Roa Fanai
Mizo te hi zirna kawngah a nawlpui a lak hian kan ti tak vang mang lo hian a hriat a. Kan theihna te a san ang leh degree nei kan tam ang hian kan degree phu tawka chhawr tlak leh hna tha thawk hi kan tlem deuh em?. A inhnial theih fe mai thei a. Inhnial teh chiamna tur a awm lo thei bawk.
Unemployment Problem lian tak kan hmachhawn a ni tih hi hai rual a ni a. Engvangin nge he lamah hian harsatna kan tawh a, tih lam chu hawl thui lo mai i la. Engpawhnise, mizo naupangte hian hna thawh tur leh thawk tura inbuatsaihna kawngah hian kaihhruaina hi kan dawng chhe deuh em aw a tih theih a, Hei hi tunlaia khawtlanga kan harsatna lian tak mai hringtu hi a ni thei angem tih hi ngaihtuah tham tak a ni.
Sorkar hna hrang hrang, private hna hrang hrang thawh tur a awm a. Miin eng hna nge a thawh ang tih hi uluk taka ngaihtuah angai a. Doctor hna a tha, Engineer hna a tha tih vang ngawta, doctor leh engineer nih tum hi thil tha ber a ni lem lo ang. Kha hna a tui tak leh, inpe tak tak tur nih loh chuan. Eng hna nge kan thawh ang tih hi ti zawng hian i lo ngaituah tlang dawn teh ang u hmiang.
1. Mahni Inhriatchian:
Mahni inhriat chian a pawimawh khawp mai. Ka hnathawh chak kha engvanga thawk chak nge ka nih. Ka tuina zawng a nih vang a ni em?. ka tuina zawngah khan thiamna leh theihna ka nei em? Talent neih ve miahlohna lam hi tui ve vak theih tho a ni. Mahni tui zawng leh thiam zawng hriat chian a ngai khawp mai. kan tuizawng leh theih zawng, thiam zawng hna thlang thiam thei turin mahni inhriat chian a pawimawh a ni.
2. Chhungkaw dinhmun hriatchian:
Hnathawh tur thlan dawnin chhungkaw dinhmun hriatchian a tul hle. He hna hi thawk dawn ila, kan chhungkaw dinhmun nen a inmil em?. Tin, kan hnawthawh tuma thawk tura eng subject emaw kan zirin, chung zirna chu kan chhungkaw sum dinhmunin a tum phak angem? tihte pawh ngaihtuah tel a tha hle bawk.
3. A tle a piang hi rangkachak a ni lo:
Miin hna tha leh hlawk an sawi hi awh ve kher loh tur. Kan thawh tur chi a ni vek kher lo thei, Thenawm pain, engineer a zir a, zir ve ngawt a.Ti tha vak mangloin zir zo ve mai a, hna tha tak tak thawh tur hmuh loh a, um khawh ral a awm thei. A langsar leh that hmel zawng zawng hi kan tan a tha vek vek kher lo.
4. Thiam bik neih tur:
Eng thil emaw thiam bik neih tur a ni. Kan lehkha zirnaah pawh, kan subject chu thiam em em khawpa zir tawp mai tur a ni. Thiam bik nei, thiam na na na chuan thawh tur hmuh loh a awm lo a. Hna tha tak thawh tur a awm reng a ni.
5. Beidawn mai mai loh tur:
Zirna kawngah te, hna zawn kawngah te, kan thawh ve ngei tur ang hna nia kan ngaih pawh hmuh mai loh a awm thei. Competitive Exam lam bei tan, tlin mai loh pawh a awm thei a, hna tha hmuh mai loh pawh a awm thei. Beidawn mai loh a, beih fat fat tur a ni. A tei rei peih a paing hi a hlawh tlinga te an lo nia.
6. Sawrkar hna chauh beisei loh tur a ni:
Sorkar hna hi hmuh mai mai theih a ni lo a, sawrkar hna hmuh loha hna thawka in ngai lo a, ngaih thrat tlat lohna rilru-ang hi neih loh tur a ni. Sawi zui tur a tam a, duhtawk phawt ang.
7. Thawh hreh neih loh tur:
Mitin mai hian ropui taka bul tran nghal kan tum ta mai emaw tih tur a ni. Hna ropui taka bul tran chu mi tlem te an ni. Eng hna pawh hi thawh hreh loh tur a ni. Bul tanna hnaimte atangin mi tam tak an hlawh tling tawh, en reng tur a ni.
8. Mi dangte hnen atanga zir:
Keimahni dinhmun anga lo ding tawh thin, mi tam tak an lo hlawhtling tawh. keimahni dinhmun aia chhe zawk dinhmun a ding pawh an ding chhuak tawh. Chung mite chu en tur a ni, an hnen atanga zirtur a ni.
9. Pathiana in nghah:
Zirlai kan ni emaw, hna zawng mek kan ni emaw, Pathianah in nghah phawt mai tur a ni. Sam 37 na pumpui te hi kan nun kaihhruaituah hmang ila. Kan innghahna hi Pathian ni se, hna tha tak min hmuh pui ang.
Sawi tur a tam mai a, a tlangpui, tawite tein kan tarlang a. Remchang dangah kan sawi zui zel anga. Engpawhnise, Mahni inrintawkna hloh miahloh tur a ni tiin khar phawt mai ang.
Tags
Mizo