Inpawl tangkaina (Benefit of sexual intercourse)

Dr. C. Lalrampana

Hriat hmasak tur - sex education kan sawi dawn avangin tawngkam a ngial a ngana hman tulna laiah hman a ni a; kan sawi tum a chian zãwk nan leh hriat thiam a awlsam zawk nana tih a nih avangin chhiartute'n min lo hrethiam hram dawn nia. 

A KAMKEUNA:

Mihring chithlahna atana pawimawh ēm ēm, mipa leh hmeichia, nupa rem tihtawnna atanga inpãwl (inlūk) hi tawngkam mawihawih zawnga sawi nan  mipat hmeichhiat hmanna  titein kan sawi kual  duah thin. Mahse, he tawngkam ai  hiian  inlû emaw inpãwl  tih tawngkam hian a nihna tak a kãwk dik zaw mah niin a lang. Saptawngin  sexual intercourse or to copulate  tih emaw a ni thei awm e. Engpawhnise, Pathianin Evi leh Adama A siam atang khan he inkungkaihna thūk leh ril tak hi Pathianin mihringah A lo dah tawh a ni. (Gen. 1:27)

INPÃWL TULNA CHHAN :

Inpãwl hi mihring nuna thil tūl leh bet tlat, chithlah thutiam hlawhtlinna bul a ni. Nupa inkarah a nih loh chuan hman mai mai tur a ni  lo. Chithlah nan erawh hman ngei ngei tur a ni a; nupa remtihtawnna angzia zelin uluk tak leh khūmkhãn taka inpãwl thin tur a ni a, hlawhtling taka chithlah hlawhtlin ngei tum bawk tur a ni. Chithlah nana hmanraw tha a nih rual rualin mihringa inpãwl chãkna  (emotional feeling/sexual desire) phuhrūkna pawimawh tak a ni bawk. 

Chithlahna hmanraw pawimawh tak a nih avangn kan thlahtu Evi & Adamate inpãwl atangin chhiarsênloh khawpa tam mihring kan lo pun phah ta a. Chutiangin, nungcha tinrengte pawh an lo inthlahpung ta a ni. Chuvangin, inpãwl chu thil tul tak a ni tih a chiang hle.

HMAN DUHDAH LOH TUR :

Chithlahna atan a hun taka inpãwl thin tur a nih angin tul  lovah hur leh lêr kawh nana inpãwl mai mai loh tur a ni. Bible-ah  chuan  Juda chuan Onana hnenaha ū a thih hnuah a ū tana chi a thlahsak theih nan a ù nupui thihsan chu pãwl thin turin a hrilh a. 

Tin, Juda chuan Onana hnênah, "I u nupui chu pâwl la, pasalte unau tih tûr chu tihsak la, i u tân chuan chi thlahsak rawh ," a ti a.

Tin, Onana chuan chi thlah tûr chu ama thlah a ni dâwn lo tih a hria a; tichuan, heti hi a ni a, a u nupui a pâwl apiangin, a u tân chi a thlahsak lohna tûrin leiah chuan a titla thîn a  . (Genesis 38:8-9).

Onana hian inpãwl nawmna chu thlahlel takin a ù nupui thihsan chu a pãwl thin a, mahse, a ù nupui serh chhungah chuan a bãw (semen) chu ti tla duh lovin a phawi chhuak a, leiah a titla thin a. Condom (CD)lei tur an la zuar lo a ni mahna.  Chithlahsak duh si lova tisa chãkna leh nawmna chauh ùma a khawsakna chu Pathian mithmuha thil tenawm tak a nih avangin Pathianin Onana chu a tihlum ta a ni.

Tin, a thiltih dân chu LALPA mithmuhah chuan sual tak a ni a: tichuan ani pawh chu a tihlum ta a. (Gen. 38:10 )

Onana thih dan hi a rapthlak hle. Chawplehchilhin a thil tihsual man a têl a ni. Chuvangin, nupuia i neih duh loh nula kah rãi mai mai te, sãwn thlãk hlauh vanga CD hmanga mi nù, nuthlawi, nula pãwla inhrikthlåk chin te, zang/chhu hrawt (masturbation) chin dawklakte hi Pathian duh loh zãwng a ni tih hria ang che.

Tin, hmeichhe thenkhat pawh inrãi luihtir tuma mipa zar buai chingte pawh an awm ve chãwk bawk. Sim hmiah tum ang che.

INPÃWL HUN THA CHU? 

Nupa tan inpãwl hun tha hriat a pawimawh hle. Inpãwl nan zãn mut tirh leh zanlai hun aiin zing dar 6:00am-7:00am hi hun tha bera ngaih a ni. Zingkarah hian chåkna a inkhãwlkhãwm tha a, nãute siam nan pawh hun tha leh duhawm bera ngaih a ni.

Fa nei thei lawk lo tãn phei chuan inpãwl hian duhdah taka namnūla nawr liam mai mai tur a ni lo. A vãwrtãwp (orgasm)  thlen rual thlap thlap hi fa neih awlsamna ber a ni tih hria ang che.

INPÃWL HLAWKNA CHU? 

Inpãwl hi thil ho mai mai leh duhdah taka lak chi a ni lova, chãkna hrikthlãkna satliah mai a ni hek lo. Chuvangin, inpãwl hi mihring tan hriselna thlen theitu pawimawh tak a nih ve theih avangin chungte chu engtenge i lo en chhin teh ang.

 1. Immune System thuam chaktu : Inpãwl thang mihring chuan inpãwl ve ngai lo ai chuan taksaa natna hrik lo dotu cell a nei tha zawk nia ngaih a ni. Covid-19 dolet nan pawh a tangkai viau mai thei. Kar khatah vawi hnih tal inpãwl hian immune system a tichak theia ngaih a ni. Hetih rual hian  ei leh in tha  leh inbūk tãwk (balance diet) ei reng a, mutthilh tama insawizawi that reng a pawimawh tih hriat reng tur a ni..

2. Thathona a tipung: Inpãwl hian thathona a thlen a, rilru a tizãngkhaiin mi a ti nula/tlangval rei thei.  Lauren Streicher, MD.  assistant clinical professor of obstetrics & gynecology  Northwestern University’s Feinberg School of Medicine, Chicago-in a sawi danin hmeichhe serh nãl leh tuihnang awm thattirtu ber chu inpãwl niin chãkna a phuhrūk hma bik thin niin a sawi.

3.  Phing thunununtu: Inpãwl hian kumkuruh kãu tha thei lote a siam tha thei a hmeichhia za zela 30% hian hetiang lama harsatna hi an tãwk tlangpui thin. Chuchuan phing (bladder) lamah nghawng tha lo a nei thei a, chuvangin, phing chevel leh kumkuruh kãu tha tura thununtu tha tak a ni thei.

4. Thisen a tihniam thei :  Joseph J. Pinzone, MD.  CEO , medical director of Amai Wellness sawi danin inpãwl hian thisen sãng a titlahniam thei a, inpåwl hmain BP tehin inpãwl zawha finfiah leh theih a ni. Mahse, inhrawt  (masturbation) erawh a tha lo a ti. Hei hi a tak ngeia finfiah leh rintlãk nia a tarlan ngam a ni. systolic blood pressure a tihniam thei a ni a ti.

5. Insawizawina tha tak a ni : Inpãwl hi insãwizawina tha tak a ni thei. Inpãwl laia taksa tan mar zawng hian lungin thisen a pe chhuak thaa tihrãwl a tichak zual sauh a, hriselna a thlen thin a ni. A hranpaa insawizawi nachang hre lo leh peih lo tan pawh a tãwk chauha inpãwl thin hi insãwizawina tha tak a ni thei. 

6. Lung phu (Heart rate) siam thatu a ni : Inpãwl hian lunga thisen inpekual vel chu a tikal tha a, chu chuan lungphu a siam tha thei. Mipa phei chu a lungphu a tawp dawn hian a zang a tlum lūt vek thin a, hei hi finfiahsaka pawh chhuahsak leh vat theih chuan chhanchhuah theih a ni thin. Chuvangin, inpãwl hi thil narãn a ni lova mihring hriselna atana Pathian ruahman a ni. Mithiamte chhūt dan phei chuan mipa bikah kartin vawi hnih tal inpãwlna hun hmang thinte hian lungphu chãwla thihna 50% vel an pumpelh thei niin an sawi.

7. Nachhãwkna tha tak a ni : Inpãwl hi aspirin leh nachhãwkna (paracetamol) ei vak vak thin ai chuan nachhãwkna tha tak a ni thei.  Thana, ruhseh, hnunzãng na, kena leh lunate hi inpãwl hian a chhãwk zãngkhai thei a; hmeichhe thi nei tha thei lote leh taksa kham na ut utte hi hmeichhe serh fawk thatho hian tam tak a chhãwk theia ngaih a ni.

8.  Prostate cancer vengtu :  Mipa bãw (semen) tuihnãng siam chhuaktu gland chi khat prostate hi a cancer duh hle a, hemi vêng tur hian inpãwl hi hmanraw tha tak a ni thei. Chuvangin, prostate cancer pumpelh tur chuan inpãwl ve fo a pawi mawh thin. 

9. Muttuina thlentu :  Inpãwla a vãwrtawp (orgasm) han thlen dun hnãp maite hi a nuam satliah mai ni lovin muhil tha thei lo thin tan pawh mutchhuak a siam a, tui taka muthilh seng sengna a ni thei a mutna damdawi alprazolam ei ai chuan taksain a ngeih zawk.

10. Rimna damdawi :  Taksa rim leh hah lutuk (stress) leh rilru hah lutuk (anxiety) chhãwk zángkhãi nan inpãwl hi damdawi tha tak a ni thei. Inngaihtuah ngut ngutna lak ata fihlim i duh chuan i kawppui bulah awm la, a pangti i nghena i zût vel ringawt pawhin i nguina tam tak a chhãwk thei che tih hriain i tum chu puitlinpui thin rawh.

A TLÃNGKAWMNA :

Inpãwl tangkaina sawi tur tam tak a la awm thei a, sawi kim sen a ni lo. Tin, inpãwl hi thil naran a ni lova, duhdah taka hman tur a ni hek lo. Inuirēna atan phei chuan hman hauh tur  a ni.  Nupa inkãrah chauh hman tur a nih laiin insûm harsa tak a ni a, inngaihzãwn avang te, awmherh leh hur herh avang hrim hrim te, intihveina avamg te, hmelthat luat avangtein inpãwlna hi thleng thei a ni a i insüm thei lo a nih pawhin india ramah HIV/AIIDS vei tam lamah pakhatna kan nih mêk avangin a vei lo ngei pãwl tum la, CD hman hi Pathian duhdan a nih loh rualin invênna hmanraw awmchhun a nih avangin hman tum hram hram la,  kawrchung chhana hnung thak hiah ang maia i ngai a nih pawhin hmeichhe rãi theih loh hun lai ngaihtuahin pãwl tum la, hmeichhia i nih pawhin rãi i duh loh chuan i rãi theih loh hun chhung hre chiangin dawh thla thin ang che. 

Inpãwl hi tha hle mah se, a lutuk chu a tha lova kartin v1 emaw v2  emaw hi nupa tãn a tãwk viau. Tin, inpãwl dawnin inbualfai ngei ngei a tha a, inbual hman loh thulhah erawh serh fai taka silfai ngei ngei tur. Inpãwl zawh apiangin iinsilfai leh thlap zel bawk tur. A theih hrãm chuan inpãwl hma leh inpãwl zawh  minute 10 hnūah tui thianghlim litre ½ tal in thin tur a ni. Hei bãkah hian ei tur tha, thlai rah leh thei hrisel ei tam a pawimawh hle tih hte reng ang che..