Vai Tarmit

B.Lalhriattira

Tin, ngai teh, chu mi ram vekah chuan tlang pakhat, sang bik lurh mai hi a awm roh a. Chu tlang chhipah chuan mi hi an lo phu mur mur a. Keia hawkdak pheng pawh chu ka lo han kal ve pek a. Mipui phu mur mur zingah chuan ka phu ve ta mur mur a. Chung mipui zi nuaih nuaih chu ka han bel chiang a, tarmit hi an lo vuah vek mai a. An tarmit vuah lah chu a in ang lo em em mai leh nghal a. Kei  chiah chu tarmit vuah lo awmchhun ka ni. Tarmit ka vuah ve loh avang chuan ka danglam bik hle ni tur a ni, mi reng reng chuan min en hu hu zel mai a. Nakinah chuan vai putar pakhat, hrenpereng kaih, diar hlui tawh tak khim, tawnzau bahna infual hleih ha leh tarmit hring da deuh dildel vuah hi a lo kal a, a vuah  lai ang chiah tarmit pakhat hi a la rawn hum \ut bawk a. Ka bul a lo thlen chuan “Mizo i ni maw?” min han ti a. Kei chuan “Ni e, nang chu vai i ni maw” ka lo ti ve thung a, ani pawh chuan “Ni e” a ti ve mai a. “Engvanginnge tar mit i vuah ve loh” min han ti leh a, kei chuan awlsam deuhin, “Nei hek lo i” ka lo ti liam puat a. Chu vai putar chuan, “Kha hei hi vuah rawh” tih pah chuan a tarmit ken lai chu min pe ta a. Kei lah chuan i he lovin ka la a, ka vuah ve ta mai a.

Chu tarmit ka han vuah chuan ka thil hmuh dan zawng zawng chu a lo danglam ta vek  a, mak ka tikher mai! Ka thil thlir reng reng chu a vai zo ta a, vai diktak hi ka ni ta berin ka hria. Ka rilru thleng chuan a vai vek tawh. Chu tarmit vuah chung chuan mipui zing atangin ka inthiarfihlim a, hmun thlengthaw nuam deuh mai pakhatah hian ka thu a. Ka hnuai lam ka han thlir chuan Khawpui pakhat hi ka hmu a. Hrilh ngai lovin Mizote chenna a ni tih ka hre thei. Chu khawpuia Mizo chezia chu vai tarmit vuahchung chuan ka thlir ta veng veng a. Hmuhnawm tak a ni, hmuhnawm tak.

In pakhat ah hian mi hi an tlan khawm sup sup a, chu tah In chhung a\ang chuan eng eng emaw hi an rawn zawn chhuak zut zut a, In chhung lamah chuan an ri bur bur bawk a. A \henin tuboh an zawng a, a \henin thirtiang kawm an lo pu vu vu bawk. eng tak chu ti dawn maw? tiin ka thlir reng a, hmuhnawm ka tiphian mai.

Mi thenkhat chu kawtah pandal zar tum hian an lo buai em em a. Khawi khawi a mi emaw Silpoline an rawn pu khawm a, rem leh rem lovin kopangahte chuan an lawn awr awr a. A \hen zar sa chu a \henin an lo \hiat leh a, hmun dangah zar an lo tum a, a ngaiah bawk chuan an zar leh a. Chu tih laiin mi tamtak chu pandal zartute zinga tel ve chuang lem lo, an mahni pui ni bawk si lo, hnathawktute tana hnawk hmel deuh deuh chuan an lo ding khawm a, an lo kawk kual bawk a. Tute mah chu an insawisel hran lo va, mahni buai buai chuan an lo buai vek a.

Chu tih lai chuan nichina tarmit min petu vai putar kha tlangnel zetin kabulah a rawn thu a, kei pawh chuan \hian \ha kawmin ka lo kawm ve bawrh bawrh a. Kan pahnih chuan ka thil thlir lai chu kan thlir dun ta zel a. Tlangval rualin Hall a mi thutthleng an rawn pu zut zut a, Inchhungah chuan an rem zel a, inchhunga leng bak pawh chu kawt zawl leh a rem lai laiah chuan an dah zel a. vai putar chuan, “Engnge an tih dawn? An puja dawn em ni?” a ti a. Kei lah chuan hre bik hek lo i, nih pawh a ni mahna, ti ngawtin ka chhang a.

Tlangval rual khat chuan Harpui tur an buatsaih laih laih a, Chu tih laiin Flag ringawt lo buaipui tawk leh Signboard lo khai kual tawk an awm, an tar sawn a,  an lo phunsawn chhen a. Dekchi lian pui pui an chhuang a, mei an lo tuah khu vut vut a, ka rilru chuan ‘an puja dawn emaw ni tak le’ ka ti rilru ve deuh a. Mahse, mak chu ka la tideuh tho, Puja turte chu inbuatsaih lawk ve deuh awm, an tlan khawm chuk chuk a, an ri pawp pawp a! Eng pawh ni se thil tih chu an awlsam phian ni tur a ni. 

Mi pawh an tam tial tial a, Khawlaiahte chuan an thu \hup a, a \hen an nui hawk hawk a, \henkhat hlim deuhin an ti ti laih laih bawk, a nawm hmel hle. Khuangte pawh an rawn la ta!Mahse, In chhung lam atang chuan \ap thawm a awm tlat! A \hen an nui, a \hen an \ap, engnge a awmzia ni ta ngai? Nuih chuan nuih vek awm? \ah chuan \ah vek awm. Puja an ni hauh lo mai. In chhungah chuan khuang pahnih an vuak rawn a, an zai a, an lam lawp lawp bawk. Zai lah an zai tui, an hmel han en khuan nuam an ti tih hai rual a ni lo. Ka bula vai putar hnenah chuan Puja tur chu an ang ber a nih khu” ka han ti a, ani pawh chuan pawm hmel takin a bu nghut nghut a.

Mi reng reng chuan tel ve lo bik nih an hlau em em mai a, an hna \ul tak tak chu tlansanin  chu In chu an pan hlawk hlawk a, a awm viau e, a tel ve lo chu lenlai chan tih mai awm a ni, a nawm hmel em mai. A khat tawkin thingpui an sem a, zai kar lakah thusawi an awm reng bawk.  A tlangpuiin an mipate hian an hmeichhiate hi an ngam lo a niang, tuna an thil tih khawmah pawh hian hmeichhe lamin thusawi an tum a, mipa lamin ngaihthlak. 

A rawn kal tlai deuhho chuan pangpar an rawn keng fur mai. Pangpar ti ila, pangpar lem a ni zawk ang chu. Ka bula vaipa chuan “An kharbari pangpar \hi an awrhtir dawn a niang” a han ti a, kei chuan, “Ngawi teh, an pangpar ken khu awrh chi pawh a ni lo, a kual satliah mai mai a ni. A tam zawk phei khu chu lehkha khawnga bel, saranga tuam an ni, awrh chi pawh a ni lo” ka han ti a. |hen khat chuan eng emaw thil fun hi an rawn hum \at \at a, an present pek tur a nih ka ring ringawt a, engnge a nih chu ka hre chuan lo.

Zan lamah pawh an chhunzawm zel dawn a ni maw? chhang pawh an la la ta deuh deuh. Kan awmna lai hi sawn ila, in chhung hmuh chian theihna lai tur zawng teh ang ka ti a, kan piah deuhah chuan kan insawn a. In chhung kan han hmuh chuan kan phu chiang dun kher mai. Kei chuan “Mitthi an sun a nih khu” ka han ti chiam a. Vaipa chuan, “An sun loh khu, an lawm a nih zawk khu, khu titaka  an lawm chuan chhan a awm ngei ang. Tuna mitthi khu a dam laiin a sual hle a ni phawt ang” a han ti a. Kei chuan, “Eng vangin maw” ka han ti a. Ani chuan, “A thih avanga khu ti taka an lawm a nih chuan a dam laiin a fel lo tawp ang. Fel chu nise khutiangin an hlim mup mup lo vang” a ti a. Kei pawh chuan nih hmel viauin ka hria a. Pangpar lem an khai luh zut zut lah kha, mitthi thlahna tur lo ni lekin. Pangpar lema an thlah danah an mitthi chu a fel vak lo a nihte kan ring leh zual a.  An present tur emaw katih lah kha,  a petute pawhin an sin duh loh ni awm tak puan a lo ni a, mitthi bulah an vawm vum hnuk mai a, mitthiin eng atan tak hmang ang maw?

Mitthi a ni tih kan han hriat chian hnu chuan thlanmual lam ka han thlir a, thlanmualah chuan tlangval rual an pung khawm a, thlan sawmhnih dawn lai laih a ngai ta emaw tih mai tur khawpin an tam a. Hlim takin an ri dur dur a. A laitu tur bika ruat ni maw, mi tlem te chu an in luh chhawk chhen a, mi dang chu khawi khawiah emaw \huthmun an lo rem a, thlan laitute chu an lo chhaih a, an lo in vawm bawk a, a laitute pawh an hlim, a lai ve lo turho a niang, chungte pawh chu an hlim, an vaiin an hlim em em vek.

A vuinaah lah chuan a pawimawh ber ni awm takin tel loh hlauvin an phu sup sup a. Mahni hna tul leh pawimawh tak tak an tlansan dawr dawr a. A hmun an va thlen chuan an pawimawh hmel ang teh lua chuan an lo pawimawh hran lo va, khawi lai kawm kilah emawte an va tawm vel mai mai a. An ti ti han ngaihthlak chuan an mitthi vui ber pawh chu an lo hre lo leh nghal a! Ngaipawimawh em em a Office chhuahsantute lah kha mitthi chhungte tu ber emaw nen an lo inhmelhriat satliah mai maite a lo ni leh lek a. Mitthi chanchin sawitute lahchuan an sawi thiam hlawm hle a. A thia chhungte pawh an ka hau hlawm mai!

Ka bula vaipa chuan eng eng emaw hi min zawt chhen a, ka hre bik si lo. “Mizo danah chuan mitthi awm chu lawmawm lutuk maw?” min han ti a. Kei lah chuan ka ning ve deuh tawh bawk nen, Engmah ka hre lo” ka han ti chiam a. Vai putar chuan mak tih hmel zeta min en chungin “Mizo i ni lawm ni?” min han ti hu a,  Kei chuan, “Nih chu ni e, mahse, vai tarmit ka vuah hi” tih pah chuan ka tarmit vuah lai chu ka thlawn a, ka paih ta daih a.