Nui tam rawh

Reader Digest thuziak zinga tha deuh chu “Nuih hi damdawi tha ber a ni” (Laughter is the best medicine) tih hi a ni. Mahse, nang chuan, ‘Ka nuih a zat miau loh chuan engtin nge ka nuih tam  theih ang?’ i ti tiraw?

Nia, mi thenkhat chuan thil engkim hi an la runthlak lutuk fo. Eng emaw chang chuan a thatna lai a awm ve zauh thin na a, nuihpui hawk hawka hahdamna ni mai tura runthlak lutuka thil kan ngaihtuah thin hian kan nunah lungngaihna leh harsatna a zual phah fo. Harvard University Professor, William James-a chuan, “Hlim lo chung pawha hlim taka han awma, han nuih luih hian hlimna tak takin a rawn zui mai a ni,” tiin a sawi. America rama Insurance Company-a thawk zinga hlawhtling ber pakhat Franklin Better-a chuan, “Hlim hmel pu mite hi eng lai pawhin an duhawm reng a ni, a ti bawk.

William James-a hi chuan, “Kan hlim vanga nui lovin kan nuih vang hian kan hlim chhunzawm thin,” tiin a sawi bawk. Hlim taka nuih i duh chuan i hlim theihna tur kha nangma kuta awm a ni a. I nuih a zat loh hle lai pawhin darthlalangah han inen la, nangmah ngei kha infak la, “Ka hmel hi chu a tha mawle!” te tiin han insiamchhe vel la. I nuih a za chawp ang a, i nui hawk hawk mai ang. A nih loh vek leh thleng sil pah te, insu pah te, eng emaw ti pahte khan ring zet zetin han zai la, han intithawveng lui teh, i nuih a za chhunzawm mai ang.

Comedian, Steve Martin chu tuk tin darthlalang hmaah minute 5 chhung a nui lui ziah nia! Nuih fo theih hian kan mood a ti fuh thei a; phurna leh thahrui min pek belh fo a lo ni. Engto nei miah lo va, za em ema nui hawk hawk theihna tha tak chu thil sual tih loh hi a ni. Mihringte hi kan nun a thlamuan a, hlauhthawn kan neih loh a, thil tha lo tih kan chin loh a, rilru tha tak kan put thin phawt chuan hlim tura siam kan ni. Kan hlim loh chhan tam ber hi chu thil tha lo tih kan chin vang te, kan rilru that tawk loh vang te a ni fo. Nun hahthlak leh khirh lutukin nun hmang duh hauh suh; a atthlak teh mai a nia. 

Pathian malsawmna i dawn tamzia ngaihtuah la, hlima nui hawk hawk tur i ni asin. Zanah tui takin i mu a, zingah thawh i hai phung a, i zung teuh thei a, dulkiar khawpa chawi ei nghek tur i nei a, ei theihna turin hrilselna pek i ni bawk a. I vannei teh asin. Pathian avang hian hlimna leh nuihna tur a tam em em a. Chu chu hriain Nehemia chuan, “Lalpaa lawmna chu in chakna a ni si a,”(Nehemia 8:10) a ti. Pathian duh zawnga nun hmang mite an hlim thin. Nui tam i duh chuan i nuna thil tha lo i chin thin kha bansan daih la, tluang takin nun han hmang teh. Pathian hian a duh zawnga nung thinte hnenah chuan hlimna a pe a, harstana hnuaiah pawh zangkhai takin an nui hawk hawk thei talt thin. Chu nun hlimna thuruk chu pek i ni e. “I ka nuihnain a tikhat ang a, i hmui pawh hlim au thawmin.” (Joba 8:21)