Thuamtea Khawlhring
‘Chapona’ hrim hrim hi hrilhfiah ka tum dang lo. Khawvel hnam hrang hrang hi phak tawk ang zelin han thlir kual ila, a hnampui deuh nge nge hi chu an chapo tha duh lo ang reng khawp mai.
Hmanni lawkah, football-ah chuan an ngaihsan em em Champions’ League final-ah Zinadine Zidane-a naute chu a vawi hnih nan an champion a, vawi khat champion pawh a harsat tehlul nen, a kum zawna champion thei hmasaber an ni a. Nimahsela an Coach Zidane-a chu a chapo chuang hauh lo mai a, “Khawvela Coach thaber ka ni lo” a la ti fan!
Mizote hi duh aiin kan chapo hma thin emni aw tih hi in ngaihtuah ve fovin ka ring.
Mizo zingah pawh a mi tha deuh chhungkua leh a mi hlun chhungkua, nei nung deuh leh bakberh lo deuhte hi an chapo lo zawk fo mai. Engmah ni mang lo ho hi kan chapo zawk fo!
Ni e, engmah ni mang lo kha, eng tin tin emaw harsa ang reng takin mi kan rawn ang chho ve deuh a; ti ve thei deuh tawh, mi hriat hlawh ve deuh tawh, mi kuk ruala kak ve thei kan han nih chinah hian awmchintawk hi kan hre lo fo mai.
A nei fate’n eng sumdawnna emaw (private firm) an han din a, a dawrtute (customer) lo dawngsawng tur leh lo chiauau turin hlawh tlemte neiin min han ruai ve ngei a. Mamawha min rawn dawrtute, kan sum hnar tur berate chu kan han be tha duh lo ve ringawt zel a; kan han inchhuan khum ve ringawt zel mai a. “Min dawr lo mahse a pawi hleinem” tih mena meng chungin tin hnawihsen kan hnawih san a, khawlthluakneiah card kan rem dik san a!
Eng sumdawnna emawah cheng tlemtein bul kan han tan ve a, a tirah chuan kan hawihhawm em em mai, kan nghawng pawh fik se kan nui vur vur ang tih tur khawpin kan inphahhniam a. Kan han ti fuh chho tan a, kum li kum nga hnuah chuan dawr kawtah motor lian a ding ta fo a, vai pachal ip dum khai an rawn lut chhen tawh bawk a. Herhsawpa thu thin kha kilkhatah thutthleng vir theiah sikret hmawr eng nen kan han fu er van a, min dawrtute hmusitna chapter chu a rawn in tan leh ta chiah zel a!
Tunah chuan kan khua te a lo lian ve ta. Hmanah chuan feh kal tur hi kawn khatah kan liam za dul dul thin. Tunah chuan kawn khatah kan liam vek seng tawh lo. Ni khat thil thu-ah pawh hian, khaw khatah mai pawh hian tihpui lian hi hmun hnih hmun thumah a lo awm ve ta. Thang an thar a, keini aia thiam leh fel zawk an rawn chhuak zel. Thil tih engkima telve zel leh a tlar hmasaa thu thei zel nih tum ringawt kha a theih tawh loh.
Hmun khatah an lo inhnek a, hmun khatah ball an lo pet a, hmun khatah an lo inzaisiak a. Ka tel ve loh avanga mi thil huaihawt hnualsuat sak ringawt leh bengkhawn sak duh loh ringawt hi mi chapo zia bawk a ni. Miin thil tha an tiha hlawhtling taka eng thil emaw an lo huaihawt ve thinte hi kan lawmpui hliah hliah tur a ni zawk.
Event lian pui pui te hi kan ramah hian huaihawt ve ila, tuifinriat rala mite’n tualchaina tlak (international platform) atan min ngai ve se, chu chu hmasawnna pawimawh tak a ni. Miin a dan dik tak leh thianghlim taka eng eng emaw an lo hauihawt ve a nih chuan i lawmpui ang u. Miin thil tha lam an ngaihtuah avanga an theihna leh thiamna an pho chhuak ve te hi i inngaihhlutsak ang u.
Mahni kuta sa hrang chauh hmu lian lurh lurh, mi dang ‘dah nil’ tum ringawta phe vel ruai thinte hi tu dang ni lovin chapona laina hnai an ni duh. Hmasawn zel tura inel a tul hun chu a awm tehmeuh e, a chuti zawng pawh ni zeng si lova mi dang hmuhmawh riauna thlarau hi hnuailam atanga chhuak a ni ang. Chunglam atanga chhuak ni lovin!
Chapona, intihveina, mi dang chaw thleng ben buak duhna te hi rin ai hian kan va huangtautir ang reng em! ‘Ei zawng’ leh ‘ei loh zawng’ nei dum mai, mahni aia lar tur leh thiam zawk turte kawng dal ching leh hupbeh ching; milian leh milar tlawn huam mai, khawikipa tlar hmasaa thut tum ringawt; ropui tum, lar tum leh lansarh tum hi kan va tam ta lua em!
