North East tan Time Zone hrang neih chungchang

Prof Lianzela

 

Sawihawnna: N.E.-in Time Zone hran neih chung chang leh Daylight Saving Time (DST) hi tunhnai mai atanga sawirik a ni a. Time Zone hrang hi lo nei ta ila India-in Time Zone pahnih kan nei dawn ta tihna a ni ang. N.E.-in Time hrang kan nei anga, N.E. tih loh (rest of India)-in a hrang an nei ang. A mawl zawnga sawiin N.E.-in kan sana kan herh danglam dawn tihna a ni. Hemi avang hian ni eng (sun light/day light) kan chhawr \angkai zual sawt dawn a ni.

Thil engkim mai hian a \ha zawng (positive) lam leh a chhe zawng (negative) lam a nei vek a, chuvangin Time Zone hrang neih pawh hian a \ha lam leh \ha lo lam a nei dawn tih hria ila. A \ha lam duhtute sawi chauh kan hriat chuan kan hriat dan kha a kim lovin a sir khat lutuk thei dawn a, a sir leh lam kan thlir tel ve ngei chu thil tih makmawh a ni. A chhe lam leh \ha lam kan hriat tawn ve ve hnuah ngaih dan lai (balance) kan nei thei chauh ang. Chuvangin tun tumah hian Time Zone hrang neih chung changah a êng lam(positive side) leh a thim lam (negative side) rawn tar lan ve ve ka tum a ni.

A duh leh \ul titu te \an chhan chu 'hna thawh tam theih nan' tih leh power & energy (electric) lama sum sen ral tlem nan tih a ni ber. Hriselna lam leh nungchang siam\hatna leh chhungkaw kehchhiat loh nan tih a ni tel ve bawk.

Khawvel ram hrang hrangah Time Zone hran neih a ni nual viz. USA-in time zone 4 an nei a, Mexico & Alaska tela  North American continent huapa sawi phei chuan time zone 6 an nei. (U.S.A. Time Zone-te chu Los Angeles 12:49 A.M., Denver 01:49 A.M., Chicago 02:49 A.M. & New York 03:49 A.M.). Russia-in zone 11 an nei thin a, zone 9-ah tun hnai mai khan an ti tlem ta. Australia in time zone 3 an nei bawk. US-ah leh khawvel hmun dang dangah Time Zone hrang neih sa tawhna leh neih lem lohna ah pawh ni êng (sun light) chhawr tangkai tûr zawng Day light Saving Time atan sana an herh danglam fo mai. An duh chin (thla khat or thla hnih hnuah an ti danglam leh mai thin). Hei hi a tlangpuiah chuan electricity/power & energy renchem (conserve) nana tih a ni deuh ber.

Ram zau, tun laia thang/hmasawn tha si China leh India erawhin Standard Time pakhat ve ve an nei. Bangladesh-in tun hnaiah DST nei tûrin an sana darkar khatin an herh danglam (herh hma) ta bawk a.

Time Zone hrang duhtute duh chhan:

• Jahnu Barua sawi danin ram hrang hrangah East aiin West an hausa deuh zel, sun light/day light an chhawr rei avang a ni. Hei hi India ram ngeiah pawh dik hle a hriat a ni (Khawvelah Northern Hemisphere hi Southern Hemisphere aiin an hausa deuh zel). India hmar chhak State pawhin nitin darkar 1 emaw 2 vel Day light kan neih belh dawn avangin kan productivity a sang ang. Kan hausa ve sawt ang. Youth problems pawh tlem sawt turah a ngai!
• Mathematical calculation a\ang chuan production pun dan tûr leh electricity a sum sen ral tûr in a tlem phah tur zia a chiang a. Ramin income a nei pung anga, a hausa sawt dawn tihna a ni. Hei hian employment generation-ah pawh a \ha zawngin nghawng a nei thei ang.
• Thalaiten infiamna hun leh intihhlimna hun ngah sawt tûra ngaih a nih avangin ruihhlo ngaih leh ruihtheih thila buai pawh nep sawt tûra beisei a ni.
• Hnathawktu/inhlawh fa hlawhbi hi darkar a chhut a, darkar bi a inhlawh a theih ve hunah DST avanga darkar 1 or 2 neih belh chu a \angkai leh zual ang.
• Time Zone hrang neih vangin darkar khat emaw hnih emaw ni êng neih belh hi chhungtin tan \ha ngei tûr a ngaih a ni. Family-a chhuahvah (outing) neih nan - Park a kal nan, Games & Sports enho nan, tute emaw tlawh nan etc. Hei hian chhungkaw innelna, thawhhona ti \ha ngei tura ngaih a ni.
• Time Zone hrang neih duhtute sawi lan leh dang pakhat chu hriselna lama a \hatna tûr a ni. Tuna Delhi/Mumbai te nen hun ang khata kan nei hian chaw ei hun, mut hun, thawh hun etc ah an ni rual ang deuh a kan chet ve a phut a, hei hi kan tan appropriate time a ni lo. Biological watch-in a mil lova, hriselnain a tuar niin an hria. Mut hun dik lo, chaw ei hun dik lo in kan hriselna a nghawng a. Intihhlimna hun neih loh (hun remchang tlem) in nasa takin nun a ti nguai a ‘depression’ a thlen an ti bawk.

Duhlo tute sawi dan tlangpui:

• Russian economist Arkady Dvorkovich chuan DST hi mihring tan a \hat loh avangin power & energy lama hlep awm mahse hriselna berin a tuar hi a pawi zawk a ti. DST avanga sana herh danglam hian Industry leh lirthei-ah chetsualna (accident) a tipung. Chu bakah thisen sang, mahni intih hlum (suicide) a tipung a ti bawk. (Hei hi biological clock a in-adjust ve zung zung loh vang nia ngaih a ni).
• N.E. tan inlakhran leh zualna a thlen ang (more alienation thlentu a ni thei ang). Tun dinhmunah pawh N.E. hi rest of India/main land a\angin kan hrang sa viauin a lang a, time hrang kan neih hian min tih hran leh zual ring an awm.
• Counter productive/self damaging a ni thei. Inbiak pawhna a tibuai a, security problem a siam thei bawk. (A bikin N.E. a Central Office awm te hian) N.E. time an hman a rem ve kher lo mai thei a hei hian remchan lohna eng eng emaw a siam ang ti pawl an awm a, security problem a awm hlau pawh an awm a ni.
• Production/productivity hi sunlight neih belh chauhah a innghat lo, mindset/mental attitude leh work culture, health condition & skill & technology ah a innghat. Sun light hi lo neih belh tehreng mah ila, hun kha leh chen atanga kan lo tih dan leh nunphung thlak a har ang ti an awm nual hlawm.
• India ramah lehkhathiam lo leh mi mawl tak tak kan la tam a, sana herh danglam, chumiin a nghawng ‘calculation’ tih ngai kan ti peih lovang. Post Office, Bank & Air Line lamah a buaithlak zual.
• N.E. chhunga Central Office hi a bik takin a tibuai zual ang.
• U.S. in time zone 4 an neih buaithlak a tihna chhan chu an ram chhungah ngei inbiak pawh harsa an ti khu a ni. Ram dang tan phei chuan an hun hrang 4 khu hriat sak tak tak a harsa leh zual. Trading partner an neihte nen pawh harsatna an tawk. Tunlai khawvela economics lama an mahni elpha teuh ber (India leh China) in Time pakhat an hmang thei ve ve hi vannei an ti a, hei hian khawvela insum dawn tawnna a advantage a pek nasat zia an hmu chiang a, an awt hle. Time zone tihtlem dan tûr an buaipui ve reng a ni. Anni ngaih dan chuan tunah engkim tih theih deuh thaw (office etc hna a hriat duh) ‘online’ in a tih theih tawh a, hman angin day light chhung ngei a tih tûr ang chi a tam tawh lo.
• Polling problem a awm thei. Time zone hrang neite hian inthlan lai hian harsatna tawk duhin an inhria. Khawi hmunah emaw poll khar a ni a, khaw thlang lamah inthlan a la kal a, a zo hmasa a chet dan in a dang kha influence tlatin an hria.

Zawhna pawimawh ni ta chu:

• Time Zone hrang emaw DST avanga darkar khat or darkar hnih ni êng kan neih belh kan hmang \angkai tak tak angem? Biological Clock-in a mil angem? Food habit, sleep habit, work habit & church service & activity kan adjust thei angem? Kan inkhawm (church service) hun thleng pawh engemaw chen chu rawn nghawng turah ngai ila.
• N.E. chauhin Time Zone nei hrang ta ila mainland/rest of India in kan time min hriatpui or ngaih pawimawh sak tak tak angem? Kan khawpuia Central Office te tan a buaithlak angem? Foreign atanga India a lo kal, N.E. a programme nei tan kan time neih dan rawn hriat ve vek a har angem?
• Theory a chhuta dik/Mathematical Calculation a dik hi practical-ah a dik vek thei angem?
• Seperate Time Zone pui pui lovin, Work time/Office time or hour re-schedule mai a tha em? Entir nan Office hour hi zingah dar 8:30 ni in tlai ah 3:30 P.M. ah ban ni ta se. (Tah hian Daylight Saving Time a awm tho si a!)