Thalaite leh Sex

Lalchansanga Chinzah

A khuh hawnna:

Thalaite leh sex han tih ngawt mai hi thil sawi nuam leh chakawm tak a ni lo a, kan mizo society ah ngat phei chuan zahmawha kan ngaih thin avang hian kimki deuh tak chunga kan sawi a ngai thin a. Inzirtirna dik leh fumfe kan hmu leh chuanglo a, chuvangin kan ngaihdan leh thlirdante kan her rem hret a ngai dawn a ni.

A hmasain Sex chungchang hi lo sawi dawn ta ila. Pathianin mihring a siam khan mipa leh hmeichhiaah a siam a, chu mai chu duh tawk lovin chi tam tak thlah a khawvel luah khat turin mal a sawm a. Mipa leh hmeichhhia chu an taksa ah chi thlahna hmanrua a hranin a dah a, chu thil chu Pathian mithmuh pawh a thianghlim taka nupa nun hman nan a siam a ni. Mipa leh hmeichhia in Pathian duhdan ngeia nupa nun an hman hi sex kan ti thei ang chu.

Thalaite hian engvanga sex chungchang inzirtir tur nge kan nih kan tih chuan, he thil hi hmansual theih a nih vang a ni. Chuvang chuan kawng dik leh him inkawhhmuh hi kan tih makmawh a ni. Inzirtirna leh kawng dik inkawhhmuhna kan tlakchham avang hian thil thalo leh pawi zawk thleng thei a ni a. Sex chungchanga thil dik leh tha, him bawksi inzitirna kawngah hian kan thanharh a hun tawh hle a ni.

Sex hi engnge a rawn chhuahna:

Bible chhui mite chuan Adama kawppui atan Evi a siam hma khan Pathianin Adama kawppui turin Lilit a siam a. ( Genesis 1: 27) Adama chuan a nupui Lilit chu mipa leh hmeichhia inpawl dan pangai a pawl a tum a, Lilith chuan a chungzawk awmlo a, taksa inzawla hman a duh a. Adama chuan a rem tihloh avanga a thinrim chuan Pathian hming lam thian loh chu lamin boruakah a thamral ta a.

Adama chuan a nupui koh hawsak turin Pathian a ngen a. Pathian chuan vantirhkoh pathum Senoy, Sansenoy leh Semangelof-te atir a. Tuipuisen kamah an va hmu a, haw tura an thlem chuan haw a tumloh thuin a lo chhang a. Angel pathumte chuan a fate chu nitin za an thihlum thin tur thuin an vau a. A ni erawh chuan naupiang zawng zawngte chunga thuneitu a nih thu leh angel pathumte chuanna banbun bunte chauh chu a zuah tur thuin a lo chhang a, beidawngin an haw ta a ni.

Lilith hi hurna sual thlarau bulpui ber a ni a, Eden huan atanga hnawhchhuah a nih veloh avangin thi theilo(Immortal) a ni. Mihringte hi thi thei kan nihna chhan chu Adama leh Evi bawhchhiatna avanga Eden huan atanga hnawhchhuah kan vang a ni. (Genesis 3: 19)

Lilith hi Mizo Bible-ah hian ‘zanlam Sava’ tiha dah a ni thin. English Bible King James Version ah hian ‘Night Creature’ tih a dah a ni. Lilith chungchang hi Thuthlunghlui ah vawikhat chiah a langa, Isaia Bung 34: 14 ah hian a lang a. “ Tin, thlalera ramsate chu chinghniate nen an intawk ang a, sathar chuan a thian a ko vang a; a ni, zan thil hlauhawm pui chuan chuta chuan awmhmun a khuar ang a, ama tan chawlh hmun tur a hmu ang. ( there shall the beasts of the desert meet with the jackals, and the wild goat shall cry to his fellow; the lilith also settle there, and find for herself a place of rest). Heta lilith tih hi ‘screech owl, “night creatures,” leh ‘night hag,” tih ten an dah bawk. Lilith leh a fate Lamashtu leh Lamia-te hi ramhuai sual mihringte rilru a hur sualna thlentu a ni an ti bawk.

Kan rinlohna lam atang in kan rilru leh ngaihtuahna rawn control a tum thin a. Incheina uchuak leh maksak tak takte pawh hi Lilith chhiahhlawh ramhuai sualten mihringte an zirtir a rin a ni. Hmasanga indona a fei leh thal, phaw hmandan zawng zawngte pawh an zirtir ni a sawi a ni. Hmeichhia in mit dum hem huam a an hnawihte, lepchiah tak taka incheite hi an lan sexy na chhan chu mihringte hipna tura Lilith hmanrua a ni a, hurna suala kan luhna tura thlemna hmanrua a ni tih kan hriat a tul hle a ni. Zan mutna a mu puak kan tihte, mangpui kan man thinte, hmeichhe inchei sexy tak kan hmuha zauthauna kan neihte hi Lilith hnathawh vek a ni.

Sex(Mipat hmeichhiatna) kan hmelhriatna:

1. Inkawmhona atangin:

Mizote hi inkawm let let thin, thiankawm nuam ti tak leh titiho nuam ti tak kan ni a. Heng kan inkawmhona ah hian Mipa chuan zahmawh sawi mai kan ching hle. Hmeichhe thenkhat pawh a huho a an awm chuan an sawi thin tho a. Heng kan sawi thin hian a ti ve ngailo leh la hmelhriatlo ten tih chhin an chak ve phah thei a ni.

2. Chanchinbu/ Lehkhabu/ Comics(Print Media):

Chanchinbu thenkhat hian khawilai emaw ah sex chungchang an ziak lang ve zauh thin a. Heng chanchinbute hian chanchinbu hlutna an tih hniam mai bakah, a chhiartute rilru a diklo zawnga a nghawng theih avangin fimkhur a ngai hle a ni. Lehkhabu thenkhat sex chungchang thukhuh tak chunga ziak lang an awm thin a, peh helh lemlo a sex chungchang ngawr ngawr ziah lanna a awm bawk. Comics thenkhat ah hian sex chungchang nuam, hlimawm leh chakawm taka lantirna a awm thin.

3. Television/ Internet/ Mobile Phone/ Computer(Electronics Media):

Television ah film bawlhhlawh leh sex rawngkai film entur a awm thin a. Internet ah sex pholanna site hrang hrang a awm bawk a. Kan duhna site atangin kan en duh zawng kim tak in en chakawm tak takin an pholang terh tuarh thin. Tunlai ah phone changkang leh hman nuam tak tak a awm a, heng hmangte hian sex video leh thlalak awlsam takin kan hmu thei reng tawh a ni.Computer ah porn video tam tak kan thiante leh hmelhriatte atangin kan la thin a, awlsam takin midang awmloh leh fianrialah duhthalin kan en thin bawk.

4. Facebook/Whatsapp/ Telegram etc.(Social networking)

Tunlai ah chuan social network nuam leh hlimawm tak tak hman tur a awm ta a. Heng thilte hi Sex chungchang sawina atan leh inthawn kual nan kan hmang nasa hle. Facebook ah hian Sex chungchang mizo tawnga sawihona group 10 chuang a awm a. Whatsapp ah pawh sex group tam tak an siam bawk. Facebook a sex group ah hian story an post 40% ( Za a sawmli) chu minu leh mipa nena sex an hman chungchang sawina a ni. Mipa tam tak hian hmeichhe zeilo tak aiin minu/nutling sex a tawnhriat nei tawh ngei an duhzawk thu an sawi a. Whatsapp group atang hian awlsam takin sex video kan inthawn zung zung thin bawk.

Heng a chunga kan sawite hi sex kan hmelhriatna lar zualte an ni a, heng lo pawh hi sawi tur tam tak a awm bawk. Kan tan a tangkai leh awlsamna thlentu hi suahsualna kawng min kawhhmuhtu leh a kailawn a ni thei a, hemi kawngah hian thalaite kan fimkhur a ngai hle a ni.

Sex hi hmansual theih a ni em?

Mipa leh hmeichhiain Pathian leh kohhran hriatpuia inneih hma a mipat hmeichhiatna an hman hi sual a ni a. Hmeichhia in tlangval emaw mipa a mutpui a, a hmeichhiat pui ngei a tisa chakna phuhrukna atan a hman chuan sual a ni a. Chutiang bawkin mipa in nula emaw minu a mutpui a, a mipatpui ngei sex a hmanpui chuan sual a ni. Mipat hmeichhiatna hi kohhran ;leh Pathian hriatpui ngeia hmeichhia leh mipa an inzawm hnua hman tur a thupek kan ni a. Mahni chakna leh duhna avang ringawt a sex hman tawh phawt chu sual kan ti thei ang chu.

Mahni anpui kawp(Homosexuality):

Tunlaiah hmeichhe leh mipa thenkhat mahni hmeichhiatpui leh mipatpui ngaihzawn hrehlo an awm ta nual a, heng zawng zawnghi sual Pathian huat zawng tak a ni. Mahni mipatpui leh hmeichhiatpui sex hmanpui hi Pathian in a duhlo leh zual a, Bible a mihring a hrem chhanfo pawh same sex hman vang a ni.

Pathianin sex hmansuala a huat ber, a mit naute khawih pha chu mahni anpui kawp hi a ni. Mihring zinga sualna pung (Genesis 6) leh Tuilet ( Genesis 7) avanga mihringte leh nungcha hremna hi mahni anpui kawp vanga hremna a ni.

Sex a sanlai( Most Active age group in man and women)

Journal of Sex Medicine in an zirchianna ah chuan mipate hi kum 25-29 inkar kan nih lai hian sex ah kan sang ber thin. Sex kan chakna chu kum 30 kan nih hnu chuan a lo tlahniam a, kum 50 kan thlen hnu phei chuan karkhat ah vawi 1.22 velh hman kan duhtawk tlangpui thin. Kum 25-29 inkarte hi chuan karkhat ah vawithum velh hman an duh tlangpuia chhut a ni.

Scientist ten an zirchianna ah chuan hmeichhiate hi kum 31 atanga kum 45 inkarah hian sexah an sangber tih an hmuchhuak a. Kum 18-30 inkarah hian dawtin, kum 46 atanga kum 54 inkarte hi an chak vak tawhlo tih an hmuchhuak a ni. (The Telegraph)

Virgin hi engnge ni? (What is Virginity?)

Hmeichhia emaw mipa emaw vawikhat mah sex la hmanglo hi Virgin kan tih chu a ni a. A bikin hmeichhia chuan an serh ah hian virgin an nih chhinchhiah nan hamda(hymen) pante a awm a. Sex an hman hnu chuan chu chu a lo thler thin a. Virginity an hlauh emaw an virgin tawhlo tihna a ni. He hamda hi pante mai leh dawrawm tak a nih avangin thildang vangin a thler thei a. Sakawr chung chuan, gymnastic tih thin vangte, cycle chuan vangte, mahni inhrawt(masturbation) leh thil dang tam tak vangin a thler thei a. Mipa nena sex kan hmanglo a nih chuan kan la virgin tho a ni tih hriat tur. Mahni inhrawt(Musturbation) vang a nih chuan mihring nihphung piahlam a nih tawh avangin thiltha erawh a nilo. Virgin ngeia nupui pasal neih hian nupa nun a hlim bakah, inrintawnna a siam a, nupa kar a nghet thin. Virginlo a nupui pasal inneite aiin virgin ngeia nupui pasal inneite nupa nun a hlim zawk fo.

Virgin hloh chhan (Causes of losing virginity?)

Thalai kan nih lai hian kan thisen a la lum that avang leh thil tihchhin chakna kan neih avangin kan thianghlimna kan hloh fo thin. A chhan langsar zual lo tarlang ila:

1. Tihve chhin chakna: Thalai kan nih lai hian khawvel thilah mite hriat leh tem ang tihve chhin chakna nasa tak kan nei thin . Thiante leh kan hmelhriat ten nuam leh hlimawm hmel takin an sawi a, chu chuan sex hmanchakna min siam thin. Tihve chhin loh hi a him ber.
2. Ngaihsam/Pharvar/ Lerh vang: Mihringte hi mize inanglo tak tak kan ni a. Ngaihsam tak engpawh thlengse a thleng ve tur reng a ngai kan awm thin. Mi pharvar leh lerh tak takte hian nungchangtha leh mi invawngte aiin virginity an hloh hma zawk.
3. Zu ruih vang: Zu kan ruih hian ngaihtuahna fim min hmantir thei lo a. Ngaihsamna, pawisak neih lohna bakah tisa chakna kawngah insum theih lohna a thlen thin. Hengte avang hian kan thianghlimna kan hlauh thei bawk. Hmeichhia ten kan hmelhriat leh thiante ngei pawh zu kan ruih chuan min khawihchhe duhtu an ni thei tih hriat a pawimawh a. Tumah rin loh hi a him, zu in loh emaw zu lak atanga inthiar fihlim hi a him ber.
4. Pawngsual: Hmeichhe thenkhat chu an vanduaina avangin pawngsual an tawk fo thin. An duhthu reng nilo a, hriamhrei leh vauna awka nena nawrbeh a sex hmanpui an awm thin a. Chungte chuan an duhthu reng vang niloin an thianghlimna an hlauh thin. Hmeichhe thenkhat a tira tang ngial, tang tlang ta lo an mahni remtihna avang leh an duhthlanna avanga sex hmang a, a hnuah pawngsual tuartu anga inchhal an awm thin. Kan duhlo tak zet a nih chuan mipa hian min tilui thei bik lo tih hi hriat reng tur a ni. Hmanrua leh hriamhrei a min vaute a nih loh chuan theihtawp a sual let a, tanpuitu auh thin tur a ni.

Mipate hian Virginity an hloh thei em?

Mipate hian hmeichhia ang thoin virginity kan hloh ve thei tih hriat tur a ni. Nupui kan neih hmaa sex kan hman chuan kan virgin bik tawhlo a ni. Mi thenkhat chuan mipate tan chuan virgin leh virgin lohin kawngro a su lo an ti fo thin. Mipate hi Pathianin hmeichhia aia a siam hmasak zawk miau avangin thianghlimna kawngah pawh hian hmeichhia ai chuan mipate hian Pathian rilru pawh kan tina zawk ang tih hriat tur a ni.

Hmanlai kan mizo ngaihdan ah chuan mipate hian an tlangval laia nula an ngaih loh chuan an thih hnuin Pawlan a sai a, kumthum chhung an ngawt thin tih ngaihdan kan nei a. Chuvang chuan mipa chuan a tam thei ang ber hmeichhia mutpui an tum thin a. Pa an nih tawh hnuah pawh mitha leh mualkil pha chuan hmei an nei deh duah thin a ni.

Kristianna in kan ram a lo luh hnu khan chu ngaihdan chu a bo hret hret a amaherawh chu vawiin ni thleng hian he ngaihdan hi pu kan la awmfo thin. Tlangval laia nula vawikhat tal mutpui thei nih chu intih theihnan hman kan ching thin. Hmeichhiate hian kan bialpaten kan thianghlimna min dila, kan remti vaklo chung min nawrluih hian an sawichhuak leh ngei ngei tih hriat tur, rimawm tak leh midang bula sawichhuaklo tura an insawi pawh hian an sawichhuak ngei ngei tih hria ila. Nupa kan nih hma chu sex ah hian inhnamhnawih loh tawp tur a ni.

Sex hmansual hian engnge a nghawng( Effect):

Pathianin a huat leh a mit naute khawih pha khawp a thilpawi a ni. Bible lamah lo en ta ila, Tuilet avanga mihring a hrem chhan kha sex hmansual vang a ni a. Sadom leh Comora a hremna chhan pawh kha sex hmansual vang bawk a ni. ‘Ka rilru ang pu’ a tih Davida ngei pawh a tluksualna chu sex tho a ni. Sex hi Pathian duhloh dana kan hman hian a hunlaiin nuam angin lang mahse a huatzawng a nih miau avangin hremna kan tuar let ngei ngei thin. Sex hmansual avang hian natna chi hrang hrang kan kai thei bawk a. HIV/AIDS, Hepatities B & C, Syphilis(Dadu )te hi sex hmansual avanga natna kan kai theih langsar zual deuh deuhte an ni. Heng natna te hian a hnuaia mi te hi an thlen thei :-

a. Nau chhiatna leh nau piansualna. b. Nau pai theihlohna(ching)

c. Chi kawnga nau pai. d. Tai na benvawn.

e. Chhul hmawr cancer. f. Til natna

g. Serh piansualna leh mipat hmeichhiatna hman that theih lohna.

h. Nauteah heng natnate kai chhawn a nihin mitna leh mitdelna hial a thlen thei.

i. Syphilis hian lung, kal leh taksa hmun hrang hrangah natna a thlen thei.

j. Mimal leh nupa ah nun hlim lohna thlentu a ni.

k. Hmusit leh endawng an hlawh thin.

Sex hmansual avanga natna kai tam ber tute nge?

Sex hmansual avanga natna kai tam ber chu kum 15 atanga kum 49 inkarte hi an ni a. Chuvang chuan thalaite hi sex hmansual lakah kan fimkhur a ngai hle a ni. MSACS in AIDS/HIV kaite a zirchianna lo en ta ila:

Source: MSACS Report (Mizoram Status of HIV/AIDS since October 1990 to June 2015).

A chunga Mizoram dinhmun atang khian AIDS/HIV kai tam ber chu kum 15 atanga kum 49 inkarte hi kan ni a. Thalaite zingah he natna hi a tlangnel hle a ni tih a lang chiang hle mai. Chuvang chuan thalaite hi sex hmansual theihna lakah kan inthiar fihlim a pawimawh hle a ni.

Tlipna:

Heng lo pawh hi sawitur tam tak a awm awm e, thalaite hian kohhran leh Pathian hriatpuina tello chuan sex hi hmanglo hram hram ang u. Sex laka kan fihlim hian Pathian duhzawng a nih mai bakah, nun thianghlim kan neih hian hlimna leh lawmna, malsawmna tam tak kan chang dawn si a. Mahni anpui kawp hi Pathian huatzawng tak a ni tih hria in, hetiang a inhnamhnawihte hi endawng mai lo a kawng dik kawh hmuhtu nih i tum ang u. Sex hmansual hian nun hrehawmna leh rilru hahna bak min thlen lo a, natna tihbaiawm leh hrehawm, mite endawng hlawhna mai a nih tih hria in insum theihna kan neih theih nan Pathian hnenah chakna awmphaw la a tawngtai reng chungin thianghlim takin i nung ang u.Josepha hi ka ngaisang viaua, Davida hi ka hrethiam khawp mai ti mailo in Sex hmansual theihna lakah inthiar fihlim vek ang u.