I zuan hmain en rawh

Lalhruaitluanga Chawngte

Education hian ngaihtuahna theihna ni lovin pawmna zawk min pe ni te'n ka hre thin. Zirlaibu siamtuin a ngaihdan a ziak a, chu chu zirlai ten kan in-by-heart siak ta thin a nih hi; a by-heart hnem apiang kha a thiam thei an ni ta mai a. Chutiang chu kan education kalphung a nih miau avangin tute emaw thatpui apiang kan awt ta thin niin a lang.

Vai lehkhabu siam hmanga degree hlawhchhuak ten Panchayati Raj kan thlahlel ngawih ngawih a, vai lehkhabu ziak chhiartu ten 8th Schedule-a Mizo tawng telh kan chak tlat bawk. Hei hi thil mak a ni lo, kan education system nghawng chhuah ni ngeiin a lang. "Ka nu ka chunnu ngei chu" tih hlaa vai nu lem dah tul ti tlatte kan nih hi.

Khawi lehkhabuah emaw eng thil emaw kan chhiar a, an lo fak viau chuan "a tha hle mai a" kan ti a, kan khukpui nghal chiam thin niin a lang. A pawi ngawt mai.

Vai tana tha apiang hi Mizo tan a tha ve ngawt lo. Sap tana tha pawh Mizo tan a tha ngawt hek lo, Mizo tana tha Mexican-te tan a tha ngawt lo ang bawkin. 

8th Schedule pawh hi India ram tawng hrang hrang chawikan nana duan a ni a, thil tha tak a ni. Mizo tawng dahluh ve duhtute auhlate pawh hi a dik bawk e. Mahse, hmaih palh kan nei - hemi chungchang hi Mizo context atangin kan chhut lo. Chu lo pawh hmaih palh dang kan la nei - politics kan chhut tel lo. Mizo politics kan chhut tel lo a, hmarchhak politics kan chhut tel hek lo. 

Tichuan, tiang hian chhut ta ila - 8th Schedule-ah Mizo tawng hi tel ve ta se, he Schedule-a tel tawng neitu hnam lianpui pui karah hian he hnam riangvai tak, BA pawh hmanni lawka pass ve chauh hi han awm ve ta ran mai ila. Heng hnam lian pui puite khuang ben rual hian sorkar laipui khuan min lamtir tum ta se. Danin 8th Schedule-a tel tawng chawikanna tur a sawi zawng zawng pawh hlawhtling ta se keini hnam, 'tunge Mizo' tih leh 'eng hi nge Mizo tawng?' tihah pawha la lungrual thei lote hian chu khuang 'beat' chu kan zo ang em? 

8th Schedule-a Mizo tawng dah duhtute hian vai hnam lian leh ropui pui puite tana buatsaih a nih kalkanin, India mithiam ten a that tur zia an sawina te an lavawng thin niin a lang a, a pawi hle. Vai hnam liante tana buatsaih a nih zia hi a phenah chiang takin a inziak a, kan hmuh thelh mai mai niin a lang.

Kan Mongolian pui, Meitei ho chuan theih tawpa an nawr vangin 1992-ah khan 8th Schedule-ah hian an tawng an lo thun tawh a, anni hi kan inzir theihna tur hnaivai an ni. 8th Schedule-a Metei tawng telh a nih theih nana a meizang hlaptu, a pawr ber All Manipur Students' Union te chu an thil tihah an inchhir nia ngaih theihin an awm niin MZP hruaitute chuan an sawi. MZP leh AMSU te hi North East Students Organisation-a inthlungkhawm an ni a, NESO thil tih nikhua velah pawh heti lam hi chu AMSU hruaitute hian an sawi tha duh lo niin an sawi nghe nghe.

Kei tehlul pawhin AMSU hruaitu thenkhat ka lo kawm ve zeuh zeuh tawh a, 8th Schedule chungchang sawi hi chuan tlanchhiatna tur an zawng thuai thin tih ka hria. NESO meeting velah pawh 8th Schedule-a an tawng a awm avang hian hamthatna an dawn tur an dawn loh phah fo niin an sawi bawk. Meitei ho hi an inhmu lian lulai emaw'n teh reng ni, an phak loh tur zuan vak vak an ching a, tribal-a chhiar an duh loh avanga an nih tur ang an nih phak loh fo zia te pawh sawi tur kan hre fur awm e. Vai hnam lian pui pui tana duan hi kan anpui Metei ho tan a tha lo tihna a ni thei ang em?

8th Schedule-a tel tawng neitute nena kan inthlauh dan hi lei leh van ang vel a ni hial ang. Kan mamawh pawh insan hleih tak a ni. Isua pian hmaa leirawhchan hmanna chang lo hre tawhte tana harsatna hi keini tan harsatna a ni ve kher lova, kan harsatna hi an tan chuan thil nuihzatthlak tak a ni thei bawk. Chutiang mite nena han inhrut rual chuat mai chu kan tan a him lo palh ang tih a hlauhawm a, ngun taka ngaihtuah chi a ni.

8th Schedule-a tel tawng neitute tan ILP hi thil ho a ni satliah lova, thil tenawm a ni. Mawl taka han chhut pawhin 8th Schedule-a lang pha meuh tan chuan ILP chu thil ho mai mai ni awm tak pawh a ni reng e. India danpuia lang pha tawng hmangtu hnam ropui nih leh a bika hamthatna hauhsak (reserve) nih hi thil inhmeh niin a lang lo, chungte chu kan ngaihtuah ngun ngai lai chu a ni.

Mi thahnemngai thenkhat chuan ILP leh reservation te hi tul lovah an ngai a, 'reserve' sak ngai nih hi tlawm thlakah an ngaih vang a ni. A dik chiah mai. Kan dinhmuh hi a tlawm thlak a ni. ILP leh reservation tel lova dam khawchhuak thei nih hi thil thlakhlelhawm a ni a, a tum pawh kan tum tur a ni. Chutih laiin, kan hnam dinhmun dik tak ngaihtuah hmasa lova, heng thilte ho lo tih viau mai chu kawng dik a ni lovang. Mahni nihna leh phak tawk hre chiang duh lova inhampuar vak thin hnam an dingchhuak ngai lo.

A 'ILP' laia pawh chu lo sawi zau ta ila; 8th Schedule-ah Mizo tawng tel ta se ILP hmanga hung hran kan ni tawh lovang tih a hlauhawm tih hi a duh lo lam tanchhan lian pakhat a ni. Chutih laiin a duhtute chuan a hlauhawm loh nia sawiin, chutiang ziakin a awm lo, tiin an sawi thin thung. Hei hi inhnial theih tak a ni. Ziak chuan a awm lo ngei a, mahse, India-in ILP a nin zia atang tea han chhut hian, 8th Schedule-a lang pha meuh in ni bawk a, min ti palh ta se engtin nge kan chhan ang? 1994-ah mai pawh khan India chuan RAP a hlip a, mipui nawlpui bakah kan mithiamte thlengin kan lawm a, a then phei chuan kan tawngtai chhannaah hial kan ngai a nih kha. Mahse, ngai teh, khatih laia union home minister SB Chavan-a khan "foreigner zawkte danna RAP mah kan paih chuan eng vangin ngei ILP kan paih lohvang?" ti zawngin, hmarchhak CM-te intawhkhawm tumin Shillong-ah ngei a sawi a nih kha. Khami tum khan eng ngaihin nge kan ngaih kha?

Mizo Accord-ah Mizoram Assembly rawn hmasa lovin ILP thiah a nih loh tur thu a inziak avangin kan unau thenkhat chu an thla a muang a ni awm e. Mahse, he thuthlungah hian Mizoram Assembly House phalna lova ILR/ILP thiah a nih loh tur thu a inziak lova, 'rawn' a nih chauh tur thu mai a inziak tih hi kan hriat reng a tha awm e. A rawn ang a, a phal emaw phal lo emaw, sorkar laipui khuan a rawn thiat daih mai tur asin. India hian chhuanlam chi hrang hrang hmangin ILP hi paih a lo tum tawh thin a nih hi. Chu chu kan rilruah riak reng teh se. ILP tel lova survive kan cho a nih chuan thuhran ni se.

A thuhrimah kan hmarchhak puite hian India sorkar nen 'accord' an nei ve fir fer a, keini ang em emin an lawm teh huam lo niin ka hria. An inremna hi India-in a ngai pawimawh lem lo niin an hria a, an vui an vui a ni ber e. Keini erawh kan lawm em em a, ILP chungchangah thlengin tanchhanah kan la hmang nghe nghe. Kan lawm tak zet a ni!

India hian eng ngaihin nge min ngaih tiha hrim hrim pawh hi kumtluana kan zir peih lo a nih pawhin exam dawn hnaihah tal hi chuan i zir hram hram teh ang u. Tun hnaiah Bodo tawng chu 8th Schedule-ah telh thar a ni a, hei hian kan tlangvalte tha a tiza niin a lang. A awm viau mai. Amaherawhchu, kan tlangval chhuanvawrte hian hemi kawnga tanlak an tum a nih pawhin fim takin ngaihtuah phawt teh se. 8th Schedule-ah an tawng dah luh a nih atang khan khu hnam khu an phel phawk asin. Bodo ho khuan script chi hnih - roman script leh devanagiri script an nei a, roman script chu Kristian hovin an hmang a, devanagiri erawh Hindu leh Kristian ni lo ten an hmang thung. Kristian lo zawngte hawrawp zawk chu India chuan a'n senglut hmak mai a, an buai hle. An mangang a, an khi a, India erawhin hmuhnawm ti takin a thlir.

India hian hmarchhakah hnam engemawzat a lo thendarh tawh, tih hi kan awih lo a nih pawhin hnam thenkhat chu a lo thendarh tawh, tih tal hi chu kan awih tur a ni. Karbi ho chu inthlahchhawnna lam leh culture lam zawnga chhut lovin, an chenna hmun a zirin hlawm hnihah then an ni a, tlang rama cheng zawng Hill Karbi niin, phaizawla chengte chu Plain Karbi an ni thung. Hill Karbi ho chu Sixth Schedule hmangin hamthatna hrang hrang pek an ni a, khuareiah chuan Karbi hnam chu hlawm hnihah an inthen ta. Mishing ho pawh Hill Miri leh Plain Miri-ah thendarh an ni a, tunah chuan an kehdarh ta. A thu hrimah chenna hmun a zira inthendarh hi thil tul lo tawp a ni a, mithiamte chuan 'Division on the basis of topography' tiin an sawi thin. Awpbettuin a awpbehte lakah a hmang thin a ni awm e! Scheduled tribe-a dah an ni a, a 'behind the scene'-ah film ril tak a awm tih erawh an ngaihtuah si lo.

Kan thenawmte, kan hmel anpui Kachari te chungchang pawh i'n sawi zel teh ang. Vawiinah hian Kachari te hi tute nge tih hi zawhna chhan har tak a lo ni ta. Dimasa ho chu tlang rama an chen avangin hlawm khatah dah an han ni phawt a, chu chu duhtawk lovin, computer hi sakawlh a ni lo tih kan hriatthiam ve meuh chuan Kachari chi 6 aia tam an lo awm der tawh. Dimasa te, Boro te, Meche te, Thengal te, Sonowal te, Sarania te, Rajbongshis te khu hnam khat, Kachari, kan Mongolian pui an ni tih i hre lo a nih pawhin zak suh. Anmahni pawhin an inhre lo. An darh chhan khu tute emaw vang a ni. Chu chu a ni pawi ta ber chu!

Hman kum lawk, Hmar leh Dimasa-te indo tum khan MZP aiawhin Dimasa tlawmngai pawl hrang hrangte ka kawm ve a, chumi tuma an thinlai luahtu, ramthim vei taka an vei tet tet mai chu India sorkarin hill tribe-ah Bodo ho dah a tiam thu kha a ni. Chumi sawi chuan tlawmngai pawl hrang hrang Delhi-ah an intir nghe nghe. Kha thu ka hriata ka rilru nat zia kha! Hill tribe-ah Bodo ho an awm chuan Dimasa ho khan an tluk si lova, kawng hrang hrangah hamthatna an ei zawh sak ang tih hlauvin India sorkar nawr an tum a nih kha. Hill tribe (ST-Hill)-a Bodo-ho dah kha India tan thil har leh hautak a ni lova, a tul ngawih ngawihna a awm hek lo. Mahse, Dimasa leh Bodo ho an inmu leh ar leh zual ang a, chu chu a lum tawk atangin hmuhnawm ti takin khawvela tam ber dawttute hian an thlir ang? Chu zawng chu. Heng thu ka sawi hi mawl ka inti a, ka awm te pawh a nuam lo deuh reuh. Eng vanga sawi nge ka nih erawh ka chiang. Ka chiang. Ka thinlungah!

Khawvelah hian khawi hnam mah hi mahni bilin an awm tak tak lova, a tu-a pawh mai hi kan inchiahpiah niaih nuaih mai a nih tak hi. Chutih laiin mi hnam erawh zawngin 'minority' te lakah hian policy mumal tak an nei zel thung. Keini anga mitdel chem sei keng anga duhna lam hawi zawng zawnga vai thin an ni ve lo. Tuikuk leh Chakmate pawh hi Swedish dep emaw, Korean-ho dep emawa awm chu ni se hetiang hi an ni lovang. Thiam takin an enkawl ang ka tihna a nih chu. India-in hmarchhak mite min enkawl dan hi a lungawi thlak loh lungrun. Mahse, thinrima lak vak chi pawh a ni lo mai thei. Keimahni zawk hi naupang thang thei lo ang kara fiaha kan men a ngai. Sorkar laipuiah khuan tu pawhin a fawng chelh se, kan laka an rilru puthmang chu a inang vek. Min enkawl nana hman tur ziak loh danbu mumal tak an inhlan chhawng zel thin. Tih tak takah chuan hmarchhaka India chet dan chungchang hi sap tawng chuan "India's policy towards Northeast is strategic" tiin an sawi thin a nih hi. Heng thu kan inzirtir meuh lo te hi tula kan hriat loh vang a ni ngei ang a, heng thu infah chiam chiam hi kan hnam tan a tha lo a ni chek ang.

Kan Bodo ho lah kha an la harhchhuak ta lova, 8th Schedule-ah an tawng a tel ve tak avangin mi thenkhat, devanagiri script hmangtute chu an phurthak palh ang tih hlauhawm khawpin an phur ta lai a. 8th Schedule-a an inhamtan theih tak avang hian hamthatna hrang hrang zawng an dawng ngei ang, mahse, hlawm hniha an khi ta phuk mai erawh hi chu eng hamthatna mahin a lei zo lovang. Chu chu a ni hmarchhak politics kan chhut tel lo, ka tih chhan.

Engpawhnise, Bodo ho hian eng nge an tawn dawn tuman kan hre lo. 'An chhiatpui lo' lo tih hluaina hun pawh a la ni lo. An chhiatpui thei a, an chhiatpui lo thei bawk. An thatpui hluah te pawh a ni thei. I lo thlir ila, an thatpui a nih te chuan, tuman 8th Schedule hi sual a ni, kan ti a ni hlei nem, a tum te pawh kan la tum ve ang chu. Fimkhur phawt teh ang u, kan ti mai alawm. 

Scheduled Tribe ngau ngau pawh Hill Tribe leh Plain Tribe-a min thendarhtu, chumi hnua Kristian leh Kristian lova Bodo ho thendarh lehtu India kalphung hi chik takin thlir phawt ila a tha lo'm ni? 8th Schedule-a kan tawng a tela kan hlawkpui dan turte hi 'dawt a ni' kan ti a ni hran lo, chik taka thil kan ngaihtuah loh avangin vawi tam tak kan lo tuar tawh a, chuvangin, tuman 'chumi hmaa 8th Schedule-a Mizo tawng in telh hman loh chuan kan vaw hrep ang che u' te min ti lo bawk a, beng i'n sik vang vang phawt teh ang u, kan ti mai a ni. Kan thenawm, Karbi te, Kachari te leh tu tu emaw lakah hetiang a thlen laia lo thlamuan viau hi a dik ber em? Kan thenawm ten hetiang an tuar laia ILP leh reservation chungchangah tea lo thlamuan viau ringawt hi a him chiah em? Thlamuan viaua thlamuan sual ai chuan, thlamuan loh viaua thlamuan loh sual hi, 'risk' sual rau rauvah a pawi lo zawk ang em?

India ram university hrang hrangah Mizo tawng a zir theih ang a, central service-ah tlin a awl sawt bawk dawn ni awma sawi te pawh hi ngun leh zuala ngaihtuah chi ni awm tak a ni. Kan thenawmte -  Assamese leh Meitei te chu 8th Schedule-ah an tel pha a, mahse, IAS-a an tlin hleih theih loh avang leh hna hmu lo an tam avanga buai nasa an ni tho mai. Hetia an tawng chawisan a nih hian mahni tawngin lehkha an zir a, Assamese medium leh Meitei medium ngeiin BA an pass thei ta hial a nih hi. Mahse, hetia mahni tawnga an graduate theih lai hian sap tawngah an chak loh phah thung. Chu chu, a leh a lingin an tuar let hlauh mai a ni.

Mahni tawng ngeia lehkha zir hi thil tha leh tul, khawvel ram dangah pawha zirna an kalpui dan a ni a, keini pawhin hei hi kan er tur a ni. Chutih laiin hemi atan hian kan inpeih em tih erawh kan hriat a tul thung. Assamese leh Meitei ho pawhin zirlaibu ngawr ngawrte chu an tawngin an nei thei mai, mahse, mahni tawnga lehkha zir, sap tawng thiam lote purchawkna tur erawh an indaih thei lo. Japan-hote chuan khawvel finna leh thiamna hrang hrang hi an tawng ngeiin an zir thei a, lehkhabu hrang hrang, eng lam hawi pawh an tawngin an nei zel. Chuvanga sap tawng mamawh lo an ni. Keini hian 8th Schedule-ah kan tawng hi dahin, college thlengin Mizo medium-in zir ve ta ila khawvel hi kan cho ngam tak tak ang em? Mizo tawnga BA pass, sap tawng thiam loten khawvel finna chhar turin eng lehkhabu nge an chhiar ang? Tuin nge chung chu chhawp thei ang? Chu chiah chu Assamese leh Meitei-ho hian an lo buai phah tawh a, an mithahnemngai thenkhat chuan IAS an neih hleih theih loh chhanah pawh an puh nghe nghe.

UPSC exam-ah pawh 'compulsory' leh 'optional paper'-ah Mizo subject a awm ve ngei ang a, chu chu thil lawmawm tak zawng a ni ang. Mahse, Meitei leh Assamese ho kan sawi takte ang khan, a dang chu sap tawnga kan chhan tho a tul ang a, chutah chuan kan chak loh phah ting mai a nih chuan a lawmawm dan a lawmawm loh hle dawn a ni. Tin, Indian languages-ah compulsory-a Mizo chhan a tul dawn avang hian paper kan ngah sawt dawn tihna a ni bawk tih hi 8th Schedule-a Mizo tawng telh tultite hian sawilang ve thin tho se kan ngaihtuahna a tizau lehzual ngei ang.

Competitive exam-a pawimawh lehkhabu leh chanchinbu thate chu sap tawngin a inziak a, chu chu sap tawnga hriatthiam a ngai a, sap tawnga reproduce a ngai bawk. Mizo paper a lak theih e tih vang ngawtin tlin tum tak takte chuan Mizo tawng an thlang chuangin a rinawm lohva, sap tawng bawk an ngai pawimawh ang tih a rinawm tlat a ni. Kan tan chuan sap tawng hi kawngkapui a ni rih tlat. Khawvel finna leh thiamna hrang hrang, information technology thlenga Mizo tawnga pur kan chawk theih hunah erawh chu chu a inthlak ang. A thu hrimah, hnam tenau nih avanga hamthatna leh tawng pui hmangtu, hnam lian nih vanga hamthatna hi kan chen rual theiin kan ring tak tak em? Lo chen rual ta ila, 'injustice' a ni lo ang em ni? 

Kan thil buaipui hi kan rin aia thukin kan hnam nun leh khawtlang nun nen a inzawm ang. "Mizoramah" tia kan sawi ngam lo a nih pawhin "Aizawlah" ti tal chuan kan sawi ngam awm e; Aizawlah hian phaia lehkhazirte leh phaia zir pha ve lote inkarah 'thil engemawni' a awm a, hei hi lian telh telh thei pawh a ni. India ram zirna in tha ber bera zirchhuak, engmah ni ta si lote hi Vairengte chhak lama tlingtlate hian an hmusit ru a, university lar tak tak atanga zirchhuak, hna hmu lova teihawi ta mai maite hi Mizoram pel pha lote hian an vei asin. He zung atang hian thil tha lo dang a chhuak ang tih hi hlauhawm tak a la ni ta cheu mai.

College thlengin Mizo medium nei ta ila, Mizo medium-a zir turte chu a retheia te bawk an ni tih hi mautam lo thleng tur tluka chiang niin a lang. Mizo tawngin competitive exam chhang thei mah ila sikul tha chhuakte chuan sap tawnga chhan an thlang tho ang a (a tha zawk miau dawn si a), sap tawng thiam lo deuh ten Mizo tawnga chhan theih a nih thu chu chauh-thu-barawhah an neih ang a, class kan inthen thuai ang tih hi thil hlauhawm ni te'n ka hre thin. Sociologist ka ni lova, ka sawi ngam lo mai mai a. 'A thlir dan a thim lutuk' min ti a nih pawhin ka hnial lovang. Mahse, ka tanhmun erawh ka sawhsawn lovang. Phaia zir chhuakte leh phai thleng pha lote inkara khi awm hi research tia zirchhuak ni lo mah ila, nitina hmutu niin ka inhre ve a, chungte chuan 8th Schedule-a Mizo tawng dah chungchangah "Aw nghak hram hram la, phunnawi mai lovin" tih kha mi saktir thin.Tunah pawh Mizo sikul chhuakte chuan hmuhsit an hlawh chiang khawp. Social stratification process hi duh aia chakin kan nawr mai ang tih ka hlau a ni.

Chu lo pawh hlauhthawn ka la nei; hmanni lawkah Paite chu Mizoram Scheduled Tribe list-ah dah an ni a, Mizo hnam hlawm lian zingah chuan anni bakah Hmar, Kuki, Pawi leh Lusei ho an ni deuh mai. Heng chi hrang hrangte hian tribal certificate an lakin mahni hnam bil hminga la lovin, 'Mizo' tiin an la thin. 8th Schedule vang hian reservation leh hamthatna hrang hrang chan ta ila, hengho tana hmalakna kawng hmasa tur chu an chibil vuaklen a ni mai. Chu chuan Mizo hnam inpumkhatna a tichhe thei daih mai a, chung te chu a ni 'risk' vak a ngamawm loh ka tih chhan chu. Chu chu a ni Mizo politics kan chhut tel lo ka tih ni.

Chuti lo zawng pawhin chhut dan dang a la awm cheu; Chakma leh Tuikuk-te nena kan inkar hi. 8th Schedule-ah an tawng a awm avang hian Assam-ah chuan Assamese a pawimawh hle a, sikul leh zirna in hrang hrangah 'Three language formula' hmangin, Assamese chu 'lian tual tual' a ni ta der mai. Chu chu he state-a hnam thenkhat, Assamese hmang lote tan chuan a rit ta em em a, mahni tawng vuaklenna tur leh inhunghranna tur an mamawh ta a ni. Eng nge a nghawng kan hria; Bodo ho chuan anmahni chenna chinah an tawng chu official language a nih theih nan hma an la reng a, chu mai a ni lo, Bodoland te pawh an ngiat a nih hi. Karbi leh hnam tenau dang ten eng nge an ngiat pawh kan hria, mahse, pawi ta em em chu, heng hi kan state-a thleng ve palh thei a ni tih kan hre lo hi a ni.

Khawvel mithmuha duhtawka min nghaisa thei khawpa chak, Chakma-ho hi an ngawi mai maiin kan ring em? A nih leh India hian chu chu eng he hu-ah a ngai lovang, tih sawi ngam kan awm em? Assam-a Assamese hmang lote chet dan khu kan rama Mizo tawng hmang lote chet dan tur a lo ni palh ang tih te hi a ni ka hlauh chu ni. Hmar te, Lai te, Mara te chu, lo lungawi lo pawh ni se, a zia tak a la awm. Unau karah sawifel theih loh tak tak a awm hlei nem. Chakma leh Tuikuk-ho mawlh mai hi a ni, kan buaina tur chu.

Assam sorkar leh an mi thahnem ngai ten Assamese chawi vawng tura theih tawp an chhuah tan tirh, 1970 chhovah khan khatih laia India prime minister, Indira Gandhi khan kalmuang deuh turin a ngen thin. Indira hian Assam hruaitute chu Darjeeling leh a chhehvela West Bengal sorkarin Bengali chawilar a tumna leh Western UP- a Urdu chawilar tumna leh a nghawng vel zirchiang phawt turin a ngen a, mahse, Assam hruaitute chuan eng he hu-ah ngai lovin, chak tak leh huai takin an kal thawt thawt thung. Chu chu vawiin thlenga Assam buaina chhan (cause) lian pakhatah ngaih a ni ta nghe nghe.

Assamese an han chawilar chiah a, Assamese hmangtu leh Bengali hmangtute inkar a khi nghal. Bodo leh Karbi hovah a kangkai thuai bawk. Chuvang chuan a nia he thil hi kan mithiam ten zirchiang phawt se ka duh ni.

Engpawhnise, kan thu khel lai hi hetiang hi a ni deuh duah a, tum khata han sawi mai sen pawh a ni lo. A lerah thuaiin, "Bodo ho mah an luh theih chuan" kan lo ti leh ngawt thin a nih chuan "Tlai luat te hian pawina a nei" tih hla te kha "Chak luat te hian pawina a nei" tia kan sak a tul palh ang tih te ka lo hlau ve mai mai thin zu nia. Assam-a thleng ang hi kan ramah thleng ve ta se, keini Assamese-ho ang hi ni ta ila, Chakma-ho hi Bodo-ho ang ni ta se, ti te'n a ngaihtuah theihin ka hria a, inthlahrung leh insit tak chung hian, zirchiang phawt ang u, tiin ka lo sawi ve keuh keuh thin.

A duhtute auhla hi a ngaihnawmin a bengvarthlak hle a, an han sawi tak tak phei chuan 8th Schedule-ah Mizo tawng telh a nih thuai loh chuan kan tawng hi a ral mai dawn emaw tih theih hialna khawp a ni. Mahse, 8th Schedule hi Mizo tawng humhalh nana siam a ni si lo. India Constitution hi Mizo tawng humhalh nana pawimawh hmasa ber a ni lo. A neitute hi kan pawimawh zawk. Tih tak takah chuan "Mizo Tawng" tih thuah pawh hian kan la lungrual chiah hlei nem. Jerusalem hovin "Mizo Tawng" kan tih hi Mizo thenkhat chuan min pawm pui lova, chutiang bawkin mi thenkhat ten "Mizo Tawng" an tih hi Jerusalem hovin kan pawmpui lo bawk. Hei hi thil mak a ni hran lo, mi hnam pawhin hetiang hi an lo tawk ve tawh thin. Thil chiang erawh chu - Zo hnam hrang hrangte tawng atangin Duhlian tawng kan tih mai hi a survive mek tih hi a ni.

Chung te chu nghak phawt ila kan tlai chhe dawn tihna em ni? A nih leh kan tawng hi, zan ang deuh hian a ral lek tawh tawh a, chu chu 8th Schedule hmang chauhva chhan theih a ni tihna a ni em? Chutiang te a nih chuan 8th Schedule-a kan tawng telh ka duh rih lohna chhan zawng zawng hi ka ngaihtuah tha leh ang. Keia duh leh duh loh hian kori tu lul lo mah se, tun dinhmunah na na na hi chuan ka tanhmunah ka la lungawi e.