Lalduhoma as told to Rama Khawlhring
Remna leh Muanna kan neih hnuah kum 31 lai a lo liam ta a, tuna kum 40-a upa leh a hnuai lamte tan chuan thawnthu a ni tan ta der mai. History reng reng hi a hun laia thuneitute leh a ziaktua thuin, dik hlel lai a awm duh khawp mai a, a chhan chu an mimal duhdan an zeh tel thin vang a ni. A bul a bala hretuteho hi kan awm loh hun a la thleng dawn a. Thu dik leh pawm tlak mipuite hrilh hriat hi ka mawhphurhna niin ka hria a ni.
Prime Minister Pi Indira Gandhi-in Remna Palai hna thawk tura min ngenna te, Mizoram Congress hruaituten min sawmnate kha pawmin, 1983 khan India President hnenah banna ka thehlut ta kha a ni a. A hnu lawkah London-ah Pu Denga be tura tirh ka ni nghal a. Pu Denga chuan Inthlan Thuchah leh India sorkar laka a Demand 17 min hawntir a, Prime Minister hnenah ka thehlut a. Heng Demand te hi uluk taka kan duan dun a ni. Inbiakna tawp tawh hnu chhunzawm leh turin Pu Denga chu Delhi-ah koh luh a ni zui ta a.
Hetih lai hian Congress Party President leh Lok Sabha MP ka nih bakah, Party hrang hrang, NGO leh Zirlai (SJAC) ten Peace Committee an dinah, remna sign a nih thleng khan Chairman ka ni a. Remna kan neih dan tur ngaihtuah chu kan hna pui ber a ni.
Demand 17 zinga a pawimawh zual kan buaipui dan han tarlang ila:
1) Chakma District Council thiah:-Chakmate khan MNF lo haw hun tur kha an huphurh hle mai a. Central sorkarah thu an thlen ve reng a. Kan hruaitute zingah sawipuitu an nei reng bawk a. Chuvangin, an District Council thiah kha kan nawr chhuak zo ta lo. Inkah lehna chhan atana hman ai chuan tiin Pu Denga khan a pawm ta a ni.
2) Ramri:- Greater Mizoram chungchang hi Pu Denga khan a nawr nasa hle. Kan thenawm State te a nghawng dawn avangin chinfel mai theih a ni lo va, chingfel tur chuan hun a duh rei hle dawn a. Remna kan nghakhlel tawh si a, India Danpui Art 3 hnuaia la sawi zui zel atan dah a ni ta a ni.
3) Inner Line Regulation (ILR) chungchang:-
ILR hi British hun lai, 1873 ah BEFR hnuaia kan neih a ni a. Chimralna laka min humtu ber a nih avangin, tihdanglam emaw, paih emaw a nih kha kan hlau va. Pu Denga khan Mizoram sorkar remtihna tel lo chuan tihdanglam theih loh ni se tiin nasa takin a nawr a, chu chu India sorkar khan rem an ti thei ngang lo va, tihdanglam emaw, paih emaw a nih dawn chuan, kan rawn hmasa zel ang che u an ti a. Tichuan, MoS para 8 naah, “The Inner Line Regulation, as now in force in Mizoram, will not be amended or repealed without consulting the State Government” tiin min dahsak ta a ni.
‘Rawn’ (Consult) tih awmzia hi han sawi fiah ila. MPSC Chairman tur te, Chief Information Commissioner turte hi ruat an nih hmain, Chief Minister chuan Opposition hruaitute a rawn tur a ni tih a ni a. Opposition hruaitute thurawn chu CM chuan a pawm thei a, a pawm lo thei bawk. Chutiang chuan ILR pawh hi lo tidanglam emaw paih emaw dawn se, Mizoram sorkar chu rawn phawt tur a ni a, mahse chu chu an pawm lo thiang a ni. Chuvangin, kan duhthusam chu a phak ta lo a ni. ‘Rawn (Consult)’ tih hi ‘Remti (Consent)’ anga hrilhfiah tur erawh zawng a ni lo ve.
Amaherawh chu, rawn hmasak phawt kan nih dawn avangin, a hma ai kha chuan a tha ta hrim hrim a, kan hriat lohin engmah an ti thei dawn lo tihna a ni a, kan remtih lohzia tihlanna leh pressure siamna hun remchang kan nei zel dawn a, chu chu politics-ah chuan hmanraw tangkai tak a tling tho tho a ni.
4) Special Provision Art 371 G:
Tunah hian Special Provision nei State 11 kan awm mek a. Hei hi MoS-a a hlu lai ber chu a ni. Khatih lai khan Delhi-ah Press Club-ah Press Conference koin, kan sorkar hotute khan Special Provision kan mamawh loh thu an puang mauh pek a, kha khan harsatna min siam rei hle. Special Provision chungchangah hian thil 2 sawifiah tul tih ka nei a:-
a) Leilung hausakna (Resources) chungchang:-
Nagaland Special Provision Art 371A chuan leilung leh a hausakna chunga thuneihna a keng tel a. Chumi ang chiah chu keini pawhin kan demand a ni. India sorkar chuan chu chu harsa an ti hle mai a, hetiang hian tanhmun an khawh a, “State tinin lei chung hausakna (Overground resources) ah chuan thu an nei sa vek a, chu chu State list 18 na leh 23na leh 50-naah te ziak a ni, lei hnuai hausakna (underground resources) chunga thuneihna erawh chu tu State mahin an nei lo, Nagaland pawhin an nei reng reng lo, Central kuta awm a ni a, Union List 53,54 leh 55-naah te ziak a ni, chuvangin, ‘Resources’ tih hian lei chung hausakna chauh a kawk a, lei hnuai hausakna a kawk tel lo, chu chu thil chiang sa (understood)-a ngaih a ni, chuti chung chuan Naga-ho hian lei hnuai hausakna pawh a huap a ni tiin an hrilhfiah lui tlat a, ONGC-in hna an thawh pawh an tibuai a, nasa takin kan inhnial phah hrep tawh a, Nagaland Special Provision ang hian nangni hi ziak sak ve ta che u ila, “Resources” tih hi in duh danin in hrilhfiah ve leh mai ang tih kan hlau va, kan ek rahpherh hnu rahpherh nawn leh hi kan tum tawh lo, min hrethiam hram teh u” an tia ni ber. Pu Denga khan Constitution lama Expert-te pawh a rawn a, India sorkar tanna chu a dik an tihpui vek a, chuvangin ‘Resources’ tih tel lovin a pawm lo thei ta lo a ni. A bul a bal hre si lo va Nagaland ta tluk lo anga sawi hi thu belhchian dawl lo a ni e.
b) Central Act chungchang:-
Kan Special Provision hian UT kan nih laia Mizorama Central Act lo hman mekte chu a huap lo vang tih a ni a. Mizoramah Central Dan hman mekte chu engtenge tih kan hre si lo va. Pu Denga khan Home Minister Chavana hnenah min tir a, ani chuan Central Dan Mizorama hman laiList chu min lo pe a, “Heng Dan-te hi in tana tangkai tur vek an ni a, in tana hnawksak tur pakhat mah a awm lo” a ti a. Chu List chu Pu Denga hovin ngun takin an zir a, mithiamte an rawn a, kan tana tha lo tur Dan engmah awmin kan hre lo va. Amaherawh chu, Remna sign tawh hnu, State kan la nih hma siin Central Dan dang Mizoramah an dah lut ang tih chu Pu Denga chuan a hlauthawng tlat a, Chavana hnenah zan rei tawhah min tir leh ta a. Chavana chuan, “Tuna in neih sa bak chu eng Dan mah kan dah belh lo vang” tiin min lo tiam a. Kei chuan, “Session lai a ni bawk a, naktukah Parliament-ah Statement siamin i puang thei mai lawm ni ?” ka ti a, Chavana chuan chu chu rem a ti a, Statement chu a siam ta ngei bawk a. Pu Denga pawhin a pawm thei ta a ni.
Hetih lai hian Forest (Conservation) Act 1980 chu Mizoramah hman mek a ni a, hnawksak kan la ti dawn tih ngaihtuah phak tumah kan awm lo va, sawi pawh kan sawiri ta reng reng lo a ni. He Dan hi chu lo telh loh tur kha a ni a.Mihring famkim lohzia leh kan fel tawk lohzia a lang a, a pawi khawp mai.
5) MoS hi a nghet tawk em ?
Memorundum of Settlement bawhzuiin Mizoram State Act chu Parliament-ah kan pass ta a, kei pawh a bialtupa nih manah ka intichangtupa ve hle. BJP khan MP 2 an nei ve a, anni chauh lo kha chuan min pawmpui vek a ni. Special Provision kan neih theih nan Parliament-ah Constitution Amendment Bill kan pass bawk a, Article 371G hi a lo piangta a ni. Constitution-a khung luh chin zawng hi chu a nghet bik a ni. Amaherawh chu, Constitution ngei pawh hi siam danglam theih a nih miau avangin, kan hnam dinhmun kal zel tur hi tuman kan sawi lawk thei lo vang.
Inremna Thuthlungah hian a tam zawk chu Constitution-a seng luh loh an ni a, chung zingah chuan ILR leh kan sum indaih lohna hnawhkhah nana Special Category State angaenkawl zui zel tur kan nih tur chungchangte hi an tel a. Dana sengluh an nih loh avangin Document satliah ang leka sawi theih a nihna lai a awm. Amaherawhchu, Inremna Thuthlunga a englai pawh hi, Dana seng luh an ni emaw ni lo emaw, hun kal zela Politics-a kan tanchhan tur leh hnialfung pawimawh tak vek an ni a, Zofate tan Document hlu tak an tling vek kan ti thei tho vang.
6) Inremna hi a nawra nawr chhuah a ni:-
Inbiakna kan neih lai khan harsatna vawi duai lo kan tawk thin a. Home Ministry lama tang ru tlat tawkte kan awm avangin, Pu Denga kut kha a chak tur angin a chak thei thinlo. Harsatna a lo awm apiang hian Inkahhai a tawp mai angtih hlauin kan thaw dep dep a, MNF lem changa buaina lo siam duh mai kan awm te a hlauhthawnawm hle thin a. Inremna neih ai chuan UT sorkar par hi tlan zel ila tih rilru pu lah, zep nak emaw, an pung tual tual a. Pu Dengan, “Thenkhatin lo kan vah laiin a thenin an lo hal a” a tih khan asawifiah hle. Lem changten buaina an siam theih loh nana theihtawp chhuah thintu, kan Chief Secretary Pu Lalkhama kha a fakawm hle.
A tawpah chuan, sorkar kha bang lo thei lova siam a ngai ta nia hriain, Students Joint Action Committee bultumin, ni 4 chhung Secretariat hualbeh a ni ta a. Sorkar chu hna thawk thei lova siam (paralise) a ni ta a nih kha. Mi 400 zet Central Jail-ah khung an ni chungin, man sen rual kan ni lo. Remna kan neihna tura Kohhran leh Pawl hrang hrangte hnathawh kan hriatreng laiin, a tawpa a nawra nawr chhuaktute chu zirlaite kha an ni.
Chutiang boruak rit tak hnuaia Remna hi siam a nih avangin, kan Inremna Thuthlung hi hei aia thaa siam ngaihna a awm lo tih hi a hre chiangtu ka ni. Chuvangin, a nih ang ang hian hman tangkai i tum phawt mai ang u. Zo hnahthlak zawng zawng zawngte lenna leh zalenna ram kan panna kawnga kan chawlh hahdam lailawkna tura Lal remruat a ni ang e.