Kaladan Multi Modal Transit Transport Project - Mizoram Vanneihna Tur

A.Zotinkhuma

Kaladan Multi Modal Transit Transport Project hian Mizo mipui beng a verh hle a, engti angin nge he project hi kan chhawr tangkai thei dawn tih leh engti ang takin nge hmasawnna rahbi min tuk sak dawn tih erawh kan hre thui lutuk rih lem lo niin a lang.

Pu Lalthanzaua Pudaite (IFS. Retd.) chatuan ram pan ta khan khawchhak lam hawi zawnga sumdawnna kawnga hmalakna (Look East Policy) hi a tuipui hle thin a, a ni kha Mizo zinga hetiang lam hawi zawnga mi tui hmasa leh hre thuk pawl tak a ni, ti ila kan sawi sual lovang. Korea rama palai hna thawka a awm lai atang daih tawhin hetiang lam hawi zawnga hmalakna hi tuipuiin dingdihlipin a lo thlir tawh thin a. “Hei hi Zofate tan hmasawnna kawnga rahbi pawimawh tak tur a ni”, tiin Pu Zauva khan uar takin a lo sawi tawh thin a ni.

Mizote hi tlangram khawkrawk tak leh chhengchhe taka cheng kan ni a, chuvang chuan inkalpawhna leh ramdang te nena insumdawn tawnna kawngah pawh kan la hnufum bik em em a. Khawmual leh tuipui hmang tangkai a hmasawnna kawnga ke pen ve tur ngat phei chuan tih tak zeta hmalak a la ngai a ni.

Vanneihthlak takin sorkar laipui chuan kan mamawhna te hriain leh awlsam zawka India hmar chhak kilkhawr taka hmasawnna a kal theihna turin ngaihtuahna thui tak a lo seng tawh thin a, chu chu vawiin niah a hlawhtlin theihna turin project namai lo tak Kaladan Multi Modal Transit Transport Project (KMMTTP) hming vuahin chhim lamah hmalakna a kalpui ta mup mup a, chumi chanchin chu tun tumah hian ilo bih chiang dawn teh ang.

Mizoram chhim lama Kaladan Multi Modal Transit Transport Project hmalak kal mek hi tun dinhmunah Mizoram chhunga hmasawnna tura hmalak awm tawh zawng zawngah chuan Project lian ber a la ni rih ti ila kan uar lutuk awm love.

He project lian tham tak, Kaladan Multi Modal Transit Transport Project kawngpui laih hna hi Mizoram chhim lam, Lawngtlai khawchhung, AOC atangin laih tan a ni a. He kawngpui hian Lawngtlai atanga chhim thlang lam hrutin Rulkual khaw hnuaiah a kal a, chuta tang chuan Saizawh East lamah kal zelin chhim lam hawiin South Bungtlang a pawh leh a, heta tang hian Mizoram chhim tawp, Myanmar ram nena kan inrina Zochachhuah thleng, Mizoram PWD enkawlna hnuaiah kawngpui laih hna hi zawh tawh a ni a. He kawngpui laih hna hi a hau tak em em a, sum sen kawngah pawh he project tluka sum sen tamna hi Mizoramah a la awm ngai lovang tih a ni thin.

Zochachhuahah hian tawp mai lovin chhim lamah la kal zelin Myanmar ram chhunga khaw pawimawh tak Paletwa pawh tur a ni a, chuta tang chuan kal leh zelin Kaletwa lawngchawlh hmun a pawh leh ang a, heta tang hian tuifinriat kama Myanmar lawngchawlh hmun pawimawh tak leh lar tak Sittwe a va pawh tawh dawn a ni.

Mizoram mai nilo, India hmarchhak state hrang hrang tan pawh Kaladan Multi Modal Transit Transport Project kawngpui laih mek hi chhawrnahawm tak tur a nih avangin sorkar laipui pawhin a ngai pawimawh em em a, National Highway 502 A ah he kawngpui sial thar hi a puang tawh nghe nghe a, chak taka hmalak a nih theih nan Ministry of Road Transport & Highways lama thuneitute pawhin uluk takin an vil reng a, a khat tawkin a hmunah hmalakna endik a, thli thlaiin an rawn kal fo thin a ni.

Multi Modal Transit Transport Project hi Mizoram sorkar pawhin a tuipui em em a, a hlawhtlinna Zoram mipuiin kan nghahleh em em leh dingdihlipa kan thlir mek a ni tih hriain Assembly House a, rorel lai leh eptu member te pawhin lungrual takin chak taka hmalak a nih theih nan resolution hial pulutin an lo pawmpui tawh nghe nghe a ni. Hemi bawhzui nan hian tunhnai khan Assembly Estimates Comittee member te chuan a hmunah kal chilhin Myanmar lamah Sittwe an va thleng a, Chuta tanga an lo haw hnuin kumin January thla tawp lam khan Pu Lalrinliana Sailo, Chairman, Estimate Committee hovin Mizoram tawp Zochachuah/Zorinpui piah ramri thlengin hmalakna te an enfiah leh tawh nghe nghe a ni.

Union of Soviet Socialist Republics (USSR) a lo kehchhiat a, ram tenau te te an lo inthendarh hnu, cold war alo tawp tak hnuah, khatih hun laia India Prime Minister PV Narasimha Rao khan India Foreign policy chu her danglam hret hretin, Russia ram awn reng ai chuan tiin khawchhak lam hawi zawnga hak zauh a rilruk ta a, hemi kawnga a sangawizawnpui thei tur te dapin Look East Policy tha zet mai a duang chho ta a, khatih hun laia Union Finance Minister Dr Manmohan Singh ho in phur takin Look East Policy hmalakna chu bawhzui chhoh a ni a.

Hemi hnu lawka Dr Man Mohan Singh, Prime Minister a lo nih takah khan, a hma aia chak leh zualin Look East Policy tih hlawhtlinna turin ke a pen ta tak tak a. A nihna takah chuan tuna Kaladan Multi-Modal Transit Transport Project hmalakna hi India sorkar in Look East Policy tihhlawhtlinna tura a hmalakna rahbi pawimawh tak tih loh theih loh a lo nita a ni.

April 2, 2008 khan, kha tih hun laia India Prime Minister Dr Manmohan Singh leh Myanmar sorkar palai, Vice Senior General Maung Aye te chuan New Delhi ah Kaladan Multi-Modal Transit Transport Project hmalakna tur thuthlung pawimawh tak chu an lo ziak fel ta a.

India sorkar leh Myanmar sorkar inremna ang chuan Multi Modal Transit Transport Project tihhlawhtlin nan hian Myanmar sorkar in an ram chinah a tul ang anga hman turin a ram leh leilung a tum vek ang a, hemi bakah hian India mi leh sa, he kawngpui sialna a thawktu Engineer te leh labour te huam vekin Myanmar ram chhunga an thawh chhung zawng venhimna uluk tak a thlawn liau liauin a pe vek ang tih a ni a.

India sorkar tih ve turah chuan he project tihhlawhtlinna tura sum senso zawng zawng cheng maktaduai 7,308 (a tira ruahman) chu a tum ve thung ang tiin inremna thuthlungah hian ziah a ni a, he project hi 2014 September thla a zo hman tura ruahman a ni a, mahse, engemaw chhan hrang hrang vangin zawh hun tura ruatah hian zawh theih a nita rih lo a ni.

Kum 2014 ah Inthlanpui kan hmachhawn a, sorkar laipuiah sorkar na a inthlak a, BJP (NDA) in hneh takin sorkar-na an chang chho a, Prime Minister Narendra Modi kaihhruaina hnuaiah sorkar an inrem fel hnu lawkah ‘Look East Policy’ ti a kan hriat thin kha a hming tlema phuah danglam deuhin ‘Act East Policy’ an ti ve ta thung a. Tum thuhmun leh ngaihdan pawh thuhmun thoin Kaladan Multi Model Transit Transport Project hlawhtlinna tura hma lo lak tawhna chu, a bo a bang awm lovin sorkar laipui chuan a rawn pawm pui mai ni lovin chak leh zuala hmalak a nih theih nan a rawn kalpui ta zawk a, tun dinhmun hi kan thleng chho ta a ni.

Kaladan Multi Modal Transit Transport Project kawngpui sial hna hi October 12, 2010 atang chiah khan tan a ni a. Lawngtlai piah Rulkual khaw hnuai, Mauhak lui bul km 38 na atangin kutthlak tan a ni a, he project hnuaia kawngpui laih thui zawng hi a vaiin km 99.86 a ni a. Kawngpui hi meter 12 a zau tura laih niin black top zau zawng meter 7, two lane chinah a ni ang a, kawng chhah zawng hi cm 66 tura ruahmanin black top chhah zawng hi cm 11 a ni ve thung dawn a ni.

A ruala motor 2 thawl taka tlan theihna tur (NH standard two lane) a kawngpuite hi laih a ni a, kawng kawi ulh tak tak a awm lova, curve radius meter 30 aia kawi a awm lo bawk a, motor lian ritphur (Truck full load) tana kawng chho lutuk a awm loh nan maximum gradient 5% a design vek a ni bawk a. Mizoram chhung bik kawngpui sial hna hi Ministry of Road Transport and Highways hnuaiah Mizoram PWD, Chief Engineer Highway in a enkawl ta a ni.

Kaladan Multi Modal Transit Transport Project hna uluk taka vil tur hian Mizoram PWD Highway hnuaia Superintendent Engineer -1, Executive Engineer - 2 bakah Sub-Divisional Officer - 3 leh JE 6 ten a hmunah an awm chilh chawt a, an ni hian thahnem ngai takin contractor te hi vilin asur-asa hnuaiah, kawla-nichhuak chhiarin theih tawp an chhuah tak meuh meuh a ni.

He kawngpui laih hna hi thuang thum (package-3) ah then a ni a, thuang 1-na hi Lawngtlai AOC veng (zero point) atanga intanin Rulkual khaw hnuai Mauhak lui km 38-na thleng hi RDS Project Limited, New Delhi in an thawk a, thuang 1-na atan hian a tirah cheng vaibelchhe 170.15 ruahman a ni a.

Thuang 2-na (package-2) hi Rulkual khaw hnuai Mauhak lui km 39 atanga Ngenpuitlang khaw hnuai km 71 thleng a ni ve thung a, M/s Atlanta - ARSS (JV) New Delhi in an thawk ve thung a, a tirah cheng vaibelchhe 163.11 senna tura ruahman a ni a. A thuang 3-na (package 3), Ngenpuitlang khaw hnuai km 71 na atanga Mizoram chhim tawp, Myanmar ramri Zocha lui, km 99.83 na thleng hi RDS Project Limited, New Delhi bawkin thawkin, hemi atan a sum ruahman hi cheng vaibelchhe 168.98 a ni ve thung a. Package I, atanga Package III na thlenga sum sen tur zat hi a tirah avaiin cheng vaibelchhe 502.24 tura ruahmana ni.

Kaladan Multi-Modal Highway Project hi Lawngtlai khawchhung, AOC petrol pump (zero point) atangin a intan a, chhim lam hawi zawngin kawngpui hi a kal zel a, zero point AOC atang hian km 3.6 thleng an lai phawt a. Chutah km 22 atangin km 38 na thleng an lai leh a, tiang zel chuan hma chhawp sa angin laih a ni a, pavement phah hmuh tur pawh hmun tam takah a awm tawh a ni.

Rulkual khaw hnuai package 1 huam chhungah hian package 1-na laitu RDS Projects Ltd. te hi inbunin hmanruate pawh an inchhawp nasa hle a. Kawngpui laih mai bakah hian Pavement hna pawh an thawk nghal zela, kawngpui laih hi a zau tha em em a, a garde a dikin chhukchho uluh lutuk hmuh tur a awm lova, kawng ko chhak lam te pawh slope tha taka laih a ni a, PWD Engineer ten a hmunah awmchilhin contractor hnathawh hi an vil reng a.

Hmun thenkhat kawngsir awih zual lai deuhah te, kawngpui a tlakbal mai lohna turin Gabion wall nghet tha taka siamin an dawl zela, fur laia kawngpuia tui a luan loh nan slap culvert te siamin hmun thenkhatah retaining wall te pawh siam a ni bawk a, tiang chuan hmalakna hi chak taka kalpui mek a ni.

Package 2na thawktu ARSS Infrastructure Projects Ltd. Delhi hian Saizawh dai atanga lai tanin hma tiam ang zar zarin hma an la thei a. Pavement siamna tur hian lung chang tha an mamawh hnem em em a, heng lungchang tha te hi Chhimtuipui kama Liapha kai atanga an lakkhawmte a ni hlawm a, Liapha hi Chhimtuipui kama awm niin helai hmun remchang laiah hian RDS Projects Ltd. leh ARSS Infrastructure Project Ltd. te hian a hran ve ve in crusher khawl lian tak tak an bun a, Liapha hmun hi kawng siamna hmanraw lak nan leh chhek khawl nan ber an hmang a ni.

Sorkar laipui hnuaia Ministry of Road Transport & Highways (MoRTH) lam pawhin Kaladan Multi Modal Transit Transport Project hmalakna hi an ngaihven em em a, hotu lian leh pawimawh tak tak te pawn a hmunah kalin hnathawh dan te a khat tawkin an enfiah awl lova, he Project hna kal lai mek hi Forest clearence vanga tum khat chawlh lailawk zauh leh fur khawchhiat zual laia an chawl tih loh chu, hmalakna hi chak taka kalpui chhunzawm reng a ni a, an zawh hlan mawlh mai hi a nghahlehawm em em tawh a ni.

Tunhma lamin India sorkar hian Kolkata lawngchawlh hmun atanga awlsam taka India hmarchhak state te tlawh pawh zung zung theih nan Bangladesh sorkar chu tuipuiah leh khawmuala kawng sialna turin alo dawr tawh thin a, mahse, Bangladesh sorkar hian a remti tlat lova. Chittagong lawngchawlh hmun hman tangkai a, bungraw phurh vel lek phei chu a phal lo leh zual a. Chuvang chuan Sorkar laipui hian kawng dang dapin Myanmar sorkar lam a dawr ta zawk a ni.

Vanneihthlak takin Myanmar sorkar chuan India sorkar rawtna Kolkata atanga Sittwe kaltlanga Mizoram lama lawng lian kal theihna tura tui kawng siam leh motor kawngpui laih chu a remti ta hlauh mai a, tichuan a tir lama tarlan tak angin April 2, 2008 khan New Delhi ah Kaladan Multi-Modal Transit Transport Project hmalakna tura inremna thuthlung pawimawh tak chu Indian sorkar leh Myanmar sipai sorkar chuan an lo ziak fel ta a ni.

Multi Modal Transit Transport Project kan chhawr tangkai theih dan tur kan hriatfiah theih nan han sawi zau ta lawk ila. Kolkata bul Haora lawngchawlh hmun atanga tuipuia lawng kalkawng hian ngil takin Sittwe a pan ang a, he lai hi kan hriat angin tuipui (Sea rout) ah km 539 lek a thui a ni a.

Sittwe awmna lai tak hi map kan en chuan Mizoram chhim tawp lam, Myanmar ram chhung Rakhine state tuifinriat kama awm a ni a, khaw mawi tak leh theng thaw nuam tak thin a ni a, khawvel ram hrang hrang atanga lawng lian bungraw phur chi te fuankhawmna ber tur a la nih dawn avangin khaw pawimawh tak tur ala ni.

Tuna kan hriat angin Sittwe lawng chawlh hmun atang hian lawng lian tak tak bungraw phur chi te chuan hmar lam hawi zawngin Kaladan tuipui hi an rawn zawh chho ang a. Kaladan tuipui lawnga zawh zelin Paletwa lawng chawlh hmun a rawn pan ang a.

Paletwa lawng chawlh hmunah hian tawp mai lovin, heta tang hian lawng bawkin Kaletwa lawng chawlh hmun panin tuipuiah an rawn kal chho zel ang a, Kaletwa lawng chawlh hmun an rawn thleng ang a, hei hi tuipuia lawng kal theih chin tur chu a ni.

Kaletwa atang hi chuan lawng a kal theih tawh dawn loh avangin an bungraw phurh te chu Kaletwa lawng chawlh hmun (Sea port) ah hian an hlang thla (unload) tawh ang a. Sittwe leh Kaletwa inkar tuipuia bungraw thiar velna kawng (sea route) thui zawng hi a vaiin km 289 a ni a.

Kaletwa atang hi chuan motor lian bungraw phur chi hmangin Myanmar sorkar kawngpui laih thar tur, km 62 a thui chu zawhin Mizoram chhunga khaw awm hmasa ber Zorinpui/Zochachhuah lam an rawn pan ve thung tawh dawn a ni.

Zochachhuah/Zorinpui khaw bul lawk Hmawngbu khua-ah hian bungrua inhlan chhawnna (handling point) tur siam a ni ang a, Hmawngbu atang hian bungraw inhlan fel tawh te chu Lawngtlai lam panpui a ni ve thung ang a, Lawngtlai atang hian National Highway 54 zawhin Lunglei leh Aizawl lam te rawn panpui thin a ni tawh dawn a, helai kawng hi lun hle tura ngaih a ni.

Mizoram lam ang bawkin Myanmar ram chhunga Kaladan Multi Modal Transit Transport Project hmalakna hi thuang 3 (phase 3) a then niin thuang 1-na (phase –I) ah hian Sittwe leh Paletwa lawng chawlh hmun te chu lawng lian tak tak dawl zo thei tura chei that hna thawh hmasak phawt a ni a, chu hna chu Inland Waterways Authority of India (IWAI) leh Essar Projects (India) Ltd, ten ngawrh taka thawkin an zo thawkhat tawh a. Lawng chawlhna hmun sak leh Lawng bungrua (Cargo) lian tak tak dahkhawmna In lian pui pui sak hna hautak em em chu tun dinhmunah zawh a ni thawkhat tawh bawk a ni.

Thuang 2-na (phase 2) ah ve thung hi chuan Sittwe leh Paletwa bakah Kaletwa inkar tuipuia lawng lian kal theih tura tuikawng a thuk zawnga laih (dredging) leh sial hna a ni ve thung a, hei pawh hi Inland Waterways Authority of India (IWAI) leh Essar Projects Ltd te bawkin an thawk mek a. A hna hi za a 95 (95%) zawh a nih tawh a. Phase -1 leh phase-2 na atana a vaia sum senso zat tur hi a tirah cheng maktaduai 442 chuang ruahman a ni a.

Phase 3-na hi Paletwa atanga Mizoram chhung Zochachhuah/Zorinpui thleng km 109.2 km a thui motor kawngpui sial hna a ni ve thung a, he kawngpui laih hna hi chu Myanmar sorkar in a thawk ang a, India sorkar in a senso zawng zawng a tum ve thung dawn a, hemi atana sum ruahman hi a vaiin cheng vaibelchhe 1921 (as on Dt. 22/1/2016) a ni ve thung a ni.

Thla hmasa January 22, 2016 khan New Delhi ah Ministry of External Affairs buatsaihin Kaladan Multi Modal Transit Transport Project hmalakna kal zel ngaihtuahin meeting pawimawh tak koh a ni a, Mizoram sorkar aiawhin National Highway Chief Engineer, Er John Rammawia leh Er Sanghrima Chawngthu, EE National Highway Kolasib Div. te an tel a, meeting hi Amar Sinha, Secretary Ministry of External Affairs (ER) in a hova, hetah hian ESSAR Projects (India) Ltd. atangin AV Amar Nath, Chief Operating Officer leh mi pawimawh thahnem tak an tel bawk a ni.

Tuna hmalak tawh chin, lawnglian kal theihna tura tuikawng sial tawhah Ministry of External Affairs hotute chu an hlimin an lungawi em em a, Myanmar ram chhunga hmalak leh na tur, motor kawngpui sial turah pawh chak leh zuala hmalak chhunzawm nghal a nih tur thu phur takin an sawi bawk a ni.

Kaladan Multi Modal Transit Transport Project ngahhlehawmna chhan em em hi han sawi zau leh hret ila. Tuna rampawn atanga bungrua harsa taka kan chawk luh thin dan atang hian a sawifiah theih mai awm e.

India ram lai ril atanga bungrua kan chawk luh te hi a tlangpuiin Kolkata kaltlanga motor kawngpuia kan chawk luh a ni ber a, a lokalna hlat thin zia hi kan chhut ngai emaw.

Map a kan hmuh thin angin bungrua kan chawk luhna kawng hi a thui em em a, Kolkata atang hian NH 34 zawhin hmar chhak lam a rawn pan vang vang a. West Bengal state chhunga NH 34 zawh chho zelin, Siliguri ringrek lai (chicken neck) a rawn zawh chho leh a. Chuta tang chuan NH 31 zawh ve thung tawhin Siliguri atang hian hmar chhak lam a rawn pan chho zela, Assam-ah lutin Bonggaigaon lam a pan a.

Bonggaigaon atang hian Guwahati-ah lutin Guwahati atangin Meghalaya khawpui Shillongah a lut chho leh a, Shillong atang hian Assam-ah bawk lut lehin heta tang hian NH 54 zawhin Mizoram a rawn thlen ta chauh thin a. Dan tlangpuiin Kolkata atanga bungrua thawn te hi a tluan viau pawhin ni 15 aia hmain Aizawl a rawn thleng ngai meuh tihn lo.

Motor kawngpui (By Road) zawha a Kolkata-Guwahati-Aizawl lama kal aiin, tuna Multi Modal Transit Transport Project hnuaia hmalak mekna (Kolkata leh Sittwe inkar hi km 539 vel chauh a nih avangin) km 1328 zetin a inhnaih hleih a, hei hian tha leh zung mai bakah alo thlawna sum leh pai kan sen thinna zawng zawng te hi nasa takin min chhawk tawh dawn a ni.

Tuna Multi Modal Transport Project hnuai hmalak mekna-ah hi chuan Kolkata leh Sittwe inkar hi tuipuiah km 539 chauh a hla niin darkar 12 chhung lekin lawngin a thlen thei a, chutiang zelin Vishakapatnam pawh darkar 24 chhungin a thlen theih bawk ang a. Hei mai bakah hian a duh tan Sittwe atang hian Bangladesh ram kal kan in Look East Policy kan sawi fo thin dung zuiin khawchhak lam ram changkang tak tak, Thailand, Malaysia, Singapore leh China etc. te awlsam takin a dawr theih tawh dawn a, hemi piah lamah, kan thlai ilo deh chhuah leh thar chhuah ve chhun te pawh awlsam takin kan thawn chhuak ve thei tawh dawn bawk a, hei hian sumdawnna kawng tinrengah samkhaina leh vanneihna nasa tak min thlen ngei dawn in a lang a ni.

Kan duh emaw, duh lo emaw Multi Modal Transit Transport Project hi zawh fel a nih hunah chuan Pastor Chhawna’n alo sawi lawk tawh thin angin Chhim lam hi kan kawtchhuah ropui a la ni ngei dawn a, hemi atan hian Zoram mipui kan lo inpuahchah lawk a, kan lo inbuatsaih lawk hi a tulin a pawimawh khawp mai.