YMA Kumpuan "Ram leh hnam humhalh"

J.H. Zoremthanga

Kum 1998 atanga kum 2002 thleng khan a zawnin “Ram leh Hnam Humhalh” hi kumpuan ah kan lo nei tawh a, kum 2003-ah khan “Intodelh” kumpuanah kan neih zawka, kum 2004 khan “Ram leh Hnam Humhalh” bawk hi kumpuanah kan neih a, Kum 6 zet kumpuana kan neih hnuah kum 2012 YMA Kumpuan atan “Ram leh Hnam humhalh” chu YMA General Conference vawi 66-na chuan a lo puang leh ta a ni.

Ram leh Hnam Humhalh hi kan kumpuan neih tawh zawng zawng inchhun luhna leh khaikhawmtu ber pakhat a nih avangin kan mimal nun theuhte, chhungkuate, khawtlangte, thangthar lo la awm zel tur thleng pawh a nghawng nei a ni a, chuvangin fimkhur taka hmalak a ngai a ni.

Khawvel indona leh pawl leh pawl innawrna chungchanga Philosopher-te zawhna lar tak chu “A tawpna a that dawn phawt chuan hmanrua engpawh hmangin, eng kawng pawh zawh ila a pawi ang em?” tih hi a ni thin. Ram leh Hnam Humhalh kum kan puanah hian he zawhna pawimawh tak hi kan inzawh ve fo a tul a, Eng hmanrua nge kan hmang ang a, eng kawng nge kan zawh dawn?

Chinese Indo thiam hmingthang Sun Tsu chuan “A theih chuan tharum ni kher lovin finnain hmelma chu hneh tum tur a ni” a tih hi kan rilruah cham reng se. YMA chu tlawmngai pawl, zawldawh chunga vantlang rawngbawl tur a ni tih hi kan hriat nawn fo a tul bawk a ni.

A HUAM CHIN :

1. Pi leh pute atanga kan chenna ram hi thang leh tharte chenna tlaka humhim leh humhalh.
2. Mizo mipuite kawng hrang hranga chimral kan nih lohna tura humhim leh humhalh.
3. Kan hnam zemawi leh thate humhim a, venghim zel tura hmalak.
4. Hnam zahawm kan nih theihna tura ei leh bara intodelh, mahni puala eizawnna ngelnghet nei tur leh kut themthiamna lama kan intodelh theih nana zirna kawng hrang hrang uar chhunzawm zel.
5. Kan ram rohlu - Ramngaw, Thing leh mau, Nungchate, lui tuite, boruakte leh leihnuai hausakna humhalh.
6. Mizo hnahthlak hnam hrang hrangte inpumkhatna tura hmalak leh chibing inlakhranna do tlat.
7. Kan hnam eichhe mektu zu leh ruihhhlo chi hrang hrang do chhunzawm zel.

RAM LEH HNAM KAN TIH FO HI ENGE NI :-

“Ram” kan tih hian lei phek emaw, ramruak satliah mai a kawk lo. Kan luah chin emaw, kan thlahtute luah chin leh hniakhnu kal san emaw, awm tawh lo emaw leh la awm reng hmun leh hma ani deuh ber. Thenkhatin “ram” kan sawi phei hi chu suangtuahna a kan ram dinhmun chauh niin a lang. Ram leh Hnam kan sawi hian Political Boundary leh Cultural Boundary kan hriat hran fo a tul a. Cultural Boundary chhungah chuan tun hmaa Mizo hnam hrang hrangte lo chen tawhna leh la chen mekna Burma, Bangladesh, Manipur, Tripura leh Mizoram te hi a awm thei vek a ni. Heng Cultural Boundary chhunga cheng Mizote leh khawvel hmun dang danga Mizo awmte hi “hnam” kan tihte chu a ni mai a.

Political Boundary hi kan ngaihdan a inang lo thei hle bawk awm e. Mizote lo luah tawh chin ram zawng zawng - Burma, Bangladesh, Manipur, Tripura leh Assam ram thenkhatte hi Greater Mizoram kan tih thinah hian Political Party te leh NGO pawl engmawzatin an telh a. Ram leh Hnam kan tih hian pipute atanga Mizote lo chen thinna ram zawng zawng leh a chhunga cheng hnam hrang hrangte hi a huam thei awm e. Engpawhnise, khawvel pumpuia Mizo hnam hrang hrang ten kan puala ram kan neih chhun “Mizoram” hi kan Ram tia kan sawi tur chu a ni.

RAM LEH HNAM DINCHHUAH DAN :

Mithiam ten an sawi danin ram leh hnam dinchhuah dan leh Identity rawn insiam dan kalhmang hi chihnih a awm a. Chi leh hnam denchhena hnam Identity siam chu chi leh hnam ruangam (Ethnic Model) emaw khawchhak ho ruangam (Oriental Model) an ti a. Ruangam dang leh chu khawthlangho ruangam (Western Model) emaw vantlang ruangam (Civil Model) an ti ve thung.

Ethnic Model hi Europe chhuah lam (East Europe) leh Asia ram state hrang hrang intel khawm dan tlangpui a ni a, chumi model hmanga ram leh hnam din chuah nana bawlhhlo pawimawh zual paruk “National Identity” tih lehkhabu ziaktu Anthony D. Smith thlan khawmte chu :-

1. A huhova inkohna tur hming tlanglawn neih (A collection proper name)
2. Hnam tobul thawnthu intawm tur neih (A myth of common ancestry)
3. Sulhnu hlui intawm tur neih (Shared of historical memories)
4. Culture/Nunphung inzawl (one or more defferentiating element of common culture)
5. Inthlunna tur pipu atanga rochun ram bik neih (An association with a specific homeland)
6. A tlangpuia inlungrualna rilru put tlan (A sense of solidarity for significant sectors of the population)

Hengte hi ram leh hnam lian zawk dinchhuahna atana hmaraw pawimawh ni mahse, Zofate tan pawh a pawimawh em em a ni. Chhinlung, Khampat Bungpui, Run lui, Rihdil, Thlanrawkpa Khuangchawi thawnthute, kan serh leh sang hman dante, kan rin leh sakhaw biak dante, kan milar Chhura leh Nahaia te, kan thlang tlak hnua kan mi chhuanvawrte leh chanchin dang dangte chu hnama kan dinchhuahna tura kan rahchhan, min phuarkhawmtu leh hnam Identity min petu an ni a, an pawimawh em em vek a ni.

KAN HUMHALH TUR RAM LEH HNAM CHU :

1. Mizo History ziak tam ber hi chu tunhma kum zabi 18-na hunlai a “Philosophy of History” te ang deuh a Conjectural History (Ni awm ang taka lang, a nihna erawh finfiah theih ni si lo) nena inchawhpawlh a ni deuh ber mai. Kum 1700 velah Mizoramah hian Mizote kan lut thla nia hriat a ni. Chutih laia Mizote luah thin ram sawi nan ‘Chin-Lushei- Country’ tihte leh ‘Chin-Kuki Country’ tihte an hmang bawk. Tin, a mi chengte pawh koh dan hrang hrang ‘Chin, Kuki, Lushai’ tia sawi kan ni thin Khatih hun lai khan khawtinin Lal hran neiin an in awp dan pawh ‘City State’ an tih hi a ni.

2. Hetianga mahnia ro inrel a, tu thuhnuaiah mah kun lo leh awmbeh ni lova zalen taka kan awm lai hian kum 1890 ah Mizoram chu Sap hovin min awp bet ve ta a ni. Mizoram chu hun tharah a lo lut ta.

3. Mizote chuan kan ram kan pi leh pute chenna kan lo neih tawh chu kan hloh ta. Sapho chuan min chhuh sak a, kum tam tak min awp a. Hei hi khawvel kalhmang a ni a, hmanlaiin hetiang hi a thleng thin a, tunah pawh a lo thleng mek zel a ni. A tam zawk leh chak zawkin tlem zawkte an awpin an chimral thin’ tih hi a ni. Hei hi Mizote chungah pawh a lo thleng dik chiah a ni.

4. Sapho ziak loh ‘DAN’ hmanga kan ram min hnehchhuh chu “ZIAK DAN” hmang thlap in min pekir leh ta a. Hongkong pawh “DAN” hmanga China hnena Sap hovin kum 1997 a an pekir leh ang khan. Chung Dan min siam sakte chu :-

1) The Bengal Eastern Frontier Regulation I of 1973. He “Dan” hian inhung bikna atan ramri min siam sak a, kum 1930 Sept 3-ah he Dan hi Mizoramah hman tan a ni. 

2) The Chin Hills Regulation 1896 (Regulation V of 1896). He Dan hi Mizoramah kum 1897, June 1-ah hman tan a ni.

3) Govt. of India Act, 1919. He Dan hian Chin Hills Regulation hi Mizoramah a ti nung zel.

4) The Govt. of India Act 1935. He Dan hian Simon Commission (1927) rawtna angin Mizoram chu “Excluded Area” ah a dah a ni.

Heng Dan tha takte hi Sap hovin min siam sak avangin Mizoram chu tu thuhnuaiah mah a awm lova, Mizote kutah pek let a ni ta bawk a ni.

Kum 1947-a India in zalenna a neih khan Mizoram pawh India ram-ah betin hetiang hian kan ram dinhmun a lo danglam chho ta a ni.

1) India Independent Act 1947 khan “Mizoram chu VIth Scheduled-ah” a dah a.

2) North Eastern Areas (Reorganisation) Act 1971 chuan Union Territory-ah a hlangkai a.

3) State of Mizoram Act 1986 chuan State puitlingah Mizoram chu a dah leh ta a ni.

RAM LEH HNAM HUMHALH A TULNA CHHANTE :-

Pawn lam atanga beihna :-

1. Ram leh Hnam Humhalh kan duhna chhan ber chu Mizote hnam anga kan dinchhuahna tur leh chimral kan nih lohna tura theihpatawpa beih a ni. Inchimralna (asimilation) hrang hrang zingah politics-a inchimralna (Political assimilation) hi hnam thlemte tan chuan a hlauhawm ber hial awm e.

Kum 2011 India ram chhiarpuiah khan India rama mihring awm zawng zawng chu 1,21,01,93,422 lai kan ni a. Khawvel mihring awm zawng zawng hmun ruka thena hmun khat zet chu India rama cheng mihringte hi kan ni. Kum 2025-ah phei chuan China ram aiin India ramah mihring kan tam zawk dawn niin mithiamte chuan an chhut a. Mizoram bikah chuan kum 2011 chhiarpuiah mihring 10,91,014 kan tling awrh a, Mizo hlang chauh kan ni lo leh nghal. Ramdangmi leh hnamdangmi tam tak an tel a ni. NE States hrang hrang zingah pawh Mizoram hi mihring tlemna ber pawl kan ni a, chuvangin kumpuan kaihhruaina ah pawh khan “Awmze neia pun dan” ngaihtuah nise kan ti a nih kha.

Kan chawm zawh dawn phawt chuan a tam thei ang ber fa neih theuh nise tih hi kan inzirtirna pakhat chu a ni. Kan ram chhungah hian ramdangmi leh hnamdangmi 150000-200000 vel awm reng anga chhut a ni a. Heng ho nikhat hlawh ringawt pawh hi tam tham tak a ni ngei ang. Aizawl district bika kum 2011-2012 (Feb 24 thleng) a ILP pekchhuah zat chu 7805 a ni a. Heng ho nikhat hlawh ringawt pawh hi Rs. 15,61,000/- vel zet a ni dawn a ni. India ram hmun dangah chuan Sq. Km a-ah mihring 382 awm anga chhut a ni a, Mizoramah chuan 52 vel awm anga chhut a ni thung (Census 2011), kan la tlemzia leh chimral awlsam te kan ni tih kan hre thei mai awm e.

Democracy ramah chuan “Number” game a pawimawh ber a, a tam tamin rorelna an chang mai thin. Mizoramah hian a ram mi nilo “Floating Population” hi mi 150000-200000 vel zet awm anga chhut an ni a, kan chhehvel ram atanga lo lutte hi an pungchak em em lehnghal a. Kum 2011 Census-a Mizoram pumpui punna 22.78% vel a nih laiin Bangladesh atanga lo kal Chakmate chu kum 1901-ah 198 an ni a, kum 1911-ah 302, 1921-ah 680, kum 1931-ah 836, kum 1941-ah 5088 (508%), 1951-ah 15,297 (200.64%), kum 1961-ah 19,337 (26%) 1981-ah 39,905 (78.20%), kum 1991 54,194 (35%), kum 2001 ah 83,000 lai an tling tawh a ni.

Tuikuk ho hi kum 1961-ah 1000 vel chauh an awm a, kum 1971-ah 9828, tunah chuan anmahni insawi danin 85,000 lai an tling tawh a, keini chuan 30000 vel ni turah kan ngai. Burma lam atanga lo chhukte hian 80000-100000 vel zet an in chhal bawk. Dan lova bawk/khua din 40 vel zet a awm bawk. Kan thenawm State, Manipur, Assam, Tripura atanga lo kal (a bik takin Vai kan tih ho) ringawt pawh hi tam tham tak an ni bawk. Aizawl District-a kum 2011-2012 chhunga ILP pekchhuah zat pawh 7805 lai a tling a ni.

Heng mite hian sumdawnna chi hrang hrang leh ei leh bara inchimralna (Economic Assimilation) Culture-a inchimralna (Cultural Assimilation) leh Politics-a inchimralna (Political Assimilation) min thlen mek a ni. Aizawl khawpui chung bika Mizo hming hawha Vai sumdawng ringawt pawh 262 lai an tling tawh a nih kha. Kan chhehvel state, Manipur, Meghalaya, Assam, Tripura, Nagaland, Arunachal Pradesh-ah te chuan sumdawnna 80-90% hi a ram mi nilo (hnamdang) kutah a tlulut tawh a ni.

CHHUNGLAMA KAN HMELMATE :-

1. Chibing leh hnambing:-

Zofate hi kan la tlem tehlul nen, a in lahrang zawng leh inthendarh zawngin kan khawsa chho ve zel a bawk a.  Mizoram chhungah ngei pawh Minority Co-ordination Committee 1998 MLA Election dawn khan din a ni a, MLA engemawzat neih an tum a ni. Chibing MLA neih hi YMA chuan tha a ti lova, hnam inpumkhatna tichhe thei a nih avangin Central YMA a kan hruaitute chuan chibing party thawhpui lo turin Political Party tinte a ngen thin a. He kan ngenna avang hian chibing MLA kan nei ngai ta meuh lo.

Kumin Village Council inthlannaah khaw 15 lai inthlang thei lova an awm hi a pawi takzet a, a inthendarh zawng ni lova, a inpumkhat zawnga ke pen zel turin tan i la thar ang u. Chibing leh hnambing chungchangah hian kal nat lutuk a pawi thei, zohnahthlak thenkhat an mahni hnam tawnga an tawng “Mizo i ni na nge?” tih mai chingte kan awm. Eng hnam mah rilru na lova kan siam thiam hi a pawimawh a, Mizote hian nu leh pa chan kan chan thiam a pawimawh tak zet a ni.

2. Zu leh ruihhlo:

Zu leh ruihhlo hi ram leh hnam tlukchhiatna, mimal leh chhungkaw zahawmna tichhetu leh titlarantu, khawtlang nun tikhawlova, tiriraltu leh thihna thlentu a ni. Chuvangin kan hman tluchhe tur veng tur hian kan do zel a ngai a ni. Ruihhlo leh Zu avang hian kan thalai rualte an thi nasa tawh hle a, kum 2005 atanga ruihhhlo beihpui kan thlak atang kha chuan ruihhlo avanga thi kan tlem ta hle a ni. Kum 2004-ah OD - 144 an awm a, 2005-ah - 35, 2006-ah - 21, 2007-ah 25, 2008-ah 9, 2009-ah 25, 2010-ah 13 leh 2011-ah 9. Central YMA hnuaia CADS-in kum 2010 atanga 2012 chhunga ruihhlo an man hlut zawng hi Rs. 2.8 Crore zel a tling tawh a ni. Central YMA CADS hmalakna chauh ring lovin, mahni Branch theuhvah theihtawp i chhuah thar leh ang u.

3. HIV/AIDS :

Mizote zingah HIV/AIDS natna a hluar ta hle mai.

MSACS Report (upto Dec 2011) in a tarlan danin :-

Thisen Test - 1,77,728

HIV + ve - 6,549

AIDS - 273

HIV Kaina Kum zat

Sex - 4255 14 hnuai lam 257

IDU - 1860 15-24 inkar 1592

Naupai- 241 25-34 inkar 2748

Others - 193 35-49 inkar 1748

50 chung lam 206

Kan hnam a boral loh nan theihtawp chhuah a, HIV/AIDS a darh zel loh nan tan lak thar a tul hle mai. Heng kan tarlan bakah hian kan hnam nun eichhe mektu hlemhletna (Corruption) kan do tlat a ngai a, naupangte leh hmeichhe chak lo zawkte an himna turin theihtawp kan chhuah thar a pawimawh hle bawk a ni. Ram leh Hnam humhalh tur chuan khawtlang nun tha kan neih a ngai tak zet a ni.

DAN KAN NEIHTE :

Mizoram hi Dan hmanna ram a ni a, Dan bih chiangin “Thu” a ching fel hmasa in hma kan la tur a ni. A pawr pawr leh a duh rum rum te hi Ram leh Hnam hmangaihtu an ni vek kher lo. Khua leh tui tha chuan DAN a zawm tha a, Dan kengkawh tute a tanpui bawk thin. Ramdangmi leh Hnam dang mite Dan lova lo lut te, Dan hmanga kan um let theihna tur leh an laka kan him theihna tur “DAN” tha tak tak kan neihte lo thlir ho ila.

I. BENGAL EASTERN FRONTIER REGULATION 1873 (Inner line Regulation)

ILP hi Kum 1873, India indan hma daiha Sap hovin kan inhumhimna atan min siamsak tawh a ni a, Bengal Eastern Frontier Regulation 1873 tia hriat thin hmanga siam a ni. Gazette of India ah chhuahin, Kum 1975 Oct. ni 11 khan tihpuitlin a ni a. He a bika humhimna huamchhung hi rinfel niin, chu chu Inner Line tih a ni a, hemi chhunga lut tur hian phalna a ngai a ni. Mizoram bik chauh tan hian Kum 1930 khan a huam chin ram ri fel zawk leh chiang zawk a siam a ni a, chu chu siamtha lehin Kum 1933 khan tun thleng a kan hman hi siam chhuah a ni. Chu chu Bengal Eastern Frontier Regulation 1973, Section 2-na hmanga siam niin, ni 9.3.1933 khan Notification No.2106 AP tia hraittirna chhuah a ni ta ni. He inhumhalhna Dan hi North East ah chuan Nagaland leh Arunachal Pradesh-ah te hman a ni ve a.

Mi tam takin National Integration atana hmalakna kawng daltu niin an ngai a, Nuai bo an duh a, mahse keini Mizo te Naga te, Arunachal Pradesh mite chuan tha kan tiin kan roh hle thung a ni. He Dan tha tak mai hi a hman tangkai dan tur ang takin kan hmang em tih chu enchian a, inbihchian a tul hle a ni. Tunah hian he Inner Line Regulation ILP (Inner Line Permit) kan tih mai hi mi tam ber chuan ‘Vai pass’ emaw kan ti a, mahse chuti mai a ni lo. A dan bung leh chang (Clause) han bihchiang ila, Sorkar hnathawk te leh Indigenous Inhabitant ‘Leilung fa, a chhunga chengte’ chauh pass tel lova lut thei an ni. Indigenous-a leilung fa ni mah ila, Inhabitant-a chhunga cheng kan nih loh chuan he Dan hian min phuar tel a ni. Chutiang bawkin inhabitant pawh indigenous a nih loh chuan Mizoram ah luh phalna a pe chuang lo.

Tunah hian Aizawl District bikah Kum 2011-2012 February thla ni sawmhnih thleng a ILP pek chhuah zat chu 7,805 a ni. He Dan tha tak Sap hoin min siam sak chhan hi kawng hrang hrang chhim ral kan nih lohna tur a ni a, chuvangin Dan tha tak kan nei hi i hmang tangkai ang.

II. INTERNATIONAL BORDER LAM VE THUNG

Mizoram hian chhak lamah leh chhim lam leh khawtlang lamah Foreigner kan thenawm chhuak vek a, 630 Km lai ramri ven tur kan nei a ni. Chuvangin, kan harsatna hi India State dangte aiin a danglam bik a. A bika kan inven a ngai. Khawchhak lama Foreigner thenawmte chu kan unaute an lo ni bawk vei nen, Sorkar dan ding laite hi kan hriat chian a pawimawh hle a ni.

Foreigner (Protected Areas) Order 1958 chuan Mizoram chu Protected Area a nih avangin Foreigner reng reng tlawh a khap a. Amaherawh chu he Dan hi thlah dulin, Circular No.154 dt.16.11.1992 hmangin Ministry of Home Affairs chuan Foreign Tourist 4 emaw, a aia tam emaw tan ni 10 chhung tlawhtir phalna Mizoram Sorkar hnenah a pe ta a. Hei hi tunah hman mek a ni. Ni 10 aia tam pek theihna Mizoram Sorkarin a nei lo a ni.

He Circular Para 4-ah hian Pakistan, Bangladesh leh Burman (Mynammar) mite chu Central Sorkar, Ministry of Home Affairs phalna lo chuan Permit theih an ni lo. Rule 4 of the Passport entry to India, rule 1950 Dan hnuaiah Mizoram Sorkar chuan Memorandum No F.22015/10/83 - HM(PP) dt.14.4.1988 hmangin India leh Burma (Myanmar) mite chu a hnuaia tarlan Entry & Exit points atangte hian ramri atanga Free-trade Zone 40 Km chin ve ve an inkal pawh theihna thupek a siam a. Aizawl District-ah chuan AO Mimbung, Kawlbem, Hnahlan, Zote, Ruantlang, ASI/SI-Melbuk, Phaizawl, AO- Vaphai, Farkawn, ASI/SIKhuangthing, Lunglei District-ah AO - Thingsai, Chhimtuipiah AO - Sangau, ASI/SI Lungbun, Zawngling, Ainak, Laki, Khengkhawng, Kakifery, Zokhawchhuah, AO- Parva te hian ni 7 chhung an pe thei a, loh theih loha a tulnaah ni 7 dang an pawtsei thei a ni. Para 4-na chuan engtikawng mahin ramri tuaka 40 Km bak a huam loh thu a sawi (He Dan hmang hian DC Champhai chuan Rihdil en phalna a pe thin) India Citizen ni lote chu Foreigner (Ramdangmi) an ni a, thisen zawm emaw, unau, hnathlak pawh nise khawvel Danin Internation Border piah Citizenship nei chu ‘Ramdangmi’ a ti mai. Sorkar ngaihdan angin YMA pawhin Ramdangmi chu Ramdangmi ‘Foreigner is a Foreigner’ kan ti mai a ni.

Tunah hian Mizoram chhungah hian Foreigner engzatnnge awm ang le? Sorkarin emaw, YMA,VC -in emaw record tuman an nei lo, anmahni an inhre chiang hek lo. Anmahni inchhal dan phei chuan sing riat lai an tling tawh a ni. Mi tam tak ngaihdan chuan Mikhualte hian Mizoram sumdawnna lian Bazar thil zawrhna hmunte an tam hneh mek a ni. Kan ramah ruihhlo leh suahsualnaa lo pung, Crime rate a lo sang ta zel a nih hi. Hetiang khawpa International Border zalen hi khawvel dangah awm ang maw!

ACT No 1 of 1964.

III. THE MIZO DISTRICT (Transfer of Land) Act 1963 (Hnamdang hnena ram hralh leh pek theih lohna Dan) Control of Transfer of Land - No Land in Mizoram shall be sold, mortgaged, leased, bartered, gifted or otherwise tranferred by a tribal to a non-tribal, or by a non-tribal to another non-tribal except with the previous permission of the Administration.

IV. Tribal in Non-Tribal nupui/pasala an neih pawlh chuan an chhungkua (family) leh an fate zawng zawng chu nontribal an lo ni tawh ang tiin hriattirna No.12025/6/90/SEC/ R.L.Cell Ministry of Welfare, Govt. of India chuan a ti chhuak a ni.

V. FINANCIAL INSTITUTION ten sum puk leh pek chhuah chungchang a Sawrkar Dan siamthar The Mizoram(Money lender & Accredited loan providers) Act leh The Mizoram protection of Interests of Depositor/

In Financial establishment) Act.

VI. Trading by Non-Tribal 1974

VII. Article 371(G)

KAN HMALAKNA TURTE

1. Electoral Roll & Election : Electoral Roll leh Election hi inkawp tlat a nih avangin 1995-a Intensive Revision of Electoral Roll kan neih bak kha chu Mizoramah Intensive Revision kan la nei leh lo. kumtin special Revision te, Summary Revision te kan nei thung.

Electoral Roll siam a nih hian YMA kan in rawlh ve thin a, mi tam takin kuang lo nawr mi ti thin a ni. Electoral Roll hi ram leh hnam humhalh nan a pawimawh em avangin YMA chuan kan kuang dik tak kan nawr a ni kan ti thung thin.

Electoral Roll dik pawimawh zia sawi nan “Ramdangmi leh Hnamdang mi pakhat, Electoral Roll-a thun a nih hian Mizo pakhat vawhlum zel ang kan ni” kan ti thin. Kum 1998 Election dawn atang khan Electoral oll siam chungchangah hian YMA kan inrawlh tan a, Kum 1998 MLA inthlan dawn Ramdang mi leh Hnamdangmi 75,000 zet paih an nih kha, vawiin thlengin Electoral Roll tha kan neih phah ta a ni.

YMA ten theihtawp kan chhuah a, a changin kan duh ang zanin a lo chhuak lova, kan beidawng lek lek thin. Beidawng mai tur kan ni lova, tun atang Kum 50-ah chuan Electoral Roll tha kan nei tawh ngei ang. Dik tak chuan YMA lo chu Electoral Roll dik nei tura thasen ngaia thawktu kan la awm lo a ni. He Zoram khawvel hi a boral loh nan theihtawp chhuah a Electoral Roll dik nei turin i bei sauh sauh ang u.

2. Village Census Record :- Hnamdang leh Ramdang mite kan chhinchhiah a, kan hriatchian ai maha pawimawh zawk chu keimahni ram leilung fate kan inhriatchian a, chhinchhiahna fel tak kan neih hi a ni. Kan khua/veng chhungacheng dik takte chhinchhiah a, village census register uluk taka vawnthat hi kan hmalakna zel tur a ni. Hei hi a tuldan a zirin kumtinin ennawn leh siamthat tur a ni a, hetiang record fel tak kan neih chuan kan harsatna leh buaina tam tak chu a kiang thei ngeiin a rinawm.

3. Thing leh mau nungcha humhalh :- Kan ram rohlu thing leh mau, nungchate, lui tuite, boruak leh kan ram leilung humhalh leh humhim zel hi kan kumpuan un a tum ber pakhat a ni. Khawvelin a buaipui, Zoram tan pawh a tul leh pawimawh em em, YMA Branch tin ten kan thawhthiam Nungcha leh Ramngaw humhalh leh humhim chungchang hi ngaih pawimawh a, tha thlah lova hmalak zui zel hi kan tih tur a ni.

Kan ram rohlu pakhat Mau “Green Gold” kan nei hi kan vannei hle, kan vat rem hleithei lova, kum thum lek chhunga puitling thei kan ram rohlu hi kan humhalh thiam a pawimawh hle. Mau tuaite hi khawrh lovin Kum 2/1 lek pawh han zuah ila kan ram ngawte hian a that phah ngawt ang. Ngaw kan thiah nasat avanga kan tuipui hnar lo kangchat zel te hi ngaihtuah chiang ang u. India rama ram ngaw nei thaber State kan nih hi duh tawk mai lovin tan ila sauh sauh ang u.

4. Zirna :- Ram leh hnam humhalh tha ber pakhat chu zirna kawng hrang hang uar chhunzawm zel hi a ni a. Kan rama sawrkar hna lian leh pawimawh zawng zawngte luah khat vek thei tura inbuatsaih hi kan tih makmawh a ni a, chuti a nih loh chuan loh theih lohin hnam dangin min awpin, an hnauaiah kan la kun ngei a ngai dawn a ni. Chumi pumpelh tur chuan thalaiten theihtawpa tan kan lak zel a tul takzet a ni.

Sawrkar hna mai bakah thiamna tak tak hmanga kan ram leilung enkawl te, lo neih dan hlawk zawk zir chhuah te, sumdawnna kawng hrang hranga hnamdang khum tura inzirtirte leh thiamna bik nei tura tanlak zel a pawimawh em em bawk.

5. Culture chungchang :- Culture han tih hian mi tam zawk chuan thil hlui leh hmanlai thil niin kan ngai thin. Culture hi hmanlai thil chauh ni lovin, hmasang atanga hnamze tha, mi tam zawkten an l a chhawm zel hi a ni. Kan pi leh pute kha an thatchhe ngai lova, mahni hma an sial lova, an intodelh bawk thin. Chuvangin kan hnam lam leh incheina te kan humhalh rual hian, hnamdangin min pawlh hmaa Mizo ze dik tak - Tlawmngaihna, hawihawmna, huaisenna, taimakna, chhelna, rinawmna, midangte hmakhaw ngaihna leh aia upa zahnate hi chhawm nung reng turin YMA member tinte hian mawh kan phur a, hei hi pawl ang mai ni lovin, mimal tinte hian kan hmalakbna theuh tur a ni.

6. Hnam inpumkhatna ;- Ram leh Hnam humhalh kumpuanna kan neih chhan ber pakhat chu Mizo hnam inpumkhatna hi kan zavai pawh hian kan la tam loh tehlul nen, a inla hrang zawng leh inthehdarh zawngin kan la khawsa chho ta zel niin a lang. Chuvangin Mizo hnahthlak hnam hrang hrang te zinga chibing leh inla hrang zawnga khawsa leh che te tireha tibo tur leh kan inpumkhatna atana hmalak hi kan tihtur pawimawh ber pakhat a ni.

7. Research & Documentation :- Kumpuan hmalakna atana tangkai thei, kan ram leh hnam tana pawimawh Document leh lehkhabu hrang hrangte haichhuaha vawnthat hi Kumpuan bawhzuina pawimawh tak a ni.

Dik lo taka kan hnam min puhchhiatna lo chhan let te, chumi chhanglet thei tura Document lo zawn khawm leh vawnthat te, danlo a Mizorama lo lut Ramdangmi leh Hnamdangmi lo chhinchhiah zel te hi kan tihtur pawimawh tak pakhat a ni.

Kan Mizo hnam hrang hrang, Mizo nihna hloh tawh chhuichhuah a, kohkir lehte hi Research & Documentationina tihtur pawimawh tak pakhat a ni.

8. Ram leh Hnam Humhalh nan - Intodelh :- Political Party zawng zawng ten Policy an neih chu “hnam damna” tih hi a ni a. Vairengteahte, Tlabungahte, Zokhawtharahte, Marpara-ahte hnamdang lo lut tur dan nan Gate te kan siam a, tan pawh kan la hle, Mahse, hei chauh hi ram leh hnam humhalhna a ni lo tih chu kan hrechiang theuh awm e. Kan ram leh hnam humhalhna tha ber pakhat chu keimahni kan intodelh hi a ni. Mithiam ten khawvel pum huapa an lo zir tawh naah ram reitheite chuan hengte hi an tlachham chawk an ti.

1) Taimakna (Industry)

2) Tih tak tak peihna (Sincerity)

3) Tumruhna (Determination)

4) Rinawmna (Honesty)

5) Hun ngaihpawimawhna (Time budgeting)

6) Thiam chianna (Excellency)

7) Thawhho theihna (Cooperation)

8) Tihdan hlui paih phalna (Readiness to discord the only system)

9) Hmalam thlir thiamna (Long sightedness) Hnam changkang leh intodelh hi hnam taima an lo ni zel.

Kan rama hnamdangmi awm, thenkhatin kan hmusit em em, thenkhatin thlarau lama kan vei em em Vai ho leh khawchhak lam mi ho hnen atang hian zir tur tam tak kan nei.Hnathawh hreh an nei lova, “ka zak” tih an nei ve lova, hna chi tinreng an thawk mai a. Hengho hian IRDP atangin tanpuina an beisei lova, NLUP tanpuina an la hek lo. CIS an beisei ve hek lo. Kan ram hi nasa takin min bei a, indona thianghlim an puang a, silai an hman loh avangin kan hrethiam si lo. An hmanrua, an ralthuam, an invena leh innghahna ber chu - Taimakna, dawhtheihna, chhelna, remhriatna leh inngaihtlawmna te a ni. Tawngka a anmahni vei ringawtin min chhanhim dawn lova, pawngpaw huat ngawt lahin min lehpelh tir dawn bawk hek lo. Kan bei let ve dawn a nih ngai chuan, an hmanrua ang bawk taimaknate, dawhtheihnate, chhelnate, remhriatnate, inngaihtlawmnate hi kan hman ve a ngai a ni.

Ram leh Hnam Humhalh duhtu dik tak chu a thatchhethiang lo, hnathawh hreh a nei tur a ni lo, eng hna pawh thawh bawrh bawrh mai tur a ni a, a rinawmin a rintlak bawk tur a ni.

A tawp berah chuan kan hmalakna theuhah hian hlawhtling ngei turin bei ila. Amaherawhchu hlawhtlinna tak tak erawh chu a man a tamin, a harsa a ni tih hriain, teirei peihna, taimakna leh rinawmna te hi hlawhtlinna nen a inzawm tlat a ni tih i hria ang u. Kan banphak maiah ram leh hnam humhalhna atan Dan tha tak tak kan nei a, hei hi hmang tangkai ila, keimah ni ram neitute hi kan pawimawh ber a ni tih i hre thar leh ang u.