Mithiamte Lu Tihaitu Second 1
Zara
Ni hi a chhuak a, a tla leh a ni satliah mai lo. Hei hian leilung hun a siam a, khawvel nun a thunun a, mihring leh a siamchhuah thilte chetvelna a hril vek.
Saphovin ‘Hun hi tangka a ni’ an ti. Tangka mai a ni ngawt lo, hun awm lohna hmuna kan chen hma chuan second 1 tê mai pawh hian khawvel hi a chawk buai vek thei a nia aw! Min kan vawi khat khap fek chhung, he second 1 tê mai hian khawvela inbiakpawhna leh inkalpawhna a khawih thuk em em a, a bikin thlawhtheihna leh lawng vahvelna phei chu a khawih nasa zual. Sum leh pai virvel thlengin a khawih.
Kan chenna lei hian a virna lai (Axis) ah her danglam zauh chang a nei a, chumi leilung virvelna lai azir chuan kan hun hman hi a rei chang leh tawi chang a awm zauh thin.
Hunbi chhiar tur chuan second a pawimawh hmasa a. Chu second 1 chu a aia tehna tenawiin, maktaduai eng emaw zahah an han then darh leh a, tunlaia hun tehna atomic clock atangin khawvel sana hi teh a ni.
Khawvel hi a inher muang tial tial niin mithiamte chuan an sawi a. A inher dan ngaiin a inher reng lo va, a her muan hret hret dan pawh - ni khatah second hmun sing hnih velin a muang tial tial a ni.
Khawvel inher muangin a nghawng hmasak ber chu kan hun hman dan a ni. Kan hunbi chhiar hi a kim lo zeuh zeuh thei tih hriatna vangin kum 1972 atang khan kum tin (emaw kum hnih danah te pawh) khawvel vir dan milin atomic clock-ah second 1 an belhchhah zeuh thin a, chu’ngte chu keini hian kan hre ve vek kher lo vang!
Kumin hian June 30-ah second 1 belhchhah a ni leh dawn a, hetianga an belhchhah thin chhan chu - khawvel inher muan vanga hunbi kim lo tur zangnadawmna ang a ni.
Second 1 lek vanga khawvel hi buai thei a nih miau avangin mithiamte chuan kum tina second 1 belhchhah emaw, kum hnih dana belh leh zeuh ang chi chu a hman reng chi em, tih an sawiho va, thutlukna mumal a awm thei rih lo. Kum 2015-a World Radio Conference neih hunah hemi chungchang hi sawiho leh turin an dah a, chutih hunah chuan thutlukna siam theih tawh an inbeisei. Khawvel sana enkawltu International Telecommunications Union-te chu January thla khan Geneva-ah an thukhawm a, leilung inher dan leh hun an teh a, second 1 belhchhah thin chungchangah hian an inhnial a ni.
America leh France chuan kum 1 emaw, kum 2 emaw-a second belhchhah hi tihtawh loh an duh a. Canada, Japan, Italy leh Mexico te'n an thlawp. Chutih laiin, Germany leh UK chuan second belhchhah zui zel hi an duh thung a; Nigeria, Russia leh Turkey te'n la zir chian leh an duh thung.
Kum khat emaw hnih emawa second belhchhah zeuh thin hi tihtawp ni ta se, hmuh theihin khawvel nun hi a danglam ve ve dawn.
Second 1 belhchhah thin hi tihtawp a nih chuan khawvel awm chhungin he second 1 hunbi kim lo hi hmuh kir leh theih a ni tawh dawn lo va, darkar leh kum thlengin a khawih buai chho dawn a ni.
Hetianga second 1 belhchhah hian kum 10 hnu-ah minute a tidanglam a, kum 500 hnuah phei chuan darkar a lo tling tawh dawn a, kum 1,000 hnuah phei chuan hun a tidanglam dawrh dawn a ni. US chuan hetianga second belhchhah hian inbiakpawhna leh inkalpawhna a tibuai a, sum leh pai chetvelna leh internet thlengin a khawih avangin second 1 belhchhah chuan nakin zelah khawvel a tibuai zawk dawn niin an ngai. Chu pawh chu, nakinah kan mithiamte’n an la rel fel ang chu.
A enga pawh chu ni se, van thengreng zau tak mai hunbi chhiarsak a, buai lova arsi tluklehdingawn chuang vil thintu, chunga Pathian ropuizia chu he ‘second 1’ hian a tichiangin i hre ve thin em?
