Darrokima
Nursery Veng
Mizoramah hian Driver hian ngaihsan an hlawh lem lo hle mai a, mipui tana rawngbawltu pawimawh tak an nihnate hi kan hriatsak duh mang lova, anmahni ngei pawh hian hnam darthlalang pawimawh lutuk an nihna hi an hrethiam phak meuh lo niin a lang. Hei hi kan ngaihtuah chian deuh a ngai hle a ni. Vanneihtluanga’n driver te thlavang hauhna Essay ngaihnawm zet mai a ziak a, zirlaibu-ah hian sengluh a ni a, thil lawmawm tak niin ka hria a. Tun hnai mai khan kan mithiam chhuanvawr zinga pakhat, Prof. Laltluangliana Khiangte chuan a hla phuah dahkhawmna lehkhabu leh audio cassette a tlangzarh a, driver-te thlavang hauhna leh fuihna hlatha deuh mai a rawn tel ve nawlh mai a, thil lawmawm tak a ni.
Prof. Laltluangliana Khiangte hian a Padma Shri Award lawm nia a tlangzarh, a lehkhabu Rochuam leh audio cassette Hnam ro par hi min pe ve hlauh mai a, ka’n en thuak thuak a, Aw Driver Sap tih kha ka hmu a, mak ka ti angreng hle mai a, ‘Ani ang mi tak taka kan neih chinin hetiangte han phuah ve teh tlat chu, hengte chu Pu P.L. Liandinga te, Vanneihtluanga te, keini angte phuah ni awm tawk leh a nih hi mawle’ ka ti rilru a. In ka thlen veleh ‘Aw Driver Sap’ ngei mai chu ka’n ngaithla nghal chat a, ka ngaihtuahna a kal thuitir angreng khawp mai a.
Nia, he ‘Driver Sap’ hi tunlaia kan zaithiam chhuak thar duhawm ber pawl Juliet Hnamte-in nem dap dap mai, ngaihthlak hahdam zet maiin a sa a, a satu zaithiam hrim hrim leh a ngaihnawmna hi chu thuhranah lo dah ila, a thu belhchiandawl leh ngaihtuah tithui zet mai hi sawi chian tham niin ka hria, a thunawnah chuan,
Aw Driver Sap, uang mai lo la,
Fimkhur chungin zeiten vai la,
Chuan nuam hahdam a nih ngei theih nan,
Her zel nang che, dam nuamtein,
Fet suh ang che nun ze dik sinin,
Zoram nuam siamtu ni zel ang che....
tiin a tawp ta daih a, ‘Fet suh ang che’ han tih laite hi atha hle mai. Fet deuhthin an awm em ni? An fet chuan Zoram a nuam lovang tih a chiang. Zoram nuam siamtute zingah Driver-ho a dah ta daih mai le. A va chhut thiam em!
Dik tak chuan, Driver te hi ‘ka hmusit love’ han ti ve bawkthin mah ila, Mizo mipui nawlpui hian kan dah hniam deuhthin tih chu a chiang a, ‘Driver lungmawl’ tihte pawhtawngkam tlanglawn tak a ni. Mizoram driver zawng zawng hi a rualin ni khat lek pawh chawl tathup se kan buai dan tur hi sawiin a siak lo. Chuti chung chuan a var tam tak zinga a dum tereuhte bak hi kan hmuhsaktha duh lova, an fakawmna tam tak aiin an hmingchhiatna chhe te hi kan sawi vul leh chûkthin. ‘Aw Driver Sap’ hi ngaihtla ta ila, mipui tam tak hi chuan driver-te kan ngaihdan hi kan sawh danglam phah ngei ka ring.
Driver ho hlei hlei hian he hla hi ngaithla ve ngei se ka ti. An mawhphurhna sanzia leh an pawimawhna hre miah lova motor tlawh lirh thiam vanga khalh ve ringawt hi an awm ve nual niin a lang a. Hengho hi anthiante hmai tibaltu pawh an ni châwkthin a ni. Miin ‘driver lungmawl’ an lo tih vanga mawl ta viaua inngai ve ringawt, an mawhphurhna leh an pawimawhna, hnam darthlalang leh ram chawisanga tihniam theitu an nih dan pawh hre miah lova lo ‘mawl’thut ve ringawt hi chiang lehzualin han hre fiah hlawm se ka ti ngawt mai. heng hla chang khatnaa -
Hruaitute hruaia nun hlu kawltu,
Vangkhaw mawia ram rawngbawlin,
Tanpui hnai reng i lo ni si
tihte hi a dik a sin. Mirethei bakberh ber a\anga a ropui ber thleng hian driver-ho tel lovin kan khawsa thei meuh tawh lo. Pathian tih lohah chuan kan nunna chunga thuneitu pawimawh berte chu driver-ho hi an ni tlat. Chutiang khawpa hna ropui thawk chung si chuan kawng tam takah anmahni leh anmahni an intihhniam fothin. Hei hi an ngaihtuah chian atha khawp mai. Hna ropui tak thawktu an nih ang ngei hian anmahni pawh an intizahawm ve thei tur a ni.
Driver nih vanga mawl ta viaua inngaih ringawt kha a dik lova, ho deuha nung tura inngaih phal ringawt pawh a dik lo. An hna hi hna zahawm takah an her danglam thei ngei tur a ni. Kan Mizo nula hnam dang sumdawng hnena hralhthintu tam ber chu taxi driver-ho an ni tih hriatte hian rilru a nathin. A venghim thei tur ber an nih zawk vei nen hian. ‘Driver Sap’ chang thumna -
Zonun ze mawi lan chhuahtir la,
Leng tin lungdumintang zel na’ng che.
a tih ang ngei hian, hnam dang laka Mizo hming tithangmawi thei tur ber pawh anni hi an ni a, anni tluka ‘Zonun ze mawi’ par vultir thei tur hi an awm bik chuang lo.
Mi tam zawkin thlir nachang kan lo hriat lem loh, sir lehlam a\anga driver-te dinhmun rawn thlir a, Zoram hmel her danglam thei tur hlatha tak rawn phuah chhuaktu Laltluangliana Khiangte hi fakawm ka ti a, a thlûk a mawiin a satu Juliet Hnamte hian a lo sa thiam em kher bawk nen, he hla hian Mizoram hmel hi kawng tam takah her danglam thei ngei se ka ti tak meuh a ni; he ram hi ram nuam lehzuala kan siam zel theih nan.
