Independent Country (Mizoram)

Lta Chhakchhuak

BRITISH LOLAN VAWI 1- NA 

British ngaimawh khawpa Mizote chetna hmasa ber chu 1847 kuma Syhlet leh a chhehvel mite an run kha a ni a. Mi 150 lai an that a. 1849 ah Phaizawl vela awm an run leh bawk a, mi 29 an that leh a, mi 42 sal ah an man nghe nge!

Hetia Mizote'n India ram huamchhung an run thin avang hian India awptu British chungah Phaizawl awm ho an vui a, Mizote zilh turin 1850- ah Colonel Lyster-a hovin sipai 235 chu Mizoram anlo lut a. Mizo Lal thenkhat an zilh a. Rei rial lovin an kir leh thuai a ni!

BRITISH LOLAN VAWI 2- NA 

Mizo Lalte chu hetia British hovin an zilh avang hian an ral beih an tawp mai mai hauh lova! Ni 23, January 1871 ah Silchar phaizawl a Alexandrapore thingpui huan an run leh a; chutah chuan James Winchester an that a, a fanu kum 6 mi Mary Winchester an man bawk a! Ahnu ah Sailam Lal Bengkhuaia chuan a enkawl zui. Tin, hemi tum vek hian Anierkhal an run bawk a, mi 23 an that a, mi 37 sal ah an man nghe nghe bawk!

MNF Army In Mizoram

Hei hian India rama awm British mai nilo British ram ngeia British Parliament ngei beng a thleng tawh thung! Parliament chuan diplomacy hmanga laklet leh dan tur a rel a. A theih ngangloh chuan sipai chakna hman nise tiin, a bawhzuitu atan India ram awptu British Viceroy kutah dah ani bawk.

Tichuan, January 1872 ah British sipaite chuan Mizoram an lo lut a. Hetih hunlai a Mizoram an sawina hming chu "Chin Lushai Land" tih a ni a, a hming dangah "Howlong/Kookee" tih ani bawk! [Zoram A Tap, C. Zama. 1st Impression: 2008. Printed at Zorin Compugraphics. Page. 1-2 ]

Hetia anlo kal tum hian Mizote khan khaw hrang hrang ah danbeh lo tum mahse ralthuam tha zawk nei na na chu an hneh zo lova, Mary Winchester(Zoluti) chu an lakir leh thei ta a. Chhinchhiah tlak zet erawh, ahma ang thovin Mary Winchester chhanchhuaktu British te hi Mizoram ah rei pawh cham lovin an kirleh nghal a ni!

BRITISH LOLAN VAWI 3- NA 

Mahse Mizoten phaizawl rama India mite an beih anla simloh fo avangin 1887- ah Mizoram pumpui chu awp law law turin anlo kal nawnleh ta a! Mizo Lal te nen an inbei nasa hle a. Kum 5 zet British sipai te nen an inchapchar hnu ah kum 1892- chuan Mizo Lal te chu an thuhnuai ah an dah thei ta tawk a ni!

Hetia India ram leh Mizoram te British hnuaia an awmlai ngei hian War World 2 alo thleng a. Mizo thalai tam tak pawh an kal ve nghe nghe. A tawp ah British leh a tanrualpui te chu hnehtu anlo nih tak avangin India ram leh Mizoram chu thlahzalen an tum zui ta bawk a ni.

Hetia British-sawrkarnain Mizoram chhuahsan a tumlai hian Mizoram, British awp hma renga Independent Country chu a awmdan tur ah thurel ngai niin an hria a. Hetih lai Lushai Hills District awptu Superintendent chu L.L. Peter a ni a. Tin, hetih lai veka Political Party anga awm pawl lian pahnih chu Mizo Union leh U.MF.O (United Mizo Freedom Organisation) an ni a. Mizo Union chuan India sawrkar zawm a sawi mawi hle a. U.M.F.O ve thung chuan Burma zawm an sawi mawi ve thung!

Engpawhnise L.L.Peter chuan Mizoram awmdan tur chungchang rel turin ni 14.8.1947 ah Aizawl ah mizo mi pawimawh ho a kohkhawm a; chung zingah chuan Mizo Union aiawh 13, Independent aiawh 5, Lal aiawh 5, Zalen aiawh 15, Sipai pension aiawh 3, Sawrkar hnathawk 2, MHT(MHIP ni ta) aiawh 3, Pastor 3 leh Tirhkoh 1 te an ni a. Chairman chu L.L. Peter a ni nghal bawk!

An Thurel Te:

1. Lushai te chu tunhnua an inenkawl chungchang ah Constitution leh District rules, Indian Independence Bill No. 7 subsection 2 - na ah a awmloh avangin Mizoram chu Pakistan emaw Burma rama a beh tir phal leh phalloh Assam Governor-in ziaka a sawi chian hi a tul a ni!

2. Lushai te hi Indian Union a an luh dawn chuan hengte hi an thil ngiat te an ni;

~ An hnam dan bik leh an ram luah chhung enkawlna leh a dangte tuna a awm anga vawn himsak zel an ni tur ani.

~ Chin Hills Regulation, 1892 leh Bengal Eastern Frontier Regulation 1873 dan hi District Council emaw a tlukpui rorelnaah emaw heng hi a tul tawh love an tih hma chuan hman zui zel ni rawh se.

3. Kum sawm a ral hnuah Lushai ten India ram atanga inlakchhuah an duh chuan phalsak an ni tur ani.

( Hei hi Superintendent L.L.Peter Lushai Hills leh Assistant Superintendent Sainghinga Lushai Hills ten hming an ziak a. Nimahsela Superintendent hian an thurel hi Memorandum anga a ziak a ni a, Assam Governor hnenah an thehlut ngei ani tih copy hmuh a nilo! )

Tichuan, India chu British sawrkarin a chhuahsan a, chutiangin Mizoram pawh! Nimahsela Mizoram chu India sawrkar hnuaia enkawl ani zui ta thung a! Lushai Hills District Act 1954L 18 of 1954 angin India president chuan ni 19.4.1954 atangin Mizo District tiin a hming a siam sak a ni!

PRIME MINISTER HNENA LEHKHATHAWN

Hetia India hnuaia Mizoram alo awm takah chuan a Mizo Union chuan Mizoram chu political party angin a hruai a. Nimahsela 1959 kumah 'Mautam Tam' alo thleng chu namen lovin Mizoram chu a tam ta mai a. India sawrkar chuan puih a hnekin a enliam titih zel mai si a. Chumi avang chuan mipui lungawilo chuan Mizo National Famine Front(MNFF) 1960 ah an din a. An tum chu India sawrkar beng hriata auchhuah a ni. Rei erawh a ding lo. Mahse party angin din zui rem an ti a, a hming a hma ami 'Famine' kha paihin 'MNF(Mizo Nation Front)' angin an dingleh ta a. An tum chu, Britishin Mizoram a awp hmaa Mizo te right dik tak INDEPENDENT COUNTRY nihna kha neihlet leh a ni!

Tichuan MNF chuan Memorandum ni 30, October, 1965 ah Prime Minister tan ziakin an thawn ta a. Chung te chu ziaklan vek duh mah ila Mizoram chanvo dik tak an ziak zinga pahnih khat chauh tarlang teh ang;

......Constitution Act of 1935- in British India chu dinhmun a han siamsak takah khan British chuan Mizote chu hnam hrang kan nih zia hriain an Constitution siam thar huangchhung ah chuan khung ve ta lovin sawrkar order 1936 kuma chhuah chuan Mizoram chu EXCLUDED AREA niin a puang ta a ni!

.....Politics lama an la puitlin loh avang te, an tunhnu awmdan tur an chhut thiamloh avangtein Mizo Union, chutihlaia political pawl lian ber aiawhtute leh Mizo hruaitu lar deuh sawmnga thlan chhuahte chuan sakhaw lam hruaitute leh khawtlang hruaitute tiama an duh dan chu sawrkarah an thlen a. India ram a telve chu tiamkam awmin anlo thlang ta a ni. Chuta thildangte bakah an phut an ziahlan chu; 'Mizo(Lushai) te chuan an duh chuan a tlem ber ah kum 10 hnuah India an chhuahsan leh phalsak an ni tur a ni......adt

Sd/- Lianzuala

General Secretary

Mizo National Front

Sd/- Laldenga

President

Mizo National Front

Dated 30th October, 1965

'Excluded Area' awmzia chu India sawrkar chhunga state hrang hrang dan siam te lekkawh thuhla ah Mizoram chu a huam velo, tihna a ni ber a. Hei hi achhan chu British khan Lushai Hills te hi ram neitu kan nihna kawngah te, kan sakhuana leh kan hnam thiltih engkimah min khapna engmah nei lovin min zahsak zawk em em a. Assam Legislature - in 'excluded areas' tia Lushai Hills mai bakah Assam Hills tlang dunga 'partly excluded areas' a tihte ho pawh Indian Constitution huang pawn nisi a keimahnia thuneihna chu 'official' taka han form thlip thlep a awmlo bawk niin a hriat nghe nghe!

Anihna takah chuan British ho khan Lushai hills tan hian kan zalenna dan tur thil thatak 'Coupland Plan' tih an siam nghe nghe a. Hei hi Indian Nation Congress khan a duhlo em em niin tun thleng hian Civil Service exam ten an Indian constitutional essay note ah anla ziak lang fo nghe nghe a ni!

Hetiang lova sawidan pawh hi controversy a awm a. Heti em em a Assam Hills a cheng Lushai Hills te tana British- in dan alo siam sak tihdanglam phet tumna leh tihbo tum titih a chanchin a than fo bawk avangin he 'kum 10 hnua kan chhuah zalen theihna' thuthlung te pawh hi tihbo luih emaw thup anih hmel ber ani! Sawi tak angin, achhan chu Indian National Congress hian Assam Hills dunga British dan lo siam te kha a do nasa hle thin a ni!

MIZORAM AWPBEH TUMNA RAPTHLAK

Engpawh nisela, hetia memorandum awmze nei taka an thawn hnuah pawh Central ngeng a chhunlo nge President emaw Prime Minister thu leh hla reng reng an dawng thei lo. Kumthar ni 19, January 1966 ah Planning Commission Member Tarlok Singh chu Aizawl ah arawn kal ta a. MNF party te nen an inhmu a. An intha then ve mai a. Mahse ni 2, February ah Commission H.V. Pataskar alo kalleh a. An thu a inhmu tawh meuhlo!

A haw hnulawk ah Assam sawrkar chuan mizo mipuite run tur leh awpbet turin 18th Battalion Assam rifle chu Mizoram ah arawn tir ta mai a! Laldenga'n Assam Chief Minister B.P Chaliha hnenah sipaite kohkir tura a ngen pawn a kohkir duh silo!

MNF Flag

Hei hian Independence Movement an kalpui lai a tih thuanawp MNF chuan a hauh avangin mi 62 hming sign hnanin March ni 1, 1966 chu Independence Day ah puan atan a rel thlu ve ta nghal a. Heta hming sign hnan Independence declaration na tur ami te hi 'Independence Signatories' an ti!

(Hnam indona hi hmasang ata Bible a kan en chuan Thlarau indona hi anilo theilo a sin! Christian/ringtu kan nih atang a rei vak lovah aram pum huapa rawk kan ni kha ngaihdan dang vak a leng lo, Thlarau indona mai lo chu.)

Tichuan March ni 1 zing dar 12 leh tlem a rik chiah chuan Independence chu Mizoramin a puang ta nghal rap mai a. Hmun hrang hrang a vai sipai te tukdawl an ni nghal bawk a. Aizawl a awm Assam rifle te pawh chu Mizo Independent Volunteer te chuan an hnehchhuh nghal a. Chuveleh Assam sawrkar chuan Thlawhtheihna rawn tirin Aizawl Assam rifle hnehchhuh sa chu arawn sài ta chiam a. Bomb te thlakin Aizawl khawpui chu a khu alh puat puat a! Aizawl mai nilo Tlabung, Sangau, Hnahlan leh Khawzawl ah te, Bunghmunah te bomb a thlak a. Mizoram chu India-in Independent pe duh lovin a chakna thahruiin awpbeh luih nan Sipai leh Bomb hmangin a run ta chiam chiam mai! He bomb a run chanchin lungchhiatthlak tak hi la hre pha te rengin India sawrkar hi an ngaidamleh thei tak ang maw!

Tichuan Mizo thalai leh pa te chu Independent Volunteer ah an inpe nghal a. Chutiangin lehkhathiam tam tak an inpe nghal bawk a.Sawrkar hna ah te an bang a. Mizo hnam chhanchhuah nan an rammu ta hlawm a ni! Chutia Mizo independent duha Volunteer ten an silai tunga remna an siamleh hma zawng khan, India sawrkar sipai chuan dimna leh hmangaihna tel hauh lovin ama ram ningai hauhlo chu a run a, nu nau an that a, nu leh nula tam tak an pawngsual a, pa tam tak an kaphlum a. Mizo history a history rapthlak ber leh Mizo hnam hmuhsitna lian tak chu sernung angin anlo hnutchhiah ta ani!

MNF Army

Mizo te hi Mizoram a cheng kan ni a. Tuma ram ah kan awm lova. Kan ram ah, kan pipute zawn hmuh ram ah kan awm a. An thisen an luanral tawhna ram ah kan awm a. Miten anla neihloh ram ah kan lut a. Kan Kannaan ram ani a! Hindu leh Buddhism a kan pil hmain Zion thu ropui kan hmu hman hlauh va! Mahse kan zalenna leh mahni ram hum zo lovin Hindu sawrkarna ram India chuan min hnehchhuh a tum a. Rallak angin min la a. Hnam ropui tak pipute ram ah ngei hian Bomb leh silai nen mizo hnam an that zawih zawih a! Rapthlak takin an liam leh a! Tunah India vek chuan a hnam chhinchhia nan leh a ram chhung mite tan chhinchhiahna UID a siamleh a. Min nawr lui a. Athenin kanlo sawi mawi vel a maw! He ram hi India ram ani lova, min hnehchhuha min laksak ram hi atir ata kan ram a ni a. India mi kan ni ngai lova. India kan nilo! Kan pipute 'kanaan ram' hi India ta a nilo! India mite kan nilo a sin! A chhinchhiahna pawh kan pu tur anilo zawk a sin! Harh ila, kan pipute Kanaan Ram hi i tungding leh zawk teh ang u! Heilo ram dang kan neilo! Bawhchhetu India sawrkar chi leh kuang kan nilo a sin! Zoram Thar i dinleh ang u! Independent Country, kan hmuhchhuah ram ngei hi i independent puileh ang u! Independence tur chuan economics ah buai hlau suh; khati zah kan thlahtuten anlo luah tawh ah khan keini thangthar mithiam zawkte phei hi chuan kan tâm kan ring em ni! Zoram, ka ram a ni!

Zoram Thar i dinleh ang aw...?

[ Reference ]

~ Hri Dai Theu, C. Vanlallawma

~ Zoram A Tap, C.Zama

~ Lungphang Lo La, L.Keivom