rintlak kan mamawh. Hun hmasa lamah khan Chim leh Hmar lama kohhran hruaitute zinga ‘Pa ena en’ theih khawpa kohhranho kaihruai leh kilkawina lama huvang nei mi pali panga vel chu kan nei a, chung mite chuan thawh pawh an thawh hlawk hle nghe nghe a ni. Vawiina Mizo Pathian thu thiamte zingah hian khatiang mi, ‘ani zet hi chu’ tih tur, an thu leh hla pawh ngaihchan bik tur ang chi kha kan van ta deuhin a lang.
