Vanlalremruata Tonson
Feudalism, A ha. Ho lutuk. Medieval hun lai mihring khawsa zia an zirna chu tunlai Mizo khawsak dan phung sawi fiah nan hman i tum a ni maw? Min hmusit a nih loh pawhin i ngaihdan chu a lai mawh hle ta ve ang. Feudalism-te chu medieval hun lai a ni a, chumi hnuah modern an ti a, tunah kan chenna khawvel hi chu post-modern a nih zawk mah hi. Post-modern mi erawh kan lo ni kher lo a ni thei e, mahse, kan khawsak dan min kaihruaitu pawimawh tak pakhat chu a ni awm e. Medieval nen phei chuan inhlat tak kan ni.
Ka hre lo le; mahse, history hi thui taka sawi fiah kan tum hman lo vang a, amaerawh chu history hi uluk taka kan thlir chuan thil inthlakthleng tam tak karah hian mihring nunzia ti lang chiangtu leh thil awmdan thenkhat mihring nuna bet reng hi a awm thin. Chuvang chuan continuity hi mi thenkhat chuan an sawi uar hle. Tuna kan sawi tur hi continuity a ni tihna phei chu a ni lo va, mahse mihring khawsa ziaa tel pakhat, kum tam tak liam hnu pawha a zungzam ni awm taka chhui theih a awm thin a. Feudalism pawh chutiang chu a nih hmel. History kan zirte a taka hman tangkai kan tuma, kan ngaihtuah a nih chuan hmaih chi a ni miah lo vang.
Hmanlai chuan feudalism hi an khawsak phunga loh theih loh thil pawimawh leh tul tak a ni. A hmang thiam hmasate tana din chhuahpui theih a ni bawk. Tunah erawh chuan hmanlai feudalism ang hi kan mamawh tawh lem lova, hmasawn nan emaw survive nan emaw a pawimawh tawh lo. Hmanlaia an mamawh em emna pakhat chu indo fo thin leh ralmuang lo an nihna hi a ni. Tunlaiah chuan indo pawh kan inpawng do tawh lo. Mizoram kan ni ve lo a nih pawhin, ram changkangah chuan feudalism aia mode of production tha zawk a awm tawh bawk. Tin, tunlai khawvela kan nun chu a ralmuan leh ralmuan loh dan chu a dang tawh lutuk. Feudalism chu nun ralmuang lo lutuk atang ralmuanna zawnna atanga lo piang chhuak hi a ni tlangpui. A nihna takah chuan ralmuan lohna hi thil thar leh hmasawnna tam tak thlentu chu a ni alawm. Feudalism pawhin a thlen bawk lawm ni?
Feudalism chu ei leh bara zawn dan zirchian nana hman tawngkam pakhat a ni ve a. Hmanlai ho khawsak dan sawi fiahna chauh a ni mai lo. He feudalism laimua pawimawh ber chu ram hi a ni. A pawimawh em bawk a. He kan khawvel history-a medieval leh modern thenhranna pakhat, technology lama hmasawnna nasa leh chak tak a lo lan chhuah hmaa ei leh bar zawnna kawnga mihringte innghahna lian ber chu ram hi a ni tlat.
Han peng lawk ila, kum za chuang zet chu civilization tia an sawi nen hian thlunzawm kan lo ni ta a, kum 50 chuang mahni ro inrelin kan awm tawh a, kum 30 chuang chu budget pawh mahni kan insiam tawh a ni. Modern leh medieval te danglamnaah hian eng nge kan dinhmun tih hi thil ngaihtuah tham leh a bikin zirlaite ngaihtuahna luah fotu tur niin a lang. Technology hian kan khawsa zia chu a ti danglam nasa hle tawh a, kan hnam nunzia (culture) pawh a ti danglam. Ei leh bar zawnna kawngah pawn hian kan danglam tih loh rual chu a ni lo. Mahse mi tam ber chu lei/ramah hian kan la innghat a; mite chuan leilung, hetia kan hmuh theih piahah hian technology hmangin economic space (?) siamin ei leh bar hi an lo zawng tlat si a ni. Leilunga innghah hi a sual e, a tha lo ve tihna lam ni lovin; kan production organisation / mode of production lam dinhmun hi inbih let chu kan ngai deuh mai thei asin.
Feudalism-ah chuan leilung hi mihausa leh che thei ho an insem ral a, a neitu chuan mahni ram theuhah thuneihna sang tak an nei a, dik tak chuan an aia chak zawk a rawn che a nih ngawt loh chuan "sovereign" ang-tluk an ni. Chu chu hmanlai tan chuan administration-ah a remchang em em a, tin lal ber tan buaina tam tak pumpelh a mipui thawhchhuah a lo hui vena a ni bawk. Chu chu feudalism nih phung pakhat a ni. Mahse chutiang aia inrelbawlna tha zawk hmuhchhuah a, hlawhtling taka hman a lo nih tak avang leh leilung ringawta innghat lo va eizawnna tha tak a lo awm theih takah chuan feudalism chu a lo bo ta mai a ni.
Aizawl leh a chhehvelah hian tute nge cheng? Ram nei lo va, mi rama mahni ei tur dapa hnathawk ho an ni, tiin min hrilh. Ka zuk hre si se ve lo. An pute nen hian inti thiam lo se khawiah nge an kal ang. An khuaah. Kalna tur an la nei a nih chu. Feudalism hun lai chuan pute nena inti thiam lo hnawhchhuah chu mi rama tlukluh a ngai a, chu chu thil awlai a ni lo. Landlord class ho hi an nihna ropui lutuk hum turin an tangrual tlat a, lal pawhin a tan. Kut hnathawk ho chuan zalenna an nei lo va, an neih chhun chu an inthurual chuan hel a ni mai. Thil theih loh tluk a ni. Mahse ram a changkan rual hian feudalism chu a tluchhe bawk si a. Chu chu a lawm history hlutna chu. Thil hi a awm ngaiin a awm thei tlat lo.
Historian hriat hlawh deuh mai pakhat, EH Carr chuan history-ah chuan thlasik anga khel lo va thleng tur tia sawi lawk theih a awm lo, a lo ti a ni awm e. Feudalism cho a, tichhe tura hel chu thil theih loh awm tak a nih laiin feudalism chu a tluchhe tho a ni. A kawng erawh a kual thui ang reng viau a. Chutiang deuhin engtianga inthlak danglamin nge thil hi a rawn thlen ang a, engvangin nge a rawn thlen ang tih hi hriat lawk theih a ni chiah thin lo. Thil eng emaw chu a thleng ngei dawn niin a lang tih hi sawi dan hima ngaih a ni.
Mizoah chuan miin feudalism an sawi thin ang hi chu a awm lo tih ka chiang khawp mai. Amaerawh chu communication-ah hma kan sawn ang a, thingtlang ramruakte kan la hmang tangkai ang a, chutah chuan land reclamation, history-a hmasawnna innghahna lungpui pakhat chu kan tan ve dawn a ni. Ram zawng zawng pawh kan insem fai ang. Chumi hunah chuan tuna mihausa ho huana ei chawp dapa awm, ram leh hmun nghet ngaihtuah lote hi eng tin nge ni ang?
Aizawla kan khawsak phung hi lo ngaihtuah leh daih i la. Finance minister-in budget a han pharh chuan, hmasawnna lungpui kam nghettu tur, a lungte (infra-structure) chherna tur sum pawh a tawk viau. Ruahman anga hman chu nise kan ram hmelhmang chu danglam kawk kawk thei a ni. Engpawh nise ruahman ang thlapa hman hlawhtlin chu inbeisei lo ila, duhthusam leh a tak ram chu a inang tak tak thei lo va lawm. Mahse tuin nge ruahmanna chu tih puitlin theih a nih beisei a, tih puitlin tum? Ruahmanna tha tak siam ila, vai ho Indianization policy chhawr tangkaiin sum hai chhuak ila, chu chu chen i la, a hahdam ber!
Budget chu hman a ni a. Sawrkar hna hmachhawpte chu a thawktu turte hnenah sem a ni a. Sum sen tur duan a nih laia sawrkar aia a hnathawh lo en zui a, a tihhlawhtlinnaa mawhphur tura ruat (contractor) te chu an hlawh tura chhut tel zat an hlawh chuan an lungawi ngai lo, an ti. A dik viau ang. Mi fel chuan fel nih man chu a tel tur a lawm. Mahse mi fello pawhin tel kan tum tho va. Contract-ah reng reng hian contractor hlawh tur chhut tel vek a ni a, a bak chu ani fel leh fel lohah a hlawh tam leh tlem dan a innghat a. Mahse fel aiin rinawm lote hi an hlawk zawk ta thin emaw ni chu aw a tih theih. Sawrkar tih ang thlapa hna hi thawk a, mahni fel avanga senso tlem zawka hna hlenchhuah te chu lo ni thin se ram hmelhmang chu danglam kawk kawk tur a ni a le. A danglam kawk kawk lo deuh chu niin kei ka lo hre deuh va. Chutiang a nih loh chuan ruahmanna siamtu kan innghahnate atang hian eng nge beisei tur kan neih ang?
A hlawk lutuk niin a lang ta ber a. Chuvang chu a ni ang, mi rama a kum za tel civilization lo nei tawha mihausate neih ang nei pha lo mah i la, hnathawh ngai lo kan tam? Ei tur dap ngai lo, mamawh nei zung zung thei kan lo nih takah chuan duhthlan tur kan nei. Khawvel hi kan chen thei a ni. Khawvel chen kan nih ber tawh chuan nuntha tak kan neih hmel loh hle. Khawtlang tan kan inhmang viau thei bawk. Hun pum deuhthawa khawtlang thila inhmang thei mi fel kan tam reng a ni. Hei hi thil hlawk lutuka sumtling khawm rahchhuah chu a ni a, sum chu peipun a ni tawh lem lo. Hnathawk chhuak tur sum chu kan kuta a awm chhung chuan damlo khumbet ang deuh chauh hi a ni, 'idle money' a ni a, damlo tangkaina ber chu chatuan atan kan inthen rih lo a nih angin kan kuta sum awm tangkaina ber chu kan duh ngawih ngawih min neih tir a, damlo chu insen ralna a nih angin mi tam tak tan chuan pawisa chu nun hlohna a lo ni ve a.
Hmasawnna "infrastructure" atana hman tur, a nih dan tura hman loh avanga tlingkhawm chu Aizawl leh vai ramah hian an leng vel ta a ni. Thingtlangah chuan beisei tur tak tak a awm tawh lo va. Khawvel hmasawnna chuan khawpui lamah chuan mi hnuk ta a. Thingtlang khawsakna beidawn thlak tak avang chuan hmasawnna "infrastucture" atan hman tur tlingkhawm atanga Aizawl chhhehvela lei ramte leh mi khawsa thei ho rama eichawp zawn a lo ngai ta a ni. Chutianga nawr luitu a awm a ni tih erawh chu an hrethiam kher lo vang. Thingtlangah beisei tur tak tak a awm lo va, khawpuiah pawh awm chuang lo. Mahse, sum a leng zawk tlat. Chuvangin medieval hun lai nen kan khawsakna chu inthlau tawh hle mah se feudalism ang thawthanga mihausa ho rama nitin eichawp ngaihtuaha khawsak ngai kan lo awm ta a ni. Feudalism thlaktu factory-a thluak tha fal thenkhat rawn piang chhuak ang a, kan ram hmel ti danglam tur thluak tha fal lo pianchhuahna tur hi a insiam mek erawh kan ti ngam lo va, a insiam lo pawh ka ti ngam chuang lo.
Khawvel hi a tawp loh chuan engtik niah emaw chuan tuna mi tam tak tlan chhiat san thingtlang te hi kan tlawhpawh ang a, kan reclaim ngei ang, ti ila, dawt sawi palh a hlauhawm loh, chu chu ram humhalhna leh kan tum pakhat a ni ve tlat si a. Mahse, chutiang huna leilung hausakna teltu tur chu tute nge? Tuna khawpui chhehvela inbengbel ta te hi eng tin nge an khawsak zel ang? Tute nge mawhphurtu te hi?
