Zoram Berampute kalsualna mawlh mai hi !

Lalremliana Pachuau

He thu ka ziah dawn hian Pathian thu, a bik takin Zawlnei lian pathumte thu ka bih chîk hle a. An pathum hian Berampute an demna a inang vek! Kohhran kaltlangin a thau thau an ei vek a, damlo pakhatmah an tidam lova, an beramte pawh an chawm bawk hek lo. Rev Sangvela hian min lo hrethiam se, anni anga Berampu ţha kan sawina a ni lova, Pathian ţih dek Berampu an awm lo kan ti hauh bawk hek lo. 

Ezekiela phei chuan Bearmpute a dem nâ zual bik emaw tih mai tur a ni! Kohhran thau sawkin an inthuam mawi a, kohhran hnawhbo, phuar mekte pawh an tlawh ngai bawk hek lo, tia a sawite hi a tam ber an ni! An bial chhûnga natna tuar takngial pawh an kanin an tichak ngai lo. Thlarau bote pawh an zawng hek lo a tih ang chiah dinhmun hi kan Berampute nihna a nih tak hi! Kohhran kawmiti kaltlangin pawisa an pe a, kohhran hriatah puangzarin ti ţha an va inti kher êm! Zoram kohhran hian sum hi engkimah a ngai zo ta! 

An kalsualna bul lo inţanna chu Pawl anga Chhim leh Hmar kohhran an inrem loh aţang leh kohhran hruaitu inkhaidiat chhawng duah a awm tak aţang khan a ni. He pawl hi a awm a ngai ngei mai, mah se pawi ta zawk chu chu pawlah chuan Berampute an luangliam ta tlat mai chu a ni. Pawl a lo awm reng rengin mawhphurtu an awm a ngai ziah a. Chung mite rorelna kaltlang chuan a ni, Zoram kohhrante hi kan kalsual tak chiam mai ni! Heng mite hian biak in chhûngah leh kohhran lama an pisa kaina hmunah bak rawngbawlna an kalpui thei ta lo. An tun hma lama ke pen chhuaka an thiltih ţhat hmangin an inthlamuan chawp a, an zinga thawk rei deuhte pawhin tun hma chu inthlamuan nân an hmang ta mek a nih hi! 

Zorama fahrah tamzia te, ruihhlo bawiha tang kan tamzia te, hûrna hriin min tuam hlup hlup mek laite hian Zawlnei hnenah Lalpa’n, ‘Beramte chu tlang tinah leh ruam tinah an vak bo a, Berampute chu anmahni an inchawm zawk avangin an beramte pawh sakawlhte chaw mai an lo niin beramte chu a saseh mai an lo ni ta’ a tih hi a va dik tak êm! Lalpa vek hian ‘Berampute u, in chung a pîk e’ zuk ti a! Heti êma Zoram chhiatna hmu chung si hian koohran tinte chuan kum khat chhûnga Budget an tlin chuan rawngbawlna hlawhtling kalpuiah an inngai ta vek bawk a nih hi!

Pastawr chauh kan sawi lo, Upa leh Rawngbawltute thleng hian Berampute an ni! Israel hruaitute sualzia hmanga kan ram dinhmun tarlana awmte hi chhiar a hreawm a ni! ‘An puithiamte pawhin nasa takin ka dân an bawhchhia a, ka thil serhte an tibawlhhlawh a ni. Ka thil serh leh thil naran reng reng an thlei lova, mite lah thil thianghlim leh thianghlim lo an thleitir chuang lova’ tiin a vaukhan hial a! Thawhlawm lo luhna tawh phawt chu an hlan thianghlim fai ta vek a nih hi! Kohran pui berin ‘Mipui Budget’ pawt heuin Inkhawmpui Budget a pass a, ţhalai, nuho, pahoin mipui chanai pawt hekin contract hial kan thawk ta a nih hi! 

Ram hruaitute dinhmun an sawite mawlh mai hi a va han dik tak êm! ‘A laia hotute chu chinghne koham ei tur zawng vanglai ang mai an ni. Hlemhle taka an hlep theih nân thisen chhuah hial pawh an pawisa lo!’ an ti hial a! He Zoram mipuite nihna an tarlante hi sawi chhawn pawh inthlahrunawm khawpa tenawm, huamhap a nih zawh tak hi! ‘Zu in mi, khawi veng tlangval ve mai mai ka ni’ titu ngei khan, ‘Pathian lama ţan hi a hlawk êm êm reng a ni’ tiin a dawt sawi zozai video en tur awm chung siin zuk sawi ngam a! 

‘Mipuite chuan hnehchhiah an hmang a, mi chanpual rawk hrehna reng nei lovin rethei leh tlachhamte chu an hnehchhiahin dik lo takin an ti ţhin’ a tihte hi kan nihna dik tak a ni! Zoram mipui zinga a thei fa kan tihte hian midang ngaihsakna leh lainatna chhe tê pawh nei lovin an duham huam huam a ni ber a. Kham chintawk reng reng nei lovin hun an hmang mek a nih hi. Mi rethei bakberh kan tihte lah chuan kawng khat tala hlawkna kan hmuh theih nân chuan BLP nih pawh kan hreh ta lo hial a nih hi! Zoramah hian khawi khuaah mah lo him zuk awm tawh lo hial a! 

Berampute hian tihsual an neih lên ber chu ka beramte an chawm lova, natna tuarte an tichak lova, ruh tliak an tuam lova, damlo an tidam lova, khauh tak leh nâ takin an thu sawi hmangin an thunun ta zawk si, tia Lapa’n a chhuahchhalna hi a ni. Kawmiti buai reng renga hun hmang, hmun tin hmun tanga kala rawngbawlna chuangtlai ruahmanna rah an seng mek a nih hi! Chutih lai erawh chuan sawma pakhat pêk loh hi Pathian pawisawina tiin min vau titih a nih mek bawk a!

Pastawr Lengluta chanchin han chhiara damloin an pan lai hun ngaihtuah chuan kan tun hun chu dang tak a ni ta! Hun bika biak ina thu sawi, mitthi vui, nau hlan, inneih, mitthi ral, baptistma chantir bakah bial kawmitia tel bak Berampute hian thawh tur reng an nei tawh lo! Anmahni ang bawkin kohhran upate pawhin rawng an bawl a, damna reng an kengtel lo a nih tak hi! Kohhran upa chu a ni ve lawi si a, a nun hi a nuihzatthlak tih lo pianna chhan pawh heng zawng zawng vang hi a ni.

Berampute awpna hnuaiah hian beramte chu, ‘Sa seh mai mai an lo ni ta ngei a’ a tih ang chiahin a hman hman an rai a, an rui a, chhûngkuaah buaina an siam a, khawtlang an tibuai a, an insual a, mi an rawk a, mi an bum a, ruk an rut a mawlh mawlh mai a nih hi! Vengtu nei lo beramte hi chianghnia leh sakawlh hmanga seh tawk mawlh mawlh kan va ni ta êm! A hman hmanin khaw laia lirthei an rawk a, pitar takngial pawh an pawisa itin an tihlum duh ta hial a nih hi! Mahni chhûngkua zawng zawng pawisa it vanga tihlum phiar duh pawh an awm ta!

Pawl anga inkaihhruaina khaidiat thehrep vang hian kawmiti kaltlang lova rawngbawlna kalpui thei ta miah lo kan han ni ta maite hi a lo hmulawk vek em ni aw ka ti! ‘Berampute pawh anmahni an inchawm tawh lovang a, an ângchhûng ata ka beramte ka la chhuak ang, Berampute ei tur an ni tawh loh nân!’ a tih tak hial ni! Kohhrana thawkte hi an va han nuamsa ngai êm! Sawrkar ai pawhin an lo nuam sa tawh ţhin nia!

Anmahni mai piahah an pension hnu pawhin an chhûngte thlengin MR zuk bill thei a maw le! Hei êm êm hi chu sawrkar hnathawkte pawhin an tithei hauh lo nia! Hei vang hi ni maw, pawl chhuak an tam chhan? Lirthei chhuak thar bel ber hmangin rawngbawlna an kalpui a. An pisate lah chu sawrkar pisa tam zawk aiin a han ropui ta a! Mi rethei leh chumchhia tân chuan pen luh ngam lohna khawpin a ni, an rawngbawlna hmunte hi a lo ropui tak ni! 

Zoram Berampute hian, ‘Kohhran kawmiti kaltlanga kawng dik niawm taka lang, a tawp thihna ni si a awm a’ tih hi anmahni chanpual ni ve thei ngai lovah an ngai niin a lang. An rorel tam zawk hi chu kawng dik niawm tak hian a lang nangin dai leh ruam fana beram bo zawnna lam reng reng a hawi ngai lohzia ngaihtuah hian ro zawng rel zual an nei tam khawp dawn niin a lang tlat! Mi kutah engkim an dah a, ropuina lai taka erawh anmahni chanpualah an siam vek a ni ta ber!

Entirna pakhat chauh han sawi ta ila. Kohhran member zinga pakhat chu zu zuar a ni tlat mai. Nuthlawi niin fa panga a nei a. Zuar lo thei a ni lo, mah se kohhran erawh chuan chu hmeithai chuan Pathian nena lêng dun tura eizawnna rintlak a neih theih nân nuai 15 hmanga ringtu rinawma siam ai chuan Bolero thar diai lei an rel thlu ta daih! Hei hi a dawt a ni hauh lo. Chu ai chuan kohhran sum thawhlawm kaltlangin sap ram lama Pastawr, zirna sâng zawk bei tura kum khat chuang chawm kha ropui an ti zawk daih a nih hi! 

Savun Kawrfual hi kan sawi tehchawk a, a ziaktu khan a nihna kaltlanga tlanchhe deuh chunga a ziak a nih hriat a ţha. He lehkhabu ai hi chuan angial anganin nitin FB hmangin kan nihna dik tak hi ka ziak hnem zawk hial ta ve ang. Mahse, kan harh thei lo mai ni lovin Pastawr challang puipuite chuan tuna kan kal dan hi a ţha, tiin dawihzep takin min hnial ngam tlat tawh a ni! An hamţhatna humhim tura ţan an lak dante hi Lalpa mitah chuan a tenawm awm mang e ka ti ţhin. 

Pathianin Ezekiela hnenah, ‘Heng Berampute hi ka do a ni’ a tih ang chiah khan, thu sawi ţha, Thlarau Thianghlim malsawmna pai tel lo sawi hian an be be a. An sermon tihropui nân Mizo rilrem tak khuang hnih hla thlangin lamtual mawi an tam zawh poh leh thu sawi hlawhtlinga inngai ta hliah hliah an tam ta a nih hi! Berampute tenawmzia lo lanna dik tak i han bih teh ang. Kohhran bil bik ngaihtuah lo hmasa phawt ang che.

Kum 2005 khan Bangalore lama Infosys Co hnuaia Process pakhatah ka zuk thawkin kum thum chhûng ka cham a. Zoram lama Berampute kawmiti hnuaia kan kun miau loh avangin Denomination tina mite kha lungrual takin Bangalore Mizo Christian Fellowship (BMCF) hnuaiah awmin kan inlungrual êm êm a ni. Engahmah buaina kan nei ngai lo kha a va nuam êm aw!

Mahse, Zoram lama Berampu lian ber kawmiti chuan kan kohhran bil tiin ka chhuahsan hnuah BMCF kha an lo chhuahsan ta hmak mai a! An chhuahsan chhan sawi mawi turin Vanglaini lamah an Berampu chhuan zinga mi khan kawng dik niawm taka lang, thihna kawng ni si hmangin mipui ngaihtuahna a han vehthlem kual ta vel a nih kha! Jeremia’n, ‘An zak lova, an hmai pawh a sen eih bawk hek lo’ a tih ang chiah kha an ni! An chhuanlam ber chu kan kohhran tih dan an bosal loh nân tih zuk ni a!

Berampu ţha sawi lovin thu khar hnan ta ila, Lalpa lamţang ka ni ngai lovang. ‘Ka beramte chu khaw dûr leh thim hnuaia an mangan hunah ka zawng chhuak ang a. Hlobet ţha tak hmunahte chuan ka tlattir ang. Bote chu ka zawng ang a, ruh tliakte pawh ka tuam ang. Damlote ka tichak ang a, dik takin ka chawm ang’ tiin kawmiti kaltlang lovin an hnenah ngei Lalpa hmangaihna leh khawngaihna a takin Berampu ţhate chuan an lantir zawk ţhin. 

Ni, biak in ropui lutuk tak mai sak kawnga ngaihtuahtu pawl nih reng laia kohhran mite zinga chhuanchham awm pawh hre lo khawpa thil ţha tia inngai an va tam êm! Kawmiti thuchhuak buaipui reng renga Pathian hnena ţawngţaina pawh hlan mumal hman lo khawpa Pathian tân tia thawkrim thlawn mai Berampu tam takziate hian Lalpa ngêng a chhûn ta a nih hi! Harh rawh u, Jakoba chuan, ‘In zinga mi tam tak hi zirtirtu (Berampuah) lo awm suh se, zirtirtuin rorelna nasa lehzual kan tawk ang tih kan hre si a’ tiin in chunga thil thleng tur a sawilawkte hi sim nân hmang mawlh teh u.