PL Liandinga
Ka hriatrengna chawrche tak mai leh ka thil chhinchhiah hleih theih lohna thluak chuan nimin leh vawiin vela eng eng emaw thu lenglam te a ngaihtuah kual a. Hmasawnna lam thu tam tak karah tu te emaw chuan Miss Mizoram thlan mekte'n Bikini nena luia thla an lak vel chungchang mi thenkhatin an ngaihtheih loh thu a lo lang a. Kei ngei pawhin he an thlalak hi ka en ve a.
Kan
lo putar ve ta deuh nge, thlalak dang leh ih kan lo hmuh tam tawh vang nge kan khawvelah hian khatiang leh a tlukpui thlalak tam tawh vang ka hre lo, han phulpui hlut tur engmah ka hmu ve lova.
Tlem lai khan hmeichhe pakhat thla an laksak lai kha a rukin a darh a. A hmeichhe pawl thianghlim inhlawmkhawm chuan a hmeichhe naupang zawk kha mualpho takin an veng atangin an hnawt chhuak ta hlauhva. Kum a rei telh telh a, a mak telh telhin ka hria a. Khata tang khan kan sim ve tawh mai ang chu maw tih lai laiin tunah kekawrte nena mi tih anga kan nulate thlalak kan han phulpui leh ta hluai a. 'Lalburha hian a sikul hlui a chhuahsan thei lo,' tih ang mai kan ni leh tain ka hria.
Kei zawng misual ka ni a Lalpa, heng nulate thlalak te hi hmuhnawm ka lo ti khawp a (a vai chuan en phei chu ka en peih lem law). Inelna anga an lak a nih a, chhun khaw enga mi fate tih anga an tih nak hman chuan a khawilaiah hian nge maw kan 'holier than thou' (intih felna uchuak) thlarau hi kan han phawrh leh thut thin le aw?
Mi pangngai takin zahawm tawka an ngaihin thil an buatsaih a, uluk takin an ngaihtuah ve a, pawi em em pawh ni lova an ngaih chinah thil an ti a, langtlang takin an ti mai a nia. Han hriatthiam loh tur lai ka hmu lo khawp mai.
Kan nuho zingah hian kei aia thlalak rapthlak hmu hnem an tam hi ka ring a. Kan mobile phone leh computer vela thlalak rapthlak inbilh zozai hi kan vaiin kan haider vek niin ka hria a. Kei mi chut pek hi chu min telhtu tu tu te emaw Group a ka awm vena tlemte a a phawk zualin thlalak danglam deuh an dah bak hi a zawn pawh ka zawng lova, ka hmu pawhin ka hre lova. Nuho zingah kei aia hetiang hmu thei leh hmuhna tur nei tha an tamin ka ring. Chutih kara kan han inti thianghlim leh vut vut mai thin hi chu ka ngaihtuahna kal muang tak hian a hrethiam ve phak lo. Miin, 'Bikini Round' ti na mawlh mawlh a! Anih loh leh kan Miss chu kan Chapchar Kut Miss thlan mai dawn em ni ang?
Kristianna nena kan sawi pawlh te a nih phei chuan kan buhfai buk dik thei lo te, kan Kristian Chartin te, sorkar hnathawk hausa thei bik Group te, Compensation uchuak te, kan vantlang kawng kan nekchep zo ta vek te hi kei chuan ka ngai pawimawh zawk.
Kan nulate Bikini nena an inpholan avangin kan hnam hi a mualpho ka ti ve hauh lova. Ka zak lova, ka haw hek lo. Kan chan loh tur naupangho mah ni se kha ai khan la itawm vek zawk se lo tih nak alaiin heti zawng zawnga kan han kaiher ta hi chu a mak ta he hu ngawt mai.
Wrestling en avangin kan fate an inchai zel lova (an peih lo lutuk hi a manganthlak zawk a), football en avangin tlangval zawng zawngin football an en hek lo, sangha hrai lai thla vawikhatmah an la chhuah lo chung pawhin sangha hrai te hi kan ching lek a. Inelna thianghlim kha tute emaw avangin a bawrhbang zo takngial dawn. A thuhrimin camera leh mipui vantlang hmuh atana kan nulate inphelh ai chuan thim thama an inphelh te hi a nia kan tan pawi zawk ni.
Hawh u, i ngaihtuah tha leh teh ang u.