Lalmânga Nu lawm rawih ni

Mafaa Hauhnar

21.6.2013

Facebook hahthlâkna ber pakhat ni a ka hriat chu mahni thu-a lehkhabu pahnih-khat vel lek chhiarina engkima ngaihdan sawi an tum a, hre ber thâwka an thaw phar phar a, chaltlai tak taka thu comment an ching hi a ni.

Kan thu haw lam leh kal lam pawh man mang hlei lo va, mi chungtlâk dan phêt rawn zawng pawlte hi an tam a. Zangbawng thu hniala min rawn hnial ve satliah, point sawi tlak aram nei lote hian ka dawhtheihna hi an tâwng kawlh fo.

Tukina “Lalmânga Nu Hlawh Rawih Ni” tih ka rawn zeh zeuh avang ringawt pawhin ngeng chhun tak taka mi khêng a, min khei fek fek duh an awm nual mai a. Ka intih tawngkam thiam tum vang leh intihvei tum vanga puhna hial pawh ka dawng.

Lalmanga nu kha lal a ni a. Lalin lâwm an ruai ngai lo. Lawm chu tha leh tha-in an insut thin.

“Lalmânga Nu Hlawh Rawih Ni” tih hi tute’n emaw tlaikhawhnua an chîn thar emaw ti zawng zawng khan kan missionary hmasa Pu Buanga (JH Lorrain) dictionary (Dictionary of the Lushai Language) kha han keu teh u le. Phek 283-na-ah: “Lalmânga nu hlawh rawih ni” leh “Lalmânga nu hlawh rawih thla” entries in hmu ang.

Hetiang hian:

“Lalmânga nu hlawh rawih ni, n. the longest day of the year (June 21st or 22nd). See explanation below.

Lalmânga nu hlawh rawih thla : moon corresponding nearly to June, when the days are longest. So named because the mythical chieftainess, known as Lalmanga's Mother, always used to arrange for her villagers to work on her jhoom then in order to get as much out of them as possible. The same story also applies to Lalmânga nu hlawh rawih ni above.”

tiin. Pu Buanga dictionary-ah hian “Lalmânga Nu Lawm Rawih Ni” tih chu zu han awm dêr thung lo va!

Zotawng thiam leh pipute chanchina mi rintlak ber pawla ka ngaih Pu C. Rokhuma pawhin heti hian a sawi:

Lalmanga nu kha Chawnghawih lal a ni a. Lal hnena buh an chhûn thin hma chuan pipute khan chhungkaw tinin lal tan kum khatah ni 2 emaw an thawk thin a, chu chu lal an nih hlawh a ni. Lalin lo an nei ve tho a, mahse rorel an ngaih avangin hna an thawk nasa thei lo.chhungkaw hrang hrang khan an pui thin. Lalmanga nu te lova an feh ni kha Lalmanga nuin hlawh a rawih ni, an lal hlawh a rawih ni a ni," tiin.

Thil hriat dan te, hmuh dan te, duh dan te a in-ang pit pet reng thei lo va. Ngaihtuahna hmang leh ngaihtuahna hmang, hriatna zau tawk takte nena thu han inchuh fiam vel te hi chu a nuam a, mental horizon tihzauna a nih bakah ngaihtuahna a chher hriam ṭha a, hlâwkna tam tak kan paw chhuak thin. Mahni ngaihdan nghet sa sahuai thing vawn tlata meng zau duh hlek lo va, “Kan khua-ah chua “au” ka ti thau thau,” ti tlat hi an huatthlala ka ti thin.