PL Liandinga
Eng ang hnam ze pu nge kan nih hi hriat a harsa hlein ka hre thin. Kawng tam takah chuan kan fel viau ang hian a lang a. Kawng thenkhatah chuan kan rilru hi a dik lo viau hian a lang leh lawi a.
Hmun hrang hrangah sorkar pawisa hmangin hna thawh a ni a. Hmun tam takah chuan tha ve pangngai takin thawh a ni a. Hmun tam takah thung chuan kut tling lo leh chhe takin thawh a ni bawk a. Chutianga thawktute chuan khawlai, hmun ualau lai takah pawh hna thawk se mipui vantlangin kan en liam ringawt a. Hmun pilril deuhvah pawh chhe takin hna thawk se a riral mai mai bawk a. Kan la naupang chhia angreng ngawtin a lang.
Hetianga kut tling lo taka hnathawh te, sorkar phal loh thiltih (sangha hrai te, kawng kama thingphun hal hlum tak mai te, thal laia chhun pachanga ek-In sah tak mai te) hi a chhan bul ber pakhat chu hremna fumfe a awm lo hi a ni ang. Dan lamah chuan a awm ngei ang a, mahse a kengkawhtu sorkar duap vang te, hleih neih vang te, depdet vang te a ni tlangpui hlawm.
Kan Chief Minister hian, ‘Mizote chu insawipui hnam kan ni’ a ti a. A sawi dik viau maithei. Mahse a sawi rual chiaha a ngaihtuah tur chu a tireh theitu tur ber chu amah a ni. Insawipui hian awmzia a nei zel a, chuvangin insawipui hi kan uar ta a ni mai. Insawipui uar lo tura hma la theitu pawimawh ber chu Chief Minister hi a ni.
Party Worker te hnenah hna an han pe a, an han hralh daih mai phawt a. Hre duh se kan sorkar hian hna hralh hi a hre ngei ang a, a hralhtu leh a leitu pawh a chhui chhuak vek thei ang. An hriat chhun pawh an hrem ta tlat lo hian mipui a hruai sual a ni. Kan hotute hnena dan bawhchhiat thu-hlaa zualko tam tak hi hlawhtling lo zel sela, insawipui hi chu a reh mai ang. Hlawhtling tawk a awm tlat thin avanga insawipui te, dan bawhchhetu hrem loh te hi lo piang a ni.
Sap rama Traffic Rules bawhchhiat chu a buaithlak em em a ni tih kan Chief Minister hian a hrechiang viau ang. Miin lo bawhchhe ta se, Senator emaw, Parliament member emaw hnenah va sawi ngawt dawn ila, ‘Eh, chungte chu keia lo sawi tur a awm hlei nem. Dan chu dan a ni mai alawm,’ an lo ti mai ang a. ‘Lehkha ka ziahsak ang che,’ ‘Ka phone sak ang che,’ an ti dawn hauh lova. An police offi cer-te va be leh ila, ‘E khai, a mantu chuan report a thehlut tawh ang a, tihngaihna a awm hlei nem,’ an lo ti leh ang a. Sawi zel chu thil buaithlak tak angin an lantir ang a, ‘Chuti khati chuan ka lo pui ang che,’ tih lam engmah an sawi lovang.
A nih lohdan tur anga hnathawktu pawh kan hnena lo kal chu thuneihna lantir nan te, kan ropuizia lantir nan te, kan chungnunzia pholan nan te leh thildang tam tak avangin kan hnen meuh lo thleng ta chu an tawrhna lo thawidamsak kan tum a. Thil tha titu anga lan leh, mi biak nuam chan kan chan theih nan a dik leh dik loh pawh fi nfi ah buai duh hauh lovin kan theihna mual mualah kan sawisak a, khawngaihna nei mi anga inlantir kan tum a. Chumiin kan ram a bawh buaizia hi nasa tak a ni.
Mipuite hi kan sual ngawr ngawr lo. Mi tha tam tak an awm a. Mahse kan that loh pawha min chhan zel theitu awm anga kan hriat tlat avangin thil dik lo pui pui ni a kan hriat, hlawkpui thei zel an awm tlat ni a kan hriatna hian kan ngaihtuahna a tichawlawl a ni.
Tura sangha hraitute hi tun ang hunah chuan mi tam tak tan khawvel tihrehawmtu an ni. Dan pangngaiin a hremna a nep a nih pawhin tih tak takin kan sorkar hotute hian ngaimawh sela. Chutiang bawkin contract agreement ang lova hnathawktu te, kawng siamtu te, lung remtu te, tuihawk luankawr siamtute leh hna chi hrang dang dang pawh thawktute hi a ngaihhnathiam zawng emaw, a ngaidam zawng emaw, hremna pumpelhtir zawng emaw hian khawsa lo ila. A hremtu tur te hrem theitu leh chung mite chunga thuneitute hi inngaihtuah fi m thei se chu a lawmawm ngawt ang. Rilru sual vanga thil tha lo ti ni lo, mi tihdan phung pangngai ve reng emaw tih vanga a nih lohdan tur anga thilti tam ber hi chu awlsam taka hruai ngil mai theih kan ni a. A hruai ngil theitu ber ber te hian engkim mai hi vote atanga an teh miau avangin kan tehfung hi a sual nghal a.
Engkim hi dan tehfung atangin teh thei sela aw...
