Ka zalenna

James Dokhuma

“Eternal Spirits of the Chainless Mind,

Liberty thou art brightest in dungeon”

Vanduainate hi vanduaitu leh vanneite tivanneitu chuan, he khawvel mihring chhiar sen loh zingah hian kei tak ngial pawh hi sal lovin min lo hre ve tho mai le. March ni 14 1968 Ningani kawl lo eng chu ka damlai nia ka kalkawng bumboh lai ber hun tur ka zawh tanna ni a ni ang tih hre lawk hauh lovin, ka nitin nun dan pangngai tluang lam zawh a, thlamuang taka ka awm lai chuan, hnung lama sabarh ang mai in rambuai hri chhe ber ‘ambush’ chuan min rawn barakhaih ta thut a, mitkhapkar lovah ka thisen luipuiah chuan ka tlu ta nghal a, silai mu hnunhnung chu ka eng laiah nge ka dawn leh dawn tia kaptute silai kaw herh ka en reng lai chuan a mu hnihna chuan ka ban dinglamah a rawn vawm leh ta a. Ka han en chuan var huam leh duk pui puia thi dir tluah tluah ka hmu hman, chutah ka nunna zawng zawng chuan Van Pathian ka au ta vawn vawn a.

Silai ri hluah hluah kar ah chuan ka dam chhung nite ka hmang zo dawn a ni ang tih inring chungin ka naupan laia ka nu leh pa kapkara ka awm laia pangchang taka ka thil duh zawng pawh ka han duh lo der ngawhngau ka chhuah hun laite nen lam chuan chhiar chhuak dapin, ka hun mual liam tawh zawgn zawng chu a kip a kawiin ka suangtuah a,darthlalangah chuan fiah kuk mai hian a rawn in ziak chhuak uai uai a. Chutah silai mu thumna chuan min rawn phin leng lawp mai a, ka thinhnunah mu hnih a lut thiang a ni ang tih hre hauh lo mah ila, chu ka thil tuar avang chuan ka dam chhung nite chu thlanah ka pel tawh ang a, ka thlarau chuan ka taksa piah lam, ka fan ngai hauh lo ram chu ka pen tan ta niin ka inhria a,mahse rilru harh fimtak chung chuan chu ka hliampui chu rampalailengah, chhung leh khat, then leh rualte bawihsawm leh enkawl hlawh lovin ni hnih leh zan hnih tlawng mai chu ka tluk hmunah chuan ka thisen chu ka bawhchilh ta a. Chutih lai chuan he khawvelah hian beiseina te, ropuina te, hausakna te chuan awmzia neih a hneh in NUN ringawt pawh beiseina piah lamah pawh awma mawi a ni tawh lo.

Tichuan,chhuan kua lai chaw ka nghei hnuin March ni 17 1968 chawlhni chuan Helikopter atangin ka tumchhuak ta a. Pawnah chuan hmuaktu huaisar tak tak, thihna tur(poison) tha ber aia chak zawk hlir kengtu engemaw zah chuan hmangaihna mitmei leh ngaihnobeina hmel nei miah lovin min lo hmuak thuap mai a. Tichuan, engemaw hun chhung atana ka khawvel hman rihna lam tur panin min chhawm ta a ni. Chutah ka chunga thil inmung chu a hma pawh a ka hai hauh loh, zawhna leh thlemna, vauna leh tihduhdahna hrui hrual, tha taka inthawn bo daihnate nen chaun ka inchhawp reng tih chu hai rual a ni lo.

Kei beiseina bo tawh mihring chuan dam aia thih ka thlan hliah hliah tawh zawk avangin, ka damlai kalkawng chu ka ngaih dana rinawm taka tuar zel zawk chu ka tum ta  ani. Tin, tumah ka chungah hian THIHNA aia rorelna sang nei thei he khawvelah hian an awm lo tih ka hre chiang si a. Chu ber nen lah chuan thian kan inchibai tawh si a. Tichuan, chung zawng zawng chu a indawtin ka rahbi chho ta zel a ni. Chu mi ni la la chuan pindan thim fit riat vela inbial tura zauvah chuan mahni chauhva khawsa turin min thlah fal ta rih a ni. An thu min zawhnate chu ka tana chhan thiam loh chi te an nih hlawm avangin an lak ah duatna mak(mark) ka hmu pha ta lo deuh nge ni chaw min nghei zui leh ta a. Chhuan sawm leh pariat ka nghei hnu pawh chuan riltamnate chuan ka lah thuneihna a la chang phak rih lo.

Ni 4 ni 5 lai chu khawharna pindana mahni maia hliam pui ka sepui ruah tuar lai chuan a hmaa ka taksa hliam min bawisawmtu ka hmuh chhunte chu tawih lung hringtu thopui mai ang an nih hlawm avangin, chungte chuan an chi thlahna nan ka hliam chu remchangah hmangin an tan ruaipui mai ka lo ni ta a. Lung sawi hleihtheih loh chuan a chhun a zanin min chamchilh ta mup mup mai bawk a ni. 

Mahse, heng thil ka tuar chhung zawng zawng hian he ka taksa hi ka ngaihtuahna te chuan thlawh bosanin, rilru zalenna khawfing chat engah,thinlunga suangtuahna chauhva inbawk khawmin,leilung hlimnate leh van lawmnate nen kar tuak tawnin nawmsip a bawl ve tlat tho mai le. Lungngaihna puk thim chu ka hring lam taksa tan riahbuk mah ni se, ka ngaihtuahna erawh chu tuma dipdal loh leh tukhaw tihduhdah phak rual lohvin a duh duh a kawm lawr a, a duh leh Pulpit tlangah Gospel sermon a sawi a, achang leh Political platform atangin a duhzawng a sep rawtui thul nen, chhun khaw eng lah chuan zah pahna min siam sak chuang lo va, zan khaw thimlah chuan eng min hliah chuang azeng a ni bawk hek lo.

Ka taksa chu retheihna pu chhiaah dahin a awm ngei tak e, thihna kawngka pawh an hawng huai mai; mahse chuta luh zawng ka zalenna piah lama thuneitu thupek chauh lo chuan luh thian a ni lo. Mahse,chumi ka thlen hma na na na chuan chiartu, nang leh kei a chanvo hi a lem chuang lo ve. Ka rilru chu a huatthla ber ni mah se, a chu a ber chuan tu tihduhdahna mah a tem si lo. A ni tak e,he zalenna rilru chunga van Pathian min pek hi kei zawng ropui ka ti. Chu tuarna chu ka tan chuan zalenna min zirtirna sikul alo ni a, lawmna chi(seed) hi hrehawmna lei chhiaah a tla tiak thin a, vanneihna pawh chu vanduaina hawrawpin a lo ziak chhuakin vanneihna pawh chuan chu vanduaina chu a lo tlangaupui bawk thin a ni.

Chekah chekah, thih leh dam thial a, sal khat khata vanduaina lo kal lo thin, chatuan hmawr kotlang leilung chu, tu tan mai pawh hian hmun thlan nahawm loh ber mah ni se, tu tan pawh hian khawvel thlirna tlang leh leika sangpar ualau tha ber chu a ni ang lawi bawk si a ni. Zalenna hlutzia leh nunna ze tinrengte chu he tlang atang hian a thla an lo nem kai thin a lo ni e. He ka zalenna hi kut kawl karah a put chhuak a, kharkhipna puk thim a chhul phel a. Tan in lungphum chu a ngainepin thil pal(Iron bar) awng karah luang chhuakin khua a chuan si thin a ni.

( He article hi MZP chanchinbu november 1974 kuma chhuah a ni, hetih hun laia Editor chu Prof.Siamkima a ni)