Rempuia R. Lûtmâng
'Puandum' tih leh 'pawndum' tih sawi dan inang lo chungchangah hian a dik zawk hria kan tamin kan sawi huai țhin hle mai a. A dik zawk hi kei chuan ka hre lo a, keini ang duang hriat phâk ni hek lo le. Mizote'n puan an neih țantirh lai pawh kan hre lo a ni si a. Amaherawhchu, a dik zawk leh a dik lo zawk hria an tam țhin si a, kan upate'n engtin nge an ziah kan en dawn a ni.
Kan sawi thui hmain hei hi zep lawk teh ang: puandum/pawndum sawi lai hian "puan dum" (black cloth) rawn sawi ta daih țhin an awm a, tunah erawh chuan chu chu kan sawi tel lo tih i hre țheuh ang u.
DICTIONARY LAM
1. Pu Buanga dictionary (1940):
• puan dum, (pawn-), n. a dark blue cloth worn by the Lushais.
• pawn dum, n. a variant form of puan dum, which see.
(Pu Buanga chuan puandum/pawndum chu thuhmun a ti phawt mai.)
2. Pu Remkunga Mizo Ṭawng Dictionary (2008):
• puandum (pawn-), Mizo puan chi khat, la dum hmanga tah, a eng leh a sen, etc.-tea a dung zawnga țial, mitthi ruang khuh nan tea hman țhin, khuallam châng tea sin țhin, mitthi vuinaah te, etc. lungngaihna entir nana sin țhin."
(A hranpain pawndum a ziak lo; "zawl puan" tih a awm a, "puan dum, movin pasal a neiha a chhawm tel țhin, chumi a neih loh chuan a man pawh tihtlêm hial theihna," tih a ni.)
3. RK Lalhluna Mizo Ṭawng Dictionary (2013): Hetah pawh hian a chunga mi ang thoin 'puandum' a sawi fiah a, a hranpain 'pawndum' a sawi fiah lo; 'puandum' hrilhfiahna en mai turin min kawhhmuh. Heta 'puandum' hrilh fiahna chu "puan chi khat" tih a ni. "Zawl puan" tih pawh a awm tho a, Pu Remkunga sawi fiah dan nen a inan avangin tar lang kher lo mai teh ang.
4. Pu Lalzuia Colneyte unau Zoțawng Dictionary (2015):
• pawn dum/ puan dum - zawl puan, Mizo puan awmze nei taka tah, la dum leh la sen intah pawlh."
• zawlpuan - puan-dum, pasal neiin a chhawm ngei ngei chi 'zawlken puan' an ti bawk; a tel lo chuan tlaia man kiam theihna.
LEHKHABU PANGNGAI
1. Mizo Pipute leh an Thlahte Chanchin (K. Zawla; 2011): K. Zawla hi Mizo history ziaktu lâr tak a ni a, he a lehkhabuah hian "zawlken puan dum" tih leh "puandum" tih a hmang.
2. Mizo Chanchin (B. Lalthangliana; 2001): B. Lalthangliana hian "puandum (pawndum)" tiin a hmang hmasa te te a, a sawi zui zelnaah chuan "puandum" tih a hmang.
3. Mizo Hnam Dan Latest 2015-a chhuak thlir zauna (MC Awia; 2009): Hei hi Mizo customary law a bua an siam a ni ber a, hetah hian "Zawlkenpuan chu Mizo puandum pangngai a ni a," tiin an ziak.
4. Mizo La Deh leh Zethlan (Boichhingpuii; 2016): Ani hriat dan hi a dang deuh a, ani hian a dik zawk a rawn sawi ta tlat mai bawk. A thluk thlengin a lam dan tur hetiang hian a ziak, "'Puandum' a ni lo a, 'Pawndum' ('Pawnto' lam anga lam) a ni a. Lam fimkhur a țha,"_a ti a. A hmaa kan tar lan tak zawng zawng a rawn kalh fai vek mai.
MUP TLANGAU
MUP Tlangau, July 2017-ah chuan, "Puan dum chu eng puan pawh, a rawng a dum chuan a ni vek mai. Pawndum erawh chu puan chi khat, a dum leh a sena țial, tunlai chuan khuallamah leh mitthi vui nikhuaa kan hman țhin a ni. Tunlai mi hi chuan a hnuhnung zawk ang pawh hi puan dum kan ti ta deuh vek mai," tih a ni a. Tunlaia a dik lo zawk hre țhinte țawngkam chiah chiah a ni.
MUP Tlangau, October 2017 a lo chhuak leh a, MUP member-in a rawn ziak ve a, "...Darkhuang vawi sarih vuak chhungin ding ila, PUANDUM kha bât ila, a han ti a, an bât ta far mai a. An puandum tih kha mufler tiat lek kha a lo ni a. Keini țhianho chuan mak kan ti deuh a. Puandumah kan ngai meuh lo emaw ni?" a ti a. 'Puandum' ti naran mai loin hawrawppui ngatin a ziak.
(Mi thiam chin chuan a dik zawk emaw, dik lo zawk emaw an sawi lo niin a lang a; a thiam lote bawk hian a dik zawk kan hre thei ni te pawhin a hriat.)
Tags
Mizo