Social Media leh Kristian thalaite

Vanneihtluanga

Philipi 1:27: Engpawh ni sela, in awm dan chu Krista Chanchin Tha nen inmawi phawt rawh se

1. Technology-in professional thil vantlang hnenah a pe: Media thil hi mi bik, journalist lam hna thawkte tih tur anga ngaih a ni ṭhin a. Tunah chuan thiamthil thar lo awm zel avangin chu tihphung chu a lo inthlak a. WhatsApp: hi kum 6 kalta Jan 2010-a inṭan chauh a ni a, Feb 2016-ah WhatsApp hmangtu tld 1+ kan awm tawh a. Kum 12-a upa Facebook hi nikum August-ah khan a hmangtu tld 1.56 kan awm tawh. Kan vaiin publisher, broadcaster, promoter, advertiser, kan lo ni thei ta. Media ethics, professional journalist-te chauh hriat leh hman tur anga ngaihte kha, kan zavaia kutah a lo awm ta mai si a, Hei hian khawvel pum awmphung a thlak a. KṬP huang lovah pawh inzirtir ṭul tak a ni.

2. Do lovin Chhawr rawh: Hmanrua leh thiamthilte hi Pathianin mihring hnena a pek a ni a. Do lovin chhawr tum zawk tur a ni. Social media hi Islamic State leh Kristiante leh Neih inang inkawp pawlte nen kan inṭawm vek a. Chhawr ṭangkai ber nih tum mai hi Kristiante tih tur a ni.

3.  A ṭhatna: Sawi ngai lovin kan hre sa awm e. Hriatna (Chanchin thar, hriatthiamna, ngaihdan) min pe a, thil min zirtir a, chhinchhiah, dahṭhat, changthlan, reference tur min pe a. Nupui pasal zawnna leh counselling hmanrua a ni a, Rang leh man tlawm taka inpawhna a ni a. Khawtlang chhungkua, kohhran, pawl leh ṭhianzaho insuihkhawmna remchang a ni a, ṭanpui ngaite ṭanpuina hna tamtak social media hmanga hlenchhuah a ni.

IT hrim hrim hi Pathian Thu tehkhinna atan te hian a ṭha em em a. Eden huan virus clean turin lei lam thisen version hlui engmah tling zo a awm loh hnuah, Pathianin A Fapa hmangin Chhandamna version, free download theih, update leh upgrade ngai lo, chatuan daih a rawn thlen a.. han tihte hian ṭhangthar tan a fiah em em a ni.

IT leh Social media hian kan eizawnna leh hnathawh nasa taka tiawlsamin a pui a. Mi mal nun a tiawlsam a, diary, sum hmuh leh hman, appointment, records, samples, designs, leh Sunday school zirlai enlawkna atante a ṭha em em a ni.

A ṭhat lai vekin Setanan thiam takin a ram laknan a hmang mek a. Chungte chu kan sawi dawn a ni.

1. Atchilh Natna: A ṭhat avang tak hian ṭhenkhatin an uar ta lutuk a, a tel lova famkim lo ni hiala inhriatna an nei a. An thu chhuah lo ngaihventu an awm rualin milar nia inhriatna an nei a, an chapo ṭhin. Mi aia fing, bengvar, sawi thiam, anga lan tumna leh ni tak taka inhriatna kan buaipui hle. Pathian aw leh an awmna hmuna thil tak tak aiin, khawl kawchhung khawvel (virtual world) ah an cheng a, ramhmangaihna leh ram veina nei lovin ho takin an nung thei a ni.

Mizoram hi piangthar lemchang tamna tam a ni. Social media hi chhungrila ṭhatna awm si lova ṭha lem chan ti awlsam lehzualtu atan Setanan remchangah a hmang mek a ni tih i hria ang u.

2. Relations tibuai: Thuruk sawi a awl a, inkhalh fal a awl a, inngaizawngte leh nupa te mai ni lovin uirena hmanrua a ni thei a, mi mal, chhungkua kohhran leh khawtlang a tibuai ve thei a ni.

3. Resource senral nen a inman lo: A pawisa zawngin kan hek phah hle. A man to leh ṭha kher neih kan tum hi thil ṭul lo  tak a ni. Pen neih ṭhat vangin tumah kan inngaisang chuang lo ang velah hian i ngai ang u. Leisak ni lova mahni sum ngeia lei te hi a chhuanawm bik a nia. Tin, kan top-up-na hi tu sum nge? Kan phone thlabi senso nge tam kan faith promise? Kan senral leh kan hmanna hi a inman tak tak em? Hriatna kan dawn leh kan sum sen hi a inman tak tak em? Inenfiah a hun hle. Company te hian mipui min inchuh a, a free an tih hian a free tak tak lo. Kan rilru leh kan hun min khawhralsak a ni.

Nasa takin ralchah dawrah thil kan chah a. Mamawh ni lovin kan duhzawngah kan buai a, Mizoram ṭhalaite hian Kohhrana sum lut tur tamtak hetah hian kan khawhral mek a ni.

Kan hun kan tihek nasa hle bawk. Hnathawhna, eizawnna, lehkha zirna, lehkhabu chhiarna leh chhungkaw inkawmhona hun kan tihek a, thil ṭul lo kan post hian a lo chhiartute hun kan tihheksak bawk.

4. Awlsamna Natna: 1980 velah Chanmari West bial pumpui nen hian bial khat kan la ni a. Sairang kawngpui bul lamah leh, electric veng ramri-ah te, KTP Committee kohna ka sem zak zak ṭhin. Tunah chuan, heng hmanraw hrang hrang avang hian, ṭhalaiten a taka inpan kan harsat tial tial a. Khawhar inah te, thlan laihnaah te kan zelthel phah. Phone hmanga chinfel theih loh chu “A ngaihna awm lo!” kan ti zel dawn a nih chuan phone hi min tichaklotu a ni zawk. Tin, thil naran tamtak kan dawn tam leh lutuk chuan, thu pawimawh tak leh hmanhmawh thlak pawh thu naran emaw tih mai a awl. Naran tuifawnah pawimawh a pil thei tih i hria ang u. Mamawh group-ah chauh tel hi a fing khawp mai.

5. Taksa Hriselna: 1990 vel aṭang kham kum 40 ka tlin hmain computer ka ṭhutchilh ṭan ṭan a. Kum 25 a pelh meuh chuan, mit chak lo, hnungzang ruh, thisen thlum leh insawiselna ka ngah ta mai. Ṭhangtharte hian kum 5 mi in nih aṭangin in khawih ṭan a. Zan men rei leh zing thawh tlai nen in fawm a, insawizawi ṭhat bawk si loh chuan, kei aiin in taksain a tuar ang tih ka hlau ngawt mai. Upat hnuah a lang chhuak a nia. I fimkhur ang u.

6. Mi pawi sawi leh lei chawi theihna: Phone hi smart-phone ni mah se, a neitu hi a mawl miau chuan, smart takin kan mualpho fo dawn tihna a lo ni. A awlsamna tak hi duh aia thui kal palh tiawlsamtu a ni. Mi mal leh pawl thuruk thehdarh te, finfiah loh leh dawt thehdarh te, a neitu remtihna lova mi kutchhuak thehdarh te hi lei chawi theihna vek a ni. Tin min ruaitu (sorkar, private...) sawisel leh mahni chaw bel policy kalha thil sawi vak vakte hi theih mah se thil pawi thlen thei a ni a, KṬP te inthiar fihlimna tur a ni.

7. Mihring zia lantirna: Social media hi kan ze lanna remchang a ni. Ṭhenkhat chu inlantir chak chi kan ni a, ṭhenkhat chu inthup chi kan ni. Ualauva kan tih duh miah loh tur hi a ruka hming thup chuan kan ti hreh lo. Ṭhenkhat chuan mahni inthup chungin mi dang bih thlak leh zar buai kan tum. Mahni nun inthup chunga counselling te hi a hlu vak lo. Fuihna ṭha petu chu rin ngam a ni tur a ni a, rin ngam a nih dawn chuan a inhawn a ngai.

8. Fianrial: Marka 4:34-ah Fianrialah Isuan a zirtirte engkim a hrilhfiah ṭhin tih kan hmu. Fianrial hi Kristiante thlarau chaw lakna a ni. Ṭhian kawm reng tur leh min koh apianga ei reng thei tura siam kan ni lo. Social media hian I fianrial a tichhia em? Social media hmangin mi fianrial i tibuai em? Inngaihtuah ang che.

9. I nihna lantirtu a ni: Philipi 1:27-ah chuan, Engpawh ni sela, in awm dan chu Krista Chanchin Tha nen inmawi phawt rawh se tih ziak a ni. Social Media pawh ni sela, kan thil tih hi Krista chanchin Ṭha nen a inmawi em tih i enfiah ṭhin ang u.

I profiles vel kan han en a, i inlantir duh dan leh i nihna tak tak inmil lo deuh kan hmuh hian kan ringhlel che. Mi mawl deuh hi thu fing deuh forward nasa an ni fo! Dawt sawi i hrat hmel riau! I kum, thiamna, chhungkaw level, eizawnna leh nihna milin i inlantir em? I lawmzawng aṭangin i mizia awm kan hre thei. Rawngbawl tura chhandam sawi laiin ṭhenkhat hi chu mi thu post like tur ringawta chhandam ni awm tak kan ni. Like Machine ni ringawt turin Pathianin min siam lo va, follower ni ringawt lova mahni ngaihdan neia, huai taka puangchhuak a, hnehna puanzar vaia hmahruaitu ni tura siam kan ni.

Mi i biak (phone/text) hun te, i thu sawi te, phone-a i biak dan te hi hmingṭhatna leh mualphona siam thei vek a ni. Mi kan biakin aia upa te leh kan ṭhiante kan biak dan a dang a, chhungkuaa kan nungchang leh biak in chhunga kan nungchang te pawh a danglam ang hian, social media kan hman pawhin, aia upate telna group leh KTP group-ah te chuan ṭawngkam zahawm tak hman tur a ni.

10. Thlalak: Jakoba 1:23 Thu ngaithlatu nia zawmtu ni si lo chu mi, darthlalanga a pianpui hmai ngun taka inen ang chu a ni. A kal bo va, mi eng ang nge a nih a intheihnghilh nghal si ṭhin - tih hi a dik ngawt mai. Kan thlalak hian mi tamtak chu min bum a ni! Kan larpui hi kan hmingchhiat phah zawk.

I thawmhnaw ngah i show chiam hian i pasal nih kan hlau. I inchei dan hian i pian nalh lo a thup nge a tilangsar? Thawmhnaw mawl tak hmanga nalh deuha  i inchei thiamzia i show hian i fin kan ring. I thlalak zawng zawgah model ang deuha i in-pose vek hian chhungkaw nu ber atana thlan che kan ngam lo. I thlalak tamzawkhi picnic leh chaw ei thla a ni em? I hnathawk lai thla kan hmuh loh chuan ngaihzawn che kan hreh. Nang chu i fel a nih pawhin i thla lakpuite kan en hian kan ringhlel che. A vai hian KTP nen a inhmeh em tih enfiah hmasa ṭhin ang che. A reng reng thu-ah i kalna apianga i thlalak i post hian i bula awm nuam kan ti lo. Kan privacy i tibuai. Min tizak.

Thil pakhat ka hrilh ang che: A tak aia i thlalaka i lan nalh hian, mi dang i bum hmain nangmah i inbum hmasa ber a, nangmah bak bum i nei chuang lo. Zawhtein ama mei a chhaih a, uiin ama hlimthla a chhaih ṭhin. I hlimthla chhaihin buai chiam duh suh. I thla aiin i tak Lalpan a duh tih hre reng ang che.

11. Fimkhur rawh: Sam 10:9 Sakeibakneiin a pûka a chang ru angin ani chuan fianrialah a chang ru reng thin a... tih ang khan, Social Media hmang hian Setanan a chang ru reng che a, Setana hnehna atan i hmang dawn nge Setanan a hneh dawn che?  1 Kor 15:33 “Bumin awm suh u, ṭhian sualte chuan nungchang ṭha an tikhawlo ṭhin” tih ziak a ni. Social media hmanga ṭhian sualte bum ni lo la, mi dangte bumtu nih hlau hle bawk ang che.

12. Kristiante Finna Media: Thuf: 4:5 Finna nei la, hriat thiamna nei rawh; theihnghilh suh la, ka kaa thu chhuakte hi chhiat lam pansan suh. - tih ziak kan hmu. Kristiante finna media lungphum chu thlarau thianghlim a ni. I thinlunga Thlarau Thianghlim thu post like satliah suh. Delete suh, ngai pawimawh la, Thlarau Thianghlim thusawi chu zawm ang che.