Lal Isua kan thian tha berin (KHB 319)
Lal Isua kan thian tha berin (KHB 319)
(lo pian chhuah dan)
Lalrinzuala Chawngthu
Khawhar, beidawng leh hnual reng renga a nun chanve hnu lam hmangtu Joseph M Scriven-a (1819-1886) khan thian tha tak a lo va mamawh em! Khawvela a chenpuite atangin he a thil mamawh hi a hmu zo hlawl lo a ni mah na vawiin thlenga Pathian fakna hla lungkuai ber pawl a phuah chhuah tak ni.
Ireland khawpui Dublin-a chhungkaw pangngai tak pakhat atanga piang leh seilian niin Trinity College atanga a graduate hnuah a pa hnungzuia sipai tan tum a ni nain a hriselna a pan avangin a tang ve thei ta lo a. Kum 25 mi a nih laiin a hmangaih leh a duh tak mai nen inneih thu thlungin inneihna engkim kalpui a nih lai leh a tuk maia inkutsuih tur an nih laiin, chumi ni tlai lam chuan a nupui hual lei zawh lai chu a sakawr chungchuang chesualin a hnuai Bann luiah chuan chhan hman lek lohin a tla thla ta a. Ral lehlam atangin Joseph-a chuan tih theih eng mah nei si loin a nupui hual tui tla lai chu a lo thlir reng mai a nih chu!
Joseph-a chuan a tuar na hle. A nun khawhar leh ngui tlawk tlawk lak ata hawi thawven inbeiseiin tuifinrial rala Canada ram lamah a kum leh mai chuan a chhuk thla ta daih a. Ram dang leh khawsak phung lo hrang ta chuan a khawhar leh ngui pawh a chhawk phian reng a. Beiseina thar nen nun thar hmangin sikul pakhatah zirtirtu hna a thawk ta a. Vanneihthlak takin chutah chuan a mittlung tak hmeichhia tawng lehin a lo rei phei chuan a hmangaih ta em em mai a. A bialnu nen hlim leh inthlahlel taka hmangaihna an chen dun mai bakah inneih tumin ruahmanna an duan mek laiin ‘thian tha ber a tawnna daltu tur a nih vang nge’ a bialnu Elisa Roche-i pawh chu pneumonia vangin a thi leh ta hlauh mai!
Nupui lam pawh melh ngam tawh loin Joseph-a chuan an awmna Port Hope-a kohhran pawl pakhat Plymouth Brethren-ah inletin rawngbawltu tha tak a ni chho ta a. Hetihlai hian he kohhran leh a seilenna kohhran thurin hi a inperhsan deuh avangin a chhungte nen pawh an inmihran tan ta nghal a ni.
Thingzaina araa thingtuah la leh zrtirtu hnahawka eizawng Joseph-a chu ‘mi hmasasial lo, mi rethei leh puitu nei lote tana thawk nasa em em mi’ tih chu Port Hope leh a chhehvela mi hriat dan a ni ta a. Tum khat chu mi hausa tak pakhat hian thing tana rawih tumin a thianpa a biaktir a. Joseph-a chhan dan erawh a dangdai hle – “Ani chuan ka hlawh daih tur tangka a neih dawn avangin ka thawk thei lo ni rawh se,” zu han ti a!
Kum 1855 a lo thlen chuan Ireland-a cheng a nu duhtak na taka a damloh thu an hrilh chuan a hreawm a ti hle. A nu tlawha Ireland-a hawna tur tangka a neih loh avangin lam hla tak atang chuan theihtawpin a tawngtaisak ta ringawt a. Lehkhathawn sei tak thawnin a nu hnem nan hlahril pakhat – tawp chin nei loa tawngtai tih thupui hmanga a ziah chu a thun tel bawk a.
A kum a lo tam ve ta hle. Khawhar leh hnual reng renga nun hmang a nih avang khan depression pawh a nei ve nasa a. Ni khat chu a thian pakhatin a damlo chu inah tlawhin a mutna natna khum bul maia dawhkan pakhata thuziak hi a hmu ta a. Chu thuziak chu a nu puala a phuah hlahril kha niin a thianpa’n tu phuah nge tih a zawh chuan Joseph-a chuan, “Lalpa leh keima’n, kan inkarthu chungchanga kan phuah,” tiin zu chhang a!
‘Tawp chin nei loa tawngtai’ tih hlahril a phuah hi Joseph-a chuan mi dang hmuh atana a tih a ni hran lo nain sakhaw chanchinbu pakhata chhuah atan a pe a, chumi hnu lawk kum 1866-ah khawhar leh ngui kalsanin thian tha ber atana a thlan Isua nen ataka inkawm tawh turin a thlarau a thlah ta a.
Joseph-a hlahril chu America ram bung pakhat Pennsylvania rama Erie khuaa ukil pakhat, rimawi lama tawng sang zet mai Charles Crozat Converse-a chuan lo hmuin ‘Lal Isua Kan Thian Tha Ber’ tiin hla pangngaiin a lo siam ta a. Chumi hnuah Kristian Hla Bua kan hmuh fo rimawi thiam em em mai Ira D Sankey-a chuan 1875-ah a lo hre veleh a, ani hian Pathian Fakna Hla ropuizual zingah telhin a thianpa Dwight L Moody-a chuan inkhawmna hmun pakhatah a sa ta a.
Vawiin thlengin tuifinrial rala na taka damlo a nu hnemna tur chauha Joseph-a hlahril phuah kha missionary-ten chanchin tha ruala pu darh zelin a nu tan mai ni loin khawvela Kristianna a awm chhung zawng thian atana Isua thlangtute tana Isua inpuanna leh inhnem nan Moody-a kha kan sakpui ta zel a nih hi. Kan Zosap Rev E Rowlands-a’n kan tawnga nalh taka a lehlin hi ngun takin han chhiar la, Joseph-a nu khan inhnem nan leh thlamuan nan a hmang ngeiin a rinawm a, amah Joseph-a nun inpuanna a ni fawm bawk.
Tlipna: Joseph Scriven-a hian a hun hnuhnung lamah depression a nei nasa hle. A thih dan tak sawi theih a ni lo a, a chenna bul lawka lui pakhatah thiin a ruang hi an chhar. A hriatreng nan Port Hope-Peterborough Highway-ah thuziak chuanna lungphek lianpui phun a ni nghe nghe.
