Darrokima Tluangpuia Pa
Amah ka țhianpa Zautea khan a sawi alawm; Sialsuk ațanga Aizawla lawipui a kaih phei chanchin ngaihnawm zet mai kha.
Patlingin nilenga thlantui luanga lei kan laih pawhin Rs 180 kan hlawh a, chutih laia Aizawl thleng lawipui pakhat kaih pheia Rs 1000 hlawh theih te chu keini ang tan chuan pheichham tenau kan man hi a ni ringawt mai a.
Zing firah, leilung lan hma-in ka lawipui kaih tur nen chuan Sialsuk chu kan chhuahsan ta luah luah mai a. Ni khat thilthua Rs 1000 han hlawh chu ropui hi ka ti khawp a, lawipui mawnga ben pah te hian ka nui leh vur vur țhin.
Rin ai takin kan tluang a, ka lawipui kaih lah chu beisei aiin a kal țha duh a, zan dar 8 vela Aizawl thleng hman chauh tura inngai kha tlai dar 4 velah Aizawl kan lut ta ruau ruau mai a. A lawmawm viau rualin lawm lohna tur pawh a awm țan nghal.
Ngaizel velah emaw, Kulikawn velah emaw tal ka lawipui kaih kha hnutchhiah nghal mai ila chuan kan khawvel hi a fel nghal duak ni mai tur hi a nia. Mahse, Chawlhhmun lam thleng thlenga inkaih liam thlak a ngai mauh mai kha a manganthlak lai tak chu a ni ta a ni.
Mission Veng bazar te, Sikulpuikawn te, Khatla kawn te kan pal tlang zel a. Mi zawng zawng chuan hmuhnawm thlirin min lo thlir ta emaw tih mai tur hi a ni a. Ka lawipui kaihin motor kawng a kian țha duh lo, hma lam ațangin ka'n pawt fan fan a, a chang leh a meia herh chungin hnung lam ațangin ka'n nawr ngat ngat a, driver țhenkhatin mi khawngaih taka ruanga horn min han hmeh khum vak phei chuan chempui phawrh a chakawm rum rum zel nia!
Tlai dar 5 ring dawn, office bang tam vanglai tak maiin Tennis Court bul, city bus stand kan thleng phei a. Bus nghak kha an lo ding inthuahthip tup mai a. An zawna kan kal lai tak mai chuan ka lawipui kaih lai chu a ding leh ta chut mai a. Ka'n hawi let a, a ke hnung lam chu a lo chhep kak țuih țuih a, chutianga a tih chuan a e dawn tihna. Tam tak a e dawn tihna, ka hre chiang lutuk tlat. Huiha! Chutih laia ka rilru hah dan chu namen lo tak a ni.
Chutah le... Hmanhmawh miah lovin san a han pe a, beisei aia tam daih hi a han e vum ta hnuk mai a, thlir ngawih ngawih bak chu tihngaihna awm hek lo, a ek tlem deuh nan tal lo țawngțai hman ila țha tur hi a nia, mahse, mangan lutuk chuan țawngțai nachang pawh hi kan lo hre tawh reng reng lo hi a nia, ka lawipui ek khu vung vung ka thlir vawng vawng lai khan bus changtu mi tam tak khan engti enin nge min lo en ve ka hre lo; an lam ka hawi ve ngam lo.
Rs 1000 duh vanga ka hmingchhiat nasat takzia te, ka chhungten min lo hmu se min khawngaih dan tur te, chu lawipui chu leilet zawla han vuak pawp pawp mai ka chakzia te pawh ngaihtuah hman lek lovin kawngsira lehkhakhawng remchang chu ka hai khawm rawk rawk a, lawipui ek khu vung vung chu ka'n rut nawk nawk a. Chutih lai tak chuan City bus a lo thleng, horn a rawn hmet ri tuar tuar a, ka lawipui chu a phu zuk a, a tlan ta luah luah mai. Lawipui ek chawi luah chung chuan ka um ve nghal a, karei...! Sawi ringawt pawh hian ka hnuk a ulh, ka sawi thei tawh lo.
Tags
Mizo