Khawnvar dahna sawn

Lalramsiami

Mitin hi Pathianin ‘talent’ in pe theuh a. Pathian ringtu, mi piangthar kan lo nih phat hian Pathianin talent min pek te hi hman a duh a. Chu kan talent chu mi hrang hrangah a inang vek lo.

Thenkhat thuhriltute, thungaithlatute, khuangvawtute, keyboard tumtute, hla hriltute, tawnghriatloh nei te, tawnghriatloh hrilhfiah theihna nei te, tawngtai dam theihna nei te, mite chawkphur thei riau te, zirtir thiamna te kut themthiamna hrang hrang te leh thil dang tam tak a awm a, kan sawi seng lo vang.

Heng kan talent theuhte hi Piantharna kan chan hlim chuan phur takin Thlarau Thianghlim awmpuina nen ka ti pungin kan hmang thin a. Kohhran leh kan ringtu puite tan malsawmna kan nihna hmanruaah Lalpan min hman sak thin a ni. Chung hunah chuan Thlarau Thianghlim tanpuinain kan thusawi tlemtete, kan lam ringawt te, kan hla thlan ringawt te leh kan tawngkam khat lek pawh Lalpan mal a sawm a. Midangte chawkthoin nun nguite tiharh a, hnungtawlhte hmalam panna hmanruaah te Lalpan a hmang thin a ni.

Hun a lo kal zel a, kan lo inthlahdah a, Lalpa min duhna leh Thlarau Thianhlim aw pawh ngai chang zo loin keimahni duh danin kan kal mai mai thin a. Chumi hunah chuan Lalpa rilru pawh kan ti nain Pathian ram tan hnawksak kan lo ni thei hle thin a. Chutiang mite hnenah chuan Lalpa’n hetiang hian thu a sawi a ni. “Nimahsela, demna che ka nei a ni, i hmangaihna hmasa ber kha i ban tak avangin. Chutichuan, i tluksan tak chu hre reng la, simin, a tira i thiltihte kha ti leh rawh, chutilochuan i hnenah ka lo kal ang a, i sim loh zawngin i khawnvar dahna kha a hmun ata ka sawn ang ( Thupuan 2:4-5). Chumi awmzia chu khawnvar chu a eng thin a. Biblein ‘hrai hnuaiah an dah ngai lo. A dahna hmunah an dah thin’ a tih angin midangte chhawr phak hmun ualau midangte entu, kawngbote kawng kawhhmuhtu thim zinga awmte tana enna petu a ni thin. Chuvang chuan kan talent (khawnvar) Lalpan min pek theuh hi midangte tan malsawmna ni turin kan hmang chhuak thin tur a ni.

Chuti ni lo va Lalpa min duhna leh kohna pawh ngai pawimawh lova Thlarau Thianghlim hruaina pawh kan ngaihchan peih loh chuan,Thlarau Thianghlim tel lovin, keimahni lungawina chin zelin, mahni inthiamchawpin, hah takin kan mawhphurhna hlenchhuah tumin Pathian rawngbawl inti siin kan thawk anga.Chutah chuan Lalpa lungawina khawp rawngbawlna anih loh avangin, kan rawngbawlte leh Pathian  hminga kan thiltih hrang hrangte chu midangte ti vuitu, tiheltu, tibeidawngtu, lehlama tangten Lalpa hming an sawichhiatna remchang siamtu, a kohhran thianghlim tihmelhemtu. Pathian ram tan mihnawksak tak kan ni dawn a ni. Chuvang chuan Lalpan kan hnena thlarau thianghlim hmanga a inpuan lai hian tlawmna nen ahmaa kan inlan a,a hnena kan in pek thar hi a pawimawh em em a ni. Lalpan kan khawnvar (talent) dahna a sawn angnga.Thi reng siin nung hming puin a rawng kan bawl ang tih a hlauhawm em em a ni. Lalpa’n Talent min pek theuhte hmang hian kan kova mawhphurhna a dah hrang hrang te hi ama duhdanin I hmang zel ang u.