Sap Upa leh Pu Buanga te rawngbawlna

H. Roluahpuia

Kum 1891 khan The Welsh Calvinistic Methodist Foreign Mission hnuaia Khasi and Jaintia Hills-a thawklai Rev. William Williams chuan Mizoram a rawn tlawh a. Thla khat chauh Aizawlah a awm phalsak a ni. Mizote chanchin a lo hriat thawi avangin Missionary ni lovin Missionary intirhna’n a tha dawn awm em tih en tura lokal a ni.

Mizorama rawngbawl a tulzia hre chungin a thawhna hmunah a kir leh a. An Mission Board chu a rang thei ang bera hma la turin a ngen a. Vanduaithlak takin a beisei ang hmu hman lovin rei loteah Typhoid natna avangin a thi a. A thih atanga kum thum velah Mizoram tana Missionary hmasaber ni ta Sap Upa leh Pu Buanga, High Gate Baptist Church Member, North London-te chuan January 11, 1894-ah Aizawl an rawn thleng ta a ni. Sap Upa leh Pu Buanga-te hi Arthington Aborigine Mission tirhchhuah (Missionary) an ni a. Sapram atang hian Mizoram tinzawn ngar ngara lokal an ni lo. India ram an rawn thlen hnuah Pathianin mak takin kan ramah a rawn hruailut a lo ni zawk.

Kum thum chauh Aizawlah an awm tihin anmahni tirchuaktu pawl hotupa ber Robert Arthington-a chuan Chanchin Tha la hre ve lote hnena hrilh thuai thuai a hmanhmawh thlakzia ngaihtuahin hmun khata rei tak awm chu a rem ti lova. Hreh tak chungin December 31, 1897-ah Aizawl an chhuahsan a, Mizorama an rawngbawlna leh hmachhawp zawng zawng chu Welsh Presbyterian Missionary-te kutah an hlan ta a.

Baptist Missionary Society tirhin 1903-ah Mizoram Chhimlamah Abhor rama an thawk mekna chu chawlhsanin an lolut leh a. March 8, 1903-ah Tlabung an lo thleng a, Sethluna Kristiante mi 19 lai Tv. Thankunga hovin anmahni hmuak-in Tlabungah an kal a, Sap Upa leh Pu Buangate hmel an han hmu chu an lawm lutuka an mittui a tla zawih zawih a ni. Tlabung atangin ke-a ni 4 kalin March 13, 1903-ah Lunglei an lo thleng ta a ni.

Sap Upa leh Pu Buanga hian Chanchin Tha avanga danglamna nasa tak Zoram khawvelah an rawn thlen a. Reilote chhunga Mahni intodelh kohhran, mahnia Chanchin Tha puangdarh thei leh mahnia inrelbawl thei Kohhran an din theihna chhan an hlawhtlinna thuruk thenkhat I lo zirho teh ang.

1. Nun dan leh thiltihin Chanchin tha an hril : Pathian Thu hrilna khawp Mizo tawng an thiam hma pawhin damlote kanin an tanpui a, an theih ang tawk tawkin rawng an bawl sak thin. Taibuanga phei chu regular taka tlawhin an enkawl thin a, Mizo zinga ringtu hmasaber a lo ni ta hial a ni.

Serkawnah awmhmun an khuar nghal a. Kumhnih chhung zet chu an awmna in tur an sa a. Thingtlang khua atangin Mizo tam tak ni tin hnathawkin an ruai thin a. “Kan hnena insawi ang zelin inti thin a, min bum ngai lova, chuvangin in hnenah kan thawk duh a ni,” an ti a ni. Khatia an hnena Mizote an inhlawhfak lai khan kan missionary-te khan mirinawm, innghahna tlak, mi bum mai mai ngailo an ni tih an nuna lantirin Mizo te hnenah Chanchin Tha an lo hril tan reng anih chu.

2. Mizo tawng an thiam : An Mission tihlawhtling tura pawimawh hmasaber chu Mizo tawng thiam a ni a. Mizo tawng an zir phawt kha a fin thlak hle a ni. Mizoram lolut tura kum khat lai Silcharah an nghah lai khan Mizo an tawn remchan apiangte chu biak hram hram an tum thin a. A tirah chuan an rinhlelh deuh avangin Mizoho chuan an be tha duh vak lova. Amaherawhchu, rei vak lovah an tawng thiam châk na-nâ-na te nen chuan an inkawm ngeih ve ta a, Mizo-te hnen atang chuan Mizo tawng pawh Mizoram an rawn luh leh hmain an thiam nual hman a ni.

Mithiamte chuan mahni pianpui tawng tluka fiah leh kan thinlung khawih thei hi tawng dang a awm thei lo an lo ti reng a. Mizote hi mahni tawng ngaina tak kan ni a, Sap tawng emaw Bengali tawng emawin Pathian thu kha min lo hrilh ta se kan zavai hian kristian kan ni duh ang em, tih hi ngaihtuah tham tak a ni. Mizo tawng ngeia kan missionary-te’n Pathian thu min lo hrilh kha an hlawhtlinna thuruk pawh a lo ni.

3. Mizo tawng ziakin an dah : Kan rama an lokal tirhlai khan Mizo tawng hi ziakin mumal taka dah a la ni lova. Mizo tawng an zir a, an thiam a, an tawng thei ni satliah mai lovin theihtawp chhuahin ziakin min lo dah sak ta a. Hnam ro hlu ber pakhat min hnutchhiah chu kan tawng ziaka min lo dah sak hi a ni. Kan Alphabet hmasa ber an remchhuah dan chu hetiang hi a ni : A AW B D E F G H I J K L M N O P R S T T U V Z CH.

4. Zirna min din sak : Zirna sikul min la din sak leh ta zel a. 1st April 1894 khan Aizawlah Mizorama Sikul hmasaber min dinsak a. Lungleiah pawh 3rd July 1903-ah Sikul an din leh a. An sikul min siamsak chu ziak leh chhiar, belh leh paih zirna a ni mai lova, zirlaite Krista hnena hruaina hmun, Kohhran hruaitu turte buatsaihna hmun, Baibul sikul, ram leh khawtlang hruaitu tur chherchhuahna hmun pawimawh tak a ni.

5. Zirlaite rawngbawlna-ah an hmang tangkai : Zirlaite chu chawlh kartawp apiangin rawngbawlin thingtlang khuaah an chhuak thin a. Zirlaite thusawi chu lehkha zir ve lote sawi ai chuan nasa takin an ngaithla duh bik a, an rawngbawlna tangkai-zia leh hlawk-zia hi Sap Upa pawhin a hrilhfak a ni.

6. Hmeichhe sikul min din sak : Mizo hmeichhiate dinhmun chiang zawkin an han hria a, an mahni puala sikul din chu tihmakmawhah an ngai ta a. 1907-ah khan hmeichhe sikul an din a. 1910-ah phei chuan Boarding for Girls din a ni. Mizo hmeichhiate dinhmun nasa taka chawikanna a ni. Kan Pi leh pute’n ‘hmeichhe finin tuikhur ral a kai lo’ an lo tih thinte chu a lo letling zo ta.

7. Mizo tawngin Bible leh Hla min lehlin sak : Kristiannain Mizote thinlungah hmun nghet zawk a khuara zung a kaih tlat theih nan Pathian thu (Bible) leh Hla tam tak kan tawngin min lehlin saka. Mizo Kristian an awm hmain Chanchin Tha Bu pali leh Tirhkohte Thiltih an letling a, 1916-ah Thuthlung Thar kan tawngin min pe a, heng bakah hian Pathian Lehkhabu Chanchin te Kristian Vanram Kawng zawh te kan neih belh ta zel bawk a. A Grammar and Dictionary of the Lushai Language, Zirtan bu, Hlabu, Zawhna leh Chhanna (catechism) bu te an siam bawk a.

8. Sunday School an hmang tangkai : Sap Upa leh Pu Buanga-te an lo thlen atanga rei vak lovah Sunday School min tan sak a. Upat lamah kum bithliah chin siam a ni lova, a duh apiang tan a ni. Sunday School-ah hian Pathian thu bakah ziak leh chhiar an zirtira, Zirtan bu (Lushai Primer) te pawh an zir a. Sunday School-a lo kal tawh phawt chu kristianah an inpe nge nge zel a ni.

9. Tihdam rawngbawlna : Kam Missionary-te khan 1898 khan Livingstone College-ah damdawi lam an zir a. Chhim lama Medical Missionary-te an lo chhuah hma zawng khan an in room-khat chu dispensary-ah an hmang a. Sap Upa-in a enkawl deuh bik a. Challiana, Chhuana leh Lalmama-te chu an zirtir ve a, anmahni tanpuitu tha tak an ni a. An chhehvel khua atang leh thingtlang kua atangte’n mi an lokal thin a. Tin, damdawi kengin an chhehvel khuaah an zin bawk thin. Damlote damdawi pe-in an tawngtaisak a, Lal Isua chanchin an hrilh thin a ni. Damna an lo chanin insengso taka, rante-a inthawi ai chuan Lal Isua ringtu nih an lo duh zawk thin a. Hetiang hian damdawi, tawngtai leh thuhril hmangin mi tam tak Krista ke bulah an hruai a ni.

10. A ram mite nundan phung milin kohhran min din sak : Mizoram Baptist Kohhran ang pawh hi khawvel ramdangah a awm lo. Kan missionary te khan kan hnam nunphung leh khawsak dan nena inmil thei ang berin Kohhran min dinsak nachang an hria hi an hlawhtlinna thuruk a ni. A tir phat atangin zalen taka mahnia ro inrel theihnamin pe a, evangelist leh pastor rawih chungchangah te, an hlawh tur zat bithliah leh pek chungchangah te thu an nei a, thawktu enkawl chungchangah te, zilh leh thunun chungchangah te pawh thu an nei a ni.

Sap Upa leh Pu Buanga hian tihhlawhtlin ngei an tum chu mahni intodelh, Mahni-a Chanchin Tha Puangdarh thei leh Mahni-a inrelbawl theihte hi a ni. Kohhran din turin an thawk rima, an inpekna a thuk bawk a, a bul tha taka an lo tan tawh chu an hnunga missionary te pawhin an chhunzawm zel a. Tunah chuan Mizorama kohhran ropui tak din an lo tum ngei kha a lo ding ta a ni. Tunah chuan keimahni kut ke-a dingin ramdang atanga tanpuina tel lo pawhin kan inenkawl thei a, keimahni thawhlawmin Missionary-te kan tir chhuak a, keimahni tha tih ang takin kan inrelbawl bawk a. Hetiang dinhmuna kan lo ding thei ta hi Sap Upa leh Pu Buangate’n Pathian Thlarau Thianghlim hruaina zarah hmangchang hre tak leh ruahmanna fel tak neia hma min lo lakpui vang a ni kan ti lo thei lovang.

"In hotute Pathian thu lo hrilhtute che u chu hre reng ula, an awm dana thil chhuak chu ngaihtuahin an rindan zir rawh u". (Hebrai 13:7).