Ram leh hnam humhalh - Vanlalruata, President, CYMA

Ram leh hnam humhalh chungchanga Aizawl khawpui chhung Branch YMA Hruaitute inrawnkhawna a Pu Vanlalruata,  President, CYMA thusawi.

Zanina Aizawl khawpui chhung Branch YMA hruaitute Kumpuan “Ram leh Hnam Humhalh” chungchanga inrawnkhawmna hunah hian a hnuaia mi ang hian rualkhai taka hmalak tlan ni thei se.

1. ILP dap/enfiah chungchang : Kan hriat theuh angin Assam sawrkar chuan National Register of Citizen (NRC) a siam hnuah, heta tel ve lo mi nuai 40 velte chuan thenawm State-ah inhumhimna zawngin luh an tum ni a sawi a awm a. Keini Mizoram pawh hi kan bang bik lo niin a lang. Tunhnaia Central YMA kumpuan Sub-Committee in a zuk zirchianna leh MZP ten Check Gate siam a an hmalakna atangin mi 400 chuang zet NRC a chuang ve lo an hmuhchhuah thute chanchinthar lam atangin hriat a ni a. Chuvangin, kumdangah te pawh ram pumah a ruala YMA leh Sawrkar tangkawpin ILP dap/enfiah beihpui a lo thlak tawh thin angin, remchang hmasa berah thawhchhuah alo ngai leh dawn ta. Central YMA-in rampum huapa ILP dap/enfiah ruahmanna a siam lai chuan Branch thenkhat remchang lo palh awm thin hi tun tumah hi chuan a pawimawh em avangin thleng lo hram se kan ti a. Tin, hnamdang ILP nei lo leh fel lo te hmuhchhuah an awm chuan thuneitute hnena hlan bakah in luahtirte pawh an mawhphurhna an hlenchhuah loh avangin fimkhur tawh tura hriattir nghal nise.

2. Hnamdang Dan lova sumdawng chungchang : Aizawl khawpui berah hian hnamdang Mizo hming hawha dawrkai hmuh tur an la tam hle niin a lang a. Branch YMA hruaitu thenkhatte phei chuan an dawr ve fo zawk niin a lang. Kan ramah hian ramdang/hnamdang te sumdawn theihna Trade Licence mumal tak a awm lova, heti chuang hian tun dinhmun hi kan thleng a ni. Tunlai khawvelah eizawnna a harsa chho mek zel a, Sawrkar hna phei chu kan inchan lo ta hle mai. Kan tu leh fa ten khaweng an rawn hmuh theih nan tunah hian keini ho hian tha thlah lova kan tan mar zel a tul tak meuh meuh a ni. Hemi kawngah hian Branch YMA hruaitu ten huaisen taka hma kan lak loh chuan dem kan hlawh ngei ang le. 

3. Ruihhlo Do chungchang : Kan hriat theuh angin kan ramah tunlai hian ruihhlovin nasa takin min run mek a, kan thalai tam tak an boralin tam tak Home/Centre-a dah ngaiin an awm nghek nghuk a, theihtawp chhuah a kan bei chung pawhin a sawt mawh hle mai a, tha kan thlah leh lek phei chuan kan ram hian a tuar nasa hle dawn a ni. Tun atang hian Branch tin ten thahnemngai taka Duty thin nise. Nikum YMA khawmpui lianin a rel angin, Ruihhlo ngaite pual a Home leh Centre, tha leh changtlung zawk nei thei turin hma lak mek a ni a, hemi pual hian a tul huna hnatlang thei turin Branch YMA tinte pawh kan inngen lawk a ni.Tin, heng bakah hian YMA-in a hma kan lak mekna chak leh zawka bawhzui ngai han tarlang leh ila :

a) Branch YMA hminga lehkha siam fimkhur a tul hle. Eg. ILP harsatna tawkte hriatthiamna lo dilpui te, Sumdawnna kawnga hnamdang lehkha ziah sakte, Political Party thuchhuak a hming lo ziahte, Kutdawh hriatpuina lo siam sakte tun hnuah chuan fimkhur leh zual a tul hle. Pem lehkha Central YMA-in a tih tur a tih anga ti lote chu a dawngtu Branch lamin lo hnawl ngam mai a tha.

b) Branch tam takin thahnemngai taka Buhfai leh Gas an buk thin avangin mi tak tak an lawm hle a, chutihlaiin, Branch thenkhat hma la la ve lo an awm hi kan pheikhai a rual theih nan hmalak tan nise.

c) Kumin hian MLA kan lo thlang leh dawn ta a, YMA hruaitute chu thianghlim taka khawsa tura beisei kan ni a, Political Party tan lam nei a kan lo chet ve chiam a rem lo. Tin, therhlo leh kan mamawh hrang hrang te dilna remchang a ngai a Political Party-te laka thangtlawm zawnga hma lak loh nise.

d) Central YMA-a kan chanvo hrang hrang eg. Tanpuina chhunluh, Budget, Annual Fee leh Report Form hrang hrangte a hun takah thehluh thin ni sela, tin, Central Co-ordination Committee (CCC) Meeting, General Conference/Rorel inkhawm ngaihpawimawh hram thin nise.

e) YMA tena thupuia kan neih “Tanpui ngaite tanpui” hi kan theih ang tawka kalpui hram hram thin nise. Hunpui kan lo hnaih leh dawn ta a, pawl hrang hrang, thianho leh mimal angte a tanpuina an pek hriat tur tam tak a awm lain, YMA te ber thawm a daih chang a awm thin hi tan kan lak leh zual a ngai hle a ni. 

Tin, ram leh hnam humhalh kawngah YMA te tun aia rilru kan pek a tul leh zual ta hle. Tripura Camp-a Tuikuk awm ten Mizoram a chhe thei ang berin dawtin min hek cham chi a, ‘lo haw rawh u’ kan tih reng lain, an lo haw duh chuang lova. Tun tum laklet ruahmanna bak hi chu Mizo mipuite hian kan nghah theih a rinawm tawh lova, chuvangin hmalak a tul hunah a tul anga che thei turin Branch YMA te lo inkau turin beisei kan ni. Tin, chutiang bawkin Chakma lam lahin dawt tinrengin min hek reng bawk a, nikum YMA khawmpui liana a rel angin Chakma Autonomous District Council thiah tum chu kalpui mek zel a ni a, ruahmanna duan mek zel a ni a, hemi atan pawh hian Branch-te a tul anga lo inkau tura beisei kan ni.

YMA hruaitu ten tih tur tam tak kan nei chho mek zel a, hruaitu dinhmun a khirh chho zel niin a lang a, inpekna thuk zawk nen lo chuan a kal theih ta meuh lo niin a lang. Kan ramah hian YMA lo chu a ram mipui ten beisei nghah ngamna an hmu ta meuh lo niin a lang a, kawng hrang hranga ram hmasawnna turte ,tlawmngaihna leh kan Mizo nun zemawi a vul zel nan YMA te hian tih tur tam tak kan nei zel dawn a ni tih hria in hruaitu te inlungrual tak leh inpawh taka kan thawhho a tul leh zual ta hle mai. Theihtawp chhuahin kan ram leh hnam tan YMA ten hmalam i pen zel ang u. YMA vul zel rawh se.