Zofate hian hmasawn ve tak tak kan duh a nih chuan entreprenuership khawvel hi huaisen taka kan luhchilh a, thalaite hian sorkar hna ringawt um lova mahni kea dintuma, tuman minpui lo mahse ka hlawhtling tho tho ang tia insehruh chuanga theihtawp chhuaha tan kan lak hunah Mizoram hi kan changkangin hma kan sawn ang.
Lehkha zir san hi a tha em em a, mahse Certificate hian hna min pe ngawt lo tih hi a rang a ranga kan pawm a, mahni chawei man tal pawh thawhchhuah theihna tur zawnga lehkha kan zir a, kan hma hun thlir a ke kan pen vat loh chuan, Lehkhathiam hna hmu lo, awm mai mai kan tam tawlh tawlh mai dawn.
Singapore house maid-a han inhlawhte hian thla khatah Rs. 25000/- atanga Rs. 30000/- vel an hlawh thei a, mahse a tam zawk chu pawl 8 pawh pass lote an ni si a; mahse, mi tam tak chuan kan sawihnawng a, kan iai deuh tlat. Cheng khat pawh thawk chhuak lo khan social media hmangin mi eizawnna kan lo deu a, chuti khati kan lo ti duar duar a, status update-na tur top up man, nu leh pate kan dil leh tho si a, an va hmuhsitawm zawk em! Master degree te, Graduate Certificate te neiten kum 30 kan pelh hnu pawha mahni kan la inchawm zo lo a nih ngat chuan kan hlawhchham hle tih kan pawm a, a rang ranga kan thawhharh a hun tawh a ni.
Kan thenawmah tlangval ngaihsan deuh ka nei, chu pa chu tunhma chuan damdawi laah a tlan ve hman a, mahse a harh chhuak a, chhuat nawhna a siam a, ni tin bazarah a pu chhuak a, tunah chuan Order pek tur a nei ta nual mai. Ani pawh lehkha thiam sang a ni hran lo. Zirna hi hlawk zawka kan thawhchhuah nan a tangkai na meuh mai a; mahse hlawkpui aia hun khawhrala a tawp a engmah nihpui si lo hi kan tam awm a sin. Zirnaa kan senso leh kan hun khawhral hi chhut let ta hlawm ila, Lehkha thiam leh zirsang pui puiho hian pawl 10 pawh pass lo va ni tin mahni themthiamna hmanga inhlawh chawpte ai pawn kan thawk chhuak nep zawk fe mai lo ang maw. Zirna kan dah hniam hrim hrim lam ni loin tam tak thawhchhuah phah mang si lova hun leh kum sum leh tha sen ral satliah ve ringawt uihawmzia chu ka sawi tum zawk chu a ni. Master degree hum ve ran si a, thla khata Rs. 10000 em pawh kan thawk chhuak lo a nih chuan zahnachang kan hriat a hun khawpin ka hria.
Khawvela Entrepreneurs ropuiber te zing a mi Bill Gates chuan, “Rethei taka ilo piang a nih chuan i mawh a ni lo a; mahse, rethei taka i thi a nih chuan nangma mawh liau liau a ni e,” a ti a, hei hi a dik hle awm e. Khawvel a mi hlawhtling tam zawk te hian an bultanna chu chhungkaw hausa sa an ni hlawm mang reng reng lo. Colonel Harland Sanders, KFC dinchhuaktu hian a social Security pawisa tlem a khawl ve hmangin bul a tan a, chuti chung chuan vawi 1009 a hnawng a, beidawng lo a, a beih tauh tauhna chuan India ram kilkhawr ber pawh lo thlengin KFC-a arsa ei chu tunlaia intihtheihna pakhat a ni ta reng mai. India ram thingtlang khuaa zirtirtu fapa, sikul bana Bhujia zuara au au thin kha vawiinah chuan Dhirubai Ambani, khawvel sumdawngte zinga langsar ber pawl lo ni ta chanchinte hi a va ropui em!
Bultan nan mi tam tak chuan sum kan dah lian em em lo thei lo va; mahse, Entrepreneurs hlawhtling tak takte hian sum aia dah hmasak an nei vek mai, chu chu an tumruhna leh tih tak takna a ni. Mihring tungchho pangngai kut ke ban kim nei, mi pangngai ni ve tan chuan kawng a awm a ni tih an hre chiang em mai a, chu chuan hlawhtlinna ropui tak a pe thin a ni.
Mi tam tak chuan ngaihtuahna kan seng thelh deuh thinin ka hria, sumdawnna bul kan han tan dawn a, keimahni pawh kan inrin hmain Bank Loan leh sorkar tanpuina kan beisei nghal ringawt thin a, mi tam tak chuan bultanna ngialnghet tak an neih hma in, an bultanna atana thilmak beiseiin sorkar pisaah hun an khawhral thin a, Bank Manager te an dawr khawtlai thin, an beisei anga tu te puina emaw an hmuh loh chuan an beidawng leh mai thin, chutiang chu bultanna tha a ni thei lo ang, chung tanpuina chu awlsam tak in hmuh inring lo phawt la a fuh ber ang; mahse, i beidawn phah mai tur tihna a ni chuang lo, entrepreuers chu an beidawng mai mai tur a ni lo tih hi kan vawng tlat tur a ni. Kan lawnchhuah tumna ah chuan min pawt kai tu tur awmlo in hmu zo miah lo mah ila, kemahni in leihlawn kan insiam chawp anga kan lawn chhhuak ve thei ngei ngei thin, chuvang in kan bana min pawt tu tur zawn ai chuan leihlawn insiam chawp mai khan keimahni ah phurna leh chakna pawh min pe nasa fe zawk anga chu chuan hlawhtlinna kawng kan zawhna kawng ah pawh thui takin kongro a su ngei ngei ang.
Mizo thalaite hian Employment hrilhfiahna atana sorkar hna kan hman hi bansan ila, sorkar hnathawh nan chauh lehkha zir lo ila, mahni kea kan din theihna tur thiamna zirchhuah tum ila, hlawk zawka kan sumdawn theihna turin lehkha zir ila a va tha dawn em! Hlawhtlinnate hi a suangtuaha suangtuah ringawt chi a ni lo a, hlawhtling tura kan chetchhuah a ngai a ni. Mi tam takin awlsam taka sum hmuh an tum a, chu chuan kawng dik lo leh sual kawngah a hruai mai thin a ni, hlawhtling tak tak tur leh thiltha pawchhuak tur chuan nghah peih a ngai thin. Ngaihtuahna fim leh uluk tak hmanga hmanhmawh hauh lova hlawhling tur a kan chetchhuah a ngai thin a ni. Ding chhuak tur chuan huaisenna leh dawhtheihna a ngai bawk a, huaisenna chu hlauh nei lo satliah ringawt hi a ni lo, hmabak hlenchhuah ngei ngei duhna leh tumna hi a ni. Chuvangin bultanna tha ber chu tun hun hi a ni a, a sawia sawi loa tan tawp hi hlawhtlinna leh hmasawnna bulthut chu a ni.