Kristian thalaite leh Vaihlo

Lalchhandama Colney

Dinhmun – Thalaite zingah mifel tak tak, zuk leh hmuam a fihlim an awm nual laiin lungchhiat thlak takin a tam zawkte hi chu fihlim lo an ni. U.P.C. (NEI) lamte hi chu an tha viau a; mahse, a dang hote hi chu kan tha lo hle. Salvation Army lam te hi chuan tun hma kha chuan an dodal viau thin a; mahse, tunah erawh eng mah an ang tawh lo ni berin a lang. T.K.P. lam te pawh hi fihlim viau awm tak; mahse, an ni miah lo, a uar hlei hlei emaw tih mai tur an ni. Nikum K.T.P., rorel inkhawmpui Bawngkawna an neih tum khan ka zuk kal thla a, an chhun chawlh lai a ni ngei ang,Vai-pan-dawr tin maiah khan an kawrchung, badge, etc.,nen khan an bawr khawm tuai mai a. Engnge an tih tih chu hai rual a ni awm lo ve. Rilru tete chuan heng a han tel phak chinte chu branch-a mi fel deuh,vengva,an ni ngei ang a; mahse, an thil tih thin chu – kuhva, cigarette, etc., mi dangte nen a dang lam chuang lo a nih hmel hle mai. An hruaitute pawh an fihlim lo a nih chuan a dangte phei chu an chaurau duh awm hle mang e.

A That Lohna – Kan hriat theuh ang in vaihlo leh a kaihhnawihho hian cancer a thlen thei a ni. Vaihlo tur hian taksa tana thalo leh hlauhawm tak tak chi 4000, chuang lai a keng tel, mi thiamte chuan an ti a ni. Mei kan han zu a, hei hian kan lan dan, hmelte hi a tithim chual a, a tawi zawngin hmel a tichhe thei a nih ber chu. Mit tante pawh hian a tha lo hle a, khaw hmuh a tifiah lo thei a ni. Hei bakah hian sawrkar leh puipunna hmun reng reng ah khap vek a ni a, chuvang chuan phurit min siamtu mai a ni. Gutkha lam chite pawh hi hmeichhe lamin kan uar hle a, a rimchhiat mai bakah vaihlo ang tho a hlauhawm a ni. Hengho atan hian kan pawsate ni tin kan hmang talh talh thin a; mahse, kan hriselna tichhetu mai an lo ni a, tul lova sum khawh ralna mai a ni.

Rawngbawlna A Nghawng Dan Tur – Kohhran tina thalai pawlte chu a nihna dik takah chuan nakin a kohhran hruaitu turte an la ni hlawm a, chumi atana an in buatsaihna chu a ni. Hruaitute ngat phei chu member-te entawn tur an ni a,chu bakah naupang lam Sunday school-ah te pawh zirtirtute an ni tlangpui thin a, an fihlim loh chuan naupangte an tih hmuh thei a ni. Tun hma kha chuan a that lohna lam hi an la hmu chhuak lo va, tu pawh mai,tih theih deuh thaw khan an hmang thin a ni. Tun hnuah erawh a hlauhawm zia puan zar a ni ta un un mai, ruihhlo chi khat (Soft Drug)zinga chhiar tel hial a lo ni ta. Hetiang a nih avang hian Pathian rawngbawltute tan chuan a tih chi miah loh, kei mahni leh mi dangte tana tha lovin, Pathian hmel hliahtir theitu a ni. Nakinah kohhran upate, pastor, missionary-te kan la ni duh ang, chung hunah chuan heng vaihlo leh a kaihhnawihho hian min la tibuai thei dawn a ni.

Sim Theih A Ni – A hmasa ber atan chuan la ti ve ngai maih lote tan han tih ve chhin mai mai emaw ka ti tak tak dawn chuang lo, tih a, han zuk, hmuam, ei, etc., ve chhin kha a him lo hle. Zeuh zeuh atang hian a in tan duh khawp mai,chu ai chuan a tih a tih ve chhin miah loh a tha ber. A ti tawh lak lawh tan chuan tih tawp leh mai hi a awl ai lo hle a, chuvang chuan tum tam tak beih te a ngai thin a ni. Thianten emaw min lo fiam, nuih, a nih pawhin, thil tha lam a ni a, zahthlak leh tlawmngaiha lak loh chi tak a ni, kan hlawhtlin hlauh chuan, hnar a hlit phawi ang huai, a ni dawn a ni. Eng pawh nise, sap thufing pakhat – Try try again, tih hian min huam tel vek a, kan hlawhtlin mai loh pawhin tum li, nga, etc., kan ti mai tur a ni. Pathian hnenah te pawh kan thlen ang a, kan thlen fo ang a; tichuan, min lo tanpui ngei ang. Nangma tum dana i hlawhtling thei ngang lo a nih chuan, Aizawl Civil Hospital leh district hospital tinah tanpui tur chein, Tobacco Cessation Clinic,a thlawnin pan theih reng a ni bawk.

Kohhran thalai pawlte kan in enfiah a ngai, ho mai mai, tunlai thil alawm,kan tih tlat chuan kan tisual let der a lo ni reng dawn a ni. Han ngaihtuah chiang ta ila, hriselna atana thalo kan tih thin tlat chuan kei mahni pawh a tuar tur kan ni a,rawngbawlna pawh a ti buai ngei ang. Ngun taka han thlir vang vang chuan Kristian Thalaite leh Vaihlo chu thil in rem lo tak a ni.