UID leh sakawlh

Rev. Rosiamliana Tochawng

India ram chhiarpui kan neih hian Mizoramh a hlau tawk kan awm thin. Kum 2000-a chhiarpui neih lai pawh khan sakawlh chhinchhiahna pu tur anga inngaia inchhiar duh lo an awm tawh niin sawi a ni a, chutiang bawkin EPIC kan hman dawn te pawh khan a hlau tawk an awm a nih kha. UID hlau, sakawlh nena sawizawm tlat pawl kan awm hi a pawi khawp mai.

Mi tam tak chiaina lai nia lang chu Thup 13: 16-18 naa sakawlh chhinchhiahna mitinin an neih tur thu leh chumi nei lo chuan an leia an hralh theih loh tur thu leh chu sakawlh number chu zaruk sawmruk paruk a nih thu hi chhiarpui leh UID nen an thlunzawm vang a ni.

UID kan neih tur hi Sakawlh chhinchhiahna ni thei awmin a ngai a, chumi bul nia lang chu Internet-a UID tangkai dan tur an ziak pakhatah 'No one can buy or sell any property without UID card. Through it we can control the black money and confirm that how much property is belongs to this person. Govt. can provide subsidy to whom have not any flat or property and get extra tax who have already flat or property.' tih hi a tel a, chu chu Thup 13:17 dikna tur ni hian a hre ta ni ber awm e. Helai thu hi thil lei leh hralh hrim hrim ni loin thil lian tham sawina a ni mai a, chu pawh chu official a thuchhuak pawh a ni hek lo. A tangkai dan tur sawina mai a ni.

Thenkhat UID ah hian Computer microchips, Biometric etc hman a nih tur thu leh chutianga data bank lianpui lo awm tur chu sakawlh ni ngei turah a ngai niin a lang a. Chutiang microchips te chu buhfang tia emaw lek lek, taksa phum mai theih a nih hmel a, kut emaw chal emaw hi a phumna tha ber turah ngaih a lo ni si nen. Tichuan Bible-a 666 pawh kha Greek tawnga chi xi sigma a ni a, sigma tih chu chhun emaw chiu tihna a ni a tiin chutiang microchips nen chuan a sawibel ta mai a. Mahse sigma a tih hi chiu emaw chhu tihna ni lovin, hawrawp sawina a ni a, ‘s’ ang tak a ni.

Mahse UID (Aadhaar Card) siam a nih hian computer microchips an phum reng reng lo. Mit naute thla(Iris) leh kut zung tang thla an la a, tichuan ID card an pe a, chu zawng chu a ni mai. Bank account nena thlunzawm tur leh Gas lakna tura tul tur anga sawina a awm a, mahse a taka kalpui a la ni lem lo. Tha ti pawl awm mahse Supreme Court-in a la dang tlat.

Global Survey of Group Survey on National ID Cards - in a tarlan danin khawvel ram tam tak hian hetiang ID cards hi an nei, Myanmar, Pakistan te pawhin hmanah an nei tawh. He thil hi a tangkaina pui ber tur chu ram himna atan a ni. Tunlaiah khawi ramah pawh firfiak ho an che thut thei, misual hrim hrim an huangtau bawk, chutiang karah chuan khua leh tui dik tak inhriat chian nan he thil hi a pawimawh.

Thenkhat hian sakawlh hi tuipui viau thin mahse sakawlh hi buaipui teh chiam a tul lo. Insawithaihna hmanga Pathian inrin tir tum pawh hi a fuh ber lo. Vawiina ka thil tawn leh tihah Pathian duhdan anga ka tihzel phawt chuan sakawlh hi engti kawng maha hlauh tur a awm lo. Min hmangaihtu Pathian hi kan lamtang a nih kan hriat chian chuan kan hriat lohna avanga buma kan awm emaw a phal reng reng lo ang. Sakawlh buaipui chiam hi tul lova thlabarna thlentu mai a ni thei.