Kan ram economy vs tax

K.Zoremtluanga

Mission Vengthlang

Ngaihdan (idea) tha tak tak leh fing tak tak, ram hmasawnna tur atana thil tangkai tam tak article hmanga kan thawhkhawm thin hi chhiar a nuamin a manhla thin khawp mai. Ngaihdan hi a inang lo thei khawp mai a, tun tumah hian kan ramin hma a sawn a, state budget state-in a lo tum ve tur kan tling ngai meuh loh 10% a lo tling ve theihna turte, kan ramin hma a sawn a, kan ram hi kan hmangaih phah a, sorkar thil mai midang ta lutuk anga kan en thin hi kan taen ve theihna tura ka ngaihdan ka rawn thawh ve ang e.

Mizote hi tunhma atang tawhin chhiah (tax) pe hreh tak kan ni a, Political party ding hmasa ber pawhin Lal hnena chhiah pek tawh loh tur a tih avangin kan thlawp tha a nih kha. Mahse ramin hma a sawn nan chuan chhiah kan pek that a ngai si. Ram changkang apiangah tax a pawimawhzia mipuiten an hria a, ram hmasawn nan leh ram siamthat nana thil pawimawh tak a nihzia an hriat avangin pek pawh an pe nasa hle a, an ram hruaitute pawhin ho te te a kan ngaihah chhiah (tax) tlem te tal, mipui mimir tana hreawm/ harsa khawp ni si lovin lak dan an hre khawp mai.

America ramah khuan professional tax hi an la hnem khawp mai a, nikhata dollar 120 hlawhin ni khatah dollar 20 vel tax-ah a pe thin. Chu chu 20% dawn lai a ni. German rama an mi hausa tawntaw (multi millionaire) ho chin chuanin hman deuh khan a hausa bik zing atangin chhiah tipung turin an sorkar a ngen a nih kha. Ram an hmangaihin ram hmasawn nan chuan an in ui lo hmel bik hle. Chutih rual chuan chhiah lo awl ruk tum pawh an mi hausate zingah an bang bik chuang lo. Mahse chung awl ruk tumte chuan hremna an pumpelh lovin, lungin hial pawh an thleng thin. Milar zingah chhiah awl ruk avanga man tawk ta pawh an awm nual.

Kan ramah chuan sumdawng leh sawrkar hnathawk ho hi chhiah petu langsar chu  an ni deuh mai a. Sumdawngho lah a consumer-te atangin an cut sa deuh vek a, sorkar hnathawk lah a hniam ber atanga a sang ber thleng Rs. 2500 in an hrut rual tawp thin a nih kha (tun dinhmun ka hre chiah lo). Thil thar chhuak leh thil siamchhuakte hi chuan a hmingin kan chawi ve lek maithei. Road tax leh land revenue bak hi chu mipui mimir hi chuan kan chawi meuh lo.

Tax hi kan sorkar hian tun aia systematic deuh leh tax lakna tur kawng hrang hrang (a chunga kan sawi anga) thil hote a kan ngaihah te hian tlem te tea lak dan mipui mimir tan phurrit leh hreawm khawp ni si lo hian ngaihtuah se chuan kan state budget tum ve tur pawh hi tun ai chuan kan ziaawm ang. State puitling ni ve lem si, budget 10% chauh pawh tum daih ve theih reng reng loh mai hi chu a zahthlak lam deuh chu a ni.

Tichuan, kan land revenue, tui, electric bill etc a let deuh thoa tihpun leh road tax pawh vawi khatah pek tlak vek ngai lo hian a awm theih ang. Mipui mimir tan phurrit a tling tlat (a bill pass tute hi chuan an hrethiam pha ve lo maithei). Chubakah dan bawhchhiatna chi hrang hranga pawisa chawi turah hian a tam thei ang berin (tun aia let 5 to a let 10velin) chawitir zel se, chu chuan bill leh tax pung pawh a veng deuh ang a, tichuan mipuiin kan lo chhawr ve thei zawk ang. Dan bawhchhiat pawh a hlauhawm sawt ang.

Kohhranah sawma pakhat kan pe a, chuvang chuan kohhran thil (property) leh biakin thil vel chu kan thawh atanga kan lei leh sak a ni tih kan hriat avangin kan ulukin kan dim dawih em em. Hetiang chiah hian chhiah hi chu pe tha ta ngat ila chuan sorkarin eng hmalakna pawh nei se kan inti neitu in em em tawh ang. Sorkar building, property eng thil mai pawh hi kan chhiah pek atanga lei a nih phawt chuan tuna kan sorkar building leh thil eng pawh hluia chhe chak em em mai pawh hi tha takin rei tak kan nei ve thei tawh ang. Sorkar atanga thil a thlawna an sem reng reng pawh kan chuh huam huam tawh lo ang a, a dawng thei awm tak chauh kan kian zel tawh ang. Sorkar hnathawk eiruk tumte pawn (a zawng zawng chuan an ni lo ang a) amah chhiah pek vek atanga han eiruk talh kha chu a tih chi tawh dawn si loh.

Contractor, supplier pawn eng hna pawh chhe taka a thawh/ supply chuan huai takin anmahni pawh kan va sawisel ngam tawh ang. Harsa taka kan pawisa thawh chhuah atanga chhiah kan pek atanga sorkar thil reng reng lei a, sak a, supply a nih tawh dawn avangin. Kan sawiselna pawhin awmzia a nei deuh tawh ang. Sorkar a thil ti thei chin, a fawng vuantu (Minister, MLA, Officer etc) pawhin thil mamawh ni lo, an duhzawng a pawisa an hman lutuk (VIP motor lei vak vak, kum 5 bak valid lo ni awm taka kum 5 hnua thlak leh zel te, MR kawl tam lutuk te, contract hna a thawh muang lutuk avanga estimate pun leh vak vak ringawt thin te etc, a tam lutuk a, sawi vek sen pawh a ni lo) leh pawisa a hmang hek lutuk zawnga a che a nih chuan an lakah kan thikthu a chhiain tun aia nasa zawk hian kan sawisel ngamin kan thin a rim viau tawh ang.

A thei thei apiangin a kan pawisa chhiah atanga thawhkhawm an mimal duh dan an lo hman pawp pawp kan remti tawh lo khawp ang. Hman deuh khan USA-a an politician pakhat chuan sorkar pawisa ama mimalatan a lo hman then avangin jail an tantir nih kha. Hmanni deuh mai pawh khan China ram hruaitu pakhat pawn sorkar pawisa a mimal atana a hman avangin court chuan khaihlum turin a chungthu a rel a nih kha. Chhiah an pek that avangin corruption pawh hi an haw takzet a ni. Heng zawng zawng hi chhiah kan pek that chuan kan la ti ve thei vek dawn.

Amaherawhchu, tun ang renga kan kal chuan engtikah mah Sorkar hi kan ta en ngai lo ang a, corruption pawh hi engtikah mah kan haw tak tak ngai lo ang.