HC Vanalruata
Hman deuh khan WhatsApp thuthawn pakhat ka dawn chu a phuahtu-in a phuah thiamin a awm ang hle mai. Pawisa ruk ching chungchangah a tam dan indawtin a ziak a. Cheng 10 ru chu a nu-in a hauva, a ti chho zel a, a khawtlang leh Police te inrawlh zelin cheng nuai chuang rutu erawh chu parthi awrh tirin khuallianah te kan hmang thin niin a ziak a. A dik hle-in zu hre tlat i a!!
Chutiang zel chuan kan ram hi ramdang leh state dang nena khaikhin hleih theih lohva a tenawmna hriat tur a awm fo mai. Pathianni-a kan thawmhnaw tha ber nena Bible Thianghlim leh Hlabu zakzeha a khawnawta BiakIn lam pana kal thin, Pathian thu awih em em avanga Kelkanga kal dul dul a, kawngpuia traffi c jam pawisa lova bingbilet hnam. Zan reha awrawl tawp tawpa 'Zoramah Krista Lal ber rawh se," tia aurual thin hnam kan nih hi kan nun dik tak, kan nitin nunah a lang chhuak lem lo chu a nih hi maw.
Khai aw... India-in Commonwealth Games a thlen dawn khan 2010 September thla-ah an lei dawh lai a chim a nih kha. CWG atana inbuatsaihnaah hian eirukna a tam hle niin media te chuan an puang nasa mai a. Hemi thu kal zelah hian CWG Organising Committee hotupa ber, khatihlaia Congress MP leh milian (Indian Olympic Association President) Suresh Kalmadi pawh tun thlengin politics thlanmualah phumin a awmzui a. Mi lian tam tak leh contractor-te'n eiruk thubuai an awrh a, hnathawktu engemawzat chu hnathawk zui tlak lova ngaih (black-listed) an ni. Mizoramah hian Pathian thu kan sawi nasa a, dikna kan duhzia kan tlangaupui fo lai hian sum chheprelhtu Anania te nupa chawp-leh-chilha hrem nghaltu thiltih chu kan sawi zui tamlo khawp a, chu ai chuan zu leh zu zawrh hi Pathian huat ber emaw kan ti a ni ta awm e.
Kolkata khawpui-a an kawngchhawng (flyover), 'Vivekananda Flyover' an tih mai chu March ni 31 khan a chim a, Mi 30 dawn an thi. He hna thawktu, Hyderabad khawpui-a inkulh IVRCL company an tih mai hotu lawk mi 9 an man tawh. Heng an mi mante hi IPC section 302 (tualthat), 307 (tualthah tum) leh 120B (thiltisual tura phiarru) te-a puh an ni a. An puhnate hi fi nfi ah a nih chuan khaihlum thlenga hrem theih an ni. Mi fate chu an heti tlat.
Keini chu Khatla-ah lungrem a chim a, mi 4 an thi a, tumah an man kan hre lova; an hrem zui phei chu kan hrelo. Chhimlama electric hrui fual luat vanga Bus a chuang mi 9 lai nunna chan phahnaa mawhphurtu an man emaw an hrem emaw kan hrelo. Hetianga ngaihthah (criminal negligence) avanga arte thih ta mai mai hi Mizoramah an tam tawh lutuk. Kan sorkar hian Mizo nunna hi vaiho nunna aiin a hlulo deuhvin a hria a ni awm mang e kan ti dawn nge mi thihna thlen khawp hiala hnathawk thalote hi a duat kan ti zawk dawn? A pahnih pawhin a dik ve ve mai thei a ni.
Vivekananda Flyover chim atang hian zir tur kan nei em tih i lo en chiang teh ang. Kolkata veng pakhat Girish Park a an sak mek Kilometre 2.2 a thui he Flyover hna hi kum 2008 (CPI-M sorkar lai) khan IVRCL company hnenah hian contract pek a ni a. Kum 2009 khan hna an thawk tan. Kum 2010-a thawh zawh tura ruahman a ni chungin vawi tam tak an zawh hun tur pawhsei sak an ni a. Trinamool Congress sorkar hnu-ah Chief Minister Mamata Banerjee chuan an hna an zawh ngei ngeina turin thla 18 hun pe-in kumin February thla khan zo fel ngei turin thupek a siam a. An zo hman ta lova, March thla tawpah a chim ta a. Kan ram hruaitute'n mipuiin an nawr chim tia mipui an puh ang deuh hian "An Chief Minister-in a nawr chim," kan ti ve mai dawn em maw ni le?
Ringlomi tia kan sawite hian midik leh hnathawk tha chawimawina chang an hre mai a ni lova thil diklo titute chu an hrem ngam mai pawh ni lovin an hrem thin. Keini state sorkar ve erawh chuan lei chim fo dawhtute, a huna hna zo theilo-te hi hrem chu sawi loh an duat zawk tlat mai. An lei dawh a chim chuan mi state-ah chuan an man a; an phu tawkin an hrem thin. Keini chuan man leh hrem chu sawi loh kan ruai zui satliah mai lova duhsak takin hna dang kan pek belh mawlh mawlh mai a ni. Contractor a huna hna zo theilo, vawi 10 dawnlai an zawh hun tur pawhsei sakte pawh hna kan la pek belh ta zel zawng a nih hi. Hei hi enge a chhan ni ta ang le?
Kan thian pakhat (contractor) chuan hetiang hian hmanah a sawi ve tlat: "|ha taka hna thawka, a hun hma emaw a hun takah emaw zo chat chat chu sorkarin a chhawr nawn duh vaklo. Hnathawk tha chu a lo induh deuh larh a, hotu leh thuneitute hnenah sum pek a tum ve lova. A thawh that miau avangin engineer ho leh a chung amite pawhin a lakah engmah an phut tha ngam lova; an hlawkpuilo em a ni. 'Laap naai' an tih ang chi hi chu hna an pe chhunzawm duh viau lo," a ti a nih chu.
Chumi letling chiah chu kan kalphung hi a ni ta ni-awm tak a ni. Hnathawk chhe chunga bill lak duh chuan engineer/ offi cer a tlawn lo thei ta lova; a hna a len' poh leh an intlawnna a lian ta mai a ni. Tlawn ngai kha chuan a tlawntu lakah phut a lo nei a; an intlawn nat poh leh sum an siam tlang tam mai a, hnung thak an inhiah tawn laklawh tawh phei chuan an tlatlum em em tawh mai a ni.
A huna hna zo theilo pawh chutiang tho chu an ni. Hun tiama hna an zawh loh hian hrem theihna dan (punishment clause) a awm ngei tur a ni a; a huna zo theilo contractor chuan pawisa a chawi ngei tura ngaih a ni a, hei hi contract agreement zawng zawnga awm tura ngaih a ni. Mahse, chutianga hrem an awm chu kan la hre lova (an puangzar vaklo pawh a nih mahna). Hna chhe lutuk leh hun tiama hna zo thei reng reng lote hi kan sorkar-ah hian hrem emaw ensan (black list) eawm an awm kan la hrelo mai ni lovin duat namen lova duat an ni zawk tih hi mipui mimirin kan hmuh dan a ni awm e.
Pawisa tlem te te rutute an vuak hrepna ram, khawtlangin ar ru um hrepa an vuak hlumna ram, rakzu zawrh vanga khua/veng atanga hmeithai an hnawhchhuahna ram, chutih laia cheng nuai/vaibelchhe tel rukhmang nia rinhlelh ngawih ngawihte parthi awrh tira khualliana hmang thin ram kan ni tih hi chu hai rual a ni lo. Kristian ram tia kan vuah Mizoramah hian thil 'mak' thleng theilo a ram hi a lo awmlo a nih hi. Chuvang chu a ni ta ve ang - misual an din chan a, hnathawk thalote leh hun tiama hna zo hmanlo contractor leh company te'n duat leh ngaih pawimawh an hlawhna rama kan lo chan zawh tak ni!!