“Mi zawng zawng hnena i sawtna a lan theih nan chung thilahte chuan taima la, chungah chuan inhmang zo rawh.” I Tim 4:15
Isua hun lai khan tunlai ang hian heng kan media changkang tak takte hi a la awm ve lo va, chuti chung chung chuan Media an neih chhun tawngka (oral media) leh thuziak (scroll writing media) kha a hmang tangkai em em lawi si a ni. Rawngbawlnan a remchang apiang a hmang ve mai a. Mi sual inah a luh laiin mi fel inah a lut a, mirethei inah a luh laiin mi hausa inah pawh a lut bawk a. Mipa hmeichhia a thliar ve hek lo. Zin veivah nan (transportation) chuan man chawi ngai - Lawngte kha a hmang ve tho bawk ang tih a rinawm em em. Sabengtung te pawh chuangin a hunlaia hmanruate kha a hmang tangkai a ni tih kan hria.
Vawiinah hian Isua kha mihringah rawn chang tha lehin kan bulah awm ta se, social network hrang hrang heng Facebook te, Whatsapp te, Hike etc te hi a hmang ve mai ang em? Rawngbawlna atan a tul hunah chuan a hun laia zin veivahna(transportation) tha leh media a hmang tangkai ang bawkin heng hi a hmang tangkai ang tih a rinawm em em a, heng hi Isua duhzawnga kan hman leh kan kawihher hi Isua pawh a lawm em em ang tih a rinawm a ni.
1. Thu tha kan post hi tangkai lehzual: Pulpit atanga thusawi hian inkhawmpui leh programme pawimawh tih lohah chuan ngaithlatu an tam lo thin. Kohhrana mi hla kan tih te phei chuan thusawi tha tak tak an ngaithla tam lo fo. Chung mite chu an inah kalin kan luhchhuak reng thei lo va. A hman pawh kan hman kher lo thei. An tana chanchintha hrilhna tha chu he social networking hi a ni ang tih a rinawm hle.
Thu kan post dawna tawngtaina nena kan hlan thlap hian Pulpit atanga kan sawi tlukin Pathianin a hmang duh ang tih a rinawm em em a. A thawktu tur thlarauvin a hman chuan, “Isua hi lo ring ve tawh rawh u” tih mai pawhin rampum a tuam thei tih hriain he social networking hi Pathian rawngbawlnan a va tha lehzual em. (Tin, an hnenah, “Khawvel zawng zawngah kal ula, thil siam zawng zawng hnenah chuan Chanchin |ha hi hril rawh u. Marka 16:15)
2. Social Media Ethics thlirna atangin: Social Networking hrang hrangah Pathian thu sawihona group hrang hrang a awm a, heng hi a that viau rual hian hmansual theih a ni tih erawh hriat a tha hle. Kan huatzawngte Pathian thua vawm nan te, insawithaih nana Pathian thu hman te, uchuak taka Kristian thurin dik tawk lo leh firfiak(extreme) thehdarh nante hman a awm thei hle a. Extreme rawngkai hrim hrim hi thil dangah pawh a lo him lo tlangpui. Tin, nileng lenga engmah hnathawk si lova helama inhmanral ve theih bawk a ni a. Chintawk hriat a tha hle.
Pathian thu hi a hunah te, hun lovah te puang zel tura tih ni bawk mah ila; kan tihtur (duty), kan mawhphurhna(responsibility) thulh phah nana heng social networking hman erawh Pathian thu tum a ni hauh lo thung. Helama thawk tura a bika rawih kan nih si lohva kan tih tur thulh khawpa inhman ral a hlauhawm hle a, heng lakah hian inven a tha hle awm e. (Engkim tan hian hun ruat a awm a, van hnuaia thiltih zawng zawng tan hun remchang a awm. Pian hun a awm a, thih hun a awm. Phun hun a awm a, thil phun phawi hun a awm. (Thuh 3:1-2)
3. Social Networking leh thalaite: |halai Kohhrana inhmang te chuan Isua duhzawnga he social networking kan hman thiam a tha hle. Kan khawvel changkang zelah social network hi a chagnkang telh telh ang tih pawh ring ila. Chutih laiin ringtute chu helam kawngah hian kan danglam tur a ni a. Hengah hian kan inhmang ral tur a ni lo ve. Heng hi tangkai takin a tha zawngin hman tum ila. Kohhrana inhmang tak zirna lama fail nih kan inhmeh lo ang hian kan zirnaah mite aiin kan zir nasa zawk tur a ni. Chuti ni lova kan hlawhchham chuan Kohhran hi inhmanna tur a ni love miin an ti mai ang a, Krista leh Kohhran hmel kan ti bal thei dawn a ni. Kohhrana inhmang te hi a inhmang lo te ai chuan kan changkang zawk a, thil engpawh ti dawn ila kan hmantlak zawk tih a hre tute kan ni. Hei hian rinna lamah nasa takin min pui a, puitlinna lamah min hruai thin. |halai, Kohhrana inhmangte chuan taima nih te hi kan inhmeh em em a. Thatchhia leh zawmthaw tak nih kan inhmeh lo bawk a. Chhungkua leh midang tana chhawr nahawm, rintlak nih tum zel ila. Zirna kawng thuah te, eizawnna thuah te pawh midangte pawl phak thei tura kan tan a, mahni intodelh thei tura tan kan lak a tul hle a ni. Social Networking tangkai taka hman i tum zel ang u.
Tags
Mizo