Favang

LH Varte

Hun leh ni te a inher liam zel a, tunah chuan Favang hun nuam kan thleng leh ta. Hun hrehawm leh khirh tak tak te tawng thin mah ila, Pathian hian hrehawm tuar tur ngawr ngawr chuan A fate hi min duh bik loh zia he hun hian a rawn tarlang leh thin a nih hi. He hun nuam hi kan bel chiangin kan chhut chiang ngai em le..Mizoramah chuan Sik leh Sa nawm hun lai ber niin, boruak a lum lutuk lova, a vawt lutuk bawk hek lo. Khua a thiang tha in a mawi em em bawk a ni.

Add caption

Zing vartianah han tho ila, khua a thiang tha em em a. van dum pawl riai te chuan chibai min lo buk a, kawla ni chhuak tur lah chu a mawi danglam bik em em bawk a. Vawiin atana duhsakna famkim min hlan ni awm tak a mawiin a rawn vul chhuak ni ber in a lang. Khua han chuan ila, hmun tin, ram tin mai chu a mawi em em vek a, lungleng ngai lo tan pawh a lunglenna tham chu a tling teh meuh mai. Tlang tin an hring mawi em em a, khawi hmun mai pawh hi a mawiin a lang duhawm em em a ni. Chu a chhapah Christmas rim a lo nam tawh bawk si nen. Patling thankin tawh pawh Thlasik Nilum ai chungin duhthu kan sam kual rawl bawk nen.

Hetiang hun nuam kan nei zet hi chu kan va han vannei teh lul em! Tunah chuan khawlum avanga thlan tlak zawih zawih hun te kha a liam zo tawh a, engkim mai hi a mawi em em vek mai a nih hi. Turnipui kawla’n a her liam mek a, hetih hunah hian khawvel mawi zia hi i lo dawn ve thin em? Pathian thilsiam duhawm zia hi i lo thlir ve thin em? Han thlir ve teh “Dam hi a lo manhla hle a nih hi” i ti ve ngei ang. Rawng hnawih chawp ang maiin tlang tin te chu an eng no surh mai nia!! Hramthiam va tin reng te’n zaiin min awi reng bawk a. He hun lo thleng tur hi an thlahlel ve em em bawk a. Kan unau tam tak ramdanga awmte paw’n he hun nuam leh duhawm hi chhim turin Zoramah hian an rawn haw leh thin a ni.

Hetiang taka hun nuam lo thleng tur ah hian he Favang kawl eng nuam tak hian eng ang hun te nge a lo paltlang ve le? Thal ro em em te, Furchhia te, Nipui lum sa huam huam te, khawkheng rapthlak tak tak te a paltlang ve bawk a sin. Mihringte tana zir tur leh beiseina min siamtu a lo ni reng mai nia! Heng hun hrehawm tak takte hi tawng lo i la, he hun nawmzia leh hlutna hi kan pawh phak meuh ang emaw chu!!

Heng hun khirh tak takte hian he Favang hun hi an ti hlu zual sauh ang hian, keini pawh kan hun kal tawhah te thal khawro ang mai a nun tuihal chang te, riang bik ngawih ngawih ni a inhriat changte, Furchhia ang mai a hun khirh leh beidawn em em chang te pawh kan nei thin ang. Mahse heng hun te hi kan nunah an cheng reng ngai lo a, kan hmalam hun atana Beiseina duhawm min petu an lo ni reng zawk a ni. Tunah hian eng thilah emaw i beidawng em em in, i hun kal tawh te khan an ti lungngai che pawh a ni mai thei. Nun a beidawn lai chuan eng thil tih mah hi a chakawm loh a, thih daih mai te chakin rilru tha lo pui pui kan pu thin a ni. Mahse, he thu hi han dawn ve teh ‘Khua a thim reng ngai lova, thilsiam mawi tak tak te rawn pho lang leh turin Ni a rawn chhuak leh thin a ni’. Kan nunah khawthim lai awm thin mah se, kan beidawng mai tur a ni lo. Hun hlimawm hian ban phak lekah min hmuak reng a, kan thinlung chau tawh tak hi Favang hun nuamah a hruailut leh thin a ni.

Tichuan, nikhat na rau rau chu he hun mawi zia leh duhawm zia belhchian nan hian han hmang ve la, hei aia tam hi sawi chhuah tur i hre ve ngei ang le.