Ruatfela Nu
Thuhma: Ralkhel dar ri ri raptlak tak, ngaihthlak ngei ngei ngai a nih avangin, Ni 17 June 2024 khan, CM Pu Lalduhoma hmuin, ‘he thil hi thil serous tawpkhawk a ni a. In sawhthing chin tlangaupui dan dik loh vangin a rawn zual kai a ni nge ni lo zirchianna neih tir rawh. Department of EF&CC, GoM an alert nge alert lote zawt rawh. Hetiang tawha an alert loh chuan hau hrep rawh’ tiin ka sawipui tawh a. Min hriatpuitu pawh CMO a mi pawimawh pahnih leh environment humhalh kawnga ka sangawi zawnpuite an ni.
Mizoram bik ramngaw hloh: January 2022 atanga May 2024 thlenga khan ‘Global Forest Watch’ (GFW) chuan Mizoramah ramngaw hloh alert nuai 6.29 chuang a chhinchhiah a. Heng alert he hian thingin a khuh ram, (ram hring naran) acre 17, 611 leh ngaw puitling acre 1, 848 chuang a huam a. Chu chu FIFA Football khelmual 10, 000 leh 10, 050 tluk a ni.
Ramngaw hloh hi climate change vanga khawvel buaina namen loa thil serious tawpkhawk a nih vangin, 2024 May thla khan National Green Tribunal (NGT) chuan ramngaw hloh news report behchhanin thubuai a ziak lut a. Heihi NGT tan chuan tihmakmawh a ni. NGT hian environment dan leh hrai bawhchiatna thlengah mimal emaw, pawl emawin complaint an theh luh ngai loin, news report atangin thubuai a ziak lut thin tih hria ila. Chu chu mihringte hi environment tel loa kan dam khawchhuah theih loh vang a ni. Kum 2022 khan NGT hian Mizoram sawrkar chu bawlhhlawh a sawngbawl that loh vanga environment-in a tawrh compensate nan 50 crore a lo chawi tir tawh a. Ramngaw hloh vang hian state sawrkar hi pawisa engzat tak rawn chawitir leh ang maw?
GFW data-in kum 2000 atang khan India ramin thing hmun hectare maktaduai 2.33 a hloh tih a tarlang tel a. GFW hian kum 15 vel kal ta chhunga Mizoram chungchang bik data a tarlan chu- India thing hmun hloh tlukpui emaw, a aia mahin emaw a manganthlak a ni! Kum 2024 hian ramngaw hloh a pung chak hle a. Thla 5 chauh la liam mah se, thing hmun hloh zat chu 2022-2024 chhunga hloh 46% aia tam mah a ni hman a. GFW in ngaw puitling chhunga hloh zat a nasa lehzual tia a tarlan hian thla a tiphang takzet a ni. January 2022 atanga tun thlenga thing hmun hloh zawng zawng 53% chuan chu kumin kum chanve pawh tling loa hloh a ni.
Heihi he ram hmangaihtu tan chuan mutmawh hnarmawha neih ngei tur a ni a. Heihi Leilung leh a chhunga thil awm zawng zawng neitu, Pathian ringtu tan ngaihthah thiang a ni lo. Heihi kan lo neih kalphung vang emaw, political party policy, sawhthing chin/ chin nana thing kih nasa lutuk nghawng vang emaw, hmasawnna hnathawh vang emaw a nih leh nih leh loh zirchian a nih theih nan thuneitute an beng chhut ngawnsan thiang tawh lo.